मत्ती 11

यीसू अर बतिस्मो देण आळो यूहना

(मरकुस 7:18-35)

1जद यीसू आपगै बारा चेला नै समझागे बठूं उठग्यो अर गलील परदेस गै नगरां में उपदेस देवंतो फिरयो। 2जद बतिस्मो देण आळो यूहना जेळ में हो तो बिनै मसी गै कामां गै बारै में ठा लागग्यो। बण आपगै चेला नै भेजगे पूछयो। 3के तूं बो ई है झिको आण आळो हो या म्हे ओर किंगी उडीक करां। 4-5यीसू बानै केयो, “आंधा देखै, लंगड़ा चालै, कोढी ठीक होवै, बेरा सुणै, मरेड़ा जींवंता होवै अर दीन दूखियां खातर सुब समाचार गो परचार होवै। झिको कीं थे सुणण अर देखण लागरया हो जा'गे यूहना नै बता देओ। 6धन्य है बे झिका मान सकै अर आपगो बिस्वास छोड ना।”

7जद यूहना गा चेला बठूं जावा तो यीसू लोगां नै यूहना गै बारै में केण लागरयो कै, “थे ईं बन उजाड़ में के देखण आया के कोई सरकणा झिका पून में हालण लागरया है? 8तो फेर के देखण आया? एक आदमी नै झिको भोत सुणा गाबा पेर गे राखै? देखो, आच्छा गाबा पेरण आळो राजमेलां में रेवै। 9तो थे के देखण आया हो? कोई परमेसर गी बात बताण आळै नै? पण मैं थानै बताऊं झिकै नै थे देखण आया हो। बो परमेसर गी बात बताण आळै ऊं मोटो है।” 10सासतर में लिखेड़ो है ओ बो ई यूहना बतिस्मो देण आळो है झिकै गै बारै में केयो,

“तेरूं पेली आपगो दूत भेजूं,

बो तेरै खातर रा बणावैगो।”#मलाकी 3:1

11मैं थानै केऊं, “झिको मां ऊं पैदा होयो है बामूं बतिस्मो देण आळै यूहना ऊं मोटो कोई आदमी कोनी। सुरग गै राज में झिको सारा ऊं छोटो है बो ई सुरग में सारा ऊं मोटो है। 12यूहना गै दिनां ऊं लेगे आज तांई सुरग राज में जाण खातर बिस्वासी लोग कोई बी दुख मुसीबत सेवै है अर तकड़ा लोग इनै खोस ल्यै। 13परमेसर गै राज गै बारै में सारा परमेसर गी बात बताण आळा गै द्वारा अर नेम विधान में भोत पेलां ऊं यूहना गै टेम तांई आ बात बोलेड़ी है। 14जे थे परमेसर गी बात बताण आळा गी बात मानण खातर तैयार हो तो झिको एलियाह आण आळो बो ओ ई है। 15झिको सुणनो चावै बो सुणल्यै। 16-17आंगी पीढी गी बराबरी किंगै सागै करूं। बे बजार में बेठया टाबरां बरगा है झिका आपसरी में केवै है। म्हे थारै खातर बंसरी बजाई पण थे नाच्या कोनी। म्हे दुख गा गीत गाया पण थे रोया कोनी। 18बतिस्मो देण आळो यूहना आयो। बो ओरां गी तरियां। ना तो खावै अर ना'ई पीवै हो। पण लोग केवै है इमै ओपरी बडे़ड़ी है। 19फेर मिनख गो बेटो आयो झिको सारां गी तरियां खावै पीवै पण लोग केवै बो पेटू अर पियाकड़ है। ओ चुंगी लेण आळां अर पापी लोगां गो बेली है। पण परमेसर नै मानण आळां लोगां गो चाल चलण देखगे पतो लागै कै बांगो परमेसर सच्चो है।”

अबिस्वासियां नै यीसू गो चेताणो

(लूका 10:13-15)

20फेर यीसू बां नगरां गै लोगां नै ललकारया जठै भोत सारा चमत्कार करया क्यूंकै बठै गा लोग पाप करणो कोनी छोडयो। 21“हे खुराजीन अर बेतसैदा में रेण आळा लोगो थारै सागै भोत बुरो हो'सी। जिता चमत्कार थारै में करया जे बे सुर अर सेदा में करयां होवंता तो बठै गा लोगां भोत पेलां ई टाट गा सोक गाबा ओढ गे अर आपगै सरीर पर राख लगागे दुख करता अर आपगो मन बदळ लेवंता। 22पण मैं थानै केऊं न्याय गै दिन सूर अर सेदा गै लोगां ऊं थारी हालत बोळी खराब हो'सी। 23हे कफरनहूम गा लोगो, थे सोचता होणा, म्हानै सुरग में ले जावोगा पण थे तो नरक में जावोगा क्यूंकै झिका चमत्कार थारै में करया बे सोदोम में करेड़ा होवंता तो बो आज तांई टिक्यो रेवंतो। 24पण मैं थानै बताऊं कै न्याय गै दिन तेरै लोगां गी हालत ऊं सदोम गी हालत आच्छी हो'सी।”

भार ऊं दबेड़ा लोगां नै आराम

(लूका 10:21,22)

25बिं टेम यीसू बोल्यो, “हे पिता थे सुरग अर धरती गा प्रभु हो। मैं थारी बडाई करूं क्यूंकै थे ऐ बातां ग्यानी अर समझदार लोगां ऊं लकोगे राखी अर झिका भोळा भाळा लोग हा बां पर प्रकट करी। 26हे परम पिता, आ बात इंया कर'गे थानै ठीक लागी। 27मेरै परम पिता मनै सारो कीं सोंप दियो। परम पिता नै बेटै गै सिवा कोई कोनी जाणै अर ना'ई पिता गै सिवा बेटै नै जाणै। अर बे लोग ई जाणै झिकां पर बेटो परगट करै। 28हे थकेड़ा अर भार ऊं दबेड़ा लोगो मेरै कनै आओ। मैं थानै आराम देस्यूं। 29थे पूरी तरियां अपणै आपनै मेरै पर समरपित करो, मैं थानै सिखाऊंगा क्यूंकै मैं मन में दीन हूं अर थे बी आपगै मन में सुख चेन पाओगा। 30झिको जूओ मैं थानै दैयूं बो सोरो है अर झिको भार मैं थानै दैयूं बो हळको है।”

اکنون انتخاب شده:

मत्ती 11: BGQ

های‌لایت

به اشتراک گذاشتن

کپی