मत्ती 9

लखवा काजे वारू कोरनो

(मरकुस 2:1-12; लुका 5:17-26)

1ओवतेन येसु ढोंड्यामा चोळीन पोल धोळे गोयू, एने तेरा सोहोर आव्यु. 2एने देख, काहनास माणसे लखवा बिमारी वावा काजे खाटला पोर मेकीन तेरेनचा आव्या येसु तिंदरू भुरसू देखीन तिना लखवा बिमारी वावा काजे कोयू, “हे पुऱ्या हिंमत धोर तारो पाप माफ होय गोया.” 3देखू, इनापोरसी घोणा शास्त्री विचार कोऱ्या, “यु ते परमेश्वरोन बुराई कोरतेलू.” 4येसु तिंदरी मोनो मायली वाते जानीन कोयू “तुमु माणसे आपना-आपना मोनोमा भुंडा विचार काहा कोर रोया?” 5सुधो काय छे, यो कोयनो, “तारा पाप माफ होय गोया,” नीती यो कोयनो, “उठ एने चाल फिर?” 6बाकीन इनान कोरता कि तुमु जान लेयु कि माणसोन पुऱ्या काजे धोरती पोर पापोन माफी आपनेन होक छे तेत्यार चू लखवा बिमारी वावा काजे कोयू, “उठ तारो खाटलो चूट, एने तार घोर जात रोय.” 7चू उठीन तेरे घोर जात रोयू. 8माणसे यो देखीन नोवलाय गोया एने परमेश्वरोन महिमा कोरणे बाज गोया जू माणसो काजे यु होक आपलु छे.

येसुन मत्ती काजे बुलावनो

(मरकुस 2:13-17; लुका 5:27-32)

9चा गोथू ओगु जायीन येसु मत्ती नावोन एक माणसो काजे फावू लेनेन चोवकी पोर बोस रोयलु देख्यू, एने तिना काजे कोयू, “मारे पोछोव आवती रोय.” चू उठीन तेरे पोछोव आवती रोयू.

10जेतार चू घोरमा खाणेन कोरता बोश्यू ती घोना सोवटा फावू लेणे वावा एने पापी आवीन येसु एने तेरा चेला साते खाणो खाणे बोश्या. 11यो देखीन फरुशी तेरा चेला काजे कोयू, “तुमरु गुरु फावू लेणे वावा एने पापी साते काहा खातलू?” 12यो सोमवीन येसु तीनु काजे कोयू, “डाक्टर वारला आरेगलान कोरता नि बाकीन बिमारी वावान कोरता गोरोजोन छे. 13इनान कोरता तुमु जायीन एरू मतलब सिक लेवू मे बलिदान नि बाकीन दया मांगतलु काहाकि मे धोरमीन कोरता नि, बाकीन पापी काजे बुलावने आवलु छे.”

उपवासोन सवाल

(मरकुस 2:18-22; लुका 5:33-39)

14तेत्यार योहानोन चेला येसुनचा आवीन कोया, “काय मतलब छे कि आमु एने फरुशी ओतरा उपास कोरतेला, बाकीन तारा चेला उपास नि कोरतेला?” 15येसु तीनु काजे कोयू, “काय वोरात्या, जेतार तोक लाडुस तिंदरे साते छे, दुख कोर सोकतेला?” बाकीन चे दाहळा आवसे जेतार लाडुस तिंदरेमा गोथू निकाव लेसे, तिने टेमे चे उपास कोरसे. 16कुरा कापळा काजे थीगवो जूनला छिंदरा काजे नि लागाळतला, काहाकि चो थीगवो तिना छिंदरामा गोथो काहीन एने हापकी लेतलो, एने चा जादा फाट जातलो छे. 17एने माणसे नोवलू आंगुरोन रोस जूनला ठाहरामा नि मेकतेला, काहाकि ओसो कोरणेसी बुदलो फाट जातलो छे, एने आंगुरोन रोस वाये जातलो छे एने बुदलो फाट जातलो छे; बाकीन नोवल आंगुरोन रोस नोवला बुदलामा भोरतेला छे एने चे दुयू वाचीन रोयतेला.

मोरली पुराय एने बिमार बायर

(मरकुस 5:21-43; लुका 8:40-56)

18येसु हिनुक जे वाते कोयने बाज रोयू होतु, कि देखू, एक सरदार आवीन तीनाक नमस्कार कोऱ्यु एने कोयू, “मारी पुराय हिमी मोरली छे, बाकीन आवीन आपनु हात तिनी पोर मेक दे, ती ची जीवती होय जासे”. 19येसु उठीन आपना चेला साते तेरे पोछोव चाल पोळ्यु. 20एने देख्यू, एक बायोर जिनी काजे बारा साल गोथी लुय वोयनेन बिमारी होती, एने पोछोव गोथी आवी तिनान डोगलान कुपरा काजे छिम लेदी. 21काहाकि ची आपना मोनोमा कोयती होती, “ओगर मे तेरा डोगला काजे बी छिम लीस ती वार होय जायीस.” 22येसु फिरीन तिनीक देख्यू एने तिनीक कोयू, “पुराय हिंमत बांध; तारू भुरसू तुसेक वारू कोरलु छे” आखरी ची बायोर तिने टेमे वारू होय गोयी. 23जेतार येसु तीना सरदारोन घोरमा पुग्यू एने वाजा वाजाडणे वावा एने गोरदी काजे कोचाट कोरतेला दिख्यू, 24तेत्यार कोयू, “छेटा होय जावू, पुराय मोरी नी, बाकीन सुवली छे” इनापोरसी चे तेरी मोजाक कोरणे बाज गोया, 25बाकीन जेतार गोरदी निकवी गोयली ती चू माहाय जायीन पुरायीन हात धोऱ्यु, एने ची जीवती होय गोयी. 26एने इनी वातोन खोबर तिना आखा देसमा पसरी गोयी.

आन्दवान भुरसू

27जेतार येसु चा गोथू गोयू, ती दुय आंदवा तेरे पोछोव यो कोयता जायीन आव्या, हे दाऊदन पुऱ्या, आमरेपोर दया कोर, 28जेतार चू घोरोमा पुग्यू ती चे आंदवा तेरेनचा आव्या, एने येसु तीनु काजे कोयू, “काय तुमु काजे भुरसू छे, कि मे यो कोर सोको.” चे येसु काजे कोया, “होव प्रभू.” 29तेत्यार चू तिंदरा डूवा काजे हात लागाळीन कोयू, “तुमरा विस्वासोन अनसारे तुमरेन कोरता होये.” 30एने तिंदरा डूवा उगळी गोया, येसु तीनु काजे जोताळीन कोयू, “सावधान, कुदु इनी वातो काजे नी जाणे” 31बाकीन चे निकवीन आखा देसोमा तेरा काम चमत्कार पसराव देदा.

मुक्कान वारू होयनो

32जेतार चे बारथे जाता होता ती देख्यू माणसे एक मुका काजे जीनामा भुंडली आत्मा होती तेरेनचा लाव्या. 33एने जेतार भुंडली आत्माक नीकाव देदा, ती, मुकु बुलने बाज गोयू; इनापोरसी भीळ वाहरायीन कोयने बाज गोयी कि, इस्राईलमा ओसो कोदि नि देख्या. 34बाकीन फरुशी कोया “यु ने भुंडलीन आत्मान सरदारोन मदतसी भुंडली आत्माक निकावलू.”

दाहळक्या थुलाक से

35येसु आखा देसोमा एने गावोम फिरतू रोयू, एने तिंदरा प्रार्थना घोरमा प्रचार कोरतू एने राज्यान वारली खोबर प्रचार, एने भाती-भातीन बिमारी एने कोमजूरी काजे वारू कोरतू रोयू. 36जेतार चू भीळ काजे देख्यू ती तीनु माणसो पोर गिन आवी काहाकि चे तीनु गाडरान तोसा जिंदरु कुदु राखवाव्या नी होय, कासावीस एने भटकलान ओसा होता. 37तेत्यार चू आपना चेला काजे कोयू, “पाकला खेते ते जुदा सोवटा छे बाकीन दाहळक्या कोम छे 38इनान कोरता मामार खेतोन मालिकनचा विनता कोरो कि आपना खेत काटने कोरीन दाहाळक्या मुकली दे.”

اکنون انتخاب شده:

मत्ती 9: BFBNT

های‌لایت

به اشتراک گذاشتن

کپی