मत्ती 12
12
यीशु, भक्ति करणे रोजे मालिक
मरकुस 2:23-28; लूका 6:1-5
1यक भक्ति करणे रोज#12:1 हफ्ते सातवां रोज, जे यहूदी मेह्णु शुचा मान कइ परमेश्वरे पुजा अराधना कतेथ त कामकाज केआं अराम कतेथ। यीशु त तसे चेले यक बगे बइ घेण लगो थिए। तसे चेली ढुक लगी त से सियुड़ पुरोड़ पुरोड़ कइ खाण लगे। 2फरीसी तेन्हि हेर कइ यीशु जे बोलु, “हेर हेर! तें चेले तेस कम करण लगो असे जे कम भक्ति करणे रोज करुण ठीक नेईं।”#निसुणे 20:8-10 3तेन तेन्हि जे बोलु, “तुसी पढ़ो नेईं ना कि जपल राजा दाऊद त तसे साथी ढुक लगो थी त तेन की किओ थिउ? 4से परमेश्वरे गी गा त तठि चढ़ो रौठि खेई, जेन्हि खाणे हक न त तेस थिआ, होर न तसे साथी। तेन्हि खाणे हक सद देहरे पुजारी थिआ।#1 शामु 21:1-6 5तुसी नियमे कताब अन्तर न पढ़ु ना कि पुजारी देहेर अन्तर भक्ति करणे रोज बि कम कर कइ बजन दोषे भुन्ते? तेन्हि पुठ कोई दोष न लगता। 6पर अउं तुसी जे बोता कि इठि जे असा से देहेर केआं बि बोडा असा। 7धरमे कताब अन्तर लिखो असु कि
‘अउं दाह करणे बेलि खुश भुन्ता,
भकत चढ़ाणे बेलि ना।’#होशै 6:6; मत्ती 9:13
अगर तुस असे मतलब समझतेथ, त एन्हि नरदोष मेह्णु दोषी न बोतेथ। 8किस कि अउं, मनखे कुआ भक्ति करणे रोजे बि मालिक भो।”
यीशु यक शुखो हथ बाड़ा मेह्णु सुसुरेरण
मरकुस 3:1-6; लूका 6:6-11
9तोउं तठिआ हंट कइ, यीशु तेन्के अराधनालय अन्तर गा। 10तठि यक ईं मेह्णु थिआ, जेसे यक हथ शुखो थिउ। तेन्हि फरीसी यीशु पुठ दोष लाणे जे तेस केआं पुछु, “नियमे मुताविक भक्ति करणे रोज बीमार मेह्णु सुसुरेरण सही असु ना?” 11तेन तेन्हि जे जवाब दिता, “सोचे कि तुं यक ढडुड़ असु। अगर से भक्ति करणे रोज यक खोपर अन्तर झड़ घियाल त तुस कि तेस बाहर न किढ़ते ना?#लूका 14:5 12त मेह्णु कि ढडुड़ केआं घट असे ना? इस बझई जुए भक्ति करणे रोज भलु करण सही असु।” 13तोउं तेन तेस मेह्णु जे बोलु, “अपु हथ अगर कर।” तेन अपु हथ अगर किउ त से होर हथे ईं ठीक भोई गोउ। 14ईं हेर कइ फरीसी बाहर घेई गे त तसे खिलाफ अपफ बुछ मेझर करण लगे कि यीशु कीं कइ खतम करण।
यीशु, परमेश्वरे चुणो सेवक
15ई पता भुणे बझई जुए यीशु तठिआ घेई गा त सुआ मेह्णु तसे पता पता गे। तेन तेन्हि बिचा सोब बीमार मेह्णु सुसुरेरि छड़े। 16त तसे बारे केसे जे बि ना बोलुण जे तेन तेन्हि जे निआंग दिती। 17तोउं जे बोक यशायाह भविष्य वक्ते लिखो थी, से पूरी भुई। 18तेन परमेश्वरे बोलो बोक लिखो थी कि
“हेरे! ए में सेवक भो, जे मेईं चुणो असा;
में ट्यारा, जेस हेर अउं ती खुश असा।
अउं अपु आत्मा तेस पुठ छान्ता त
से हर यक जाति मेह्णु के बुछ में न्याये करणे बारे प्रचार कता।
19से न झगड़ीन्ता, होर न हल्ला कता,
होर न दुआरोड़ी तसे बोके शुणती।
20जपल तकर तसे पंची सोब ना मानियेल,
से कमजोर मेह्णु जोई नरमी जुए बरताब कता त बेसाहारे मेह्णु दाह कता।
21सोब मेह्णु तेस पुठ उम्मीद रखते।”#यशायाह 42:1-4
यीशु शैतान केआं बि ताकतवर असा
मरकुस 3:20-30; लूका 11:14-23
22तोउं मेह्णु यीशु केईं यक ईं मेह्णु घिन आए, जे अन्हा त गुंगा भोई गो थिआ। तेस अन्तर दुष्ट आत्मा थी। यीशु से सुसुरेरि छड़ा, त से हेरुण त बोलुण लग गा। 23तोउं सोब मेह्णु हैरान भोई कइ बोलुण लगे, “ए राजा दाऊदे कुआ ‘मसीह’ त ना भो, भला?” 24पर फरीसी ईं शुण कइ बोलु, “ए त दुष्ट आत्माई के सरदार ‘बालजेबुल’ मदते बेलि दुष्ट आत्माई बाहर नशाणता।”#मत्ती 9:34; 10:25 25यीशु तेन्के मने बोक बिझ गा त तेन्हि जे बोलु, “जेस राज्य अन्तर फूट पड़ती, से राज्य उजीड़ घेन्ता। होर जेस शेहर या गी अन्तर झगड़े भुण लगे, से न टिगते। 26तोउं अगर शैतान, शैतान नशाणाल त से यक होरी दुश्माण बण घेन्ते। त तेन्के राज्य कीं टिगता? कदी न टिग बटता। 27अगर अउं शैताने मदत जोई दुष्ट आत्माई नशाणता, त तुं बंदे केसे मदते बेलि नशाणते? तोउं त सेईंए तुं पंची करे। 28पर अगर अउं परमेश्वरे आत्माई मदते बेलि दुष्ट आत्माई नशाणता त परमेश्वरे राज्य तुं बुछ पूज बि गो असा। 29होर बोले त, कोउं मेह्णु यक पेहलवान बजन बन्हणे तसे गी लूटणे हिम्मत कता? पर अगर तस पेहलाई बन्हता त तोउं से तसे गी लूट सकता। 30जे मोउं जोई नेईं से में खिलाफ असे, होर जे मोउं जोई साते न बेह्ढ़ते, से छिंगेई छते।#मरकुस 9:40 31तोउं त, अउं तुसी जे बोता कि मेह्णु सोब पाप त बुराई माफ करिन्ती। पर शुची आत्माई खिलाफ कोई बि बोक कदी माफ न करिन्ती। 32जे कोउं मनखे कोईये खिलाफ बोक करियाल, तसे से पाप माफ करिन्ते। पर जे कोउं शुची आत्माई खिलाफ कोई बोक कते, तसे पाप ना इस जुग अन्तर, होर ना एणे बाड़े जुग अन्तर कदी माफ ना करिन्ते।”#लूका 12:10
बुटा त तसे फल
लूका 6:43-45
33होर यीशु बोलु, “तुसी ठीक करणे जरूरत असी कि बुटा अब्बल असा कि नेईं। अगर बुटा अब्बल असा बोते त तसे फल बि अब्बल बोलुण एन्ता। होर अगर बुरा असा बोते त तसे फल जे बि बुरे बोले, किस कि फले बेलि यक बुटे पिछाण भुन्ति।#मत्ती 7:20; लूका 6:44 34ए जहरिले कीड़े गभुरुओ! तुस बुरे भोई कइ बि खरी बोके कीं कते? किस कि जे मन अन्तर भरिए असु, सेईंए मुंह बइ निस्तु।#मत्ती 15:18; लूका 6:45 35भला मेह्णु अपु मन अन्तरा भली बोक किढ़ता त बुरा मेह्णु अपु मन केआं बुरी बोक किढ़ता। 36अउं तुसी जे बोता कि मेह्णु के हर यक बुरी बोकी के लेखाजोखा न्याय करणे रोज परमेश्वर नेन्ता। 37किस कि तुस अपु बोकी के बझई जोई नरदोष या दोषी बोलीण असे।”
मेह्णु यीशु केआं स्वर्गे यक निशाणी तोपीण
मरकुस 8:11-12; लूका 11:29-32
38तोउं धर्मशास्त्री त फरीसी यीशु जे बोलु, “ए गुरु! अस तोउ केआं यक निशाणी हेरण चहन्ते।” 39तेन तेन्हि जे जवाब दिता, “इस जुगे बुरे त कपटी मेह्णु निशाणी तोपते, पर योना भविष्य वक्ते निशाणी छड़ दी कइ होर कोई निशाणी न दिईन्ता। 40जीं योना टाई रोज त टाई रात यक बोडी मछली पेट अन्तर थिआ, तीं अउं, मनखे कुआ बि टाई रोज त टाई राते लिए धरती गभ अन्तर बिश्ता। 41नीनवे शेहरे मेह्णु न्याय करणे रोज खड़ भोई कइ इस जुगे मेह्णु पुठ दोष लान्ते, किस कि तेन्हि योना भविष्य वक्ते समाचार शुण कइ अपु मन बदलो थिए। पर, हेरे! इठि त योना केआं बि बोडा असा। 42दखण देशे राणी#12:42 शेवा देशे राणी: ए देश इस्राएल देशे दखण दिशा अन्तर थिउ। आजकण जमाने एस देश जे “येमेन” बोते। शेवा देशे राणी करीब 1600 किलोमिटर दूर केआं ओ थी। #1 राजा 10:1-10; 2 इति 9:1-12 न्याय करणे रोज खड़ भोई कइ इस जुगे मेह्णु पुठ दोष लान्ती, किस कि से राजा सुलैमाने ज्ञान शुणुण जे धरती यक कुणे केआं आई। पर, हेरे! इठि त राजा सुलैमान केआं बि बोडा असा।”
अणपुरी सुधार केआं आफत एण
लूका 11:24-26
43“जपल जुठी आत्मा यक मेह्णु अन्तरा निस घेन्ति, त से हर जगाई सुख त अराम तोपती, पर मेता नउ। 44तोउं बोती, ‘अउं अपु तेस पुराणे गी घेन्ति, जेठिआ बाहर किढ़ो थी।’ होर घेई कइ तेस से खाली, साफ सुथरा त सजाओ मेता। 45तिखेईं से घेई कइ अपफ केआं बि ज्यादी बुरी सत जुठी आत्मा घिन एन्ती, त पासर बंठ कइ तठि बिश्ति। तोउं तेस मेह्णु दशा पेहले केआं बि ज्यादा बुरी भोई घेन्ति। इस जुगे बुरे मेह्णु के दशा बि तिहांणि भुन्ति।”
यीशु ई त भाई
मरकुस 3:31-35; लूका 8:19-21
46जपल यीशु हसुड़े जोई बोक करण लगो थिआ तपल तसे ई त भाई एई कइ बाहर खड़ खड़ बिशो थिए। से तेस जोई बोक करण चहन्तेथ। 47केनि तेस जे बोलु, “गुरुजी हेरे! तें ई त भाई बाहर खड़ खड़ बिशो असे। से तोउ जोई बोक करण चहन्ते।” 48पर ईं शुण कइ तेन बोलुणे बाड़े जे जवाब दिता, “कोउं भो में ई? त कोउं भिन्थ में भाई?” 49तोउं अपु चेली के कना जे हथ कर कइ बोलु, “हेरे! में ई त में भाई भेण इ भिन्थ। 50किस कि जे कोउं में स्वर्गे बोउए इच्छा पुठ चलते, सेईंए में ई, भाई त भेण भिन्थ।”
اکنون انتخاب شده:
मत्ती 12: pgg
هایلایت
به اشتراک گذاشتن
کپی

می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 (Active) Wycliffe Bible Translators, Inc. All rights reserved.