यूहन्ना 7

यीशु होर तेऊरे भाई

1याह गला बाद यीशु गलीला में फिरदअ रहू; किबेकि यहूदी तेऊ मारणा चाहंदा थी, ऐतकी तणी सह यहूदी में नाई फिरना चाँहदअ थी। 2यहूदी री झोपडी री जाच नेड थी। 3ऐतकी तणी तेऊरे भाई तेऊबै बोलू, अखा का यहूदा बे नाह, कि जोह काम तूह करा त्या तेरे चेले तखे भाले। 4किबेकि ऐहडे कोहे नांई हुणे जोह प्रसिद्ध हुणा चाँहदा, होर गोझी करे काम करे। अगर तूह काम करा, तअ आपणे आपा संसारा में प्रकट कर। 5किबेकि तेऊरे भाई भी तेऊ पैंदे बुशाह नांई करदे थी। 6तेबा यीशु तयाबे बोलू, मेरा वक्त एबरे तणी नांई आउआ, पर तमाबे सबे वक्त साहा। 7संसार तमे संघे बुराई नांई करी सकतअ, पर सह मांई संघे बुराई करदा, किबेकि हाऊं तेऊरे बिरोधा में एक गुआही दिंदा कि तेऊरे काम बुरे साहा। 8तमे एसा जाचा बे नाहा; महा एबरे एसा जाचा बे नांई नाहंणा, किबेकी ऐबरे तणी मेरा वक्त पूरा नांई होऊ। 9सह या गला बोली करे गलीला में ही रहू।

झोपडी री जाचा में यीशु

10पर जेबा तेऊरे भाई जाचा बे नाठे पर सह आपु भी प्रगट में नांई, पर जाणा कि गुप्त रूपा में नाठअ। 11यहूदी जाचा में तेऊ यह बोली करे लोडे लागे, कि सह कंई साहा? 12होर लोका बे तेऊरे बारे में चुपे -चुपे बहू गला होई कुछ बोला, सह भलअ मणश साहा। होर कुछ बोला, सह लोका शखाऊदा। 13तेबा भी यहूदी रे डरा रे मारे कोई मणश तेऊरे बारे मे खुली करे बोलदअ नांई थी।

जाचा में यीशु रा उपदेश

14जेबा जाचा री आधी धियाड़ी बीती; तेबा यीशु देहुरे नाहीं करे उपदेशा करदअ लागअ। 15तेबा यहूदी परेशान होई करे बोलू, ऐऊ बिना पढ़े विद्या केडी आई? 16यीशु तयाबे उतर दिना, मेरा उपदेश मेरा नांई, पर मेरे भेजणअ आले रा साहा। 17अगर कोई तेऊरी इच्छा में चलणा चाहे, तेबा सह तेऊ उपदेशा रे बारे में ज़ाणलअ कि सह परमेश्वरा री तरफा का साहा, याह हाँऊ आपणी तरफा का बोला। 18जोह आपणी तरफा का कुछ बोला, सह आपणी ही बड़ाई चाहंदा; पर जोह आपणे भेजणअ आले री बड़ाई चाहंदा सह सचअ साहा, होर तेऊमें अधर्म नांई। 19कैह मूसा तमाबे व्यवस्था नांई दिंनी? तेबा भी तमामें कोई व्यवस्था में नांई चलदअ। तमे महा किबे मारना चाहंदा? 20लोके उतर दिना, ताह में दुष्टात्मा साहा! कुण ताह मारना चाहंदा? 21यीशु तयाबे उतर दिना, मांई एक काम करू, होर तमे सभे परेशान हुंदे रही। 22ऐतकी तणी मूसा तमाबे खतना री आज्ञा दिंनी (यह कि मूसा री तरफा का साहा पर यह दादु बाबा का चली आई दी), होर तमे सब्ता री धियाड़ी मणशा रा खतना करा। 23तेबा सब्ता री धियाड़ी मणशा रा खतना करा कि मूसा री व्यवस्था नां टले , तेबा महा पैंदे ऐतकी तणी रोष किवे करा कि मांई सब्ता री धियाड़ी एक मणश पूरी रीति का ठीक करू। 24मुँहा भाली करे न्याय नाई करे, पर ठीक-ठीक न्याय करा।

कैह यीशु ही मसीह साहा?

25तेबा यरूशलेम बासी बोलदे लागे, यह सह जासू मारने री स्कीमा लागे दे थी,? 26पर भालाआ, सह तअ खुलमखुली गल़ा करा होर कोहे भी तेऊबै किछे नांई बोलद। कैह सरदारे सच-सच ज़ाणु कि यह मसीह साहा? 27ऐऊ तअ हामें जाणा कि कंदकअ साहा; पर मसीह जेबा ईहलअ तेबा कोही नांई ज़ाणना यह कंदकअ आउद। 28तेबा यीशु देहुरे में उपदेशा दींदे पुकारी करे बोलू, तमे माँह जाणा, होर यह भी जाणा कि हाऊं कंदकअ साहा। हाऊं तअ आपे नांई आउअ, पर मेरे भेजणअ आलअ सच्चअ साहा, तेऊ तमे नांई ज़ाणदे। 29हाऊं तेऊ जाणा किबेकी हाऊं तेऊरी तरफा का साहा होर तेहू हाऊं भेजुदअ साहा। 30ऐता पैंदे त्याहे सह ढाकणअं चाहू, पर तेबा भी कोही भी तेऊबै हाथ नांई लाऊ किबेकी तेऊरा वक्त एबरे तणी नांई आउआ थी। 31तेबा भी-भीड़ा में बहू लोके तेऊ पेंदे बुशाह करू, होर बोलदे लागे, मसीह जेबा ईहलअ तेबा कैह एताका जादा चिन्हा आले काम रिहाऊणे जोह ऐऊ रिहाई?

यीशु ढाकणे री कोशिश

32फरीसिये लोका तेऊरे बारे में याह गला चुपे -चुपे करदे शुणी; होर प्रधान याजक होर फरीसीये तेऊ ढाकते सपाही भेजी। 33एता पैंदे यीशु बोलू, हाऊं थोड़ी देर तणी होर तमे संघे साहा, तेबा आपणे भेजणअ आले सेटा बे नाहंणा। 34तमे महा लोडले, पर नाई भेटणअ; होर ज़खे हाऊं साहा, पर तखे तमे इच्छी नाई सकते। 35एता पैंदे यहूदिये आपु में गला करी, यह कंई नाहंणअ कि हांमा यह कंई भेटणअं? कैह ऐऊ त्या सेटा बे जोह यूनानी में तितर बितर होई करे रहंदा, होर यूनानी बे भी उपदेश देलअ? 36यह कैह गल साहा जोह तेऊ बोली, कि तमे माँह लोड़ले, पर तमा नांई भेटणअ; होर ज़खे हाऊं साहा, तखे तमे नांई इच्छी सकते?

जीबन-पाणी री नई

37जोह जाचा री आखिरी धियाड़ी, जोह मुख्या धियाड़, यीशु खड़अ होऊ होर जोरे संघे बोलू, अगर कोई शोखअ साहा सह महा सेटा बे इच्छा होर झुटा। 38जोह महा पेंदे बुशाह करलअ, तेऊ आपणी शोख पूरी करनी, जेहड़ा पवित्र शास्त्रा में आउआ दा, तेऊरे दिला का जिंदगी रे पाणी री नंई बहंणी। 39तेऊ यह बचन पवित्र आत्मा रे बारे में बोलू, जो तेऊ पेंदे बुशाह कर्णआले पाऊणे में थी, किबेकि आत्मा एबरे तणी नांई उतरु, किबेकि यीशु एबरे तणी आपणी महिमा में नांई पुजू। 40तेबा भीड़ा में कोई-कोई या गला शुणी करे बोलू, सच्ची यह सह भविष्यद्वक्ता साहा। 41दूजे बोलू, यह मसीह साहादअ। पर ऐखे बोलू, किबे? कैह मसीह गलीला बे इहण? 42कैह यह पवित्र शास्त्रा में यह नांई आउआ कि मसीह दाऊदा रे बंशा में होर बैतलहम ग्रां का इहणअ, ज़खे दाऊद रहंदा थी। 43एतकी बजा का लोका में फुट पड़ी। 44त्यामें कुछ तेऊ ढाकणा चांहंदा थी, पर कोही भी तेऊ पेंदे हाथ नांई लाऊ।

यहूदी गुआही रा अबुशहा

45तेबा सपाही प्रधान याजक होर फरीसी सेटा बे बापस आउए; त्याहे तयाबे बोलू, तमे सह किबे नांई आणु? 46सपाही उतर दिंना, कि कोही मणश कधी ऐढ़ी गला नांई करी? 47फरीसी तयाबे उतर दिना, कैह तमे भी भरमांई? 48कैह सरदार या फरीसी मे का कोही भी तेऊ पेंदे बुशाह करू? 49पर या लोका जोह व्यवस्था नांई ज़ाणदे , शापित साहा। 50निकुदेमुस जोह तेऊ सेटा पहिले आउअ, होर त्यामें एकी, तेऊ बोलू, 51कैह महारी व्यवस्था कासु मणशा बे, जेबरे तणी पहिले तेऊरी शुणी करे ज़ाणे कि सह कैह करा, दोषी ठराउंदा? 52त्याहे तेऊबै उतर दिना, कैह तूह भी गलीला रअ नांई साहा? लोड होर भालअ कि गलीला का कोहे भविष्यद्वक्ता प्रकट हूंणअ? 53तेबा सब कोई आपणे-आपणे घरा बे नाठे।

اکنون انتخاب شده:

यूहन्ना 7: ISJNT

های‌لایت

به اشتراک گذاشتن

کپی