Alukasɨ 24

Adzaŋ za Yeso a Zhwémnɨ́nɨ́ a mbó Nɨvwo

(Mat 28:1-10; Mar 16:1-8; Yoa 20:1-10)

1A nyom njwi, a nye ntsambyi njwi a mu ngabɨ, bəngye ba ghɛ́n atú a nɨshe wa. Bo tíʼtɨ́ bɨnyuʼtə ba bo kyáŋtɨ́nɨ́ lá. 2Bɛrə zɛ́n, bɨ bɨŋsɨ ngɔʼ za a ntsu nɨshe wa ndotɨ nɨ zɛrə ghe. 3Bɛrə kón ngɛn a mu nɨshe na lá nkeʼ akfú a Maʼmbyí Yeso za ɨwu ze. 4Mbáʼ anu za a kɨ́ʼnɨ́nɨ́ awa lá, mbáŋnɨ́ tsi bá, ngwəgɨ ɨtsɛʼ ɨ fúgə ngə́ bú nkə́ ŋwánkə́, vwúkɨ́ ntɛ́m a mbyɛn bo ghe. 5Mbáʼ bɛrə tfúŋnɨ́ ɨtú ɨtsa a ɨshe a mu nɨbɔgɨ lá, mbáŋnɨ́ tsa bítɨ́ awa ngə́, “Nɨ lǒ a ŋwɔn wa a tsinɨ atú ntən a tɨtərɨ bɨkfú lá ɨ nə́ le? 6Waʼtɨnə adzaŋ za wɛrə a sóŋnɨ́ a mbó bən, mbáʼ a bvúrɨ́nɨ́ a Galili#24:6 Alukasɨ 9:22 7ngə́, ‹Bɨ mɨ zagɨ gha a Mɔn Ŋwɔn a mbó ngaŋ ngɨ mɨbvu, á bɨ kwemtɨ a wɛrə atɨ abaŋnɨ-baŋnɨ á bə nzhwemnɨ a ndzum njwi tsi tárə́ ghe.›”

8Bɛrə tíʼ ngwáʼtɨ́ nɨgham nɨ wɛrə, 9ntíʼ tɨ bən atú a nɨshe wa, ɨ mɨ ɨnu tsiŋ ɨtsum a mbó bɨyɛʼ ɨbyi ba nɨghúm ntsɔb mɔ́ʼɔ́ abɔʼnɨ abvuʼ a ɨbɛn ə. 10Bəngye ba bé, Mɛrɨ Matarɨna, Yoana, Mɛrɨ nɨmo bɨ Jemsɨ abɔʼnɨ bəngye bə mɔʼɔ mbáʼ bɨ mɨ́nɨ́ ɨnu tsen a mbó ntóm Yeso tsa. 11Ntóm Yeso tsa kwáʼtɨ́ ngə́ ɨnu tsa bəngye ba mɨ́nɨ́ lá nɨ mɨghan, nkeʼ mɨntəm ɨma a nye tsɛrə nɨŋə. 12Lá Bita a nyɛ́nɨ́ ndo atɨ́ nkɨə ngɛn atú a nɨshe wa; nkfuʼnɨ ndzɛn tsɛʼ atsɛʼ atɨŋndvuŋ zə fú za bɨ kárɨ́nɨ́ ayi ɨwu lá nkeʼ azúm zə daŋ bə ndze. Anu za a fúnɨ́ lá a kɨ́ʼnɨ́ ayi, wɛrə a lo nkwɛn ayi ɛ.

Nɨyen nɨ Ngěn a Emausɨ ə

(Mar 16:12-13)

13Tsɛʼ njwi məwa ɨbɛn bi bɨbá ba bɨ kɨ́nə́ ndzɔŋə a Yeso ló ntíʼə ngěn atom zə tse za bɨ kɨ́nə́ ntɔ́ŋə́ ngə́ Emausɨ mbáʼ a bénɨ́ tso bɨmarɨ bi samba mbɔŋ ɨ kon a Yerosalɛm, 14bo tíʼə ngamnə bo nɨbo mbɨ́ʼ ɨnu ɨtsum tsa tsɨ fúnɨ́ lá. 15Mbáʼ bo kɨ́nə́ ngyiŋə ngámnə́ nkə́ ntǎŋ ngam lá, Yeso zɨmboŋ a zɔ́ŋ ɨ fátɨ́, ngyénə́ bo bo ghe. 16Azúm zə tse a bvúrɨ́ ɨmɨgɨ ɨma, bo ze ayi nkeʼ bə njiɛ. 17Yeso a bítɨ́ awa ngə́, “Ngam zen za nɨ yenə ntáŋə́ lə a nɨ mbɨ́ʼ ake le?”

Bo tɛ́mnkɨ́ atəchi nɨ mɨlɨŋnɨ ə. 18Ŋwɔn nɨbo, mbe Kliobasɨ, a bítɨ́ ayi ngə́, “O lá ngən a Yerosalɛm wa ka a zhi ayi ɨnu tsa tsɨ funɨ ɨwu a mu njwi tsen le?” 19Yeso a bítɨ́ ngə́, “Tsɨŋə ɨnu le?” Bo sóŋ wəmbo ngə́, “Ɨnu tsa tsɨ funɨ a nye Yeso ŋwɔn bə Nazarɛ mbáʼ a bénɨ́ ntom Ŋwi, ntən a mu nɨgham abɔʼnɨ ngɨnɨ mɨnu a ɨshi ɨmɨgɨ Ŋwi abɔʼnɨ ɨbɛn bɨtsum ə. 20Bɨntumshe bə wi abɔʼnɨ bɨsáʼ bɨ alaʼ ghá ayi ngə́ á bɨ chɛrɨ ɨsáʼ ɨyi ngə́ bɨ mɨ zhwitɨ ayi ɛ. Bɨ tíʼ nkɨ́ nkwémtɨ́ ayi atɨ abaŋnɨ-baŋnɨ ə. 21Mbáʼ bɨgɨ kwɛnə ntsiŋə nɨ ntəm ɨtsum ngə́ a nɨ zɨ wa a ghɨnɨ kyɛtɨ mɨnkɨ mɨ abuʼ a nye Izrai ghe. Ɨ bə kɨ ghɛn ɨwu, a nɨ njwi tsi tárə́ ndɔgɨnɨ mbáʼ anu məzen a fúnə́. 22A ngěn nɨ mbyi, bəngye bə tse a tɨtərɨ bɨgɨ chi nkɨʼnɨ awɨgɨ ə. Bo chi ngɛn atú a nɨshe wa a tənjwi a mbáʼəmbáʼə, 23lá bo lo nkeʼ akfú azhi ze. Bo ló nkwɛn ɨ soŋ ngə́ bo ló ndzé ndzɛm nəzhwɨgɨnɨ bɨtsen bɨ ndá bɨ Ŋwi bə tse bɨ soŋ a mbó bo ngə́ Yeso a zhwemnə. 24Bɨgɨ bə mɔʼɔ ló ngɛn atú a nɨshe wa ndzɛn ngə́ akfú a Yeso a se ɨwu bə mbe, tsɛʼ adzaŋ za bəngye ba lonɨ soŋ lá.”

25Yeso a tíʼ sóŋ a mbó bo ngə́, “Nə nɨ adzaŋ za nɨ dzɨŋtɨnɨ, ngɔgɨ a nɨ́ŋ mɨntəm ɨmən a nye ɨnu ɨtsum tsa ntóm Ŋwi kwɛ́nə sóŋ! 26A kwɛ́ nkeʼ kuʼnɨ ngə́ á Wa bɨ Zɔ́ʼnɨ́ a ze ngɨ́ʼ a mu ɨnu tsiŋ ɨtsum ntiʼ nkon a mu nɨfáŋ ɨni le?” 27Yeso a tíʼ ngɛn mbiʼnɨ ntwiʼtɨ ɨnu mbɨ́ʼ ayi a mu aŋwaʼnɨ a Ŋwi ndɔgɨnɨ a nye ɨŋwaʼnɨ Mǒse ntiʼ ndzɔŋtɨ nɨ ɨŋwaʼnɨ ntóm Ŋwi ɨtsum ə.

28Bo kɨ chínə ntíʼə nkúŋə́ a mu atom za bo kɨ́nə́ ngěn ɨwu lá, Yeso a lɔ́btɨ́ tso a mɨ fəŋ awa ɨ ghɛn nɨ mbyi; 29lá bo lɛ́gɨ́ ayi nchwátɨ́ ayi ɨ soŋ ngə́, “Yen ndye bɨgɨnə mbɨ́ʼ ngə́ nkfu ɨ tsanə, ɨtfúʼ kɨnə nkɨ mbiʼnɨ ɨ fɨ́ŋə́ ghe.” Wɛrə tíʼ mbém ndzɔ́ŋ awa ɨ ghɛn lye bo bo ghe. 30Bo bo ghɨnə ntsí atú atɛkɨ a ndzɨ́ mɨdzɨ, wɛrə a lɔgɨ abán, ntsaʼtɨ a Ŋwi, mbagɨnɨ a zɛrə nga a mbó bo ghe. 31Ɨmɨgɨ ɨma vwúkɨ́ ŋáʼnɨ́ bo tiʼ nji ngə́ a lo mbe lá Yeso ghe. A nyom məwa a vwúkɨ́ mbyé a ɨmɨgɨ bo ghe. 32Bo tíʼə ngamnə bo nɨbo, ɨ sóŋə́ ngə́, “A ló nkeʼ tsi lá tso ngə́ mɨntəm ɨmɨgɨnə shǎ a nyom wa a lonə ngamə a mbó bɨgɨnə a ndómnji ɨ fɨ́ʼtɨ́ aŋwaʼnɨ a Ŋwi a mbó bɨgɨnə lá le?”

33Tsɛʼ a nyom məwa, bo nyɛ́nɨ́ ndo mbə́ nkwɛ́n ngɛ́n a Yerosalɛm adiʼ wa bɨyɛʼ ba nɨghúm ntsɔb mɔ́ʼɔ́ ghótɨ́nɨ́ bo bɨ ɨbɛn bə mɔʼɔ lá. Bo yenə nkon, 34bɨ fɨʼtɨ a mbó bo ngə́, “Tsɛʼ a nkənu Maʼmbyí a zhwemnə! Wɛrə a fu a ɨshe a ɨshi Samɔn ə!”

35Ɨbɛn ba bɨbá tíʼ nkɨ́ nkə́rɨ́ ɨza nkərɨ a mbó bo ghe. Bɛrə kə́rɨ́ anu za a fúnɨ́ a ndómnji abɔʼnɨ adzaŋ za bo zhínɨ́ ngə́ a nɨ Maʼmbyí a nyom wa a bátɨ́nɨ́ abán za.

Yeso a Fu a Ɨshe a Ɨshi Bɨyɛʼ ɨbyi ɛ

(Mat 28:16-20; Mar 16:14-18; Yoa 20:19-23; Ɨfa 1:6-8)

36Tsɛʼ a nyom wa ɨbɛn ba bi bɨbá kɨ́nə́ sǒŋ ɨnu tsen lá, Maʼmbyí zɨmboŋ a bə nkwiʼ nkɨ ngvukɨ fu a ɨshe a tɨtərɨ bo ntɛm, ɨ soŋ ngə́, “A mbɔnɨ tsi a mbó bɨŋ ə.”

37Ngvurɨ zɨ ngwi ɨ tsí a nye ngǒtə za, bo kwaʼtɨ ngə́ bo ze a nkfúshe. 38Lá a bítɨ́ awa ngə́, “Nɨ vurɨ lá ake le? Nɨ bítɨ́ ɨbítɨ a mu mɨntəm ɨmən lá ngə́ ke le? 39Zɛnə azɨŋ, mbó ɨmə, zɛnə mɨku ɨmə. Nɨ chi kɨ zɛn ngə́ a nkənu a nɨ me awiŋ ə. Mɔmtɨnə aghə, a njíɛ a nkənu ngə́, ka ma be aghan nkfúshe. Ka nkfúshe a nchyɛ̌ ayi nɨ ɨnyam ɨnye nɨ ɨkwɛn ɨnye tso adzaŋ za ma tsinɨ nɨ tsɛrə lá.”

40A sóŋ a məzen ntiʼ ndiʼ mbó ɨmyi bo bɨ mɨku ɨmyi a mbó bo ghe.#24:40 Ɨŋwaʼnɨ tsə mɔʼɔ se nkaŋ 40 kwiʼtə. 41Mbáʼ nɨdorɨ abɔʼnɨ atsanɨ a tsínɨ́ a ntəm ɨbo, bo kə mbvúrə́ mə́ŋnə́ lá, wɛrə a bítɨ́ awa ngə́, “Nɨ tsi nɨ azúm zə dzɨnɨ ɨghan le?” 42Bɨ ghá abagɨ a ɨshwú zə lamnɨ wəmbo 43a kwarɨ nkfurɨ a ɨshi bo ghe.

44A tíʼ sóŋ a mbó bo ngə́, “Nə nɨ ɨnu tsa ma sóŋnɨ́ a mbó bən mbáʼ ma bvúrɨ́nɨ́ ntsi bɨgɨnə lá: anu atsum za bɨ ŋwáʼnɨ́nɨ́ a mu Nyɔngɔŋ Mǒse, ɨnu tsa ntóm Ŋwi ŋwáʼnɨ́nɨ́ ndzɔŋ nkwiʼtɨ a tsa bɨ ŋwáʼnɨ́nɨ́ a mu bɨsalms lá, ɨ ghɨ́ ntsí nɨ ɨ fuə a nye anu ə.”

45A tíʼ ŋáʼtɨ́ ɨtú tsa ngə́ á bo lanɨ nji ɨnu tsen tsa bɨ ŋwáʼnɨ́nɨ́ a mu aŋwaʼnɨ a Ŋwi lá, 46ntiʼ soŋ a mbó bo ngə́, “Bɨ ŋwaʼnɨ lá ngə́: Wa bɨ Zɔ́ʼnɨ́ wa a tsi nɨ ɨ zagɨ ɨ ze ngɨ́ʼ, ɨ zagɨ zhwemnɨ a mbó nɨvwo a ndzum njwi tsi tárə́ ghe. 47Nɨ ɨkum ɨyi, bɨ mɨ zagɨ laʼ nkən mbɨ́ʼ mbəŋ ntəm a nye mɨbvu ɨ tsi a bagɨ Ŋwi abɔʼnɨ ndɨgɨnɨ mɨbvu a mbó ɨlaʼ ɨtsum, ɨ biʼnɨ a Yerosalɛm ə. 48Nɨ lá bətɛmə-ndzě a nye ɨnu tsiŋ ɨtsum ə. 49Me mboŋ ma mɨ tsagɨ a mbó bən a wɛrə wa Ta ɨghan a kaʼnə awən nɨ wɛrə ghe. Lá nɨ tsi nɨ ɨ zagɨ ghɔŋ a mu ntáʼmbagə wu wi ɨ kuʼnɨ nkfu za mɨtən mɨ lo atɨ́ ɨ shiʼ atú bɨŋ ə.”

Bɨ Lɔgɨ a Yeso Nkɔʼ nɨ Wɛrə a Fɔməbvurə ghe

(Mar 16:19-20; Ɨfa 1:9-11)

50Yeso a tíʼ ndɔgɨ awa bo bo fu a mu ntáʼmbagə wu wi wa ngɛn a nye aghagɨ zə sa nkuʼ a Bɛtani, adiʼ wa wɛrə a tságɨ́nɨ́ mbó ɨmyi atɨ́ ɨ fɔgɨ awa ghe. 51Mbáʼ a kɨ́nə́ fɔ́gə́ awa lá, ɨ nyɛʼtɨ awa bɨ lɔgɨ ayi nkɔʼ ngɛn nɨ zɨ a fɔməbvurə ghe. 52Bo tíʼ ngúʼsɨ́ a wɛrə mbə́ mbən awa a Yerosalɛm, nɨ nɨdorɨ nə wi a ntəm bo ghe. 53Bo chí ntíʼə nchyɛ̌ a mu Ndáŋwi zɨ Ngwi tsɛʼ nkfu tsum ngǎ a mɨya a mbó Ŋwi ə.

انتخاب شده:

Alukasɨ 24: MNT

های‌لایت

به اشتراک گذاشتن

کپی