Mark 4
4
Tuqım sebiwshi tuwralı tımsal
(Mat 13:1-9; Luk 8:4-8)
1Iysa jáne kól jaǵasında tálim bere basladı. Átirapına júdá kóp xalıq jıynalǵanlıqtan, kóldegi qayıqqa minip otırdı, al xalıq kóldiń jaǵasında, qurǵaqlıqta turdı. 2Ol xalıqqa tımsallar menen kóp nárselerdi úyretip, bılay dedi:
3– Tıńlańlar: bir tuqım sebiwshi tuqım sebiwge shıǵıptı. 4Ol sepkende, tuqımlardıń geybirewleri jol shetine túsipti. Quslar ushıp kelip, olardı shoqıp jep qoyıptı. 5Geybirewleri topıraǵı az bolǵan taslaqqa túsip, jer tereń bolmaǵanlıqtan tez kógerip shıǵıptı. 6Biraq kún shıqqannan soń solıp, tamırsız bolǵanlıqtan, quwrap qalıptı. 7Geybirewleri tikenler arasına túsipti. Tikenler óskennen soń, olardı tunshıqtırıp taslaptı hám olar zúráát bermepti. 8Al basqaları ónimli jerge túsip, kógerip ósip shıǵıptı hám geybirewleri otız, geybirewleri alpıs, geybirewleri júz eseden zúráát beripti.
9Qulaǵı bar adam jaqsılap esitip alsın!
Tımsaldıń maqseti
(Mat 13:10-17; Luk 8:9-10)
10Iysa jalǵız qalǵanda, on eki shákirti hám basqalar Onnan tımsallar haqqında soradı. 11Iysa olarǵa bılay dedi:
– Qudaydıń Patshalıǵınıń sırın biliw sizlerge berilgen. Al sırttaǵı basqa adamlarǵa hámmesi tımsallap aytıladı. 12Solay etip:
«Olar qarap tursa da, kórmeydi,
Tıńlap tursa da, túsinbeydi,
Qaytıp kelip, keshirilmeydi»#4:12 Iysh 6:9-10..
Tuqım sebiwshi tuwralı tımsaldıń túsindiriliwi
(Mat 13:18-23; Luk 8:11-15)
13Iysa olarǵa bılay dedi:
– Sizler bul tımsaldı túsinbeysizler me? Onda basqa barlıq tımsallardı qalay túsinesizler? 14Tuqım sebiwshi Qudaydıń sózin sebedi. 15Geybir adamlar jol shetine sebilgen tuqımlarǵa uqsaydı, olar Qudaydıń sózin esitiwden-aq, shaytan kelip, olardıń kewline sebilgen sózdi alıp ketedi. 16Bazılar taslaq jerge sebilgen tuqımlarǵa uqsaydı. Olar sózdi esitken waqıtta-aq onı quwanısh penen qabıl etedi. 17Biraq tamırsız bolǵanlıqtan turaqsızlıq etip, sóz ushın azap shegiwge yamasa quwdalanıwǵa tuwra kelgende, tez isenimnen qaytadı.
18Ayırımlar tikenler arasına sebilgen tuqımlarǵa uqsaydı. 19Olar sózdi esitse de, bul dúnyanıń táshiwishleri, baylıqqa aldanıw hám basqa da qumarlıqlar sózdi tunshıqtıradı, sonlıqtan olar zúráát bermeydi. 20Al basqaları ónimli jerge sebilgen tuqımlarǵa uqsaydı. Olar sózdi esitip, onı qabıl etedi hám zúráát beredi: birewleri otız, birewleri alpıs, birewleri júz eseden beredi.
21Iysa olarǵa jáne bılay dedi:
– Kim shıranı ıdıstıń yamasa káttiń astına qoyıw ushın ákeledi? Kerisinshe, onı shıra qoyǵıshqa qoyıw ushın ákelmey me? 22Sebebi ashılmaytuǵın hesh qanday sır, bilinbeytuǵın hesh qanday jasırın nárse joq. 23Qulaǵı bar adam jaqsılap esitip alsın!
24Iysa dawam etip, olarǵa bılay dedi:
– Esitkenlerińizge kewil awdarıńlar! Sizler qanday ólshem menen ólshep berseńler, ózlerińizge de sonday ólshem menen ólshep beriledi. Hátte, sizlerge qosımsha etip te beriledi. 25Kimde bar bolsa, oǵan qosımsha etip beriledi, al kimde joq bolsa, onıń barı da tartıp alınadı.
Ósip shıqqan tuqım tuwralı tımsal
26Soń Iysa:
– Qudaydıń Patshalıǵı mınaǵan uqsaydı: bir adam jerge tuqım sewipti. 27Ol tún bolǵanda uyıqlaptı, kúndiz bolǵanda oyanıptı: biraq tuqımnıń qalay kógerip óskenin bilmepti. 28Óytkeni jer óz-ózinen zúráát beredi: dáslep kók shıǵıp, sońınan masaq, al onnan soń masaq ishinde dán ónedi. 29Al egin pisip jetiliskende, sol adam dárriw orıwǵa kirisedi, sebebi orıw máháli keldi, – dedi.
Qıshqıl tuqım tuwralı tımsal
(Mat 13:31-32; Luk 13:18-19)
30Iysa taǵı bılay dedi:
– Qudaydıń Patshalıǵın nege uqsatayıq? Onı qanday tımsal menen túsindiriwge boladı? 31Ol qıshqıl tuqımına#4:31 Qıshqıl tuqım – gorchica. uqsaydı. Jerge sebilgende, bul tuqım jer júzindegi barlıq tuqımlardıń eń kishisi boladı. 32Biraq ol sebilgennen soń ósip, shaqaları jayılıp, barlıq shóplerden úlken boladı hám oǵan aspan qusları ushıp kelip, sayalı shaqalarına uya saladı.
33Iysa usınday kóp tımsallar menen xalıqqa túsine alǵanınsha sóz ayttı. 34Olarǵa tımsalsız hesh nárse aytpadı, al shákirtlerine awlaqta hámmesin túsindirdi.
Iysanıń dawıldı toqtatıwı
(Mat 8:23-27; Luk 8:22-25)
35Sol kúni keshte Iysa shákirtlerine:
– Kóldiń arǵı jaǵasına óteyik, – dedi.
36Olar xalıqtı qaldırıp, Iysanı otırǵan qayıǵı menen alıp ketti. Onıń menen birge basqa qayıqlar da bar edi. 37Sonda kúshli dawıl kóterilip, tolqınlar qayıqtı soqqılaǵanda, qayıq suwǵa tola basladı. 38Al Iysa qayıqtıń artqı jaǵında basına dastıq salıp, uyıqlap atır edi. Shákirtleri Onı oyatıp:
– Ustaz! Bizler óletuǵın boldıq-ǵo, sonda da Saǵan bári bir me? – dedi.
39Iysa turdı da, samalǵa tıyım salıp, tolqınǵa:
– Toqta! Tınıshlan! – dep buyırdı.
Sonda samal toqtap, awır tınıshlıq ornadı.
40Iysa olarǵa:
– Nege bunshama qorqasızlar? Ele isenimlerińiz joq pa? – dedi.
41Biraq olar qattı qorqısıp, bir-birine:
– Samaldı da, tolqındı da Ózine boysındıratuǵın bul kim? – desti.
انتخاب شده:
Mark 4: QrqMK22
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Институт перевода Библии, 2022
