Matyo 8
8
Yeso a Tsuʼ a Ŋwɔn Mbáŋnɨ́ wu Tse ghe
(Mar 1:40-45; Alu 5:12-16)
1Mbáʼ Yeso a shíʼnɨ́ atú ntáʼ wa lá, ɨnɔ ɨnɔ ɨbɛn ɨ zɔ́ŋ ayi ɛ. 2Ŋwɔn atəchwen wu tse a yén nkwem mɨkwiʼtɨ ɨmyi a ɨshi zɨ ɨ soŋ ngə́, “Tə̧, be a bɔŋ a mbó gho, o chi ghɨ á ma shwetə.”
3Yeso a tságɨ́ abó azhi ɨ mɔmtɨ ayi ɨwu, ɨ soŋ ngə́, “A bɔŋ a mbó me ghe; fɛmə!” Ŋwɔn wa a byí shwétɨ́ a mbó nɨghɔ nɨ atəchwen ɨni ɛ. 4Yeso a tíʼ sóŋ wəmbo ngə́, “Njimbɨʼ o soŋ anu zə tsɛrə a mbó ŋwɔn tsɛrə ghe; lá ghɛn ndiʼ atuəmbəm azo a mbó ntumshe; nkɨ nga ɨdzúm tsə ghanɨ tsə mɨtsuʼnɨ mɨ atú ma Mǒse a sóŋnɨ́ ngə́ á bɨ ngǎ lá, tso alisɨ a mbó ɨbɛn bɨtsum ngə́ o shwetə.”
Yeso a Tsuʼ Ngaŋ Afaʼ Tantso Bɨgwe Nkɨ wu Fɨgɨnɨ ə
(Alu 7:1-10)
5Adzaŋ za wɛrə a kónɨ́ a Kabɛrɨnaum lá, tantso bɨgwe nkɨ wu fɨgɨnɨ a yén nkwátɨ́ ayi, mbuʼ mbó wəmbo 6ɨ soŋ ngə́, “Tə̧, ŋwɔn afaʼ ɨghan a byinkɨ ɨ nɔŋ a ndá, ndzǔʼ ndzaŋə be tɨsɨŋə.” 7Yeso a sóŋ wəmbo ngə́, “Ma mɨ ghɛn tsuʼ ayi ɛ.” 8Lá tantso bɨgwe nkɨ wu fɨgɨnɨ wa a chwɨ́gɨ́ ngə́, “Tə̧, ma sa kuʼnɨ a nkwárɨ́ gho a ndá me ghe; nyám soŋ tsɛʼ ngə́ á shwetə, a mɨ kɨ shwetə. 9Me mboŋ, ma kɨ mbe ŋwɔn wa ma tsinɨ nɨ ɨtú tsa tsɨ sáʼnə́ aghan nkɨ ntsi nɨ bɨgwe ba ma sáʼnə́ awa ghe. Ma soŋ a mbó gwe wa wu tse ngə́, ‹Ghen!› a ghen; ma soŋ a mbó wu mɔʼɔ ngə́, ‹Yiŋə!› a yiŋə; ma soŋ a mbó abuʼ azan ngə́, ‹Ghɨ lə!› a kɨ ngɨ tsɛʼ mə lá.”
10Mbáʼ Yeso a zúʼnɨ́ a məzen lá, a kɨ́ʼnɨ́ ayi tsɛʼ nkə; a bə́nkɨ́ ayi ɨ soŋ a mbó ɨnɔ ɨbɛn wa ɨ kɨ́nə́ ndzɔŋə ayi lá ngə́, “Ma sóŋə́ awɨŋ ə, ka ma zɛ́nə aghan abeməntəm tso zɛnə ghe, kə́ be a mu Izrai tsum ə! 11Ma sóŋə́ awɨŋ ə, bə ghaʼnɨ ghɨ lo a sáʼnyom bo ntsonyom ɨ yen shiʼtɨ tsi atú atɛkɨ bo bɨ Abraʼm, Isak bo Yakɔb a mu nɨdorɨ a mu Nɨfɔ nɨ fɔməbvurə ghe. 12Lá ɨbɛn ba bɨ benɨ tsi a mu Nɨfɔ məna, bɨ mɨ tyiŋ awa ɨ tsagɨ a mu ndzumnɨ, á bɨ tsi ɨwu mbúgə́ nkə́ nkfúrɨ́ mɨsɔŋ ɨma ghe.” 13Yeso a tíʼ sóŋ a mbó tantso bɨgwe nkɨ wu fɨgɨnɨ wa ngə́, “Ghen; a mɨ be tsɛʼ adzaŋ za o nɨŋnɨ ntəm ɨgho ɨwu lá.”
Ŋwɔn afaʼ ɨyi wa byí nkɨ́ shwétɨ́ tsɛʼ a nyom məwa.
Yeso a Tsuʼ Ɨbɛn bə Ghaʼnɨ ə
(Mar 1:29-34; Alu 4:38-41)
14Yeso a yén nkón a mu ndá Bita, ndzɛn a nyɔŋ Bita a nɔŋ a ɨkon ngǒ nɨ ɨfɛgɨ wu tɨŋə. 15Yeso a mɔ́mtɨ́ abó azhi, ɨfɛgɨ wu tən wa byi nyɛʼtɨ ayi, a lo atɨ́ ntiʼ ntaŋtɨ nɨghan ɨni ɛ.
16A nkwɛfɔ məwa, bɨ yén nɨ ɨbɛn a ɨnɔ wəmbo ba bɨ tsínɨ́ nɨ bɨdzɨŋ a mu ɨnye ɨtsa ghe. Yeso a lɔ́gɨ́ lá tsɛʼ nɨgham nɨ ntsu ɨni ɨ fɨgɨ ɨzhwi tɨbɔŋ tsa ɨwu, nkɨ ntsuʼ a ŋwɔn tsum wa a kɨ́nə́ ngǒ ghe. 17Wɛrə a ghɨ́ a məzen lá taŋ á kɔ́ʼ mbomnkɨ bo bɨ anu za ntom Ŋwi Asaya ɨ sóŋnɨ́ ngə́, “Wɛrə zɨmboŋ a kwárɨ́ ndzaŋə ɨzɨgɨnə nkɨ mbyɛʼ mɨghɔ ɨmɨgɨnə ghe.”
Ba bɨ Tsinɨ ɨ Ghɨ Zɔŋ a Yeso ghe
(Alu 9:57-62)
18Mbáʼ Yeso a zɛ́nɨ́ ɨnɔ ɨbɛn wa ɨ kárɨ́nɨ́ ayi lá, wɛrə a sóŋ a mbó bɨyɛʼ ɨbyi ngə́ á bɨ daŋ ngɛn a ndzɨŋ sagɨrə wa zɨ mɔʼɔ ghe. 19Ndiʼ Nyɔngɔŋ wu tse a kɔ́ʼ ngyen ɨ soŋ wəmbo ngə́, “Ndiʼ aŋwaʼnɨ, ma mɨ zɔŋ agho adiʼ atsum za o mɨ ghen.”
20Yeso a sóŋ wəmbo ngə́, “Bɨnɨmaŋ tsi nɨ mɨngvo, bɨsɨ́ŋ tsi nɨ mɨnkə, lá Mɔn Ŋwɔn a se tsi nɨ adiʼ za a chinɨ nɔŋ ɨwu ɨ zhwitə.”
21Wu mɔʼɔ ngyɛʼ a sóŋ wəmbo ngə́, “Tə̧, nyɛʼtɨ á ma fom ngɛn ntwəŋ a ta ɨghə.”
22Lá Yeso a chwɨ́gɨ́ wəmbo ngə́, “Zɔŋ aghə, ɨ nyɛʼtɨ á bɨkfú twəŋ ɨkfú ɨbɛn ɨtsa ghe.”
Yeso a Bɔrɨsɨ a Kɨfɛrɨ Wu Ntɨŋ ə
(Mar 4:35-41; Alu 8:22-25)
23A ghɨnə nkón ntsí a mu abáŋ a nkyi za bɨyɛʼ ɨbyi zɔŋ nkuŋə. 24Mɨmboŋnɨ kɨfɛrɨ wu ntən a zhwúʼ ntsa a mu sagɨrə wa, adzaŋ za mbáʼ nkyiɛ yiŋənɛmə kɨ́nə́ ntsɔ́ʼ abáŋ a nkyi za nkɔʼə mbɨ́ŋə́ shiʼə nɨ zɛrə; lá Yeso a lyenə ayi ɛ. 25Bɨyɛʼ bɨ Yeso tíʼ ngɛn ndzɛm ayi, ɨ soŋ ngə́, “Maʼmbyí, loŋ awɨgɨ ə, bɨgɨ tsi a ntsu nɨvwo ə!”
26Yeso a bítɨ́ awa ngə́, “Nɨ bɔ́gə́ lá mbɨ́ʼ ake le? Abeməntəm azən a kɨ́gɨ́ be tɨsɨŋə!” A tíʼ ndo ngamtɨ a kɨfɛrɨ wa bo nkyiɛ yiŋənɛmə wa; ɨdiʼ tiʼ mbɔnɨ ngə́ tum.
27A kɨ́ʼnɨ́ ɨbɛn, bo bitɨ ngə́, “A nɨ abə́ŋ a ŋwɔn ake a zen mbáʼ atsum a zúʼnɨ́nə́ ayi ɨ ghɛn kuʼ a nye kɨfɛrɨ bo nkyiɛ yiŋənɛmə lá le?”
Yeso a Tsuʼ Mbáŋnɨ́ tsi Bá tsa tsɨ Tsínɨ́ nɨ Bɨdzɨŋ ə
(Mar 5:1-20; Alu 8:26-39)
28Mbáʼ Yeso a yénɨ́ nkón alaʼ bə Gadara a ndaŋ ndzɨŋə sagɨrə wa lá, ɨbɛn bə tse bi bɨbá ba bɨ fúnɨ́ a mu mɨfúʼ ma bɨ kɨ́nə́ ntwə̌ŋ ɨkfú ɨbɛn ɨwu lá, bɨ bom ayi ɛ. Ɨbɛn ben bɨ tsí nɨ bɨdzɨŋ a mu ɨnye ɨtsa ghe. Ma lan, bo kə́ ntsɛ́gə́ a nye ndóm wa ŋwɔn tse a chínɨ́ keʼ zhwəŋtɨ a ntsǎ a ndóm məwa ə. 29Mbáʼ bo bómnɨ́ a Yeso lá, bo byí ntɔ́nkɨ́ mbitɨ ngə́, “Mɔn Ŋwi, bɨgɨnə tsi lá nɨ anu ake le? O yen ɨghan lá a nɨ́ŋ ngɨ́ʼ a nye bɨgɨ bɔŋ á nkfu za ɨ kuʼnɨnɨ ɨ yen le?”
30A kárɨ́kɨ́ adiʼ məwa, akarɨ a bɨkəkfunyam a tsí ɨwu ndzɨə ghe. 31Ma lan, bɨdzɨŋ ba búʼtɨ́ mbó a mbó Yeso ɨ soŋ ngə́, “Be o fɨgɨ awɨgɨ, tsagɨ awɨgɨ a mu akarɨ a bɨkəkfunyam zhirɨ ə.”
32A tíʼ sóŋ a mbó bo ngə́, “Ghɛnə.” Ma lan, bo fú ntiʼ nkón a nye bɨkəkfunyam ba. Akarɨ za atsum a zhwúʼ ɨ shiʼ abaŋ za ɨ sɔ́ʼ awa a mu sagɨrə wa ɨ shwimnkɨ ɨwu ə.
33Ɨbɛn ba bɨ kɨ́nə́ ntsǐŋ bɨkəkfunyam ba bɨ kɨ́ə ngɛn a mu ntáʼmbagə wu wi nkərɨ anu atsum nkwiʼtɨ a za a fúnɨ́ a nye ɨbɛn ba bɨ tsínɨ́ nɨ bɨdzɨŋ ba a mu ɨnye ɨtsa lá. 34Ma lan, ŋwɔn tsum a mu ntáʼmbagə wu wi wa tíʼ fú ngyén mbom a Yeso; bɨ zɛnə ayi, ntiʼ mbuʼtɨ mbó wəmbo ngə́ á fu ayi a mu alaʼ bo ghe.
انتخاب شده:
Matyo 8: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, CABTAL
