Matta 27
27
Iysanıń Pilattıń aldına aparılıwı
(Mrk 15:1; Luk 23:1-2; Yuxn 18:28-32)
1Tań atqanda, barlıq bas ruwxaniyler menen xalıq aqsaqalları Iysanı óltiriw tuwralı keńesti de, 2Onı baylatıp, rimli hákim Pilatqa aparıp tapsırdı.
Yahudanıń ólimi
(Elsh 1:18-19)
3Sonda Iysaǵa satqınlıq qılǵan Yahuda Onıń jazaǵa húkim etilgenin kórip ókindi de, alǵan otız gúmis teńgeni bas ruwxaniyler menen xalıq aqsaqallarına qaytarıp berip:
4– Men satqınlıq qıldım. Ayıpsız qandı tóktirip, gúna isledim, – dedi.
Olar oǵan:
– Bizlerge ne? Óziń bil, – dedi.
5Sonda Yahuda gúmisti Ibadatxananıń ishine ılaqtırıp tasladı da, sırtqa shıǵıp ketip, asılıp óldi.
6Bas ruwxaniyler gúmisti alıp:
– Bunı Ibadatxana qaznasına salıwǵa bolmaydı, sebebi bul qannıń qunı, – dedi.
7Olar óz ara oylasıp, sol aqshaǵa gúlalshınıń egislik jerin satıp aldı da, onı jat jerden kelgenlerdi jerlewge arnadı. 8Sonlıqtan sol jer usı kúnge deyin «Qan jeri» dep ataladı.
9Solay etip, Eremiya payǵambardıń aldın ala aytqan mına sózleri orınlandı:
«Olar otız shekel gúmisti, yaǵnıy Izraildıń urpaqları bahalaǵan Onıń qunın alıp, 10Jaratqan Iye maǵan aytqanınday, gúlalshınıń egislik jeri ushın berdi».#27:9-10 Zxr 11:12-13; Erm 19:1-13; 32:6-9.
Ólim húkimi
(Mrk 15:2-15; Luk 23:3-5, 13-25; Yuxn 18:33-38; 19:1-16)
11Iysa rimli hákimniń aldında turǵanda, hákim Onnan:
– Sen Yahudiylerdiń Patshasımısań? – dep soradı.
Iysa oǵan:
– Sol ekenimdi óziń aytıp tursań, – dep juwap berdi.
12Al bas ruwxaniyler menen xalıq aqsaqalları Onı ayıplaǵanda, Ol hesh juwap bermedi.
13Sonda Pilat Oǵan:
– Saǵan qarsı qanshama gúwalıqlar berilip atırǵanın esitip turǵan joqsań ba? – dedi.
14Biraq óziniń birde bir sózine Iysanıń juwap qaytarmaǵanına hákim qattı hayran qaldı.
15Qutqarılıw bayramında xalıq soraǵan bir tutqındı bosatıp beriw hákimniń ádeti edi. 16Sol waqıtta qamaqta Barabba degen belgili bir jınayatshı bar edi. 17Xalıq jıynalıp bolǵanda, Pilat olarǵa bılay dedi:
– Sizler kimdi bosatıp beriwimdi qáleysizler? Barabbanı ma yamasa Masiyx dep atalatuǵın Iysanı ma?
18Óytkeni ol olardıń Iysanı ózine kúnshillik penen uslap bergenin biletuǵın edi.
19Pilat húkim gúrsisinde otırǵanda, hayalı oǵan mınaday xabar jiberdi: «Sol haq Adamǵa hesh nárse isleme. Men búgin túsimde Ol sebepli kóp azap shektim».
20Bas ruwxaniyler menen xalıq aqsaqalları xalıqtı úgitlep:
– Barabbanı bosatıp berip, Iysanı óltiriwdi talap etińler, – dedi.
21Hákim olardan jáne:
– Sizlerge ekewiniń qaysısın bosatıp beriwimdi qáleysizler? – dep soradı.
Olar:
– Barabbanı, – dedi.
22Pilat olardan:
– Al Masiyx dep atalatuǵın Iysaǵa ne isleyin? – dep soradı.
Olardıń hámmesi de:
– Onı atanaq aǵashqa shegelet! – dedi.
23Al Pilat olardan:
– Ol qanday jamanlıq isledi, aqırı? – dep soradı.
Biraq olar:
– Onı atanaq aǵashqa shegelet! – dep qattıraq baqırıstı.
24Pilat hesh nárse isley almaytuǵının hám qozǵalań baslanajaǵın sezip, suw aldı da, xalıqtıń kóz aldında qolın juwıp:
– Bul adamnıń qanınıń tógiliwine men ayıplı emespen, sizler juwapkersiz, – dedi.
25Pútkil xalıq:
– Onıń qanı ushın bizler hám bizlerdiń balalarımız juwapker bolǵaymız! – dep juwap qaytardı.
26Sonda Pilat olardan Barabbanı bosatıp berdi. Al Iysanı qamshılatqannan soń, atanaq aǵashqa shegelewge tapsırdı.
Áskerlerdiń Iysanı masqaralawı
(Mrk 15:16-20; Yuxn 19:2-3)
27Sonda hákimniń áskerleri Iysanı hákim Pilattıń sarayına alıp barıp, Onıń aldına pútkil áskerlerdi jıynadı. 28Onıń kiyimlerin sheship, ústine qırmızı shapan japtı da, 29tikenli shıbıqlardan taj órip, Onıń basına kiygizdi. Oń qolına qamıs tayaqtı uslattı da, Onıń aldına dizerlep otırıp:
– Jasasın, Yahudiylerdiń Patshası! – dep mazaq etti.
30Oǵan túkirdi, qamıstı alıp, Onıń basına urdı. 31Onı masqaralap bolǵannan keyin, ústindegi shapandı sheship alıp, Oǵan Óz kiyimin kiygizdi de, atanaq aǵashqa shegelew ushın alıp ketti.
Iysanıń atanaq aǵashqa shegeleniwi
(Mrk 15:21-32; Luk 23:26-43; Yuxn 19:17-27)
32Áskerler shıǵıp baratırǵanda Shimon atlı bir kireneli adamdı ushıratıp, onı Iysanıń atanaq aǵashın arqalap alıp júriwge májbúrledi. 33Golgota dep atalǵan, yaǵnıy «Bas súyek ornı» degendi ańlatatuǵın jerge kelgende, 34olar Iysaǵa ót qosılǵan sharaptı ishiwge berdi, biraq Ol tatıp kórip, ishiwden bas tarttı.
35Onı atanaq aǵashqa shegelep bolǵannan soń shek taslasıp, kiyimlerin óz ara bólisti#27:35 Zab 21:19., 36sońınan otırıp, Onı qarawılladı. 37Onıń ayıbın kórsetetuǵın: «BUL – YAHUDIYLERDIŃ PATSHASÍ IYSA» degen jazıwdı basınıń ústi betine, aǵashqa qaǵıp qoydı. 38Iysa menen birge eki qaraqshını da, birewin oń tárepine, ekinshisin sol tárepine atanaq aǵashqa shegeledi.
39Iysanıń janınan ótip baratırǵanlar basların shayqadı hám Onıń ústinen kúlip#27:39 Zab 21:8.:
40– Háy, Ibadatxananı buzıp, Onı úsh kúnniń ishinde qayta tikleyjaq bolǵan, Sen! Eger Sen Qudaydıń Ulı bolsań, qánekey, Ózińdi Óziń qutqarıp, atanaq aǵashtan túsip kórshi! – desti.
41Bas ruwxaniyler, diniy muǵallimler hám aqsaqallar da Onı mazaq qılıp bılay dedi:
42– Bul basqalardı qutqarıp, Ózin Ózi qutqara almaydı. Eger Ol Izraildıń Patshası bolsa, házir atanaq aǵashtan tússin. Sonda bizler Oǵan isenemiz. 43Ol Qudayǵa arqa súyep tur. Eger Quday qálese, házir Onı qutqarsın#27:43 Zab 21:9.. Sebebi Ol: «Men Qudaydıń Ulıman», – degen edi-ǵo.
44Iysa menen birge atanaq aǵashqa shegelengen qaraqshılar da Onı usılay mazaq etti.
Iysanıń jan tapsırıwı
(Mrk 15:33-41; Luk 23:44-49; Yuxn 19:28-30)
45Túski saat on ekiden baslap, tústen keyin saat úshke deyin, pútkil jerdi qarańǵılıq qaplap turdı. 46Saat úshler shamasında Iysa qattı dawıs penen:
– Eliy, Eliy! Lama sabaxtani? – dep baqırdı. Bul: «Qudayım, Qudayım! Nege Meni taslap kettiń?»#27:46 Zab 21:2. – degendi ańlatadı.
47Sol jerde turǵanlardıń geybirewleri bunı esitip:
– Ol Iliyastı shaqırıp atır, – dedi.
48Dárriw olardıń birewi juwırıp barıp, bir sorǵıshtı sirke suwına batırıp aldı da, onı tayaqqa qadap, Oǵan ishiwge berdi.
49Al basqaları:
– Toqtay tur, Iliyas kelip, Onı qutqarar ma eken, kóreyik, – desti.
50Iysa jáne bálent dawıs penen baqırdı da, jan tapsırdı.
51Sol waqıtta-aq Ibadatxananıń Muxaddesxanasındaǵı perde joqarıdan tómenge deyin qaq ayırılıp, ekige bólindi. Jer silkinip, jartaslar jarıldı. 52Qábirler ashılıp, jatırǵan muxaddeslerdiń kóbisi qayta tirildi. 53Iysa qayta tirilgennen keyin, olar qábirlerinen shıǵıp, muxaddes qalaǵa bardı hám kóp adamlarǵa kórindi.
54Jer silkiniwdiń hám basqa waqıyalardıń bolǵanın kórgen júzbası hám onıń menen birge Iysanı qarawıllaǵanlar qattı qorqısıp:
– Bul haqıyqattan da, Qudaydıń Ulı eken! – desti.
55Sol jerde uzaqtan qarap turǵan kóp hayallar da bar edi, olar Iysanıń izine Galiladan erip kelip, Oǵan xızmet etken edi. 56Olardıń arasında magdalalı Máriyam, Yaqıp penen Yusuptiń anası Máriyam hám Zebedeydiń ullarınıń anası da bar edi.
Iysanıń qábirge qoyılıwı
(Mrk 15:42-47; Luk 23:50-56; Yuxn 19:38-42)
57Kesh bolǵanda, Arimatiyadan Yusup atlı bir bay adam keldi. Ol da Iysanıń shákirti edi. 58Ol Pilatqa barıp, Iysanıń denesin soradı. Pilat oǵan beriwdi buyırdı. 59Yusup deneni alıp, onı taza zıǵır kepinge oradı da, 60óziniń jartasta oyılǵan jańa qábirine aparıp qoydı. Sońınan úlken bir tastı domalatıp, qábirdiń awzına qoydı da, sol jerden ketip qaldı. 61Magdalalı Máriyam menen basqa Máriyam sol jerde, qábirdiń qarsısında otırǵan edi.
Qábirdi qarawıllaw
62Kelesi kúni, yaǵnıy yahudiylerdiń tayarlıq kúninen#27:62 Tayarlıq kúni – juma kúni. keyingi Shabbat kúni#27:62 Shabbat kúni – shembi kúni. bas ruwxaniyler menen pariseyler Pilattıń aldına jıynalıp, 63oǵan:
– Taqsır! Ana ótirikshiniń tiri waqtında: «Men úsh kúnnen keyin qayta tirilemen», – degeni esimizge tústi. 64Sonlıqtan da, shákirtleri túnde kelip, Onı urlap alıp ketip, xalıqqa: «Ol ólimnen qayta tirildi», – dep aytpawı ushın, Onıń qábirin úsh kúnge deyin qarawıllawǵa buyrıq beriń. Olay etpesek, sońǵı jalǵan burınǵısınan da beter boladı, – dedi.
65Pilat olarǵa:
– Saqshılar bar-ǵo. Barıp, qábirdi óz bilgenlerińizshe gúzetińler, – dedi.
66Olar barıp, tasqa mór bastı da, qábirge saqshı qoydı.
انتخاب شده:
Matta 27: QrqMK22
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Институт перевода Библии, 2022
