यूहना 7

यीसू अर बिंगा भाई

1आं बातां गै बाद यीसू गलील परदेस गै गाम गाम में जावंता रेया। बो यहुदियां परदेस गै गाम में जाणो कोनी चावै हो क्यूंकै यहुदी अधिकारी बिनै मारण गी योजना बणाण लागरया हा। 2यहुदियां गो झोंपडीयां गो त्यूंहार आण आळो हो। 3ईंखातर बिंगै भाईयां बिनै केयो थानै आ जिग्यां छोड़गे यहुदियां जाणो चईयै कै बठै बी तेरा चेला तेरै कामा नै देख सकै। 4कोई बी आदमी झिको लोगां गै बिचाळै आपगो नाम ऊंचो करणो चावै है बो आपगै काम नै लको कोनी सकै क्यूंकै ऐ सारा काम करण लागरयो है। आंगो पूरी दुनिया नै पतो लागणो चईयै। 5क्यूंकै बिंगा भाई बी बिं पर बिस्वास कोनी करता हा।

6यीसू बानै केयो, “मेरै खातर सई टेम कोनी आयो पण थारै खातर सारो टेम सई है। 7संसार गा लोग थारूं बेर कोनी कर सकै पण बे मेरूं बेर करै है, क्यूंकै मैं बांगै बारै में बोलतो रेऊं हूं कै बांगा काम गन्दा है। 8थे लोग त्यूंहार में जाओ, मैं अब ईं त्यूंहार में कोनी जाऊं क्यूंकै अजे तांई मेरो सई टेम कोनी आयो।” 9बो बानै ऐ बातां केगे बठै ई गलील में रेग्यो।

10जद बिंगा भाई त्यूंहार में गेया तो बो बी उड़ग्यो पण किनैई कोनी बता गे गेयो। 11यहुदी अधिकारियां त्यूंहार में बिनै ओ केगे ढूंडण लागग्या कै बो कठै है।

12त्यूंहार में भोत सारी भीड़ ही, बे लोग यीसू गै बारै में होळै होळै आपसरी में बातां करा, बो भलो आदमी है अर कोई केवै बो आच्छो कोनी, बो लोगां नै भरमावै है। 13कोई बी बिंगै बारै में खुलगे बात कोनी करै हो क्यूंकै बे लोग यहुदी अधिकारियां ऊं डरता हा।

त्यूंहार में यीसू गो उपदेस

14जद त्यूंहार आदो बीतग्यो हो जद यीसू मिन्दर में आ'ग्यो अर उपदेस देणो सुरू कर दियो। 15जद यहुदी अधिकारियां बिंगी सिक्सा नै सुणगे अचंभो करयो अर केयो, ओ आदमी कदी म्हारी धारमिक पाठसाला में कोनी आयो, फेर बी इनै इतो ग्यान किंया होयो। 16यीसू बानै केयो, “झिको उपदेस मैं देवूं हूं बो मेरो उपदेस कोनी पण बिंगै कनू आयो है, झिकै मनै भेज्यो है।” 17जे कोई साची परमेसर गी आग्या गो पालण करणो चावै तो, बो ईं उपदेस गै बारै में जाण जावैगो कै बो परमेसर गी ओर ऊं है या मेरी ओर ऊं केऊं हूं। 18झिको आपगै मन ऊं कीं केवै है बो आपगी बडाई करै है पण झिको आपगै भेजण आळै गी बडाई चावै है बो सच्चो है अर बिमै झूठ कोनी। 19मूसा थानै परमेसर गा नेम दिया है। फेर बी थे बानै मान्या कोनी। अर थे मनै मारण गी कोसिस करण लागरया हो। 20लोगां उतर दिया कै तेरै में ओपरी सवार है, म्हे तनै मारणो कोनी चावां।

21यीसू बानै उतर दियो, “सब्त गै दिन मैं एक ई चमत्कार करयो हो अर ईंखातर थे लोग अचंभो करो हो के?” 22अर मूसा थानै खतनै गी आग्या दी है ईंखातर सब्त गै दिन बी जे थारै बेटै गै खतनै गो दिन आयो तो थे खतनो करो हो, मैं साची बताऊं तो खतनो मूसा गी ओर ऊं कोनी ओ तो म्हारै बडेरां गी ओर ऊं चालतो आवै है। 23मूसा गै देऐड़ै नेम गो पालण करण खातर सब्त गै दिन जे थे खतनो कर सको हो तो फेर मैं ईं आदमी नै पूरी रीति ऊं सब्त गै दिन ठीक कर दियो तो थे मेरै पर रीस क्यों करो? 24थे मूं देखगे न्याय ना करो पण सच्च अर झूठ नै समझगे न्याय करो।

के यीसू ई मसी है?

25फेर यरुसलेम में रेण आळै लोगां माऊं कीं जणा केयो, “ओ पक्को बो ई आदमी है झिकैनै मारण गी कोसिस करण लागरया है। 26पण देखो, बो सारै लोगां गै बिचाळै बोलण लागरयो है बे लोग बिनै कीं कोनी केवै है कै यहुदी अधिकारियां सच्च में जाण लियो कै बो मसी है के? 27पण ओ मसी कोनी हो सकै क्यूंकै आपां जाणा हां कै बो कठै गो हो। जद सच्चो मसी आवैगो तो कोई कोनी जाण सकै कै बो कठूं आवैगो।”

28जद यीसू मिन्दर में उपदेस देण लागरयो हो बण ऊंची आवाज में केयो सच्ची थे जाणो हो कै मैं कुण हूं अर कठूं आयो हूं। पण मैं खुद गै अधिकार ऊं कोनी आयो झिकै मनै भेज्यो है बो सच्चो परमेसर है बिनै थे कोनी जाणो। 29मैं बिनै जाणूं हूं क्यूंकै मैं बिंगी ओर ऊं आयो हूं अर बण मनै भेज्यो है। 30ईं पर बां बिनै पकड़णो चायो पण फेर बी पकड़ण खातर कणैई आ'गे हात कोनी करयो क्यूंकै अजे तांई बिंगै पकड़िजणै गो सई टेम कोनी आयो हो। 31पण भीड़ माऊं भोत लोगां बिं पर बिस्वास करयो अर केण लागग्या कै बो इयूं बोळा चमत्कार कोनी दिखा सकै झिका अण दिखाया है। ईंखातर ओ ई मसी होवैगो।

यीसू नै पकड़ण गी कोसिस

32भीड़ में लोग यीसू गै बारै चुपचाप बात करण लागरया हा ओ सुणगे फरीसियां अर मुख्य याजकां बिनै बन्दी बणाण खातर मिन्दर गै पेरेदारां नै भेज्या। 33फेर यीसू केयो कै, “थारै सागै थोड़ै टेम ओर रेऊंगा अर फेर मैं पाछो बिंगै कनै उड़ जाऊंगा झिकै मनै भेज्यो हो। 34थे मनै ढूंडोगा पण कोनी ढूंड सकोगा अर जठै मैं होऊंगा बठै थे कोनी आ सको।” 35जद यहुदी अधिकारी आपसरी में केण लागग्या ओ कठै जावैगो कै आपां इनै मिल कोनी सकां। के ओ आपणो देस छोड़गे दूसरै सैहरा में रेण आळै यहुदी लोगां अर गेर यहुदियां गै बिचाळै जा'गे बानै बी उपदेस देवैगो? 36आ के बात है झिकी बण कैई कै थे मनै ढूंडोगा पण मैं थानै लादूं कोनी अर जठै मैं होऊंगा बठै थे कोनी आ सकोगा।

37त्यूंहार गो आखरी दिन खास हो। यीसू खड़यो होगे ऊंची आवाज में केयो जे कोई तीसो है तो मेरै कनै आवै मैं झिको देऊं हूं बिनै पीओ। 38पवितर सासतर में इयां लिख्यो है कै झिको मेरै पर बिस्वास करैगो बिंगै माऊं अनन्त जीवन देण आळी पाणी गी नदियां बगण लाग ज्यैगी। 39यीसू पवितर आत्मा गै बारै में ओ बचन केयो क्यूंकै झिको यीसू पर बिस्वास करै है बानै सारा नै पवितर आत्मा मिलण आळी ही। अब तांई पवितर आत्मा कोनी दी ही क्यूंकै परमेसर गी ओर ऊं यीसू नै आदर मान#7:39 इंगो मतलब ओ है, मर गै जींवंतो कोनी होयो है अर सुरग में कोनी लियो गेयो है। मिलण गै बाद ई दी जावैगी।

40भीड़ माऊं कीं लोग जद ओ सुण्यो तो बे केण लागग्या सच्च में ओ आदमी परमेसर गी बात बताण आळो है। झिकै गो परमेसर वायदो करयो हो। 41अर कीं लोगां केयो ओ मसी है अर कीं लोगां केयो मसी गलील ऊं कोनी आवैगो इंया हो सकै है के? 42क्यूंकै पवितर सासतर में लिखेड़ो है कै मसी दाऊद राजा गै वंस में अर दाऊद गै ई बेतलेहम गाम में पैदा होवैगो। 43ईं बात गै कारण लोगां गै बिचाळै फूट पड़गी। 44बामूं कीं लोग बिनै पकड़णो चावा हा पण कणैई हात आ'गै कोनी करयो।

यहुदी अगुवां गो बिस्वास ना करणो

45ईंखातर मिन्दर गा पेरेदार मुख्य याजकां अर फरीसियां कनै पुठा आ ग्या अर बां बानै पूछयो थे बिनै पकड़गे क्यूं कोनी ल्याया। 46मिन्दर गै पेरेदारां उतर दियो, बो आदमी इती आच्छी आच्छी बाता सिखावै है अजे तांई कणैई हिसी बातां कोनी सिखाई। ईंखातर म्हे बिनै पकड़ कोनी सक्या। 47फरीसियां बानै उतर दियो म्हानै लागै है कै बण थानै बी भरमा दिया। 48यहुदी अधिकारियां अर फरीसियां माऊं कणैई बां पर बिस्वास कोनी करयो। 49पण झिकै लोगां नै परमेसर गै नेमा गै बारै में कीं ठा कोनी बे बिं पर बिस्वास राखै है। ईंखातर परमेसर बानै सराप देवैगो। 50निकुदेमुस नै झिको पेलां बिंगै कनै आयो बामूं एक हो बण केयो, 51“आपणो नेम जद तांई किनैई दोसी कोनी मानै जद तांई बिंगी सुण ना लेवै अर बिंगो पतो ना लगा लेवै है कै बण के करयो है।”

52बां बिनै उतर दियो, “कै तूं बी गलील परदेस गो है के? क्यूंकै तूं बी बिंगो चेलो है झिकी बाता करै है धरम सासतरां नै पढगे देख तो तनै ठा लागै कै गलील प्रदेस में कोई परमेसर गी बात बताण आळो परगट कोनी होयो।” 53(फेर बे सारा बठूं आपगै आपगै घरे उड़ग्या)।

اکنون انتخاب شده:

यूहना 7: BGQ

های‌لایت

به اشتراک گذاشتن

کپی