約翰福音 8
8
1毋拘耶穌去橄欖山。
2隔日透早，耶穌閣去聖殿。民眾攏倚來伊遐，伊就坐落去給𪜶教示。 3彼時經學教師及法利賽派的人導一個婦仁人來，伊啲犯姦淫的時互人掠著。𪜶互伊徛佇中央， 4問耶穌講：「老師，此個查某人犯姦淫的時互人掠著。 5根據律法，摩西命令咱著用石頭抌死此款查某人。你有什麼意見？」 6𪜶按呢講是欲試探耶穌，通尋孔縫給伊告。耶穌踞落去，用指頭仔佇土腳寫字。
7𪜶直直給伊問，耶穌就徛起來，對𪜶講：「恁中間無罪的人先提石頭給伊抌。」 8然後伊閣踞落去佇土腳寫字。 9𪜶一下聽著諸個話，對老的開始一個一個溜出去，賰耶穌一個，彼個婦仁人猶徛佇遐。 10耶穌徛起來，給伊講：「婦仁人，𪜶佇叨位？無人給你定罪是無？」
11伊應講：「先生，無。」
耶穌講：「我嘛無給你定罪。你轉去，以後毋通閣犯罪。」}
耶穌是世間的光
12耶穌閣給眾人講：「我是世間的光；隨我的人𣍐佇烏暗中生活，反轉有活命的光。」
13法利賽派的人就對伊講：「你啲為家己作證，你的見證無效。」
14耶穌應講：「雖然我為家己作證，我的見證有效，因為我知我對叨位來，欲去叨位；毋拘恁毋知我對叨位來，欲去叨位。 15恁用人的標準批判人，我無給人批判。 16我若批判，我的判斷正確，因為我毋是家己一個啲判斷，是差我的父及我做夥判斷。 17閣恁的律法有記載，有兩個人作證，𪜶的見證才有效。 18我為家己作證，差我的父嘛為我作證。」
19𪜶就問耶穌：「你的父佇叨位？」
耶穌應講：「恁毋識我，嘛毋識我的父。恁若識我，嘛會識我的父。」
20諸個話是耶穌佇聖殿教示人的時，佇囥奉獻櫃遐講的。不過無人給伊掠，因為伊的時猶未到。
我去的所在，恁𣍐當去
21耶穌閣給𪜶講：「我欲離開啦。恁會尋我，毋拘恁會因為家己的罪來死；我去的所在，恁𣍐當去。」
22 猶太教的領袖講：「伊講『我去的所在，恁𣍐當去』，豈講伊欲去自殺？」
23耶穌給𪜶講：「恁對下面來，我對頂面來。恁屬此世間，我無屬此世間。 24所以我才給恁講恁會因為家己的罪來死；因為恁若毋信我就是『自有永有』彼位，恁會因為家己的罪來死。」
25𪜶就問耶穌：「你是什麼人？」
耶穌應講：「我對起頭就給恁講啦。 26關係恁，我有真多通講，通定罪。毋拘差我彼位是真實，我將對伊聽著的傳互世間人。」
27𪜶無了解耶穌是啲對𪜶講父的代誌。 28所以耶穌給𪜶講：「恁舉起人子了後就會知，我就是『自有永有』彼位，閣我做代誌無一項是照我家己的意思，只有照父教示我的來講。 29差我彼位及我同在；伊毋曾放我家己一個，因為我不時啲做伊所歡喜的代誌。」
30耶穌講諸個話的時，有真多人信伊。
真理互恁有自由
31耶穌對信伊許個猶太人講：「恁若繼續遵守我的話，就實在是我的門徒； 32恁會識真理，真理會互恁得著自由。」
33𪜶應講：「阮是亞伯拉罕的子孫，毋曾做人的奴隸。你哪會講『恁會得著自由』？」
34耶穌給𪜶講：「我實實在在給恁講，逐個犯罪的人就是罪的奴隸。 35奴隸無永遠屬佇主人的家庭，子就永遠有。 36所以，上帝的子若互恁自由，恁就實在有自由。 37我知恁是亞伯拉罕的子孫；毋拘恁想欲刣我，因為恁毋接受我的話。 38我是啲講對我的父遐看著的；恁是啲做對恁的父遐聽著的。」
恁的父是魔鬼
39𪜶應耶穌講：「阮的父是亞伯拉罕。」
耶穌對𪜶講：「恁若是亞伯拉罕的子孫，恁會做亞伯拉罕所做的代誌。 40現在我將對上帝聽著的真理給恁講，恁煞想欲刣我。亞伯拉罕並無做此款代誌。 41恁是啲做恁的父所做的代誌。」
𪜶應講：「阮毋是私生子；上帝是阮唯一的父。」
42耶穌就對𪜶講：「上帝若真正是恁的父，恁會疼我，因為我對上帝遐來，現在佇遮。我毋是照我家己的意思來，是上帝差遣我來。 43是按怎恁無明白我的話？是因為我的話恁聽𣍐入去。 44恁的父是魔鬼；恁干焦想欲實行恁的父的慾望。伊對起頭就是殺人犯，無遵守真理，因為伊的內面無真理。講白賊是伊的本性，因為伊是講白賊的，嘛是講白賊的人的父。 45因為我講真理，恁毋信我。 46恁中間什麼人會當指證我有罪？既然我講真理，是按怎恁毋信我？ 47屬上帝的人聽上帝的話；恁毋聽，因為恁毋是屬上帝。」
耶穌及亞伯拉罕
48 猶太教的領袖對耶穌講：「阮講你是撒馬利亞人，閣犯著鬼，豈毋著？」
49耶穌講：「我無犯著鬼；我尊敬我的父，恁卻無尊敬我。 50我無追求家己的榮光，不過有一位為著我追求，為著我裁決。 51我實實在在給恁講，遵守我的話的人一定永遠𣍐死。」
52 猶太教的領袖應講：「今阮確實知你犯著鬼。亞伯拉罕已經死，眾先知嘛死去，你哪講『遵守我的話的人永遠𣍐死』？ 53你豈比阮的父亞伯拉罕較偉大？伊已經死，眾先知嘛死去。你想你是啥人？」
54耶穌應講：「我若榮耀我家己，我的榮光就無價值。榮耀我的是我的父，就是恁講『伊是阮的上帝』彼位。 55恁毋識伊，毋拘我識伊。我若講我毋識伊，我就及恁仝款是白賊。毋拘我識伊，閣遵守伊的話。 56恁的父亞伯拉罕歡喜啲聽候我來臨的日子；伊有看著，看了真歡喜。」
57 猶太教的領袖對耶穌講：「你猶未五十歲，豈曾看著亞伯拉罕？」
58耶穌應講：「我實實在在給恁講，亞伯拉罕猶未出世，我已經存在。」
59𪜶就提石頭欲給伊抌；毋拘耶穌閃開，離開聖殿。
انتخاب شده:
約翰福音 8: TTVH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The Bible Society in Taiwan, 2021
