यूहना 11

लाजर गी मोत

1बैतनिय्याह गाम गो एक लाजर नाम गो आदमी बीमार हो। ओ बो ई गाम हो जठै बिंगी भेन मरियम अर मारथा रेवंती ही। 2मरियम बा लुगाई ही झिकी यीसू गै पगां पर सेंट लगागे आपगै बाळा ऊं बिंगा पग पूंछया हा। बीमार लाजर इंगो भाई हो। 3आं दोना भेनां यीसू नै समाचार भेज्यो, हे गुरूजी, झिकै ऊं तूं प्रेम करै है, बो बीमार है।

4ओ सुणगे यीसू केयो, “ओ रोग मरण खातर कोनी ओ परमेसर गै आदर मान खातर है अर ईं बीमार ऊं ई परमेसर आपगै बेटै नै बी आदर मान दिरावैगो।” 5यीसू मारथा अर बिंगी भेन मरियम अर लाजर नै प्रेम करतो हो। 6फेर बी जद यीसू नै पतो लागग्यो कै लाजर बीमार है तो जठै बो रुक्यो हो बठै दो दिन ओर रुकग्यो। 7फेर यीसू आपगै चेला नै केयो आओ आपां यहुदियां परदेस पाछा चालां।

8ईं पर बिंगै चेला बिनै केयो, “हे गुरूजी केई दिन पेलां यहुदी अधिकारियां तेरै पर पथर मारण गी कोसिस करी ही अर तूं फेर बठै ई जाण लागरयो है।”

9यीसू उतर दियो, “दिन में बारा घंटा होवै है। जे कोई आदमी दिन गै चानणै में चालै तो बो ठोकर कोनी खावै क्यूंकै बो संसार गै चानणै में चालै है। 10जे कोई रात में चालै तो बो ठोकर खावै है क्यूंकै बिमै चानणो कोनी है।”

11ओ केणै गै बाद चेला नै केयो, “आपणो मित्र लाजर सोग्यो है पण मैं बिनै जगाण खातर जाऊं हूं।”

12फेर चेला बिनै केयो, “हे गुरूजी, जे बिनै नींद आ'गी है तो बो जाग जावैगो।” 13यीसू लाजर गी मोत गै बारै में चेला नै केवै हो पण चेला समझया कै नींद गै बारै में केवै है। 14ईंखातर यीसू चेला नै साफ साफ बतायो कै लाजर मरग्यो है। 15मैं खुस हूं कै मैं बठै कोनी हो क्यूंकै जे मैं बठै होवंतो तो लाजर ना मरतो अर थे ओ चमत्कार ना देखता अर ना मेरै उपर बिस्वास करता। 16फेर थोमा झिको दिदिमोस कुहावंतो हो बण दूसरै चेला नै केयो आओ आपां बी प्रभु गै सागै बठै चाला कै आपां बी बिंगै सागै मर सकां।

यीसू गो दूसर जीणो अर जीवन

17बठै जा'गे यीसू नै पतो लागग्यो कै लाजर नै कबर में रख्या चार दिन हो'ग्या। 18बैतानिय्याह गाम यरुसलेम ऊं लगभग तीन किलोमीटर दूर हो। 19भाई गै मरण पर मारथा अर मरियम गो होंसलो बधाण खातर केई यहुदी लोग आएड़ा हा। 20अर मारथा नै पतो लागग्यो कै यीसू आयो है तो बा बिनै मिलण गेई जद मरियम घर में ई रेई।

21मारथा यीसू नै केयो, “जे तूं अठै होवंतो तो मेरो भाई ना मरतो। 22पण मैं अब बी जाणूं कै तूं झिको कीं परमेसर कनूं मांगैगो बो तनै देवैगो।” 23यीसू बिनै केयो, “तेरो भाई जी उठैगो।” 24मारथा बिनै केयो, “मैं जाणूं हूं आखरी दिन जी उठण गो टेम आवैगो बिं टेम बो जी उठैगो।”

25यीसू बिनै केयो, “लोगां नै जीवंता करण आळो अर अनन्त जीवन देण आळो मैं ईं हूं। 26अर झिको जींवंतो है अर मेरै उपर बिस्वास करै है बो कदी कोनी मरैगो। तूं ईं बात पर बिस्वास करै है के?” 27बण यीसू नै उतर दियो, “हां गुरूजी, मैं बिस्वास करूं हूं कै तूं मसी है झिको परमेसर गो बेटो ईं संसार में आण आळो है।”

यीसू रोयो

28-30यीसू अजे तांई गाम में कोनी पूग्यो हो अजे बठैई हो जठै मारथा बिंगै सागै बात करी ही। जद मारथा बेगी बेगी बठूं उड़गी अर आपगी भेन मरियम नै होळैसी बुला'गे केयो गुरूजी अठै ई है अर तनै बुलावै है। आ बात सुणतांई बा बेगी बेगी यीसू कनै आई। 31फेर झिका यहुदी बिनै होंसलो देण खातर घरे आएड़ा हा बां मरियम नै बारै जावंता देख ली अर सोचण लागग्या आ कबर पर रोण करण खातर जावै है ओ सोचगे बिंगै लारै हो'ग्या।

32मरियम जद बठै पुगी जठै यीसू हो तो बिंगै पगां पड़गी अर केयो जे थे अठै होवंता तो मेरो भाई ना मरतो। 33यीसू जद बिनै अर बिंगै सागै आएड़ै यहुदियां नै रोवंता देख्या तो बिंगी आत्मा भोत दुखी होगी। 34यीसू केयो, “थे बिनै कठै रख्यो है?” बां बिनै केयो, “आ अर देख ले।” 35यीसू गी आंख्या में आंसू आ ग्या। 36जद यहुदी केण लागग्या देखो बो बिंऊ कितो प्रेम करतो हो। 37पण बामूं कीं लोगां केयो, “बण आंधा गी आंख्या ठीक कर दी, यीसू कनै लाजर नै ठीक करण गी सकती कोनी है के?”

लाजर नै जींवंतो करयो जाणो

38जद यीसू आपगै मन में एकर ओर भोत दुखी होयो अर कबर कानी गेयो। बा एक गुफा ही अर बिंगै मूं गै आ'गै एक मोटो पथर लागेड़ो हो। 39यीसू केयो, “ईं पथर नै आगूं पासै करो। मरेड़ै गी भेन मारथा केयो, हे गुरूजी अब तांई तो बठै गिंध आण लागगी होवैगी क्यूंकै बिनै मरया चार दिन हो'ग्या।”

40यीसू बिनै केयो, “मैं तनै केयो है कै जे तूं बिस्वास करैगी तो तूं परमेसर गी बडाई देखैगी।”

41जद बां बिं पथर नै पासै कर दियो अर यीसू आपगी आंख्या उपर कर'गे केयो, “हे पिता मैं थारो धन्यवाद करूं हूं कै थे मेरी सुण ली है।” 42मैं जाणूं हूं कै थे सदां मेरी सुणो हो पण झिकी भीड़ च्यारूंमेर खड़ी है बिंगै खातर इंया बोलूं हूं कै सारा झिका अठै खड़या है बिस्वास करै कै थे मनै भेज्यो है।

43ओ केगे बण ऊंची आवाज में केयो, “हे लाजर बारै आ जा।” 44बो आदमी झिको मरग्यो हो, बारै निकळ आयो बिंगा हात पग अजे तांई कफण ऊं बांदेड़ा हा, बिंगो मूं कपड़ा ऊं पळेटेड़ो हो। यीसू लोगां नै केयो इंगो कफण खोल दैयो अर जाण दैयो।

यीसू गै बिरोध में योजना

45जद झिका यहुदी लोग मरियम कनै आएड़ा हा अर बिंगो ओ काम देख्यो बामूं भोत सारा बिं पर बिस्वास करयो। 46पण बामूं कीं लोग फरीसियां गै कनै गेया अर झिको यीसू करयो हो बानै बतायो। 47फेर महा याजक अर फरीसियां यहुदियां गी एक मोटी पंचायत बुलाई अर केयो आपां नै के करणो चईयै ओ आदमी भोत सारा चमत्कार दिखाण लागरयो है। 48जे आपां बिनै इंयाई करता रेण दियो तो सारा लोग बिनै मसी मान लेवैगा अर रोमी लोग आ'गे आपणै मिन्दर अर देस पर कब्जो कर लेवैगा।

49काईफा नाम गो बिं टेम गै महा याजक केयो थे लोग कीं कोनी जाणो। 50अर आपणै देस गै सारै लोगां नै रोमी सरकार गै हाता ऊं बचाण खातर आपणै खातर एक आदमी गो मरणो आच्छो है। आ बात थानै समझणी चईयै। 51आ बात बण आपगी ओर ऊं कोनी कैई ही पण बो बिं टेम गो महा याजक हो बण परमेसर गी बात करी ही कै यीसू लोगां खातर मरैगो। 52अर एकलो यहुदी लोगां खातर कोनी पण सारै संसार गा जिता बी परमेसर गै उपर बिस्वास राखण आळा लोग रेवै है बानै सारा नै भेळा करण गै खातर बो मरण आळो है। 53पण बिं दिन ऊं बे यीसू नै मारण गी योजना बणाण लागग्या।

54ईंखातर यीसू यहुदियां गै बिचाळै सारा गै सामै कोनी घुमयो अर यरुसलेम छोड़गे बन उजाड़ गै कनै इफ्राईम नगर में जा'गे चेला गै सागै रेण लागग्यो। 55यहुदियां गै फसह गो त्यूंहार आण आळो हो अर भोत सारा लोग आप आपणै गाम ऊं यरुसलेम कानी आवै हा कै बे फसह गै त्यूंहार ऊं पेलां अपणै आपनै सुद्ध कर लेवै। 56-57फेर मुख्य याजकां अर फरीसियां ओ आदेस दियो कै जे किनैई ठा है कै यीसू अठै है तो आ'गे म्हानै बतावै कै म्हे बिनै पकड़ सकां। ईंखातर लोग यीसू नै ढूंडण लागरया हा अर मिन्दर में खड़या होगे आपसरी में केवा हा कै थानै के लागै यीसू ईं त्यूंहार में आवैगो के?

اکنون انتخاب شده:

यूहना 11: BGQ

های‌لایت

به اشتراک گذاشتن

کپی