Yoane 2
2
Nɨzɔ́ʼ na a Kana ghe
1A ghɨnə mbé a nye njwi tsa tsɨ kúʼnɨ́ tsi tárə́, nɨzɔ́ʼ nə tse tsi a mu ntáʼmbagə Kana a mu Mbuʼ Galili ə. Nɨmi bɨ Yeso a tsí ɨwu ə. 2Bɨ kɨ́ ngón a Yeso bo bɨ bɨyɛʼ ɨbyi a nɨzɔ́ʼ məna ə. 3Mɨluʼ ghɨnə mí, nɨmi bɨ Yeso a soŋ a mbó Yeso ngə́, “Ka bo bə nkwiʼ ntsi a wa nɨ mɨluʼ ə.”
4Yeso a chwɨ́gɨ́ wəmbo ngə́, “Mangye, azɔgə ɨwu a nɨ ake le? Nkfu ɨzə bvurɨ tɨ kuʼə.”
5Nɨmo bɨ Yeso a sóŋ a mbó ngaŋ afaʼ tsa tsɨ tsínɨ́ adiʼ wa ngə́, “Ghɨnə tsɛʼ anu atsum za a soŋnɨ a mbó bɨŋ ə.”
6Bə Yuda tsi nɨ mbɔm ɨ sugɨ ɨtumbəm ɨtsa ɨ fɛm a mu mbɔm ə. A sugɨ ɨtumbəm ɨtsa ɨ fɛm a mu mbɔm, bɨtɛrɨ bə wi ba bɨ tónɨ́ a mu mɨngɔʼ tɛ́mnkɨ́ adiʼ wa bi ntugə ghe. Táʼ tɛrɨ a kɨ chi tíʼtɨ́ bɨlita nkɨ wu fɨgɨnə. 7Yeso a sóŋ a mbó ngaŋ afaʼ tsa ngə́, “Lwɨgɨnə bɨtɛrɨ ben nɨ nkyi ɛ.” Bo tíʼ ndwɨ́gɨ́ a bɛrə bɨ lunkɨ ndzabtɨ ə. 8Yeso a tíʼ sóŋ a mbó bo ngə́, “Tɨtsɔŋnɨ, tutɨʼ nkyi wu tse, ngɛn nga a mbó fɨ́gɨ́ a ntaŋ adiʼ a nɨzɔ́ʼ wiŋ ə.” Bo túʼtɨ́ nkyi wa wu tse ngɛn nga wəmbo, 9mbáʼ ɨ bə́ŋnə ntiʼ mɨluʼ, wɛrə a zhwiʼtɨ a mɛrə ghe. Wɛrə a sé zhi adiʼ za mɨ lónɨ́ ɨwu, (lá, a nkənu, ngaŋ afaʼ tsa tsɨ túʼnɨ́ nkyi wa zhyɛ́); fɨ́gɨ́ a ntaŋ adiʼ a nɨzɔ́ʼ wa a tíʼ ntɔ́ŋ a ndóm mɨngən 10ɨ soŋ wəmbo ngə́, “Ŋwɔn tsum a fomə nɨ́ŋtə́ mɨluʼ mə shiʼnɨ ma, bɨghən ghɨ tagɨtɨ awa ɨ no, bɨ tiʼ ngyen nɨ ma ka mɨ nyɛtɨ mbɔŋ ayi lá. Lá o lɛn a mə shiʼnɨ mbaŋnɨ ngyen nɨ mɛrə be tɨtsɔŋnɨ ə!”
11Yeso a ghɨ́ a ntsambyi anu zə yerɨnɨ-yerɨnɨ zen lá a Kana a mu Galili; ɨwu wɛrə a kyɛ́ʼ nɨfáŋ ɨni, bɨyɛʼ ɨbyi tiʼ nɨŋ mɨntəm ɨma wə ɨnye ə.
12Məzen a tsanə, Yeso abɔʼnɨ nɨmi ɨyi, ɨbɔmbɨma ɨbyi bə mbáŋnɨ́, nkwiʼtɨ bɨyɛʼ ɨbyi ghɛn a Kabɛrɨnaum ntsi ɨwu atú njwi tsɨ tse ghe.
Yeso a Kɨŋ Ngaŋ Ntaŋ Mɨtan a Ndáŋwi zɨ Ngwi ə
(Mat 21:12-13; Mar 11:15-17; Alu 19:45-46)
13Nɨdorɨ nɨ Tsa-yɛʼnɨ tíʼ abó, ma lan, Yeso a kɔ́ʼ ngɛn a Yerosalɛm ə. 14A Ndáŋwi zɨ Ngwi, a kwátɨ́ ɨbɛn ba bɨ kɨ́nə́ fǐŋ bɨnkɔʼndzum, mbyindzɨ, bɨbvugɨrə-fɨkon abɔʼnɨ ngaŋ nkwebtɨ nkáb tsa tsɨ tsínɨ́ atú afaʼ bo ghe. 15Ma lan, wɛrə a báʼ mɨnkɨ a nye ngwan, nkɨŋ ɨbɛn ba bɨtsum bɨ fukɨ a Ndáŋwi zɨ Ngwi, nkwiʼtɨ mbyindzɨ tsa abɔʼnɨ bɨnkɔʼndzum ba. Wɛrə a tíʼ mbənkɨ ɨtɛkɨ ngaŋ nkwebtɨ nkáb tsa atfúŋ atfúŋ, ndzagɨ nkáb atɨŋə ɨtsa ghe. 16Wɛrə a sóŋ a mbó ɨbɛn ba bɨ kɨ́nə́ fǐŋ bɨbvugɨrə-fɨkon ba ngə́, “Lɔgɨnə ɨdzúm tsenə ntsa fukɨnə nɨ tsɛrə ɨghə! Nɨ kyɛntɨ a ngɨ ndá Ta ɨghan a nye adiʼ a mɨtan ə!” 17Bɨyɛʼ ɨbyi wáʼtɨ́ ngə́ aŋwaʼnɨ a Ŋwi a soŋ ngə́, “O Ŋwi, nkɔŋə za ma kɔŋnɨ ndá ɨzo ɨ kɨ́ə tso ɨmugɨ a mu ɨnye me ghe.”
18Bɨsáʼ bɨ ɨlaʼ bɨ bə Yuda chwɨ́gɨ́ nɨ abítɨ ngə́, “Anu zə yerɨnɨ-yerɨnɨ za o chinɨ ghɨ a ndiʼə ngə́ o tsi nɨ mɨtən a ngɨ məzen a nɨ zɨŋə le?”
19Yeso a chwɨ́gɨ́ ngə́, “Kumnə Ndáŋwi zɨ Ngwi ziŋ ə, ma mɨ bə vwu a zɛrə wədiʼ atú njwi tsi tárə́ ghe.”
20Bo bítɨ́ ayi ngə́, “A lɔ́gɨ́ ɨlom mɨghúm mi nɨkwa nɨ ntsɔb ntugə a ngvwu Ndáŋwi zɨ Ngwi ziŋ ə, o mɨ vwu a zɛrə atú njwi tsi tárə́ le?”
21Lá Ndáŋwi zɨ Ngwi za Yeso a kɨ́nə́ ngamə mbɨ́ʼ a zɛrə lá, ɨ bé mbəmnye ɨzhi ɛ. 22Mbáʼ bɨ zhwémnɨ́nɨ́ ayi a mbó nɨvwo, bɨyɛʼ ɨbyi tíʼ ngwáʼtɨ́ ngə́ a sóŋnə a məzen; ntiʼ nɨŋ mɨntəm ɨma a nye aŋwaʼnɨ a Ŋwi abɔʼnɨ anu za Yeso a sóŋnə́.
Yeso a Zhi Mɨntəm mɨ Ŋwɔn Mɨsɔŋ a Ntsu Tsum ə
23Mbáʼ Yeso a bvúrɨ́nɨ́ ntsí a Yerosalɛm a nkfu nɨdorɨ nɨ Tsa-yɛʼnɨ na, bə ghaʼnɨ nɨ́ŋ mɨntəm ɨma wə ɨnye mbáʼ bo zɛ́nɨ́ ɨnu tsɨ yerɨnɨ-yerɨnɨ tsa a ghɨ́nə́. 24Lá Yeso a sé lɔgɨ anu aza tso azúm zə tse mbɨ́ʼ ngə́ wɛrə a zhí mɨntəm ɨma tsɛʼ mɨtsum ə. 25Anu zə tse a sé tsi ɨwu ngə́ á ŋwɔn tsɛrə a fɨʼtɨ a mbó zɨ mbɨ́ʼ a ŋwɔn mɨsɔŋ a ntsu, mbɨ́ʼ ngə́ wɛrə zɨmboŋ a zhí atsum za a tsínɨ́ a mu mɨntəm ɨma ghe.
انتخاب شده:
Yoane 2: MNT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, CABTAL
