यूहन्ना 10

फुआल होर भेडा रा दृष्टान्त

1हाऊं तमाबे सच-सच बोला कि जोह कोई दुआर बाथी भेडा रे खुड़े नाहंदअ पर कासी होर्से ईहन्दा, सह चोर या डाकू साहा। 2जोह दुआरा बाथी मितरा बे नाहंदा सह भेडा रअ फुआल साहा। 3तेऊबै दुआरपाल दुआर खोला, होर भेडा तेऊरी गला शूणा होर आपणी भेडा रा ना लई करे शादा होर बाग़े निदा। 4जेबा सह आपणी सारी भेडा बाग़े काढी छेका तेबा त्या ज़ेह-ज़ेह हांडा, होर भेडा तेऊ पीछे-पीछे हांडा, किबकी त्या तेऊरी बोली समझा। 5पर त्याहा पराये पीछे नांई नाहंणी, पर तेऊका ठुरणी, किबेकि त्याहा पराये रे शब्द नांई पछेणदी। 6यीशु तयाबे यह दृष्टान्त बोलू, पर त्या यह समझी कि या कैह गला साहा जोह हामा बे बोला।

यीशु शोभलअ फुआल

7तेबा यीशु तयाबे भी बोलू, हाऊं तमाबे सच-सच बोला, भेडा रअ दुआर हाऊं साहा। 8जेतरे महा का जैंह आउए त्या सबे चोर होर डाकू थी, पर भेडे तेऊरी शूणी। 9दुआर हाऊं साहा; अगर कोई मेरे साबे मितर प्रबेश करे तेऊ उद्धार पाऊणा, होर मितर बाग़े ईहंदअ नाहंदअ रहंणअ होर घाह दीणा। 10चोर कासु होरी कामा बे पर सीधी चोरी करने होर घाता करने होर नष्ट करने बे ईहंदा; हाऊ ऐतकी तणी आउअ कि जीबन पाए, होर बहुतायत का पाए। 11शोभलअ फुआल हाऊं साहा; शोभलअ फुआला भेडा री तणी आपणे प्राणा दिंदा। 12नोकर जोह नाह फुआल साहा नाह भेडा रअ मालक साहा, भड़िए ईहंदा भालिकरे हारिये भेडा छाड़ी करे ठुरा; होर भेड़िया त्या ढाका होर तितर बितर करादा। 13सह ऐतकी तणी ठुरा कि सह नोकर साहा, होर तेऊ भेडा री चिन्ता नांई आँधी। 14शोभलअ फुआल हाऊं साहा, हाऊं आपणी भेडा जाणा, होर मेरी भेडा महा जाणा। 15जेड़अ बापू महा जाणा हाऊं बापू जाणा-होर हाऊं भेडा री तणी आपणे प्राण दिंदा। 16मेरी होरा भी भेडा साहा, जोह ऐसा भेडशाला में नाँई। मेरा त्यारा आडना भी जरूरी साहा। त्या मेरी गला शूणनी, तेबा एक ही छुंड होर एक ही फुआल हूँणअं। 17बापू ऐतकी तणी मांई सगे प्रेम डाहंदा कि हाऊं आपणे प्राण दिंदा कि तेऊ भी लऊ। 18कोई तेऊ महा का छींनदअ नांई, पर हाऊं तेऊ आपे ही दिंदा महा तेऊरे दींणे रा भी अधिकार साहा, होर तेऊ लऊणे रा भी अधिकार साहा यह आज्ञा महा मेरे बापू का भेटिदी आसा।

19याह गला रे कारण यहूदी में भी फुट पड़ी। 20त्यामें बहू कै बोलदे लागे, तेऊमें दुष्टात्मा साहा, होर सह पागल साहा; तेऊरी किबे शूणा? 21होर लोके बोलू, या गला ऐडे मणशा री आंधी कि जासू में दुष्टात्मा आसा। कैह दुष्टात्मा काणे री आछी खोली सका?

यहूदी रा अबिश्बास

22यरूशलेम में स्थापना पर्बा मनाऊं; होर ठाड़े री ध्याडी थी। 23यीशु देहुरे रे कुण्डा में सुलैमाना रे घुमदअ लागअ दअ थी। 24तेबा यहूदी सह घेरु होर पुछु, ताह केबरे तणी माह रा मन दुबिधा में डाहंणा? अगर तुह मसीह साहा, हामा का बोल। 25यीशु तयाबे उतर दिंना, मांई तमाबे बोलू कि तमे बुशाह करदे। जोह काम हाऊं आपणे बापू रे ना का करा त्या ही मेरे गुआही साहा, 26पर तमे ऐतकी तणी बुशाह करदा किबेकि तमे मेरी भेडा मेज़ा का नांई आंधे। 27मेरी भेडा मेरा शब्द शूणा, हाऊं त्या जाणा, होर त्या महा पीछे-पीछे हांडाआ; 28होर हाऊं तयाबे अनन्त जीबन दिंदा। त्या कधी नष्ट नांई हुँणी, होर त्या कासी मेरे हाथा का नांई छीनणी। 29मेरअ बापू, जूणी त्या महा बे दिन्नी दी थी, सभी का बढ़अ साहा होर कोहे भी त्या बापू रे हाथा का छिनी नांई सकतअ। 30हाऊं होर बापू एक साहा। 31यहूदी तेऊबै पथराबा करण बे भी पाथर चुआकी। 32ऐता में यीशु तयाबे बोलू, मांई आपणे बापू री तरफा का बहू काम करी करे रिहाई; त्यामें कासु काम री तणी तमे महा पेंदे पथराब करदा? 33यहूदी तेऊबै उतर दिंना, भले कामा री तणी हामे ताह पेंदे पथराब नाँई करदे पर परमेश्वरा री निन्दा करने री बजा का; ऐतकी तणी कि तूह मणश होई करे आपणे आपा बे परमेश्वरा मना। 34यीशु तयाबे उतर दिंना, कैह थारी व्यवस्था में लिखूदा कि मांई बोलुदा, तमे परमेश्वर साहा? 35अगर तेऊ तयाबे परमेश्वर बोलू जासू सेटा परमेश्वरा रअ बचन पुजू (होर पवित्र शास्त्रा री गला गलत होई सकी)। 36तेबा जूणी बापू पवित्र डाही करे संसारा में भेजु, तमे तेऊबै बोला, तूह निंदा करा, ऐतकी तणी कि मांई बोलू, हाऊं परमेश्वरा रअ शोहरू साहा? 37अगर हाऊं आपणे बापू रा काम नांई करदअ, तेबा मेरा बुशाह करा। 38पर अगर हाऊं करा, तेबा चाहे मेरा बुशाह भी नांई करे, पर त्या कामा रा तअ बुशाह करा कि तमें ज़ाणा होर समझा कि बापू महा में साहा होर हाऊं बापू में साहा। 39तेबा त्याहे भी तेऊ ढाकणे री कोशिश करी पर सह त्यारे हाथा का निकतअ।

40तेबा सह यरदना नइ रे पार तेसा जागहा बे नाठअ, ज़खे यूहन्ना पहिले बपतिस्मा दिंदा थी, होर तखी रहू। 41बहू लोका तेऊ सेटा इछी करे बोला, यूहन्ना कोई चिन्ह नांई रिहाऊ, पर जोह कुछ यूहन्ना ऐऊरे बारे में बोलू, सह सारा सच आसा। 42होर तखे बहू कै यीशु पैंदे बुशाह करू।

اکنون انتخاب شده:

यूहन्ना 10: ISJNT

های‌لایت

به اشتراک گذاشتن

کپی