ମାର୍କ 11

ଯୀଶୁ ରାଜା ଲେକେ ଆଜି ଯିରୁଶାଲାମ୍‌ତାକେ ହାଚାନ୍

(ମାଥି. ୨୧:୧-୧୧; ଲୁକ. ୧୯:୨୮-୪୦; ଯୋହନ. ୧୨:୧୨-୧୯)

1ଯୀଶୁ ଆରେ ତା ଚେଲାହିର୍ ଜିତ୍‌ମାର୍‌ ମାନି ମାଡ଼ି ଲାଗେନି ବେଥ୍‍ଫାଗି ଆରେ ବେଥନିଆ ନାସ୍ ଏକାତାର୍। ଆରେ ଯିରୁଶାଲାମ ସହର୍ ଏକିନିହିଙ୍ଗ୍, ଯୀଶୁ ଜାର୍ ଚେଲାହିର୍ ବିତ୍ରେତାଙ୍ଗ୍ ରିୟାରିଙ୍ଗ୍ କୁକ୍‌ଚି ଇବେଣ୍ ୱେଚ୍‌ଚି ପକ୍ତାନ୍। 2“ମି ଲାଗାୟ୍‌ନି ନାସ୍‌କୁକାଙ୍ଗ୍ ହାଲାଟ୍। ଆରେ ହେନାସ୍ ଏକିତି ଦାପ୍ରେ, ର ଗଦହିମ୍‌ଣା ଗାଚ୍‌ଚାକା ହୁଡ଼୍‌ନାଦେର୍ ହେ ଗଦହିମ୍‌ଣା ରିକ୍‍ଚି ତାଡ, ହେ ଗଦଜପି ଇନେର୍ ପା ଦୁମ୍‌ୱାଦାଙ୍ଗ୍ ମାନାର୍। 3ଆରେ ‘ଇନା କିଦେଙ୍ଗ୍ ରିକ୍‌ନାଦେରା ଇଞ୍ଜି ଇନେର୍ ପା ୱେନ୍‌ବା ଆଦ୍‌ନାର୍,’ ‘ତାଙ୍ଗେଙ୍ଗ୍ ୱେଚ୍‌ନାଦେର୍ ଇଦାଙ୍ଗ୍ ମା ଯୀଶୁ ମାପୃଙ୍ଗ୍ ଦରକାର୍ ମାନାତ୍ ଇଞ୍ଜି ୱେଚ୍‌ଚିସ୍, ତାପାଚେ ହେୱାନ୍ ମିଙ୍ଗେଙ୍ଗ୍ ଜଲ୍‌ଦି ପକ୍ତାନାନ୍।’”

4ହେ ରିୟାର୍ ଚେଲାହିର୍ ହେନାସ୍ ହାଚାର୍, ଆରେ ଇଲ୍ ଦୁୱେର୍‌ନି ହାକ୍‌ଡ଼ିତ ର ଗଦତିଙ୍ଗ୍ ଗାଚ୍‌ଚାକା ହୁଡ଼୍‌ଜି ହେଦେଲିଙ୍ଗ୍ କୁତ୍‍ତାର୍। 5ହେବେତାଙ୍ଗ୍ ହେବେ ନିଲ୍‌ଚିମାଚି ମାନାୟ୍ ବିତ୍ରେତାଙ୍ଗ୍ କେତ୍‌ଜାଣ୍ ହେୱାରିଙ୍ଗ୍ ୱେନ୍‌ବାତାନ୍, “ଗଦତିଙ୍ଗ୍ ଏପେଙ୍ଗ୍ ଇନା କିଦେଙ୍ଗ୍ ରିକ୍‌ନାଦେରା?” 6ଯୀଶୁ ଇନେସ୍ ଲେକେ ୱେଚ୍‌ଚି ମାଚାନ୍, ହେୱାର୍ ହେଲେକେନେ ୱେଚ୍‌ଚାର୍, ହେବେ ହେ ମାନାୟାର୍ ଗଦତିଙ୍ଗ୍ ଅୱାଟ୍ ଇଚାର୍। 7ହେ ରିୟାର୍ ଚେଲାହିର୍ ଯୀଶୁତାକେ ଗଦତିଙ୍ଗ୍ ତାସିୱାତାର୍, ଆରେ ହେବେ ମାଚି ମାନାୟାର୍ ହେ ଗଦଜପି ଜାର୍-ଜାର୍ ହେନ୍ଦ୍ରାଙ୍ଗ୍ ପାସ୍ତାର୍। ପାଚେ ଯୀଶୁ ତା ଜପି କୁଚ୍‌ଚାନ୍।

8ଆରେ, କେତେକ୍ ମାନାୟାର୍ ହାଜ୍‌ଦିଙ୍ଗ୍ ଜାର୍-ଜାର୍ ହେନ୍ଦ୍ରାଙ୍ଗ୍ ପାସ୍ତାର୍, ଆରେ ଜେକନିକାର୍ ମାର୍‌ତି ଡାଡ଼୍ କାଦ୍‌ଦି ପାସ୍ତାର୍ ଯୀଶୁଙ୍ଗ୍ ମାନି କିଦେଙ୍ଗ୍। 9ଆରେ ଯୀଶୁ ଆଗେ ଆରେ ପାଚେ ହାଲ୍‌ଜି ମାନି ମାନାୟାର୍ ୱାରିତାଙ୍ଗ୍ ଗାଜା କାଟ୍‌ତାଙ୍ଗ୍ ୱେଚ୍‌ଚେଙ୍ଗ୍ ଲାଗାତାର୍,

“ଈଶ୍ୱରତିଙ୍ଗ୍ ଜୟ୍-ଜୟ୍ ଆଏତ୍!

ଈଶ୍ୱର ଆଦିକାର୍‌ତାକେ ଇନେର୍ ଯଦି ୱାନାର୍ ହେୱାନିଙ୍ଗ୍ ମାପୃତି ଆଶ୍ରିବାଦ୍ ମାନ୍‌ଙ୍ଗାନାତ୍!

10ଈଶ୍ୱର ଆଶ୍ରିବାଦ୍‌ତାଙ୍ଗ୍ ମା ଆକଦାଦି ଦାଉଦ ରାଜା ଲେକେ ର ରାଜା ସାସନ୍ କିଦେଙ୍ଗ୍ ୱାନାନ୍,

ସରଗ୍‌ତାକେ ମାନି ଈଶ୍ୱରତିଙ୍ଗ୍ ଜୟ୍-ଜୟ୍ ଆଏତ୍।”

11ପାଚେ ଯୀଶୁ ଯିରୁଶାଲାମ ସହର୍‌ତାକେ ୱାଜି ଈଶ୍ୱର ମାନି ମନ୍ଦିର୍‌ତାକେ ହାଚାନ୍, ଆରେ, ଚାରିବେଣ୍‌ତାଙ୍ଗ୍ ୱିଜୁ ଜିନିଷ୍‌ତିଙ୍ଗ୍ ହାର୍ କିଜି ହୁଡ଼୍‌ତାନ୍, ଆରେ ମିତିଲେଙ୍ଗ୍ ହେ ସହର୍ ପିସ୍ତି ବାର୍ ଜାଣ୍ ଚେଲାହିର୍ ହୁଦାଙ୍ଗ୍ ବେଥନିଆ ନାସ୍ ହାଚାର୍।

ତଗାମାର୍‌ତିଙ୍ଗ୍ ଯୀଶୁ ଅବିଶାପ୍ ହିତାକା

(ମାଥି. ୨୧:୧୮,୧୯)

12ଆରେ ଦିନେକ୍ ହେୱାର୍ ବେଥନିଆ ତାଙ୍ଗ୍ ୱାନିହିଙ୍ଗ୍ ଯୀଶୁ ନାସ୍‌କି ଆତାନ୍। 13ଆରେ ଯୀଶୁ ଦେହାତାଙ୍ଗ୍ ମାର୍ ବାର୍ତି ଆକିଙ୍ଗ୍ ମାନାକା ର ତଗାମାର୍‌ତିଙ୍ଗ୍ ହୁଡ଼୍‌ଜି, ହେବେ ମାର୍‌ତ ପାଡ଼୍‌ ଗାଟାଆଦ୍‍ନାତ୍ ଇଞ୍ଜି, ଆହାଆଜି ମାର୍‌ତ ହାଚାର୍। ମାତର୍ ଲାଗେ ୱାଜି ଆକିଙ୍ଗ୍ ପିସ୍ତି ଇନାକା ଗାଟା ଆୱାତାର୍, ଇନେସ୍‌କି ହେପାଦ୍ନା ତଗାପାଡ଼୍‌ ଆହ୍ନି ଦିନ୍ ହିଲାତାତ୍। 14ହେବେ ଯୀଶୁ ମାର୍‌ତିଙ୍ଗ୍ ହୁଡ଼୍‌ଜି ୱେଚ୍‌ଚାନ୍, “ଇନେର୍ ପା ନିବେତାଙ୍ଗ୍ ପାଡ଼୍‌ ତିନୁର୍।” ତା ଚେଲାହିର୍ ଇ ବେଣ୍‌ତିଙ୍ଗ୍ ୱେଚ୍‌ଚାର୍।

ଯୀଶୁ ଈଶ୍ୱର ମାନି ଇଲ୍‌ତିଙ୍ଗ୍ ନିର୍ମଲ୍ କିତାନ୍

(ମାଥି. ୨୧:୧୨-୧୭; ଲୁକ. ୧୯:୪୫-୪୮; ଯୋହନ. ୨:୧୩-୨୨)

15ତାପାଚେ ଯୀଶୁ ଆରେ ତା ଚେଲାହିର୍ ଯିରୁଶାଲାମ ସହର୍‌ତାକେ ୱାତାର୍। ଆରେ ଯୀଶୁ ଈଶ୍ୱର ମାନି ମନ୍ଦିର୍‌ନି ହାକ୍‌ଡ଼ିତାକେ ହାଚାର୍, ହେ ବାହାତାକେ ପଶୁ ଆରେ ପାରୁଆଙ୍ଗ୍ କେତେକ୍ ଜିନିଷ୍ ବେପାର୍‌ବାଟ୍‌ କିନାକାରିଙ୍ଗ୍ ଯୀଶୁ ହପ୍ତାନ୍‌। ଆରେ ହେୱାନ୍ ଡାବୁଙ୍ଗ୍ ବାଦ୍‌ଲା-ବାଦ୍‌ଲି କିନି ଟେବୁଲ୍‍ତିଙ୍ଗ୍ ଆରେ ପାର୍‌ୱାଙ୍ଗ୍ ପନି ଟେବୁଲ୍‍ତିଙ୍ଗ୍ ଉଲ୍‌ଟାଇ କିତାନ୍। 16ଆରେ ହେୱାନ୍ ଆଦେସ୍ ହିଜି ୱେଚ୍‌ଚାନ୍, “ଈଶ୍ୱର ମାନି ମନ୍ଦିର୍‌ନି ହାକ୍‌ଡ଼ିତାକେ ଇନାକାପା ଅମାଟ୍ କି ତାମାଟ୍ ଇଞ୍ଜି ମୁନାକିତାନ୍।” 17ଆରେ ଯୀଶୁ ହେୱାରିଙ୍ଗ୍ ହିକ୍ଷାହିଜି ୱେଚ୍‌ଚାନ୍, “ଇଦାଙ୍ଗ୍ ସାସ୍ତର୍‌ତାକେ ଲେକା ମାନାତ୍, ‘ଈଶ୍ୱର ମାନି ମନ୍ଦିର୍‌ତିଙ୍ଗ୍ ୱିଜୁଜାତିର୍ ମାନାୟ୍ କାଜିଙ୍ଗ୍ ର ପାର୍ତାନା ଇଲ୍ ଇନାର୍।’ ମାତର୍ ଏପେଙ୍ଗ୍ ହେଦାଙ୍ଗ୍ ଡାକୁର୍ ମାନି ବାହାଲେକେ କିତାଦେର୍‌ନା।”

18ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍, ଆରେ ଯିହୁଦି ଦରମ୍‌ନି ପଣ୍ଡିତାର୍, ଯୀଶୁ କିତି କାମାୟ୍‌ତିଙ୍ଗ୍ ଆରେ ୱେଚ୍‌ଚି ବେଣ୍‌ତିଙ୍ଗ୍ ୱେନ୍‌ଞ୍ଜି ହେୱାର୍‌ ଯୀଶୁଙ୍ଗ୍ ଅସ୍ତେଙ୍ଗ୍ ଉପାୟ୍ କିଦେଙ୍ଗ୍ ଲାଗାତାର୍, ମାତର୍ ଯୀଶୁଙ୍ଗ୍ ହେୱାର୍ ପାଣ୍ଡ୍ରାଆଜି ମାଚାର୍। ଇନେସ୍‌କି ମାନାୟାର୍ ତା କାତାତିଙ୍ଗ୍ ମାନିକିଜି ମାଚାର୍। 19ହେନାଞ୍ଜ୍ ମିକାହାରେସ୍ ଯୀଶୁ ଆରେ ତା ଚେଲାହିର୍ ସହର୍‌ତାଙ୍ଗ୍ ହସି ବେଥନିଆ ନାସ୍ ହୁନ୍‌ଞ୍ଜେଙ୍ଗ୍ ହାଲ୍‌ଜି ମାଚାର୍।

ୱାଚ୍‌ଚି ତଗାମାର୍‌ତାଙ୍ଗ୍ ହିକ୍ଷା

(ମାଥି. ୨୧:୨୦-୨୨)

20ଆରେ ରଦିନ୍ ନାଣାଙ୍ଗେ ଯୀଶୁ ଆରେ ତା ଚେଲାହିର୍ ଯିରୁଶାଲାମ ସହର୍‌ତିଙ୍ଗ୍ ୱାଜିମାଚାର୍, ଯୀଶୁ ଅବିଶାପ୍ ହିଜିମାଚି ତଗାମାର୍‌ତିଙ୍ଗ୍ ହୁଡ଼୍‌ତାର୍। ହେ ତଗାମାର୍‌ ଚିରାଙ୍ଗ୍‌ତାଙ୍ଗ୍ ୱାଚ୍‌ଜି ମାଚାତ୍। 21ହେ ପାଦ୍ନା ପିତର ଯୀଶୁ ୱେଚ୍‌ଚି ବେଣ୍‌ତିଙ୍ଗ୍ ଏତ୍‌କିଜି ଯୀଶୁଙ୍ଗ୍ ୱେଚ୍‌ଚାନ୍, “ଏ ଗୁରୁ ହୁଡ଼ାଟ୍! ଏନେଙ୍ଗ୍ ଇମ୍‌ଣି ତଗାମାର୍‌ତିଙ୍ଗ୍ ଅବିଶାପ୍ ହିତାଇନା ହେଦାଙ୍ଗ୍ ମାର୍ ୱାଚ୍‍ଚାତେ।”

22ଯୀଶୁ ହେୱାରିଙ୍ଗ୍ ୱେଚ୍‌ଚାନ୍, “ଏପେଙ୍ଗ୍ ଈଶ୍ୱରତିଙ୍ଗ୍ ଇନାକା ଏନ୍‌ନାଦେର୍ ହେଦାଙ୍ଗ୍ ହିଦ୍‌ନାନ୍ ଇଞ୍ଜି ପାର୍ତିକିୟାଟ୍। 23ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍‌ଚାନାଙ୍ଗା, ‘ଇନେର୍ ଇ ମାଡ଼ିତିଙ୍ଗ୍ ନିଙ୍ଗ୍‌ଞ୍ଜି ହାମ୍‌ଦୁର୍‌ତାକେ ହାଲ୍‌ଜି ଆରା ଇଞ୍ଜି ୱେଚ୍‌ନାନ୍,’ ଆରେ ଜାର୍ ଗରବ୍ ତାକେନି ଡାଉଟ୍ କିୱାଦାଙ୍ଗ୍, ଇନାକା ୱେଚ୍‌ଚାନାଙ୍ଗା। ହେଦାଙ୍ଗ୍ ଗଟାଆନାତ୍ ଇଞ୍ଜି ପାର୍ତି କିନାଦେର୍, ତା କାଜିଙ୍ଗ୍ ହେଦାଙ୍ଗ୍ ଗଟାଆନାତ୍। 24ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍‌ଚାନାଙ୍ଗା, ଏପେଙ୍ଗ୍ ଇନା ଇନାକା ପାର୍ତାନା କିୟାଟ୍ ଆରେ ଏନ୍ତାଟ୍, ହେ ୱିଜୁ ଗାଟାଆଦ୍‍ନାତ୍ ଇଞ୍ଜି ପାର୍ତିକିୟାଟ୍, ହେବେତାଙ୍ଗ୍ ହେ ୱିଜୁ ପାୟାଆନାଦେର୍। 25ଆରେ, ଏପେଙ୍ଗ୍ ଏଚେକାଡ଼୍‌ଦ ପା ପାର୍ତାନା କିଦେଙ୍ଗ୍ ନିଲ୍‌ନାଦେର୍, ଯଦି ଏପେଙ୍ଗ୍ ଇନେର୍‌ତାକେ ବିରଦ୍ ମାନାଦେର୍, ହେୱାନିଙ୍ଗ୍ ଏପେଙ୍ଗ୍ କେମା କିୟାଟ୍। ଇନେସ୍‌କି ସରଗ୍‌ନି ଆବା ମିଙ୍ଗେଙ୍ଗ୍ ପାପ୍ କେମା କିତ୍‌ତାନ୍‌ନା ହେଲେକେ ମି ବିରଦ୍ ଲଗାଙ୍ଗ୍ କେମା କିୟାଟ୍। 26ମାତର୍ ଏପେଙ୍ଗ୍ ଯଦି ଜେକନିକାରିଙ୍ଗ୍ କେମା କିଉଦେର୍, ଲାଗିଙ୍ଗ୍ ମି ସରଗ୍‌ନି ଆବା ପା ମିଙ୍ଗେଙ୍ଗ୍ କେମା କିଦୁନ୍।”

ଯୀଶୁଙ୍ଗ୍ ଆଦିକାର୍‌ତିଙ୍ଗ୍ ଯିହୁଦି ଦରମ୍‌ନି ନେତାର୍ ୱେନ୍‌ବାତାର୍

(ମାଥି. ୨୧:୨୩-୨୭; ଲୁକ. ୨୦:୧-୮)

27ଆରେ ହେୱାର୍ ଆରେରଗ ଯିରୁଶାଲାମ ସହର୍‌ତାକେ ୱାତାର୍, ଆରେ ଯୀଶୁ ଈଶ୍ୱର ମାନି ମନ୍ଦିର୍‌ କଚଣ୍‌ତ ବୁଲାଆନିହିଙ୍ଗ୍ ଈଶ୍ୱର ହେବାକିନି ମୁଡ଼୍‌ଦି ପୁଜାରିର୍, ଯିହୁଦି ଦରମ୍‌ନି ପଣ୍ଡିତ୍‌ ଆରେ ପ୍ରାଚିନ୍‌ ତା ଲାଗାୟ୍ ୱାଜି ୱେନ୍‌ବାତାର୍, 28“ଏନେଙ୍ଗ୍ ଇନା ଆଦିକାର୍‌ତାଙ୍ଗ୍ ଇୱିଜୁ କିନାୟା? ଆରେ ଇୱିଜୁ କିଦେଙ୍ଗ୍ ନିଙ୍ଗେଙ୍ଗ୍ ଇନେର୍ ଇ ଆଦିକାର୍ ହିତ୍‌ତାର୍?”

29ମାତର୍ ଯୀଶୁ ହେୱାରିଙ୍ଗ୍ ୱେଚ୍‌ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ର ବେଣ୍ ୱେନ୍‌ବାଆଦ୍‌ନାଙ୍ଗ୍, ନାଙ୍ଗେଙ୍ଗ୍ ଉତର୍ ହିଦାଟ୍, ନଇଲେ ଆନେଙ୍ଗ୍ ଇମ୍‌ଣି ଆଦିକାର୍‌ତାଙ୍ଗ୍ ଇ ୱିଜୁକିନାଙ୍ଗା, ହେଦାଙ୍ଗ୍ ମିଙ୍ଗେଙ୍ଗ୍ ୱେଚ୍‌ଚାନାଙ୍ଗ୍। 30ମାନାୟ୍‌ତିଙ୍ଗ୍ ଡୁବନ୍ ହିଦେଙ୍ଗ୍ ଯୋହନତିଙ୍ଗ୍ ଇନେର୍ ପକ୍ତାତାର୍? ଈଶ୍ୱର ପକ୍ତାତାନ୍ କି ମାନାୟାର୍ ପକ୍ତାତାର୍?”

31ହେବେତାଙ୍ଗ୍ ହେୱାର୍ ଜାର୍ ଜାର୍‌ବିତ୍ରେ ବେଣ୍‌କିଜି ୱେଚ୍‌ଚେଙ୍ଗ୍ ଲାଗାତାର୍, “ଯଦି ସରଗ୍‌ତାଙ୍ଗ୍ ଇଞ୍ଜି ୱେଚ୍‌ନାସ୍, ଲାଗିଙ୍ଗ୍ ହେୱାନ୍ ଇଞ୍ଜ୍‌ନାନ୍, ‘ଏପେଙ୍ଗ୍ ଇନା କିଦେଙ୍ଗ୍ ହେୱାନିଙ୍ଗ୍ ପାର୍ତି କିୱାତାଦେର୍ ଇଞ୍ଜି ଇଞ୍ଜ୍‌ନାନ୍?’ 32ମାତର୍ ଆସେଙ୍ଗ୍ ଏଲେଙ୍ଗ୍ ପା ୱେଚ୍‌ଚେଙ୍ଗ୍ ଆଡୁସ୍ ଯେ ହେୱାନ୍ ମାନାୟ୍ ଆଦିକାର୍ ତାକେଣ୍ଡାଙ୍ଗ୍ ୱାତାତ୍‌ନା।” ଇନେସ୍‌କି ମାନାୟ୍ ମୁମ୍‌ଦ ପାଣ୍ଡ୍ରାଆଜି ମାଚାର୍, ୱିଜାର୍ ଯୋହନତିଙ୍ଗ୍ ହାତ୍‌ପା ରକାନ୍ ଭବିଷ୍ଯତବକ୍ତା ଇଞ୍ଜି ମାନିକିଜି ମାଚାର୍। 33ଲାଗିଙ୍ଗ୍ ହେୱାର୍ ଯୀଶୁଙ୍ଗ୍ ୱେଚ୍‌ଚାର୍, “ମାନାୟ୍‌ତିଙ୍ଗ୍ ଡୁବନ୍ ହିଦେଙ୍ଗ୍ ଯୋହନତିଙ୍ଗ୍ ଇନେର୍ ପକ୍ତାତାର୍‌ନା ଆପେଙ୍ଗ୍ ପୁନୁପ୍।” ଯୀଶୁ ହେୱାରିଙ୍ଗ୍ ୱେଚ୍‌ଚାନ୍, “ଲାଗିଙ୍ଗ୍ ଆନେଙ୍ଗ୍ ଇମ୍‌ଣି ଆଦିକାର୍‌ତାଙ୍ଗ୍ ଇ ୱିଜୁକିନାଙ୍ଗା, ହେଦାଙ୍ଗ୍ ଆନେଙ୍ଗ୍ ପା ମିଙ୍ଗେଙ୍ଗ୍ ୱେଚ୍‍ଚୁଙ୍ଗ୍।”

انتخاب شده:

ମାର୍କ 11: PEGNT

های‌لایت

به اشتراک گذاشتن

کپی