ꓟ˗ꓗꓴ ꓟꓮꓴ ꓢꓮꓴ 7
7
ꓬꓰ˗ꓢꓴ ꓒ˗ꓣꓲ˗ꓫꓰ ꓑꓰ ꓡꓰ ꓔꓠ ꓑꓬꓟ ꓰ
1ꓧꓮꓴ ꓘꓴꓠ ꓒ˗ꓣꓲ˗ꓫꓰ ꓑꓰ ꓰ ꓬꓰ˗ꓣꓴ˗ꓢ˗ꓡꓰꓟ ꓟꓮꓲ ꓓꓳ ꓡꓳ ꓰ ꓟꓮꓴ ꓢꓮꓴ ꓗ ꓰ ꓢ ꓣ ꓑꓰ ꓣ ꓪꓟ ꓖꓶ꓾ ꓬꓰ˗ꓢꓴ ꓚꓥ ꓡꓰ ꓜꓴꓑ ꓡꓪꓲ꓾ 2ꓬꓥ ꓰ ꓡ ꓖꓬꓳ ꓣ ꓪꓟ ꓡꓳꓼ ꓮ ꓛꓲ ꓰ꓾ ꓮ ꓖꓥ ꓮ ꓖꓳꓔ ꓰ꓾ ꓜꓥ ꓜꓳ ꓠꓲ ꓗꓳ ꓰ ꓡꓰ ꓟꓬꓥ ꓗꓳ ꓰ꓿ 3ꓘ ꓢꓴ ꓟꓴ ꓖ ꓡꓰ꓾ ꓒ˗ꓣꓲ˗ꓫꓰ ꓑꓰ ꓰ ꓬꓴ˗ꓓ ꓑꓰ ꓐꓠ ꓫꓳ ꓐꓥ ꓖꓶ꓾ ꓮ ꓖꓲ ꓢꓴ ꓪꓴꓠ ꓑꓰ ꓰ ꓢꓥ ꓘꓬꓥ ꓓꓥ ꓡꓰ ꓛꓥ ꓠꓲ ꓮ ꓗꓳ ꓟꓴ ꓡꓪꓲ꓾ ꓡꓳꓼ ꓡꓰ ꓣ ꓖꓳ ꓜ ꓮ ꓛꓲ ꓑꓬꓟ ꓡꓰ ꓖꓶ꓾ ꓜꓥ ꓮ ꓜꓳ ꓗꓳ꓿ 4ꓖꓮꓲ ꓟꓮꓲ ꓡꓳ ꓗꓳ ꓡꓥ꓾ ꓖꓴꓥ ꓮ ꓛꓲ ꓫꓲ ꓡꓰ ꓬꓥ ꓟꓳ ꓡꓥ ꓮ ꓜꓳ ꓗꓳ꓾ ꓧꓮꓴ ꓕꓳ ꓟꓮꓲ ꓖꓳꓟ꓾ ꓮꓴ꓾ ꓖꓲ ꓘꓳ ꓑꓰ ꓡꓰ ꓛꓲ ꓑꓬꓟ ꓰ ꓕꓳ ꓮ ꓖꓳ ꓬꓥ ꓟꓳ ꓡꓳꓟ ꓬꓴ ꓡꓪꓲ ꓛꓥ ꓰ ꓡꓲ ꓕꓴꓥ ꓟꓬꓳ ꓟꓬꓳ ꓥꓴꓔ ꓔꓳ ꓮ ꓫꓲ꓿ 5ꓧꓮꓴ ꓟꓴ ꓡꓪꓲ ꓒ˗ꓣꓲ˗ꓫꓰ ꓑꓰ ꓰ ꓟꓮꓴ ꓢꓮꓴ ꓗ ꓰ ꓢ ꓣ ꓑꓰ ꓖꓶ꓾ ꓠꓥ ꓰ ꓡ ꓖꓬꓳ ꓪꓲ ꓮ ꓖꓲ ꓢꓴ ꓪꓴꓠ ꓰ ꓢꓥ ꓘꓬꓥ ꓓꓥ ꓡꓰ ꓮ ꓛꓥ ꓰ ꓪ꓾ ꓮ ꓖꓥ ꓮ ꓖꓳꓔ ꓟꓴ ꓰ ꓡꓳꓼ ꓰ ꓜꓥ ꓜꓳ ꓮ ꓗꓳ ꓡꓴ꓾ ꓖ ꓡꓪꓲ꓾ ꓬꓥ ꓡꓰ ꓟꓲ ꓗꓳ ꓰ꓿ 6ꓬꓥ ꓖꓶ ꓲ ꓟꓲꓔ ꓲ ꓑꓬꓟ ꓐꓳ ꓐꓥ ꓰ꓾ ꓟꓮꓴ ꓢꓮꓴ ꓟ ꓗ ꓔꓳ ꓰ ꓣ ꓙꓴꓥ ꓜ꓾
ꓫꓲ ꓮ ꓟꓬꓴ ꓖꓶ꓾ ꓬꓴꓟ ꓢꓶꓥ ꓰ ꓠꓴꓔ ꓗꓴ ꓰ ꓥꓳ ꓡꓰ ꓘꓴꓥ ꓖ ꓗꓳ ꓡꓥ꓾ ꓬꓥ ꓟꓳ ꓲ ꓟꓲꓔ ꓠꓲꓗ ꓡꓴꓟ ꓥꓳ ꓰ ꓪꓰ ꓮ ꓗꓳ꓿
7ꓬꓥ ꓟꓳ ꓐꓬꓴ ꓰ ꓓꓥ ꓡꓰ ꓜ ꓡꓲ ꓕꓴꓥ ꓗꓴꓔ ꓡꓪꓲ꓾ ꓐꓬꓴ ꓡꓰ ꓠꓬꓳ ꓟꓳ ꓰ꓾ ꓧꓮꓴ ꓢꓴ ꓟꓴ ꓥꓳ ꓡꓰ ꓐꓰ ꓐꓰ ꓮ ꓗꓳꓟ ꓜ ꓑꓮꓲ ꓠꓲ ꓮ ꓗꓳ꓾
ꓖ ꓡꓪꓲ꓾ ꓠꓴꓥ ꓟꓳ ꓰ ꓘꓬꓳ ꓰ˗ꓢꓮꓲ˗ꓮ ꓟꓲ ꓕꓳꓲ ꓓꓥ ꓗ ꓔꓳ ꓰ ꓖꓶ꓾ ꓖꓰ ꓖꓰ ꓔꓰꓥ ꓐꓰ꓿ 8ꓠꓴꓥ ꓟꓳ ꓖꓶ ꓗ˗ꓣꓮꓲ ꓗ˗ꓢꓥ ꓰ ꓢꓥ ꓓꓥ ꓡꓰ ꓑꓬꓟ ꓔꓳ ꓡꓪꓲ꓾ ꓐꓬꓴ ꓰ ꓢꓥ ꓘꓬꓥ ꓓꓥ ꓡꓰ ꓜ ꓛꓥ ꓠꓲ ꓮ ꓗꓳ꓾ ꓖ ꓰ꓿ 9ꓬꓥ ꓬꓥ ꓟꓳ ꓡꓰ꓾ ꓖꓰ ꓖꓰ ꓪ ꓠꓴꓥ ꓟꓳ ꓰ ꓢꓥ ꓘꓬꓥ ꓓꓥ ꓡꓰ ꓛꓥ ꓠꓲ ꓣ꓾ ꓖ ꓡꓪꓲ꓾ ꓗ˗ꓣꓮꓲ ꓗ˗ꓢꓥ ꓰ ꓢꓥ ꓓꓥ ꓡꓰ ꓠꓴꓥ ꓟꓳ ꓑꓬꓟ ꓔꓳ ꓐ ꓗꓳ꓿ 10ꓘ ꓢꓴ ꓟꓴ ꓖ ꓡꓰ꓾ ꓠꓥ ꓠꓴ ꓠꓥ ꓪ ꓡꓰ ꓘꓴꓥ ꓖ ꓮ꓾ ꓲ ꓠꓴ ꓲ ꓪ ꓡꓰ ꓠꓲꓥ ꓢꓴ ꓖꓶ ꓔꓰꓥ ꓔꓰꓥ ꓫꓲ ꓫꓥ ꓖ꓾ ꓖ ꓡꓪꓲ꓾ ꓟꓳ˗ꓫꓲ ꓔꓮꓲ ꓔꓳ ꓐꓰ꓿ 11ꓥꓴꓔ ꓗꓳ ꓡꓥ ꓠꓴꓥ ꓟꓳ ꓖꓶ꓾ ꓐꓬꓴ ꓬꓴꓟ ꓢꓶꓥ ꓲ ꓠꓴ ꓲ ꓪ ꓡꓰ꓾ ꓥ ꓰ ꓡꓳꓼ ꓟ ꓠꓥ ꓪꓳ ꓬꓴ ꓜꓰ ꓖꓶ꓾ ꓗꓳꓣ˗ꓐꓠ ꓥꓴꓔ ꓡꓰ꓾ ꓖ ꓔꓮꓲ ꓡꓰ ꓖꓶ꓾ (ꓗꓳꓣ˗ꓐꓠ ꓖ ꓓꓥ ꓖꓶ ꓗ˗ꓣꓮꓲ ꓗ˗ꓢꓥ ꓡꓰ ꓗꓬꓥ ꓐꓲ ꓰ ꓚꓴꓥ ꓧꓴ ꓥꓴꓔ ꓡꓰ) 12ꓧꓮꓴ ꓕꓥ ꓡꓰ ꓬꓴꓟ ꓢꓶꓥ ꓲ ꓠꓴ ꓲ ꓪ ꓡꓰ ꓗʼꓣꓴꓟ ꓣ꓾ ꓠꓴꓥ ꓟꓳ ꓘꓴꓟ ꓔꓳ ꓮ ꓗꓳ꓿ 13ꓧꓮꓴ ꓟꓴ ꓡꓪꓲ ꓠꓴꓥ ꓟꓳ ꓮꓑ ꓔꓳ ꓰ ꓢꓥ ꓘꓬꓥ ꓓꓥ ꓰ꓾ ꓗ˗ꓣꓮꓲ ꓗ˗ꓢꓥ ꓰ ꓓꓥ ꓡꓰ ꓠꓴꓥ ꓟꓳ ꓘꓲꓠ ꓑꓬꓟ ꓔꓳ ꓮ ꓗꓳ꓿ ꓧꓮꓴ ꓟꓴ ꓘꓬꓳ ꓟꓬꓳ ꓟꓬꓳ ꓠꓴꓥ ꓟꓳ ꓗꓴꓔ ꓠꓲ ꓮ ꓗꓳ꓾ ꓖ ꓡꓪꓲ꓾ ꓬꓥ ꓟꓳ ꓡꓰ ꓔꓮꓲ ꓰ꓿ 14ꓫꓶʼꓪ ꓐꓬꓴ ꓑꓰ ꓡꓰ ꓬꓥ ꓓꓴꓟ ꓪꓴꓔ ꓬꓴ ꓡꓪꓲ ꓔꓮꓲ ꓰ ꓖꓶ꓾ ꓠꓴꓥ ꓟꓳ ꓡꓴꓥ ꓡꓥ ꓥ ꓓꓥ ꓡꓰ ꓖꓬꓳ ꓡꓪꓲ꓾ ꓢꓰ ꓬꓴ ꓗꓰ꓿ 15ꓧꓰ ꓡꓴꓔ ꓟꓮꓲ ꓐꓬꓴ ꓰ ꓮ ꓕꓰ ꓫꓴꓔ ꓪꓥ ꓡꓳ ꓰ ꓧꓮꓲ ꓥꓴꓔ ꓗꓳ ꓡꓥ ꓬꓥ ꓡꓰ ꓮ ꓖꓥ ꓮ ꓖꓳꓔ ꓪꓳ ꓗꓴꓔ ꓣ ꓮ ꓥꓴꓔ꓿ ꓐꓬꓴ ꓰ ꓮ ꓘꓮꓴ ꓟꓮꓲ ꓕꓳ ꓡꓳ ꓰ ꓗꓴꓟ ꓖꓶ꓾ ꓐꓬꓴ ꓡꓰ ꓮ ꓖꓥ ꓮ ꓖꓳꓔ ꓗꓴꓔ ꓑꓬꓟ ꓔꓳ ꓡꓰ꓾ ꓖ ꓔꓮꓲ ꓰ꓿ 16ꓖꓬꓳ ꓬꓴ ꓣ ꓠꓳ ꓬꓴ ꓢꓴ ꓳ ꓥꓴꓔ ꓗꓳ ꓡꓥ꓾ ꓖꓬꓳ ꓬꓴ ꓗꓳ ꓫꓥ ꓖ꓾ ꓖ ꓰ꓿#7.16 ꓖꓬꓳ ꓬꓴ ꓣ ꓠꓳ ꓬꓴ ꓢꓴ ꓳ ꓥꓴꓔ ꓗꓳ ꓡꓥ꓾ ꓖꓬꓳ ꓬꓴ ꓗꓳ ꓫꓥ ꓖ꓾ ꓖ ꓰ꓿ This verse is not in the 1938 printing, and the text inserted here differs from the 1951 Roman script edition which transliterates as: ꓖꓬꓳ ꓬꓴ ꓣ ꓠꓳ ꓓꓑ ꓢꓴ ꓳ ꓥꓴꓔ ꓗꓳ ꓡꓥ꓾ ꓖꓬꓳ ꓬꓴ ꓫꓥ ꓖ꓾ ꓖ ꓰ꓿ 17ꓧꓮꓴ ꓕꓥ ꓫꓶʼꓪ ꓐꓬꓴ ꓑꓰ ꓰ ꓖꓥ ꓡꓴꓟ ꓡꓳ ꓡꓪꓲ꓾ ꓬꓴꓟ ꓘꓮꓴ ꓫꓴꓔ ꓓꓴꓟ ꓪꓥ ꓙꓥ꓾ ꓬꓥ ꓰ ꓡ ꓖꓬꓳ ꓪꓲ ꓧꓮꓴ ꓓꓥ ꓗꓰ ꓘꓬꓳ ꓡꓰ ꓬꓥ ꓡꓰ ꓟꓲ ꓗꓳ ꓰ꓿ 18ꓧꓮꓴ ꓟꓴ ꓡꓪꓲ ꓬꓥ ꓬꓥ ꓟꓳ ꓡꓰ꓾ ꓧꓮꓴ ꓜ ꓡꓰ ꓠꓴꓥ ꓟꓳ ꓮ ꓟꓲꓥ ꓐꓰ ꓫꓲ ꓗꓳ ꓡꓴ꓾ ꓧꓰ ꓡꓴꓔ ꓫꓴꓔ ꓟꓮꓲ ꓐꓬꓴ ꓰ ꓮ ꓘꓮꓴ ꓫꓴꓔ ꓪꓥ ꓡꓳ ꓰ꓾ ꓧꓮꓲ ꓥꓴꓔ ꓗꓳ ꓡꓥ꓾ ꓐꓬꓴ ꓡꓰ ꓮ ꓖꓥ ꓮ ꓖꓳꓔ ꓪꓳ ꓗꓴꓔ ꓑꓬꓟ ꓣ ꓮ ꓥꓴꓔ꓾ ꓠꓴꓥ ꓟꓳ ꓮ ꓢꓰ ꓗꓳ ꓡꓴ꓿ 19ꓘ ꓢꓴ ꓟꓴ ꓖ ꓡꓰ꓾ ꓧꓮꓴ ꓖꓶ ꓬꓥ ꓰ ꓲ ꓟꓲꓔ ꓠꓲꓗ ꓡꓴꓟ ꓘꓮꓴ ꓫꓴꓔ ꓪꓥ ꓡꓳ ꓰ ꓮ ꓥꓴꓔ꓾ ꓬꓥ ꓰ ꓪꓟ ꓘꓮꓴ ꓫꓴꓔ ꓜ ꓪꓥ ꓡꓳ ꓰ ꓰ꓾ ꓬꓳ ꓢꓳ ꓡꓟ ꓙꓥ ꓫꓴꓔ ꓓꓴꓟ ꓔꓮꓴ ꓕꓳ ꓡꓳ ꓰ꓿ ꓧꓮꓴ ꓢꓴ ꓖ ꓰ ꓖꓶ꓾ ꓜꓳ ꓫꓴ ꓡꓴꓥ ꓡꓥ ꓐꓠ ꓫꓳ ꓡꓰ ꓡꓳ ꓢꓠ ꓡꓳ ꓢꓰꓠ ꓰ ꓥꓴꓔ ꓡꓰ꓿ 20ꓣ ꓘꓬꓳ ꓓꓴꓟ ꓔꓮꓲ ꓡꓰ ꓖꓶ꓾ ꓐꓬꓴ ꓟꓮꓲ ꓕꓳ ꓡꓳ ꓰ ꓗꓴꓟ ꓖꓶ꓾ ꓐꓬꓴ ꓡꓰ ꓮ ꓖꓥ ꓮ ꓖꓳꓔ ꓪꓳ ꓗꓴꓔ ꓑꓬꓟ ꓡꓰ꓿ 21ꓘ ꓢꓴ ꓟꓴ ꓖ ꓡꓰ꓾ ꓮ ꓘꓮꓴ ꓟ ꓐꓬꓴ ꓲ ꓟꓲꓔ ꓘꓮꓴ ꓟꓮꓲ ꓮ ꓖꓰ ꓰ ꓲ ꓟꓲꓔ ꓠꓬꓴꓠ ꓕꓳ ꓡꓪꓲ꓾ ꓟꓲ ꓪꓰ ꓫꓴꓔ ꓰ꓾ ꓘꓮꓴ ꓰ꓾ ꓐꓬꓴ ꓢꓔ ꓰ꓾ ꓢꓴ ꓟꓲ ꓡꓴ ꓰ꓾ ꓡꓳ ꓒ ꓰ꓾ ꓮ ꓘꓬꓴ ꓮ ꓫꓳꓑ ꓰ꓾ 22ꓟꓮꓴ ꓰ꓾ ꓬꓴꓔ ꓰ꓾ ꓟ ꓠꓳꓠ ꓰ꓾ ꓡꓴ ꓟꓴ ꓰ꓾ ꓖꓴꓟ ꓣꓳꓥ ꓰ꓾ ꓮ ꓥꓳꓗ ꓮ ꓥꓗ ꓰ꓾ 23ꓧꓮꓴ ꓮ ꓫꓳꓑ ꓰ ꓘꓬꓳ ꓡꓴꓥ ꓡꓥ ꓖꓶ꓾ ꓮ ꓘꓮꓴ ꓫꓴꓔ ꓟꓮꓲ ꓕꓳ ꓡꓳ ꓡꓪꓲ꓾ ꓐꓬꓴ ꓡꓰ ꓮ ꓖꓥ ꓮ ꓖꓳꓔ ꓗꓴꓔ ꓑꓬꓟ ꓔꓳ ꓡꓰ꓾ ꓖ ꓰ꓿
ꓟꓲ ꓪꓰ ꓜꓳ ꓚꓥ ꓟ ꓠꓔ ꓘꓔ ꓑꓬꓟ ꓐꓲ ꓰ
24ꓮ ꓘꓪꓲ ꓬꓥ ꓧꓮꓴ ꓟꓮꓲ ꓕꓳ ꓡꓳ ꓡꓪꓲ꓾ ꓔꓴ˗ꓣꓴ ꓰ ꓢꓲ˗ꓓꓴꓠ ꓟꓮꓴ ꓗꓬꓳ ꓫꓴꓔ ꓙꓰ ꓡꓳ ꓰ꓾ ꓬꓴꓟ ꓘꓮꓴ ꓟ ꓬꓥ ꓪꓥ ꓡꓪꓲ꓾ ꓧꓮꓴ ꓡꓰ ꓢꓴ ꓑꓰ ꓢꓰ ꓣ ꓮ ꓠꓮꓴ ꓗꓳ ꓡꓥ ꓮ ꓪꓳ ꓗꓳꓲ ꓑꓬꓟ꓿ 25ꓘ ꓢꓴ ꓟꓴ ꓖ ꓡꓰ꓾ ꓬꓥ ꓰ ꓘꓬꓳ ꓡꓰ ꓮ ꓚꓳꓲ ꓮ ꓬꓴꓥ ꓠꓔ ꓓꓑ ꓰ ꓟꓲ ꓪꓰ ꓜꓳ ꓪꓳ ꓰ ꓟꓲ ꓪꓰ ꓣ ꓬꓴ ꓧꓮꓴ ꓙꓥ ꓪꓳ ꓖꓬꓳ ꓡꓪꓲ꓾ ꓙꓰ ꓡꓰ ꓟꓴ꓾ ꓬꓥ ꓰ ꓘꓲ ꓪꓥ ꓟ ꓘꓲ ꓒꓴꓔ ꓕꓴ ꓡꓪꓲ꓾ ꓬꓥ ꓰ ꓟꓲ ꓪꓰ ꓜꓳ ꓚꓥ ꓟ ꓠꓔ ꓡꓰ ꓘꓔ ꓑꓬꓟ ꓐꓲ ꓫꓥ ꓖ꓾ ꓬꓥ ꓡꓰ ꓚꓴ ꓓꓴꓥ ꓰ꓿ 26ꓧꓮꓴ ꓟꓲ ꓪꓰ ꓚꓮꓴ ꓖꓶ꓾ ꓧꓰ˗ꓡꓰ˗ꓠꓲ ꓮ ꓟꓬꓴ ꓟ ꓢꓴ˗ꓣꓴ˗ꓒꓲ˗ꓠꓲ˗ꓗꓲ ꓟꓲ ꓪꓰ ꓥꓴꓔ ꓔꓳ ꓡꓰ꓿ 27ꓧꓮꓴ ꓟꓴ ꓡꓪꓲ꓾ ꓬꓰ˗ꓢꓴ ꓖꓶ꓾ ꓙꓳ ꓫꓥ ꓪꓲ ꓡꓰ ꓧꓶ ꓖꓲ ꓫꓳ ꓜꓳ ꓫꓥ꓿ ꓙꓳ ꓫꓥ ꓪꓲ ꓰ ꓜꓥ ꓬꓴ ꓡꓪꓲ꓾ ꓘꓪꓲ ꓡꓰ ꓐꓲ ꓑꓬꓟ ꓡꓰ ꓮ ꓖꓰ꓾ ꓖ꓾ ꓬꓥ ꓡꓰ ꓔꓮꓲ ꓰ꓿ 28ꓧꓮꓴ ꓟꓲ ꓪꓰ ꓬꓴ ꓖꓶ꓾ ꓥꓴꓔ ꓐꓰ꓾ ꓬꓴꓟ ꓢꓶꓥ ꓰ꓾ ꓘꓪꓲ ꓑꓰ ꓡꓥ ꓜꓥ ꓒꓴꓠ ꓳ ꓟ ꓙꓳ ꓫꓥ ꓪꓲ ꓰ ꓜꓥ ꓛꓟ ꓜꓥ ꓕꓥ ꓖꓴ ꓜꓳ ꓮ ꓗꓳ꓾ ꓖ꓾ ꓬꓥ ꓡꓰ ꓔꓴ ꓰ꓿ 29ꓬꓰ˗ꓢꓴ ꓖꓶ꓾ ꓧꓮꓴ ꓢꓴ ꓖ ꓔꓮꓲ ꓰ ꓬꓠ ꓟꓮꓲ꓾ ꓠꓥ ꓡꓳ ꓮ꓾ ꓠꓔ ꓖꓶ ꓠꓥ ꓰ ꓟꓲ ꓪꓰ ꓜꓳ ꓚꓥ ꓟꓮꓲ ꓕꓳ ꓡꓳ ꓐꓰ꓾ ꓖ ꓡꓪꓲ꓾ ꓬꓥ ꓡꓰ ꓔꓮꓲ ꓰ꓿ 30ꓧꓮꓴ ꓟꓴ ꓬꓥ ꓬꓴꓟ ꓒꓬꓥ ꓓꓴꓟ ꓡꓳ ꓰ ꓥꓴꓔ ꓡꓪꓲ꓾ ꓧꓮꓴ ꓙꓳ ꓫꓥ ꓖꓶ꓾ ꓬꓴꓑ ꓖꓴ ꓕꓳ ꓟ ꓡꓰ ꓔꓳ ꓡꓰ꓾ ꓠꓔ ꓖꓶ ꓬꓥ ꓚꓥ ꓟꓮꓲ ꓕꓳ ꓐꓬꓴ ꓡꓳ ꓰ ꓡꓰ ꓟꓬꓥ ꓰ꓿
ꓠꓳ ꓙꓲꓔ ꓡꓪꓲ ꓮ ꓓꓔ ꓠꓬꓳ ꓰ ꓐꓬꓴ ꓡꓰ ꓡꓳ ꓖꓰ ꓐꓲ ꓰ
31ꓔꓴ˗ꓣꓴ ꓟꓮꓴ ꓗꓬꓳ ꓟꓮꓲ ꓓꓴꓟ ꓕꓳ ꓡꓳ ꓡꓰ꓾ ꓢꓲ˗ꓓꓴꓠ ꓡꓰ ꓘꓳ ꓡꓮꓲ ꓡꓳ ꓡꓪꓲ꓾ ꓓꓰ˗ꓖ˗ꓑꓳ˗ꓡꓲ ꓟꓶꓥ ꓗꓬꓳ ꓖꓴꓥ ꓓꓳꓥ ꓘꓳ ꓰ ꓡꓳ ꓡꓪꓲ꓾ ꓖ˗ꓡꓲ˗ꓡꓰ ꓠꓳꓥ ꓫꓴꓔ ꓰ ꓙꓰ ꓰ꓿ 32ꓧꓮꓴ ꓘꓴꓠ ꓠꓳ ꓙꓲꓔ ꓡꓪꓲ꓾ ꓮ ꓓꓔ ꓠꓬꓳ ꓰ ꓐꓬꓴ ꓣ ꓬꓴ ꓡꓰ꓾ ꓬꓥ ꓟꓳ ꓬꓥ ꓚꓥ ꓫꓴꓔ ꓫꓪꓲ ꓰ ꓡꓳ ꓡꓪꓲ꓾ ꓬꓥ ꓰ ꓕꓳ ꓟ ꓡꓳ ꓗꓰ ꓐꓲ ꓣ ꓟ ꓔꓴ ꓚꓴ ꓓꓴꓥ ꓗꓳ ꓰ꓿ 33ꓧꓮꓴ ꓟꓴ ꓫꓶʼꓪ ꓒꓴꓥ ꓟ ꓟ ꓚꓲ ꓫꓲꓟ ꓰ ꓙꓳ ꓪꓳ ꓫꓴꓔ ꓬꓥ ꓡꓰ ꓫꓪꓲ ꓕꓳ ꓬꓴ ꓡꓪꓲ꓾ ꓧꓮꓴ ꓬꓴ ꓰ ꓠꓳꓽ ꓘꓬꓴꓥ ꓘꓮꓴ ꓫꓴꓔ ꓬꓥ ꓡꓳꓼ ꓠꓬꓪꓲ ꓕꓮꓴ ꓗꓔ ꓐꓲ ꓡꓰ ꓰ꓾ ꓢꓳ ꓗꓠ ꓐꓬꓰ ꓡꓪꓲ꓾ ꓬꓥ ꓰ ꓫꓳꓸ ꓡꓰ ꓡꓰ ꓕꓮꓴ ꓐꓲ ꓡꓪꓲ꓾ 34ꓟꓮꓴ ꓘꓴꓥ ꓫꓴꓔ ꓐꓬꓴ ꓪꓴ ꓴ ꓚꓥ꓾ ꓬꓥ ꓢꓳ ꓟꓳ ꓫꓰ ꓡꓪꓲ꓾ ꓧꓮꓴ ꓬꓴ ꓡꓰ꓾ ꓰꓔ˗ꓒ˗ꓕ꓾ ꓖ ꓰ꓾ ꓧꓮꓴ ꓢꓴ ꓖ ꓰ ꓖꓶ꓾ ꓒꓳꓥ ꓡꓳ ꓮ꓾ ꓖ ꓰ ꓥꓴꓔ ꓔꓳ ꓡꓰ꓿ 35ꓧꓮꓴ ꓟꓴ ꓡꓪꓲ꓾ ꓬꓥ ꓰ ꓠꓳ ꓢꓠ ꓐꓬꓴ ꓡꓳ ꓡꓰ ꓰ꓾ ꓬꓥ ꓰ ꓫꓳ ꓔꓪꓲ ꓐꓲ ꓡꓳ ꓡꓪꓲ꓾ ꓓꓥ ꓘꓬꓥ ꓘꓬꓥ ꓪꓳ ꓠꓬꓳ ꓐꓰ꓿ 36ꓧꓮꓴ ꓘꓬꓳ ꓳ ꓡꓰ ꓡꓰ ꓮ ꓔꓮꓲ ꓗꓬꓳ ꓫꓥ ꓖ꓾ ꓬꓥ ꓬꓥ ꓟꓳ ꓡꓰ ꓔꓮꓲ ꓔꓳ ꓗꓳ ꓡꓥ꓾ ꓙꓰ ꓔꓮꓲ ꓡꓰ ꓙꓰ ꓬꓥ ꓟꓳ ꓙꓰ ꓘꓮꓲ ꓗꓬꓳ ꓐꓴꓟ ꓗꓳ ꓰ꓿ 37ꓬꓥ ꓟꓳ ꓡꓰ ꓖꓬꓮꓲ ꓟꓮꓴ ꓧ ꓐꓴꓟ ꓗꓳ ꓡꓪꓲ꓾ ꓬꓥ ꓡꓴꓥ ꓡꓥ ꓡꓰ ꓖꓰ ꓘꓬꓳ ꓪꓳ ꓗꓴꓔ ꓡꓰ꓾ ꓠꓳ ꓙꓲꓔ ꓐꓥ ꓡꓰ ꓪꓳ ꓖꓬꓳ ꓠꓥ ꓡꓪꓲ꓾ ꓮ ꓓꓔ ꓠꓬꓳ ꓐꓥ ꓡꓰ ꓪꓳ ꓠꓬꓳ ꓠꓥ ꓡꓰ꓾ ꓖ ꓗꓳ ꓰ꓿
انتخاب شده:
ꓟ˗ꓗꓴ ꓟꓮꓴ ꓢꓮꓴ 7: ATB1938
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
First published in Fraser script in 1938.
