Matyo 14
14
Adzaŋ za Yoane Ngaŋ Nga Nkyi a Kfónə́
(Mar 6:14-29; Alu 9:7-9)
1A bé a nkfu məwa lá, Ɛrɔd, ŋwɔn wa a kɨ́nə́ sáʼə Mbuʼ Galili, a zúʼ anɛʼɛtɨ a Yeso; 2ɨ soŋ a mbó bɨkum ɨbyi ngə́, “A lanɨ mbe lá Yoane Ngaŋ Nga Nkyi wa, mbáʼ a zhwemnɨnɨ a mbó nɨvwo, nə nɨ anu za a tsinɨ nɨ mɨtən a ngɨ ɨnu tsɨ yerɨnɨ-yerɨnɨ lá.”
3Mbɨ́ʼ ngə́ Ɛrɔd a kwɛ́nə soŋ bɨ ko a Yoane, ngɨ bɨ korɨ nɨ mɨnkɨ mɨ atɨŋə, ɨ nɨŋ atsáŋ ə. A ghɨ́ mə lan lá mbɨ́ʼ a Ɛrodiasɨ, ngwe mɨma Ɛrɔd wa bɨ kɨ́nə́ ntɔ́ŋə́ ngə́ Firɨbɔ ghe. 4A nye abaŋ zə tse, Yoane Ngaŋ Nga Nkyi a kə́ sóŋə́ a mbó Ɛrɔd nɨ nkfu nɨ nkfu ngə́, “Ka a kuʼnɨ ayi a mbó gho a ndzɔ́ʼ Ɛrodiasɨ ə!” 5Ɛrɔd a tíʼə ndǒ njwitɨ wɛrə, lá mbɔ́gɨ́ ɨmɨgɨ mɨ bə Yuda, mbɨ́ʼ ngə́ bo lɔ́gɨ́ a Yoane a nye ntom Ŋwi ə. 6A ghɨnə mbé njwi nɨdorɨ mbɨ́ʼ njwi za bɨ jwínɨ́ a Ɛrɔd, mɔn Ɛrodiasɨ wu mangye a ŋwɛ́ʼ mbɨŋ a ɨshi ngǒtə ɨbɛn za ɨ tsínɨ́ ɨwu tsum ə. Anu zə wu a lánɨ́ mbɔŋ a Ɛrɔd a nye ndóm wa 7a káʼnɨ́ a mɔn wa ngə́, “Ma kan nɨ ntəm ɨghə ɨtsum ngə́ ma mɨ gha agho nɨ azúm atsum za o bitɨnə!”
8Nɨmi ɨyi a tótɨ́ ayi ngə́ á soŋ a mbó Ɛrɔd ngə́, “Gha aghan, adiʼ wɛnə, tɨtsɔŋnɨ, nɨ atú a Yoane Ngaŋ Nga Nkyi a mu akáŋ asəŋ ə!” 9Ɨfɔ wa a dzə́ŋnə́, lá mbɨ́ʼ akaʼ za wɛrə a kwɛ́nə ngɨ a ɨshi bɨghən ɨbyi bɨtsum, a sóŋ ngə́ á bɨ ghɛn ngɨ adzaŋ za mɔn wa a bítɨ́nɨ́ lá. 10A tíʼ sóŋ bɨ ghɛn sobɨ atú a Yoane a ndá atsáŋ wa. 11Bɨ yén nɨ atú za a mu akáŋ asəŋ nga a mbó mɔn mangye wa, a lɔgɨ ngɛn nɨ zɛrə a mbó nɨmi ɨyi ɛ. 12Bɨyɛʼ bɨ Yoane yén mbyɛʼ akəbyim a Yoane ngɛn ntwə́ŋə́; ntíʼ ngɛ́n sóŋ a mbó Yeso ghe.
Yeso a Dzɨgɨ Mbáŋnɨ́ Nchwuʼ tsi Tə̧̂ ghe
(Mar 6:30-44; Alu 9:10-17; Yoa 6:1-14)
13Mbáʼ Yeso a zúʼnɨ́ anu za a fúnɨ́ a nye Yoane lá, a ló adiʼ wa a mu abáŋ a nkyi ngɛn a nkubə, ntsi ɨwu zɨzɨ ə. Ɨbɛn zúʼ mbɨ́ʼ a məzen, ntiʼ ndo nɨ ntáʼmbagə ɨtsa ɨ nyəŋ nɨ mɨku, ndzɔŋ a Yeso ghe. 14Yeso a fú a mu abáŋ a nkyi za a ngə́rɨ́ sagɨrə wa, ndzɛn ɨnɔ ɨbɛn, mɨlɨŋnɨ ɨwa a lon wə ntəm, a tiʼ ntsuʼ a ba bɨ kɨ́nə́ ngǒ ghe.
15A nkwɛfɔ məwa, bɨyɛʼ ɨbyi yén wəmbo ɨ soŋ ngə́, “Nkfu lanɨnə ntsa be tɨ́sə́n, ɨbɛn keʼ adiʼ wen a nkə́ nchyɛ̌ ghe. Soŋ a mbó ɨbɛn ben á bo shɛmnɨ ngɛn nɨ ɨtóm ɨtóm ndzuŋ mɨdzɨ a mbó ɨtumbəm ɨtsa ɨwu ə.”
16Yeso a chwɨ́gɨ́ ngə́, “Ka bo tsi awa nɨ ndǒ adiʼ wiŋ ə. Bɨŋ mboŋ, ghanə azúm á bo dzɨə!”
17Bo byígɨ́ ngə́, “A nu tsɛʼ mbɛʼ abán tsi tə̧̂ abɔʼnɨ ɨshwú tsi bá mbáʼ bɨgɨ tsinɨ nɨ tsɛrə ghe.”
18Yeso a sóŋ ngə́, “Yenə nɨ tsɛrə a mbó me ɨghə.” 19A sóŋ a mbó ɨbɛn ba ngə́ á bo tsi atú ngyɛn; ntiʼ ndɔgɨ mbɛʼ abán tsa tsi tə̧̂ abɔʼnɨ ɨshwú tsa tsi bá, mbiʼ atú azhi ndyiŋ fɔməbvurə, ntiʼ ntsaʼtɨ a Ŋwi ə. A bátɨ́ mbɛʼ abán tsa ntiʼ nga a mbó bɨyɛʼ ɨbyi, bɨyɛʼ ɨbyi tiʼ ngyɛbɨ a mbó ɨbɛn ba. 20Ŋwɔn tsum a dzɨ́ nzhwúrə́. Bɨyɛʼ ba tíʼ mbə ngotɨ abvuʼ a mɨdzɨ za a bvúrɨ́nɨ́ a luŋ nkye nɨghúm ntsɔb bá ghe. 21Ndvuŋ ɨbɛn wa ɨ dzɨ́nɨ́ ɨ kúʼ nchwuʼ tsi tə̧̂, tɨ kwaʼ bəngye bo bɨ ɨbɔ ə.
Yeso a Tɛ́mə́ Ngěn Atú Nkyi ɛ
(Mar 6:45-52; Yoa 6:15-21)
22Yeso a tíʼ ngɨ bɨyɛʼ ɨbyi kon a mu abáŋ a nkyi za, ntsambyi ngɛn a ndáŋ ndzɨŋə sagɨrə wa, wɛrə a tsi a ndzum ntiʼ ngɨ ɨbɛn ba kwenkə. 23A ghɨnə sóŋ ɨbɛn ba shɛmnɨ, a kɔʼ ngɛn atú a ntáʼ zɨzɨ a ntsaʼtɨ Ŋwi ə. A ghɨnə mbé a nkwɛfɔ, Yeso a tsi ɨwu zɨzɨ ə; 24a nyom məwa, abáŋ a nkyi za a kónə ngɛn nəghagɨ a mu sagɨrə wa. Nkyiɛ yiŋənɛmə ɨ kə́ ngyiŋə ntúmə́ nkɔʼə ngěn nɨ zɛrə atɨ́ mbɨ́ŋə́ shíʼə, mbɨ́ʼ ngə́ kɨfɛrɨ a kə́ njintə abáŋ a nkyi za.
25A tɨtərɨ bɨnyom bɨtárə́ bo bɨnyom bi ntugə, a tənjwi, Yeso a ghɛ́n nkwatɨ bɨyɛʼ ɨbyi, wɛrə a kə́ ntɛ́mə́ ngěn atú nkyi ɛ. 26Bo ghɨnə ndzɛ́n ayi a tɛmə ngěn atú nkyi, ntsi nɨ nɨbɔgɨ be tɨsɨŋə. Bo tɔ́nkɨ́ nɨ nɨbɔgɨ ɨ soŋ ngə́, “A nɨ nkfúshe!”
27Yeso a byí ngam a mbó bo ɨ soŋ ngə́, “Chigɨnɨ ntəm ə! A nɨ me ghe. A nɨ keʼ bɔgə!”
28Bita a chwɨ́gɨ́ a Yeso ngə́, “Maʼmbyí, be a be gho a nkənu, ghɨ á ma ntɛ́mə́ ngěn atú nkyi ngyen mbom agho.”
29Yeso a chwɨ́gɨ́ ngə́, “Yiŋə!” Bita a tíʼ fú a mu abáŋ a nkyi za mbiʼnɨ ntɛ́mə́ ngěn atú nkyi ɨ ghɛn bom a Yeso ghe. 30Lá Bita a ghɨnə ndzɛ́n a kɨfɛrɨ wu ntən, ntsi nɨ nɨbɔgɨ, mbiʼnɨ ɨ shiʼ ghɛn a mbyi nkyi ɛ. A búgɨ́ ɨ soŋ ngə́, “Maʼmbyí, loŋ aghə!”
31Nkfu zi mɔ́ʼɔ́ Yeso a tságɨ́ abó azhi nchwa ayi ɨwu ɨ soŋ ngə́, “Abeməntəm azo a kɨ́gɨ́ be tɨsɨŋə! O chi məŋnɨ lá ngə́ ke le?” 32Bo wa bɨbá bɨ kón a mu abáŋ a nkyi za, kɨfɛrɨ wa tiʼ mbɔrə. 33Bɨyɛʼ bɨ Yeso ba a mu abáŋ a nkyi za tíʼ ngúʼsɨ́ a Yeso, ɨ sóŋə́ ngə́, “Tsɛʼ a nkənu, o lá Mɔn Ŋwi ə!”
Yeso a Tsuʼ Ngaŋ Mɨghɔ a Gɛnɛsarɛ ghe
(Mar 6:53-56)
34Bo dáŋ a sagɨrə wa ɨ fú nkón a ɨshe Gɛnɛsarɛ, 35ɨwu, ɨbɛn ba zhí a ŋwɔn wa Yeso a nɨ wɛrə ghe. Ma lan, bo tíʼ ntsagɨ mɨnkən a mbó ngaŋ mɨghɔ a mu mbuʼ za tsum, bɨ tiʼ ngyen nɨ bo a mbó Yeso ghe. 36Bo búʼtɨ́ mbó wəmbo ngə́ á wɛrə a nyɛʼtɨ á ngaŋ mɨghɔ tsa mɔmtɨ tsɛʼ atsə́ŋ atsɛʼ azhi; bo wa bɨtsum ba bɨ mɔ́mtɨ́nɨ́ a zɛrə, bɨ shwétə́.
انتخاب شده:
Matyo 14: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, CABTAL
