Luc 2
2
Ekulihi e Zezi
1Ntini e Sezaare#2.1 Atuoligi ankumu ma esi e Rome o Sezaare. Ogise akihi nkumu esi e Rome, nde oti osiami ma osa onteende o baari aso ama esi e nde. 2Onteende a ntsomi dzua asi nde o ntini e Kirinise akihi lepatima o Siri. 3Mvuuru na mvuuru oyeni onguundu ma kuli nde na asa onteende. 4Zuzefe se owi Nazarete onguundu o ntsa Ngalili, ma ovuruha Betileyeme onguundu o ntsa Zide. Mpili ma kuli nkani Davide. Nde anku se aki ombisa o Davide. 5Nde ayeni na asa onteende dzua bla Mariya adila oka ompala a nde, nde aki oya na yimi. 6Ntini e bo ma kihi o Beteliyeme, tsuhu okula eto. 7Nde okuli muana antsomi, muana a balaha. Oporihi nde mo olembe, otsuusi nde o biri mo edziaha anyama. Obila ntsa otini andzia ebiri eki kali.
Obaandzi atooso Ntsia e Mve na akieli ma endoombo
8Ntsa enkese bia ekihi na akieli ma endoombo, bo ma moho na mpiibi ma okiele dziimi le bo le endoombo o ntsa anguunu. 9Obaandzi a Nkumu omo owasihi na e bo. Lekuma le Nkumu ledzeniŋi bo bla oyalala. Bo amoni vuoho bo mini. 10Obaandzi na bo ndi: «Leka mono vuoho ni, me eduha be ntsia e mve empa baari aso osuere bo mini. 11Lobi ntsa onguundu o Davide ami kula be Ovusihi nde Krisi#2.11 Krisi oma kaha mpili a Azife Masiya, mvuuru a Ndziami asuoli ma ovusuha baari a nde. Ma le greeke Kristose., nde se Nkumu. 12Mono ndiimi e be ledze oyaa nde: be ledze omono muana ma kini ma okula, ama poroho nde ma olembe, ama tsuusa obiri edziaha anyama.»
13O niŋa, abaandzi awi yulu kuna na abasaha obaandzi a ntsomi, bo ma yima aluumu a Ndziami ndi:
14«Lekuma le Ndziami leka ma ebiri e nkara yulu,
na oduusu se oka o yula ntsie o baari a nde ama dia.»
Akieli ma endoombo ma adze na Betileyeme
15Ntini abaandzi ma nyili bo ma ovurihi na yulu, akieli ma endoombo na abuha ndi: «Ŋa letsue tii Betileyeme na amono maami ma yiri, a Nkumu ama laha saabe.» 16Bo ayeni woowo, abasihi Mariya bla Zuzefe na muana ma kini ma okula o tolo, o biri edziaha anyama. 17Bo ama omono nde, bo aduhi maami ma obaandzi aduhi na bo o muana dzua. 18Baari aso ma yuhi akieli ma endoombo, akimi maami a bo ma duuhi. 19Mariya akiele maami maa aso ntsa otsui, nde asaha osuumbu ma osa. 20Emana akieli ma endoombo avurihi. Bo ma yima lekuma bo se ma siha aluumu a Ndziami, o maami a bo ma yuhi na a bo ma moni. Mo aso ayiri ma osuumbu obaandzi atoosi bo.
Ma luha Zezi nkuumi
21Emana etsuhu ntsaami, o mfuomo asi muana sasi, ampi nde nkuumi e Zezi ma osuumbu obaandzi aduhi na Mariya, nde oki kini obira yimi ni.
Ma laha Zezi na Ndziami
22Emana ŋa, tsuhu e tsinda okuumbu eto lemihi na angri a Ndziami ampi Moyize. Mariya bla Zuzefe abiri muana Zerizaleme na alaha nde na Nkumu. 23Obila ama teende ntsa osaangumu angri a Nkumu ndi: «Ntuba muo a muana a balaha, adze oka buhu ma ama yeese o Nkumu.» 24Ŋa bo ayi se na ampa avuoŋi a tsinda okuumbu lemihi na angri a Nkumu: «Eki epebihi dziele si kali baana ma akuumbi vuele.»
Simion owobi a Ndziami
25Ŋa balaha mo ekihi o Zerizaleme nkuumi e nde Simion. Nde aki mvuuru a tele, anyiima Ndziami, adila na lila Ovusihi a baari a Isayele. Oduduma Santi aki o nde. 26Oduduma Santi oki oma baana odziese nde ndi: «We aka sa kua ni, we asa mono Krisi a Nkumu asuoli.» 27Oduduma Santi obiri Simion ntsa ndzo e Ndziami. Dzia biri e nguhu bla taara ma biri Muana ma osuumbu angri a Ndziami. 28Simion oyahi muana ntsa dziala e nde, ompi Ndziami leve ndi:
29«O ŋa Nkumu, nyila odzandzi a we okua ntsa oduusu lemihi na andahi a we,
30obila miisi a me ami mono Ovusihi,
31a we ama ayeese o baari asiiso:
32Nde oyalala edze olaha we na baari a yulu a ntsie.
Nde adze oka lekuma le baari a we a Isayele.»
Simion awobo ma lengulu le Ndziami
33Taara bla nguhu a muana akimi o maami a Simion awobihi o nde. 34Simion ompi bo andosoho. Nde na Mariya ndi: «O muana we yu, kuna o ntsa Isayele ma ava, si kali ma nyusuha. Nde adze oka ndiimi e Ndziami, okoroho baari ma adze obele nde. 35Ŋa ma adze oyaa etsimiŋi e baari kuna. Ŋa we Mariya, mpasi edze otiila we otima mva dzuo.»
Aane owobi a mbari e Ndziami
36O ŋaa se ekihi na okaasi a nkuumi Aane muana Paniele ama lekaha la Aseere. Nde owobi a mbari e Ndziami, aki aya okubu. Ntsa ongondo o nde, nde osi esibi ntsaami bla olumi a nde. 37Emana oya okuuli. Nde ekuumi ma esibi mfuomo na esibi ena (84). Akihi ntsa ndzo e Ndziami ma odzandza antini aso, aka na ongerehe, nde se avuono. 38O ntini dzia nde se oyi, ompi Ndziami leve, owobi o muana na baari aso ma dilihi Ovusihi a Zerizaleme.
Obusi o Zezi o Nazarete
39Bo ama mana osa lemihi na angri a Nkumu apisihi, Mariya bla Zuzefe avurihi onguundu o bo Nazarete o ntsa Ngalili. 40Muana akulihi na mpari eso, na na ntsimi yo mini, mpolo e Ndziami eki bla nde.
Zezi oto esibi kuumi na dziele oyeni ndzo e Ndziami
41Esibi eso, nguhu a nde bla taara a nde ayenihi Zerizaleme o tsinda a Azife ma tsuoloho o Paake. 42Zezi oma to esibi kuumi na dziele, oyeni bla bo ma otiiri a bo. 43Bo amana tsinda avurihi. Ŋa muana bo, Zezi osiili o Zerizaleme taara bla nguhu aka yaa ni. 44Bo aki ndi muana oli bla abuha a bo a ndzila mo. Asi odziila okumuu, aya ma saha nde ntsa nkuono na andihi a bo. 45Bo aka mono nde ni. Avurihi na Zerizaleme na osaha nde. 46Tsuhu otari bo amoni muana ntsa ndzo e Ndziami. O ntsi, o mpaniŋi ayisihi ma Azife, nde ayuha bo, nde se alehe bo eduhu. 47Aso ma ayuhi muana akimi ntsimi ekalihi e nde. 48Bo ama mono nde, bo akimi. Nguhu na nde ndi: «E muana me we dzia dzaa e we ama sa bisi ma? Saa taara we lekihi ntsa onguo na lesaha le we.» 49Nde okaali bo ndi: «Be lesaha me ma oma? Be i ya mbri ove me esi dzandza e Taara me ni?» 50O ŋa bo aka yuha maami a nde aduuhi ni.
51Emana Zezi osurihi bla bo Nazarete. Nde anyiima bo. Nguhu akiele maami maa aso ntsa otima a nde. 52Zezi akulihi na ntsimi eso. Nde aki na mpolo o miisi a Ndziami na a baari. Na baari se ma adzuusa nde.
اکنون انتخاب شده:
Luc 2: MDT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
