Marko 15
15
E Isuse ande anglo Pilat
(Mt 27,1–2; 11–14; Lk 23,1–5; Jn 18,28–38)
1Sigate sabalin ćidije pe e šorutne sveštenikura, e učitelja tare Mojsijaso zakon, e starešine thaj savore taro Baro sudo. Phanglje e Isuse, inđarde le thaj predije le ko rimsko upravitelji ko Pilat.
2O Pilat pučlja e Isuse: “Tu li san o caro e Jevrejengo?”
O Isus vaćarda e Pilatese: “Tu vaćare korkoro.”
3A e šorutne sveštenikura tužisade le paše but buća. 4Tegani o Pilat palem pučlja le: “Dal naj tu khanči te vaćare ke kava? Dičhe li paše so sa tužin tut?”
5Al o Isus khanči ni vaćarda, golese sasa o Pilat but začudime.
O Isus osudimo ko meripe
(Mt 27,15–26; Lk 23,13–25; Jn 18,39–19,16)
6O Pilat ko vreme e Bare đivesengo mučhola jekhe phangle save e manuša manđen. 7Tegani ano phanglipe sesa pobunjenikura save mudarena ani pobuna, a maškar lende sasa i jekh manuš kaso alav sasa Varava. 8But manuša avile te roden taro Pilat te mučhol jekhe phangle sar obično ćerola ko Baro đive.
9O Pilat pučlja len: “Manđen li te mukhav tumenđe kole caro e Jevrejengo?” 10Vaćarda kava golese kaj džanglja kaj e šorutne sveštenikura predije e Isuse taro zavist. 11Al e šorutne sveštenikura čhute e manušen te roden taro Pilat te mučhol lenđe e Varava.
12A o Pilat palem pučlja len: “A so te ćerav kalesa so den le vika caro e Jevrejengo?”
13A von lije te den vika: “Čhu le ko krsto!”
14Tegani o Pilat pučlja: “Savo bilačhipe ćerda?”
Al von vadži po zurale dije vika: “Čhu le ko krsto!”
15O Pilat manglja te avol šukar e manušencar, golese mukhlja lenđe e Varava. A e Isuse dija te šibin thaj dija te čhuven le ko krsto.
E vojnikura maren muj e Isusesa
(Mt 27,27–31; Jn 19,2–3)
16Tegani e vojnikura inđarde e Isuse ki palata so si pretorijum thaj dije vika četa vojnikuren. 17Urade e Isuse skerletno ogrtači, khuvde lese venco tare kangre thaj čhute lese po šoro. 18Tegani lije te maren muj lesa vaćarindoj: “Te ave sasto, carona e Jevrejengo!” 19Čalade le po šoro e trskasa, čhungarde le thaj pele ke pe koča te klanjin pe lese – te bi asana lesa.
20Kana ačhade te maren muj lesa, uljarde lestar o skerletno ogrtači thaj urade le ane leso fostano. Tegani ikalde le te čhuven le po krsto.
E Isuse čhuven po krsto
(Mt 27,32–44; Lk 23,26–43; Jn 19,16–27)
21A nesavo manuš o Simon tari Kirina, o dad e Aleksandreso thaj e Rufoso, nakhlo gothar kana irisajlo andari njiva thaj e vojnikura terisade le te inđarol o krsto e Isuseso. 22E Isuse ande ko than savo akhardola Golgota, so značil “Kokalo e šoreso”. 23A nesave odori kanisade le te pijol mešimi mol e smirnasa, te bi ačhola lesi dukh, al vov ni manglja. 24E vojnikura čhute le ko krsto, ulade maškar peste lese šeja thaj čhudije kocka te dičhen ko so ka lol.
25Sasa enja o sato sabalinasa kana čhute le ko krsto. 26O natpis paše lesi krivica sasa: “O Caro e Jevrejengo.” 27A e Isusesa ke avera krstura čhute i dujen razbojnikuren, jekhe tari lesi desno rig thaj e dujtone tari lesi levo rig. 28[Golesa pherdilo so si pisimo ano Sveto lil: “Dikhlje le sar jekhe tare kola save ćeren bilačhipe.]”
29E manuša save nakhle gothar, vređisade le thaj vrtisade šorencar vaćarindoj: “Ej tu, so phađe o Hram thaj paše trin đive vazde le, 30spasi korkoro tut! Ulji akana taro krsto!” 31A gijate marde muj e Isusesa i e šorutne sveštenikura thaj e učitelja tare Mojsijaso zakon. Jekh averese vaćarde: “Averen spasisada, a korkore pes našti te spasil? 32Hriste! Carona e Izraeleso! Ulji akana taro krsto te dikha thaj te pača.” Marde lesa muj thaj kola razbojnikura so sesa po krsto lesa.
E Isuseso meripe
(Mt 27,45–56; Lk 23,44–49; Jn 19,28–30)
33Ane opaš đive učharda o kalipe pi sa i phuv, sa dži ko trito sato. 34Ko trito sato dija vika o Isus andaro baro glaso: “Eloi! Eloi! Lama sabahtani?” (so značil: “Devla mingreja! Devla mingreja! Sose mukhljan man?”)
35Nesave save ačhile gothe, kava šunde thaj vaćarde: “Dičhen, akharol e proroko e Ilija!”
36Jekh manuš prastija, pherda o sunđeri šutesa, čhuta pi trska thaj kanisada e Isuse te pijol vaćarindoj: “Ač te dikha, da li ka avol o Ilija te uljarol le.”
37A o Isus andaro baro glaso dija vika thaj mulo. 38I fironga pharadili ano sveto than e hrameso ke opaš odupral natele. 39Kana o rimsko kapetano savo ačhilo gothe pašo Isus dikhlja sar mulo, vaćarda: “Čače, kava manuš sasa Čhavo e Devleso!”
40Gothe sesa nesave džuvlja, save gova dikhlje odural. Maškare lende sasa i Marija Magdalena, i Marija i dej e Jakovesi e ternesi thaj e Josijasi, thaj i Saloma. 41Von phirde palo Isus thaj kandije le, kana sasa ani Galileja. Sesa gothe i avera džuvlja save avile lesa ano Jerusalim.
E Isuseso prahope
(Mt 27,57–61; Lk 23,50–56; Jn 19,38–42)
42Kana lija te perol i rat, a sar sasa đive paši Priprema, so si đive anglo savato, 43đelo o Josif taro foro Arimateja bidarako ko Pilat thaj molisada le pašo telo e Isuseso. O Josif sasa pošteno člano taro Baro sudo thaj i vov ađućarda te avol o Carstvo e Devleso. 44Al o Pilat čudisajlo kaj gaći sigate mulo o Isus. Dija vika e rimskone kapetano thaj pučlja le: “Da li odavno mulo?” 45Kana dodžanglja o Pilat taro rimsko kapetano kaj mulo o Isus, dija o telo e Josifese. 46Gija o Josif ćinda laneno čaršafi, uljarda e Isuseso telo taro krsto, paćarda le ano čaršafi thaj čhuta le ano limori savo sasa čhindo ani stena. Tegani o vudar taro limori phanglja baresa. 47A i Marija Magdalena thaj i Marija e Josijasi dej dikhlje kaj o Josif čhuta e Isuse.
اکنون انتخاب شده:
Marko 15: GSP
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
