約翰福音 14
14
耶穌是道路、真理、活命
1耶穌閣講：「恁的心毋通著急不安。著信上帝，嘛著信我。 2佇我的父的厝有真多房間，我去是欲給恁準備所在。若毋是按呢，我𣍐給恁講此個代誌。 3我去給恁備辦所在了後，會閣來導恁去我遐；我佇遐，恁嘛會佇遐。 4我欲去的彼條路，恁知。」
5 多馬給耶穌講：「主啊，阮都毋知你欲去叨位，欲哪會知彼條路？」
6耶穌給伊講：「我就是道路、真理、活命。若毋是通過我，無人會當去父遐。 7恁若識我，嘛會識我的父。對今以後，恁識伊，因為恁已經有看見伊。」
8 腓力給耶穌講：「主啊，將父顯示互阮看，阮就滿足。」
9耶穌應講：「腓力，我及恁做夥即呢久，你猶毋識我噢？看見我，就是看見父。你哪會講『將父顯示互阮看』？ 10我佇父內面，父嘛佇我內面，你無信是無？我給恁講的話毋是出佇我家己，是𫢶佇我內面的父啲做伊家己的代誌。 11著信我佇父內面，父佇我內面；若無，嘛著因為我所做的代誌來信。 12我實實在在給恁講：信我的人會做我所做的事，甚至會做閣較大的，因為我欲去父遐。 13恁奉我的名無論求什麼，我一定會給恁做，通互父對子得著榮光。 14恁若奉我的名無論求什麼，我一定會給恁做。」
應允賜聖神
15「恁若疼我，就會遵守我的命令。 16我欲對父求，伊會賜恁另外一位慰助者，通及恁永遠同在。 17伊是真理的神，世間人𣍐當接受的，因為𪜶無看見伊，嘛毋識伊。毋拘恁識伊，因為伊及恁同在，會繼續佇恁內面。
18「我𣍐放恁做孤兒；我會閣倒轉來恁遮。 19閣無偌久，世間人𣍐閣看見我，不過恁會看見我，因為我活，恁嘛會活。 20到彼日，恁會知我佇我的父內面，恁佇我內面，我嘛佇恁內面。
21「接受我的命令閣遵守的就是疼我的人。疼我的，我的父會疼伊；我嘛會疼伊，閣將本身顯現互伊看。」
22 猶大 — 毋是彼個以斯加略 — 問耶穌：「主啊，是按怎你欲將本身對阮顯現，毋對世間人顯現？」
23耶穌應講：「疼我的人會遵守我的話。我的父會疼伊；我的父及我會來伊遐，及伊做夥住。 24無疼我的人𣍐遵守我的話。恁所聽見的毋是我家己的話，是差我來的父的話。
25「我猶及恁做夥的時，已經有將諸個話給恁講。 26毋拘慰助者，就是父用我的名欲差來的聖神，會將一切的代誌教示恁，嘛會互恁會記得我給恁講一切的話。
27「我將平安#14.27 「平安」嘛通譯做「和平」。留互恁；我將我的平安賜互恁。我賜互恁的及此世間啲互人的無仝款。恁的心毋通著急不安，嘛毋通驚惶。 28恁已經有聽見我給恁講：『我去，欲閣轉來恁遮。』恁若有疼我，會因為我欲去父遐來歡喜，因為父比我較大。 29今代誌猶未發生，我先給恁講，互恁佇代誌發生的時通信。 30我𣍐閣及恁講真多話，因為此世界的統治者啲來啦。伊絕對𣍐當對我做什麼， 31毋拘欲互世間人知我疼父，有照父的命令去做。
「起來，咱來去。」
انتخاب شده:
約翰福音 14: TTVH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The Bible Society in Taiwan, 2021
