Jan 14
14
Jézu a zi lé éé goo Ti va, a nya
(2 Kor 4:17—5:1; Kol 3:1–4; Ébr 10:19–22)
1Té ka we do kpen gibɔrɔ pa lo. ’Ka bli vo Kazambale lɛ yé ’ka bli vo an lɛ é ziin ma.
2Nyanana kiɛre ana an Ti lé kɔn gi. Dé ’bɛ kaan lo, ’té maa a fe ka lɛ. Maa a gona ka nyanana ma’lɛrɛ lɛ ka lɛ. 3Yé dé maa go, dé maa ka nyanana ma’lɛrɛ faa, maa dan da lɛ é ziin, yé maa dan ka sia lɛ yé maa go ka nya, yé fɛana lé an ke, yé ka kɛlɛ ana é ziin. 4Fɛana lé maa ke gona, ka ana dɔɔ, yé ka alé zi dɔɔ.
5Tɔmas lé a lɛ léé: Mizan, ko ’ka i gona dɔɔa lo ’naan, ko kɛla kaa yé ko alé zi dɔɔ? 6Jézu lé a lɛ léé: Maa lé ke zi koo, webozen koo, vole é yuɛma koo, wo nya. Mi do kpen ’ka dan an Ti va lo, ’té dé é ’ka gié lɛ an va lo. 7Dé é vo léé, ka an dɔɔ, ’té ka an Ti dɔɔ é ziin. Yé a pélisia sin ka a dɔɔ, yé ka a ye.
8Filip lé a lɛ léé: Mizan, ’i Ti nagɔɔn ko lɛ, ’té ’bɛ kozé bɔ. 9Jézu lé a lɛ léé: Filip, ana mɔn ’té maa a ka va, yé i ’ka tan an dɔɔ lɛ loo? Mi lé é an ye, é an Ti ye. É kɛlɛ kaa yé i léé, an Ti nagɔɔn ’wo lɛɛ? 10Maa a an Ti gi yé an Ti a an gi, i ’ka paan ’bɛ ta loo? Dérenu lé maa wo fé ka lɛ, anbo dére kaan lo. An Ti lé é ke an gi, yee ɛ ke élé nyanamanu pana. 11Maa a an Ti gi yé an Ti a an gi. Ka ’maa? Dé ’bɛ kaan lo, an kɛlɛwe ’konu a gɔɔn é ziin.
12Maa fe ka lɛ kyɔ webozen nya, mi lé é an si, é dan an kɛlɛwenu kɛlɛ lɛ é ziin yé an gole an Ti va lé we ma lé, ’bɛzan kɛlɛwenu é dan kɛlɛ lɛ blɛn é minié anzé ta. 13Yé we faa lé ka a laan an tɔ gi, maa a kɛla, an Ti tɔ kɛlɛle blɛn, maa a Be gi we ma. 14Dé ka weowean laa an tɔ gi, maa a kɛla.
Jézu léé, é dan Léli Sauun nɔ lɛ
(Lk 24:49; Jn 16:5–15)
15Dé an sɔ ka lɛ, ’ka anlé bélidɔwenu kɛlɛ ma. 16Yé maa dan bazoro lɛ an Ti lɛ, yé é dan tɔrɔpaazan bɛ nɔ lɛ ka lɛ, yé ’bɛ é dan vo lɛ ka va yifaama. 17Yee tɔrɔpaazan lé ke webozen Léli nya; tɛrɛlamunu ’ka a yé lo, yé wo ’ka a dɔɔa lo, bɛwemalé wo ’ka bɔa a sile lɛ wozé nya lo; naa, ka a dɔɔ, é a é nyanale ka va yé é dan kɛlɛ lɛ ka gi, azama. 18Maa ’ka dan ka vo lɛ bugalazannu valé tigalazannu zo lo; maa dan da lɛ ka va. 19É vo sɛ yé tɛrɛlamunu ’ka dan an ye lɛ é dɛrɛ lo, naa, maa a é yuɛma, yé ka dan kɛlɛ lɛ é yuɛma é ziin, amalé ka dan an ye lɛ. 20’Bɛ yi la, ka dan a dɔɔ lɛ léé, maa a an Ti gi, yé ka a an gi, yé maa a ka gi. 21Mi lé anlé bélidɔwenu ke a lee, ’té éé wo kɛla, yee ɛ lɛ lé an sɔ, yé mi lé an sɔ a lɛ, é dan sɔ lɛ an Ti lɛ, yé é dan sɔ lɛ an lɛ, yé maa dan anbozen nagɔɔn lɛ a lɛ.
22Judas we fe, Kariɔtzan Judas kaan lo, Judas bɛ ’bɛ, ’bɛ lé a lɛ léé: Mizan, mɛwemalé i dan ibo nagɔɔn lɛ ko lɛ, yé i ’ka ibo nagɔɔn‐an tɛrɛlamunu lɛ loo? 23Jézu lé a lɛ léé: Dé an sɔ mianzan lɛ, é dan tawo lɛ an dére ta, yé é dan sɔ lɛ an Ti lɛ, yé ko dan da lɛ a va, yé ko dan ko nyanana kɛlɛ lɛ a va. 24Mi lé an ’ka sɔa a lɛ lo, é ’ka tawoo an dérenu ta monomono lo, yé dére lé ka a maan, anbo dére kaan lo, naa, an Ti lé é an pa zia, a dére lé.
25Bléyian va lé maa ke ka va, maa we ’konu fe ka lɛ. 26Naa, tɔrɔpaazan lé é ke Léli Sauun nya, ’té Ti é dan a pa lɛ zia an tɔ gi bɛ, é dan we faa paa lɛ ka gi, yé we faa lé maa a fe ka lɛ, é dan wo sele dɔ lɛ ka gi.
27’Ka vo drɔɔ. Maa anlé vole drɔɔ no ka lɛ. Maa ’ka a no ka lɛ bélé fɛan zo lé tɛrɛlamunu a no ka lɛ, a zo lo. Té ka we do kpen gi bɔrɔ pa lo. Té ka kana monomono lo.
28Ka a ’ma an ta léé, maa a gona, yé maa dan da lɛ é ziin ka va. An Ti blɛn mini an ta; bɛwemalé, dé an sɔ ka lɛ, ka gi é dan nana lɛ an gole an Ti va we ma. 29Yé sin, maa we ’konu fe ka lɛ wo bɔle ’lɛ, yé dé wo bɔ, yé ka bli é vo an lɛ. 30Maa ’ka dan we kiɛre fe lɛ ka lɛ é dɛrɛ lo. Tɛrɛlamunu nwiinzan blɛn a dana yé an kunmawe ’ka a gi lo. 31Naa, é a lé tɛrɛlamunu a gi dɔɔ léé, an Ti sɔ an lɛ yé maa a dére tawe kɛla. ’Ka nwa fɛkona, kaa go.
انتخاب شده:
Jan 14: GOURU
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Alliance Biblique de Cote d'Ivoire 1979
