Luka 9
9
İsa des u dı telebanê xo rusneno karı
1İsay veng da des u dı hawariyanê xo, qewetı u hukım day inan kı i cınan pêronan sero hukım bıkerê u nêwesan wes kerê. 2Bado İsay i rusnay kı xebera Hukumdariya Heqi bıderê u nêwesan wes kerê. 3İsay telebanê xo rê nia vat: “Sıma kı veciyay ray, nı çü, nı turık, nı nan, nı ki perı bigêrê lê xo, işliga zêdiye bilı xo de mebêrê. 4Sıma kı kuti kamci kê, hata kı a sukı ra sonê, uca de bımanê. 5Ekı sıma şi cayê, mıletê ucay kı sıma nêwasti, key kı sıma uca ra şi, tozê nınganê xo rasanerê kı no inan rê sayidinı bıbo.” 6Nay dıma hawariyê İsay kuti ray, dewı bı dewı feteliyay. İnan her ca de, Mijdania Xeleşiyayenı denê mıleti, mordemê nêwesi kerdenê wes.
7Hukumdarê Celile Hirodes kı no çiyo kı İsay kerdi bi eşiya pê, sas bi mand. Çıkı tayênan vatenê Yahya merdenı ra peyser amo. 8Tayênan ki vatenê Pêxember İlyas aşiyo. Tayê binan ki vatenê kı pêxemberanê verênan ra jüyo, merdenı ra peyser amo. 9Hirodesi vat: “Serê Yahyay mın bıxo da pırodayenı. Nowo kı heqa iy de ez ni xeberan eşinan pê, no mêrık kamo?” Hirodes rayê feteliyenê kı İsay bıvênero.
İsa phanc hazar kesi keno mırd
10 Hawari key kı peyser amay, çiyê kı kerdê, ni pêro İsay rê qeşi kerdi. Bado İsa teyna bı hawariyanê xo'a şi jü sukı, namê na sukı Beytsayda bi. 11Mılet kı eşiya pê, İsa bı hawariyanê xo'a şiyo a sukı, mılet ki İsay dıma şi uca. İsay inan rê vat: “Xêr amê!” İnan rê Hukumdariya Heqi qeşi kerdı, iyê kı nêwesê kerdi wes.
12Cema sani, des u dı telebê İsay amay lêwı, inan cı rê vat: “Wayir, mıleti rê vacı, nıta yaban yajiyo, sêrê dewan u mezranê dormi de saba rakutenı xo rê ca bıvênerê, uca de vêrê xo mırd kerê.”
13İsay telebanê xo rê vat: “İnan sıma mırd kerê.”
İnan vat: “Ma de teyna phanc nani u dı masi estê. Yan tı wazenay ma şimım na hente mıleti rê nan bigimı?” 14Uca de nejdiyê phanc hazar tenı camerdi esti bi.
İsay telebanê xo rê vat: “Sıma inan pêronan phancas phancas bıderê ronistenı.” 15Teleban na vatenı kerdı, pêro day ronistenı. 16İsay phanc nani u dı masi gıroti, asmên ro sêr kerd u şukır kerd. Na rey ni parı kerdi, day telebanê xo kı bıderê mıleti. 17Her kesi werd, bi mırd. Uca de xeylê nan ver ra mand. Nowo kı ver ra mandi bi, des u dı sepeti pê pırr biyê.
Petrus İsay nas keno
18Rocê, İsay düay kerdenê, telebê xo ki lêwı de bi. İsay telebanê xo ra pers kerd: “Sar vano, ez kaman?”
19İnan vat: “Tayê vanê, ‘Yahyawo, merdenı ra peyser amo’. Tayê ki vanê, ‘Pêxember İlyaso’, tay bini ki vanê, ‘Pêxemberanê verênanê binan ra jüyê, merdenı ra peyser amo.’ ”
20İsay vat: “Ma, sıma se vanê? Gorê sıma ez kaman?”
Petrusi vat: “Tı Mesihê Heqiay.”
21İsay i temı kerdi kı nay kesi rê mevacerê. 22Bado İsay vat: “Gereko ez, Lacê Mordemi, zaf decan banceri. Pilê mıleti, rayibê pili, jü ki ilimdarê itıqati mın qebul nêkenê. Ez ênan kistenı, feqet hirê roci tepia, merdenı ra peyser ênan.” 23İsay bado her kesi rê vat: “Kamo kı wazeno mı dıma bêro, va xo ra ravêro. Her roc çarmıxê xo bigêro hermanê xo ser, mı dıma bêro. 24Kamo kı wazeno canê xo bıxelesno ra, iy vindi keno. Feqet kamo kı saba mın canê xo vindi keno, iy xelesneno ra. 25Na dina kı pêro ê jü mordemi bo, ekı iy canê xo vindi kerd, çık kuno iy dest? 26Mı ra ki, vatena mı ra ki serm mekerê. Ez, Lacê Mordemi roştia xo de, roştia Heqi de, jü ki roştia melekanê bımbarekan de ênan. Kamo kı mı ra serm keno, key kı ez aman, ezi ki inan ra serm kenan. 27Sıma rê rastiye vaceri: İyê kı nıta derê, inan ra tayêni hata kı Hukumdariya Heqi mevênerê, nêmırenê.”
Hawari İsay wertê roşti de vênenê
28İsay ni qesan dıma, nejdiyê heşt roci tepia, Petrus, Yuhanna, Yaqub gıroti şi ko kı düan bıkero. 29Key kı İsay düay kerdenê, rüyê xo vuriya ya, kıncê xo bi sipi, zê roştia buluski bereqiyay. 30Xafılde, dı pêxemberi lê İsay de aşiyay, inan iy de qeşi kerd. Ni, Musay bı İlyasi'a#9:30 Musa u İlyas: Ni saba Yahudiyan pêxemberê mühimê. Ninan waxtê verênan de weşiya xo ramıtê. bi. 31Ni zê roştia asmı bereqiyenê; ninan ni nejdiyan de İsa sı suka Yeruşalimi de dina ra bırrino ya, qalê ay kerdenê.
32Petrusi bı i binan'a hewn ra şi bi. Key kı vesti ra, roştia İsay u dı pêxemberê kı lê İsay derê, i di. 33Musay bı İlyasi'a waxto kı lê İsay ra bişiyenê, Petrusi İsay rê vat: “Malım, ma ê rınd kı nıta derım. Hirê çardaxan bıvırazım: jüyê to rê, jüyê Musay rê, jüyê ki İlyasi rê.” Petrus xo de nêbi, nêzanıtenê kı se vano.
34Key kı Petrusi ni qesi vati, hewrê ama, inan rê şiyê kerdı. Şiya hewri kı dormê ninan gırotı, ni telebi tersay. 35Hewri ra vengê Heqi inan rê vat: “No Lacê mıno, mın no çinıt we. Gos bıderê iy.” 36Veng kı bırriya, uca de teyna İsa mandi bi. Petrusi, Yuhannay, u Yaqubi çiyo kı uca de di bi, ninan dıma qe vengê xo nêvet, i rocan de kesi rê qalê ninan nêkerd.
İsa jü laceki ra cıni veceno
37Rocê tepia, İsa u telebê xo key kı ko ra amay war, uca de sılxetiya de gırsı vera İsay şiye. 38Wertê na sılxetiye ra, jü mêrıki İsay rê vat: “Malım, se beno, lacê mı ro rey sêr kı. Xora, teyna jü domanê mın esto. 39Reyan reyan cın kuno wertê niy. No layık xafılde qirreno, lerceno, kef kuno fek. Cın layıki keno dırbetın, iy zaf çetın ca verdano. 40Mın telebanê to rê mınetı kerdı kı layıkê mı ra cıni vecerê, inan nêşkiyay.”
41Ni qesan ser, İsay nia vat: “Sıma, neslo bêiman sıma; sımao kı ray ra veciyê sıma! Ez endi hata koti bı sıma'wa pia fınderi, endi hata koti sıma rê damis deri?” Nay dıma mêrıki rê vat: “Lacê xo biya nıta!”
42Key kı lacek ama lê İsay, cıni lacek zıng kerd, da herd ro, o herd de sana ra. İsay kı na diye, cıni rê xuli bi, layık kerd wes, peyser da pi. 43Her kes qudreta Heqi ver de sas bi mand.
İsa reyna qalê merdena xo keno
Her kes owo kı İsay kerdi bi, vera iy de sas bi mand, İsay a waxt telebanê xo rê nia vat: 44“Rınd gos bıderê, ni qesanê kı sıma rê vanan: Ni nejdiyan de Lacê Mordemi danê dest.” 45Telebanê İsay ni qesi fam nêkerdi, Heqi manê ni qesan inan ra dardi bi we kı i ninan fam mekerê. İnan tersenê kı heqa na mesela de İsay ra thaba pers kerê.
En berc kamo?
46Telebanê İsay mabênê xo de qeşi kerd kı inan ra kamcin en berco. 47İsay zana, i aqlê xo ra çık vêrnenê ra. İsay domano de qıckek gırot lê xo, 48telebanê xo rê vat: “Kam kı ni domanê qıckeki saba mın qebul keno, o mın ki qebul keno. Kamo kı mın qebul keno, Heqo kı ez rusnan, iy ki qebul keno. Wertê sıma de owo kı en cêro, o en berco.”
49Yuhannay ni qesanê İsay ser nia vat: “Malım, jüyê bı namê to'a cın vetenê, feqet o ma ra nêbi. Ay ra, ma ki nêverda hini bıkero.”
50İsay vat: “Raverderê bıkero. Kamo kı vera sıma nêfındeno, o lê sıma dero.”
Mıletê Samirye İsay nêwazeno
51Waxto kı İsa sêro asmên nejdi bi. İsay şiyayena Yeruşalimi kerdi bi aqlê xo. 52Xo ra raver xeberdari rusnay. Xeberdari şi jü dewa Samirye kı uca de saba İsay her çi hazır kerê. 53Mıletê nıtay zanenê kı İsa sono Yeruşalim, ay ra inan o nêwast#9:53 Mabênê Yahudiyan bı ê Samiryeyican de dısmeninı esti biye, ay ra Samiryeyican nêwastenê jü Yahudi sukanê inan ra ravêro.. 54Telebanê İsay ra Yaqubi u Yuhannay kı na diye, inan İsay rê vat: “Wayir, asmên ra adır bıvarnım, ninan qırr kım?”
55İsa gêra ya, inan rê xuli bi. 56Bado şi dewa de binı.
İsay dıma şiyayenı
57Key kı i ray ra şiyenê, jü mêrıki İsay rê vat: “Tı sêrê koti, ezi ki to dıma ênan.”
58İsay ki vat: “Ê lüyan lanê xo estê, ê çuçıkan halindê xo estê, feqet saba Lacê Mordemi cayê çino kı serê xo rono.”
59İsay mêrıkê de bini rê vat: “Mı dıma bê.”
Mêrıki ki vat: “Fındı, ez sêri hata kı piyê mın mıreno, ez lê iy de fınderi.”
60İsay mêrıki rê vat: “Merdan ca verdê, va merdanê xo bıxo wedarê. Tı so, xebera Hukumdariya Heqi bıdı.”
61Mêrıkê de bini İsay rê vat: “Wayir, ez to dıma ênan, feqet fındı, ez sıftı sêri kê ra, xatır bıwazeri.”
62İsay iy rê vat: “Kamo kı cıtı ramıno, gereko vırniya xo ro sêr kero. Kamo kı peyser sêr keno, layıqê Hukumdariya Heqi niyo.”
اکنون انتخاب شده:
Luka 9: kiu
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 (Active), Wycliffe Bible Translators, Inc. All rights reserved.
