Luka 20

Isa yi jene ya seetiiya kɔlɔ?

Matiyu 21.23-27; Malɛkɛ 11.27-33

1Lon dɔ, Isa ka to mɔɔlu kalanna ani ka Samakan Kein lase lɔhɔlɔmabonba luu kɔnɔ, salakalase kuntiibalu ni seliya kalanmɔɔlu ni kɛmɔbalu ka na a ma. 2Ai do vɛɛ a yɛ: «A fɔ mɔ yɛ, i yi ko minu kɛla yi ne, jene n'i lɔla wo la? Jene na seetiiya wo dila i ma?»

3Isa k'ai javi, a vɛɛ: «Ǹe fana y'ài maɲiningala ko kelen ma. Ài yi ǹ javi. 4Jene ka seetiiya di Yaya ma makoliko lɔ? Ala, baa adamadennu?»

5Wo fɔ Isa bolo, ai v'i ɲɔɔ sɔsɔla, ai vɛɛ: «Ni mɔ k'a fɔ ko Ala le, a kɛtɔ a fɔla mɔ yɛ, a vɛɛ: ‹Ni wo le, mindɛ lɔ ài ma la a la?› 6Kɛɛ ni mɔ k'a fɔ adamadennu le, mɔɔ minu bɛ kɛtɔ mɔ bonna kawakulun na ka mɔ faa, kamasɔlɔn ai layine a la ko Yaya tɛɛ kela le le.» 7Wo le k'a kɛ, ai ka Isa javi ko ai m'a lɔn.

8Isa do vɛɛ ai yɛ: «Ni wo le, ǹe fana tɛnala a fɔla ài yɛ min na seetiiya dila m̀ ma ko minu kɛko lɔ.»

Gbelekunnasiiba yonnu ma sana

Matiyu 21.33-46; Malɛkɛ 12.1-12

9Wo kɔ, Isa ka sana dɔ la jama yɛ, a vɛɛ: «A ka kɛ kɛ́ dɔ le le, min ka lɛzɛn gbele kɛ, k'a kalifa gbelekunnasiiba dɔlu la, ka taa taama jaan na ka mɛn. 10Lɛzɛn bɔ waate ka se mingɛ, a ka aa bɔiden dɔ lataa gbelekunnasiibalu ma, ko ai y'a ta nii di a ma. Kɛɛ a se je, ai k'a mina k'a gbasi k'a bolokolongbɛ lasei. 11Wo kɛ, gbeletii ka bɔiden gbɛlɛ lataa kɔtunun. Ai do ka wo fana gbasi k'a lafeya k'a bolokolongbɛ lasei. 12Wo kɔ, a ka mɔɔ sawana lataa ai ma. Ai do ka wo fana madimin k'a fɔnfɔn gbele kɔma. 13Wo kɛ, gbeletii vɛɛ a jɛlɛ yɛ: ‹Ǹ'a kɛ di vɛ? Fɔ ǹ'i ǹ diyanan denkɛ lataa ai ma. Tumadɔ ai kɛtɔ wo buɲala.› 14Kɛɛ gbelekunnasiibalu ka a denkɛ natɔla ye mingɛ, ai k'a fɔ i ɲɔɔ yɛ, ai vɛɛ: ‹Kɛɛtaba le ve le. Ài m'a faa fɔsa a fa kɛɛ yi kɛ mɔ ta le!› 15Ai do k'a fɔnfɔn gbele kɔma k'a faa.

«A yi di wo lɔ? Ni gbeletii ka na waate min nɔ, a kɛtɔ mindɛ kɛla ai la? 16A kɛtɔ nala ka gbelekunnasiiba wolu halaki, ka ban ka gbele kalifa mɔɔ gbɛlɛlu la.»

Wo mɛn mɔɔlu bolo, ai do vɛɛ: «Ala mɔ talan wo ma!»

17Isa k'a ɲa kaa jama lɔ k'a fɔ ai yɛ, a vɛɛ: «Ni wo le, kuma min kɔlɔ yi mindɛ le, min sɛvɛnin kitabu kɔnɔ? Ko:

‹Bonlɔbalu n'ai banna kawakulun min nɔ,

wo le kɛnin bon tongun kawakulun ne.›

18Ni mɔɔ mɔɔ k'i ben kawakulun wo kɔkan, wo tii lɔkalitɔle. Ni do kawakulun wo k'i ben mɔɔ mɔɔ kɔkan, wo tii lɔgbɛnɛngɛtɔle.»

Niisɔɔn salako

Matiyu 22.15-22; Malɛkɛ 12.13-17

19Seliya kalanmɔɔlu ni salakalase kuntiibalu tɛɛ Isa minako ɲaɲininna wo waate kelen nɔ, kamasɔlɔn ai n'a ɲayena ko sana wo lanin ailu le ma. Kɛɛ ai tɛɛ siyanna jama ɲa.

20Wo le n'a kɛla, ai tɛɛ Isa lasaala ka a lakɔlɔsibalu lataa a ma, minu tɛɛ ai jɛlɛ kɛla iwo mɔɔ sɔvɛlu, fɔsa ai y'a mina a jɛlɛkanu dalakan fɛ, ka ban k'a don Lɔmu jamanatii bolo, a see yi min yɛ k'a kiti. 21Wo lɔ, ai k'a maɲininga, ai vɛɛ: «Kalanmɔɔ, mɔ k'a lɔn ne i yi kumala ka mɔɔlu kalan a ɲa gbugbu le ma. I tɛ mɔɔ lɔtɔmɔnna, mafɔ ka mɔɔlu kalan tuɲandeya boloma ka bɛn Ala ya siya ma. 22Wo lɔ saa, i miliya fɔ mɔ yɛ butu. Ka niisɔɔn sala Lɔmu masakɛba Sezale ma, wo ladaanyine mɔ ma, baa wo ladaannin tɛ?»

23Kɛɛ Isa tɛɛ k'a lɔn ko a laɲinin kuma le wo le. Wo ma, a vɛɛ ai yɛ: 24«Ài yi wɔligbana dɔ jiya ǹ na. Jene sawula ni jene tɔɔ y'a kɔkan?»

Ai k'a javi, ai vɛɛ: «Sezale le.»

25Wo fɔ ai bolo, Isa do vɛɛ ai yɛ: «Ni a yi ten ne, ài yi Sezale ta di Sezale ma, ka Ala ta di Ala ma.»

26Ai do ma hali kumaden kelen gbu sɔlɔn Isa fɛ jama ɲakɔlɔ min tɛɛ kɛ a minako sabu le. Aa javili k'ai kawakoya fɔɔ k'ai jeden.

Sadusilu ka Isa lɔsuma teme

Matiyu 22.23-33; Malɛkɛ 12.18-27

27 # Kɛkolu 23.8. Wo kɔ, Sadusi dɔlu ka na Isa ma, minu y'a fɔla ko fulenilu lawuliko tɛ tuɲa le. 28Ai do ka Isa maɲininga, ai vɛɛ: «Kalanmɔɔ, Nabi Musa n'a sɛvɛla mɔ yɛ ko ni kɛ́ dɔ ka sa, a ma den to a kɔ, a dɔɔkɛ le ka kan ka kɛsamoso wo fulu, fɔsa a yi den sɔlɔn a kɔlɔkɛ yɛ. 29Wo lɔ, a ka kɛ badenmakɛ wolowulan ne le. Kɔlɔmanda ka moso dɔ fulu. A do ka sa, a ma den to a kɔ. 30Wo kɛ, a badenmakɛ filana ka moso wo fulu. Kɛɛ ale fana ka sa, a ma den to a kɔ. 31Wo ɲɔɔzii le ka kɛ badenmakɛ sawana la haan fɔɔ a wolowulanna. Ai bɛ ka sa, ai ma den to ai kɔ. 32Wo bɛ timinnin kɔ, moso fana ka sa. 33Wo lɔ saa, Fulenilu Lawulilon, moso wo kɛtɔ a jene ta le? Kamasɔlɔn a n'i siila badenmakɛ wolowulan wolu bɛ le kun.»

34Isa k'ai javi, a vɛɛ: «Mɔɔlu yi fulusili ni kɔɲɛmalɔ kɛla dunuɲa min ne lɔ. 35Kɛɛ Ala vɛ mɔɔ minu jatela telenmandelu le k'ai lawuli Fulenilu Lawulilon, ani ka dunuɲa natɔ niimaya di ai ma, wolu tɛnala fulusili ni kɔɲɛmalɔ kɛla. 36Ai tɛnala saya masɔlɔnna butu. Ai kɛtɔle iwo mɛlɛkalu, ani Ala den ne ai le, kamasɔlɔn ai v'i wuli ka bɔ saya lɔ. 37Nabi Musa gbu n'a fɔla k'a lagbɛ ko fulenilu lawulitɔle ka bɔ saya lɔ. Kɔlɔmanjuni taalamaa ya ko sɛvɛnin dingila min nɔ, a k'a fɔ mɔ Tii ma, ko: ‹Ala min yi batola Ibulahima ni Isiyaka ani Janguba bolo.› 38Wo kɔlɔ le ko niimalu le Ala batola, fulenilu tɛ. Kamasɔlɔn bɛ yi niima le le Ala ɲakɔlɔ.»

39Wo fɔ Isa bolo, seliya kalanmɔɔ dɔlu vɛɛ a yɛ: «Kalanmɔɔ, i vɛ javili kɛ kobɛn!» 40Ado mɔɔ foi m'a wakali ka Isa maɲininga butu.

Dawuda Tii le Masa Tɔɔmasenin ne

Matiyu 22.41-46; Malɛkɛ 12.35-37

41Isa do k'ai maɲininga, a vɛɛ: «Mindɛ lɔ ai y'a fɔla ko Masa Tɔɔmasenin yi Dawuda bɔzɔn ne le? 42Kamasɔlɔn Dawuda gbu n'a sɛvɛla Zabuli kitabu kɔnɔ, ko:

‹Mɔ Tii n'a fɔla ǹ Tii yɛ, a vɛɛ:

«Na i sii m̀ bolokini fannɔ,

43haan fɔɔ m̀'ɛ banna i juulu lala i sen kɔlɔ.» ›

44Ni Dawuda y'a fɔla wo tii ma ko a Tii, wo yi se kɛla a bɔzɔn ne di wo lɔ?»

Isa ka seliya kalanmɔɔlu jobaliya teme

Matiyu 23.1-36; Malɛkɛ 12.38-40; Luka 11.37-54

45Jama bɛ ka to ai tolomalɔla Isa la, a do vɛɛ a kɔbiladennu yɛ: 46«Ài y'ài jando ài jɛlɛ lɔ ka bɛn seliya kalanmɔɔlu ma. A diyanin ai yɛ k'ai mataama, faani babalu vɛ ai kanna. Ai vɛ taala bala lɔ, a diyanin ai yɛ ko mɔɔlu y'ai fo buɲali boloma. Ai do vɛ taala Aladalibon na, niwotɛ feetikɛya lɔ, ɲamɔɔ siiyalu le diyanin ai yɛ. 47Ai yi kɛsamosolu bolo latɛla tɛtɛ ka ban k'ai jɛlɛjiya Aladali kunnɔjaannu fɛ. Wo le kɛtɔ a kɛla, aiya kolatɔn gbeleyatɔle ka timin dɔlu ta la.»

اکنون انتخاب شده:

Luka 20: MBT2023

های‌لایت

به اشتراک گذاشتن

کپی