約翰福音 1
1
道成做人
1創世以前就有道，道及上帝同在，道是上帝。 2伊佇創世以前就及上帝同在。 3上帝通過伊創造萬有；一切被造的逐項攏是通過道來創造。 4佇伊內面有活命；此個活命是人類的光。 5此個光佇烏暗中啲照，烏暗毋曾贏過光。#1.5 「烏暗毋曾贏過光」嘛通譯做「烏暗毋接納光」。
6有上帝差來的一個人，名叫做約翰。 7此個人來是欲作證，為著光作證，欲互所有的人通過伊來信。 8伊本身毋是彼個光，是欲為著彼個光作證。 9有真的光進入世間來照全人類。#1.9 此節嘛通譯做「啲照全人類的真光來到世間。」
10伊佇世間；世間通過伊來創造，毋拘世間毋識伊。 11伊來到家己的所在，家己的人無接納伊。 12許個接納伊的，就是信伊的人，伊賜𪜶有權成做上帝的子兒。 13𪜶毋是對血統，毋是對肉慾，嘛毋是對查甫人的意念，是對上帝生的。
14道成做人，𫢶佇咱中間，充滿恩典及真理；阮有看見伊的榮耀，是天父獨一的子才有的榮耀。
15 約翰為著伊作證，喝講：「此位就是我曾給恁講的，伊佇我後面啲來，卻比我較大；因為我猶未出世，伊就存在。」
16對伊的豐富咱攏領受恩典，恩上加恩。 17律法通過摩西頒布；恩典及真理是通過耶穌基督來的。 18無人曾看見上帝，只有父心懷中獨一的子有給伊顯示出來。
施洗者約翰的見證
(太 3.1-12；可 1.1-8；路 3.1-18)
19以下是約翰的見證：耶路撒冷的猶太教當局派祭司及利未人去問約翰的時，講：「你是什麼人？」 20伊無拒絕回答，公開聲明「我毋是基督」。
21𪜶閣問伊：「若按呢，你是以利亞是無？」約翰應講：「我毋是。」
𪜶閣問：「你是彼位先知是無？」約翰應講：「毋是。」
22𪜶就給伊講：「按呢你是什麼人？請給阮講，互阮通回答派阮來的人。你講，到底你是什麼人？」
23 約翰引用先知以賽亞的話，講：
我就是佇曠野啲喝的聲，講：
著為主修直道路。
24許個人是法利賽派的人差來的。 25𪜶閣問約翰，講：「你若毋是基督，毋是以利亞，嘛毋是彼位先知，你是按怎給人洗禮？」
26 約翰應講：「我用水給人洗禮；毋拘有一位恁毋識的徛佇恁中間。 27伊佇我後面啲來，我連給伊解鞋帶都𣍐堪得。」
28諸個事佇約旦河東岸的伯大尼發生，約旦河就是約翰啲給人洗禮的所在。
上帝的羊羔
29隔日，約翰看著耶穌行倚來，就講：「恁看，上帝的羊羔，伊欲除去世間人的罪。 30關係伊的代誌，我曾給恁講，伊比我較慢來，總是比我較大，因為我猶未出世，伊就存在。 31我家己嘛毋識伊，毋拘我來用水給人洗禮，是欲互以色列人認識伊。」
32 約翰閣作證，講：「我有看著聖神親像粉鳥對天降落來，歇佇伊頂面。 33我家己嘛毋識伊，毋拘差我用水給人洗禮彼位上帝有對我講：『你看著聖神降落來歇佇伊頂面彼個，伊就是欲用聖神給人洗禮彼位。』 34我有看著，閣作證，此位就是上帝的子。」
耶穌呼召頭一批門徒
35隔日，約翰閣及伊兩個門徒徛佇遐； 36伊看著耶穌經過，就講：「恁看，上帝的羊羔！」
37此兩個門徒聽著伊按呢講，就去隨耶穌。 38耶穌越過來，看著𪜶啲隨伊，就問𪜶：「恁啲尋什麼？」
𪜶給伊講：「拉比，你住叨位？」拉比的意思是老師。
39耶穌給𪜶講：「恁來看！」𪜶就去看耶穌住的所在，彼日及伊做夥住。彼時大約下晡四點。
40聽約翰的話來隨耶穌彼兩人，一個是西門‧彼得的小弟安得烈。 41伊先去尋伊的兄哥西門，對伊講：「阮已經有抵著彌賽亞。」彌賽亞的意思是基督。 42伊就導西門去見耶穌。
耶穌注目給伊看，講：「你是約翰的子西門，我欲給你叫做磯法。」磯法及彼得像意思，就是石磐。
耶穌呼召腓力及拿但業
43隔日，耶穌決定欲去加利利。伊抵著腓力，對伊講：「來隨我！」 44腓力是伯賽大人，安得烈及彼得的同鄉。 45腓力抵著拿但業，對伊講：「摩西佇律法書所寫，以及先知所記載彼位，阮已經有抵著，就是約瑟的子拿撒勒人耶穌。」
46 拿但業應講：「拿撒勒彼款所在豈會出什麼好物？」
腓力給伊講：「你來看！」
47耶穌看著拿但業行倚來，就講：「恁看，伊是真正的以色列人，攏無虛假！」
48 拿但業問耶穌：「你哪會識我？」
耶穌給伊講：「腓力猶未叫你，我就看著你佇彼欉無花果樹腳。」
49 拿但業應講：「拉比，你是上帝的子！你是以色列的王！」
50耶穌應講：「因為我給你講我有看著你佇彼欉無花果樹腳，你就信噢？你會看著比這閣較大的事。」 51耶穌閣給伊講：「我實實在在給恁講，恁會看見天開，上帝的天使佇人子的身上上落往來。」
اکنون انتخاب شده:
約翰福音 1: TTVH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The Bible Society in Taiwan, 2021
