約翰福音 10
10
羊椆的譬喻
1「我實實在在給恁講，欲入去羊椆，無對門入，對別所在𨃟過去的，是賊，是強盜。 2對門入去的才是羊的牧者。 3顧門的給牧者開門；羊會認得牧者的聲。伊給家己的羊一隻一隻叫名，導𪜶出來。 4伊導家己的羊出來了後，行佇羊的頭前，羊就隨伊行，因為會認得伊的聲。 5𪜶一定𣍐隨生份人，顛倒會走閃，因為𪜶毋識生份人的聲。」 6耶穌給𪜶講此個譬喻，毋拘𪜶毋知伊啲給𪜶講什麼。
耶穌是好的牧者
7所以，耶穌閣給𪜶講：「我實實在在給恁講，我是羊的門。 8所有比我較代先來的攏是賊，是強盜，羊𣍐聽𪜶。 9我是門；通過我此個門入來的，會安全，通出出入入，閣會尋著草埔。 10賊來，一定是欲偷掠，欲刣，欲毀滅。我來是欲互𪜶得著活命，得甲真豐盛。
11「我是好的牧者。好的牧者為著羊放拺性命。 12互人倩的毋是牧者，羊毋是家己的，伊一下看著豺狼來就給羊放啲，逃走；豺狼將羊咬去，給𪜶趕散。 13伊逃走，因為伊是互人倩的，無真正關心羊群。 14我是好的牧者；我識我家己的羊，我的羊嘛識我。 15親像父識我，我嘛識父。我為著羊放拺性命。 16我猶有其他的羊無屬此個羊椆；我嘛一定著導𪜶來。𪜶會聽我的聲，嘛會成做一群，歸屬一個牧者。
17「父疼我，因為我放拺家己的性命，通閣得著性命。 18無人搶我的性命，是我自願放拺。我有權放拺，嘛有權提轉來。這是我對父接受的命令。」
19因為耶穌所講諸個話，猶太人閣起分裂。 20𪜶中間有真多人講：「伊犯著鬼，精神失常，哪著聽伊的話？」
21另外有人講：「犯著鬼的人𣍐講諸個話。鬼豈會開失明的人的目睭？」
耶穌受棄拺
22 耶路撒冷抵啲慶祝獻殿節，彼時是冬天。 23耶穌佇聖殿的所羅門走廊啲行。 24猶太人給耶穌圍啲，對伊講：「你欲互阮猜疑偌久？你若是基督，著照實給阮講。」
25耶穌應講：「我已經有給恁講，恁毋信。我奉我的父的名所做的代誌啲為我作證。 26毋拘恁毋信，因為恁毋是我的羊。 27我的羊聽我的聲，我識𪜶，𪜶隨我。 28我賜𪜶永遠的活命；𪜶永遠𣍐滅亡；無人會對我的手給𪜶搶去。 29將羊賜互我的父比一切較偉大；無人會當給羊對父的手搶去。 30我及父是一個。」
31 猶太人閣提石頭欲給伊抌。 32耶穌對𪜶講：「父有叫我做真多好代誌，我攏有做互恁看，恁是為著叨一項欲用石頭給我抌？」
33 猶太人應講：「阮欲用石頭給你抌，毋是因為你做的好代誌，是因為你褻瀆上帝。你不過是人，猶久自稱做上帝。」
34耶穌講：「恁的律法豈毋是有記載『我講：恁是神』？ 35聖經的話永遠𣍐改變。既然上帝稱呼許個接受上帝的話的人做神， 36按呢，我是父分別作聖，閣差遣入世間的，是按怎我講『我是上帝的子』，恁就講我褻瀆上帝？ 37我若毋是啲做我的父的代誌，恁毋免信我； 38我若啲做父的代誌，雖然恁毋信我，嘛著信我所做的代誌，通互恁確實知父佇我內面，我佇父內面。」
39𪜶閣想欲給伊掠，伊就脫出𪜶的手離開。
40耶穌閣過去約旦河對岸，到較早約翰給人洗禮的所在，佇遐住。 41有真多人來見耶穌，講：「雖然約翰無行神跡，伊所講一切關係此個人的代誌攏確實。」 42佇遐有真多人信耶穌。
انتخاب شده:
約翰福音 10: TTVH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The Bible Society in Taiwan, 2021
