मरकुस 2
2
अदरंगो वाल़ा दु:खिया चाँगा करह्
(मत्ती 9:1-8; लूका 5:17-26)
1कंई देसो बेत्तणों गाशी प्रभू यीशू कफरनहूम नगर दे पाछू आऐं, अरह् शुण्णों दो आओ के प्रभू यीशू घरे असो। 2तबे तेथै ऐत्री बड़ी बैशुमाँर लोगों के भीड़ कठी हुऐ, के देऊँल़ी दे भे जागा ने रोही, अरह् प्रभू यीशू तिन कैई शे पंणमिश्वर के बचन शुणाँदे लागे। 3लोगे ऐक अदरंगो का दु:खिया चौऊँ आदमी ऐ लूह्थों दा टीपियों प्रभू यीशू कैई आँणा। 4परह् लोगो की बैशुमाँर भीड़ के कारण से तेथै तिन के नंजीक ने पंऐच़ी सकी; तबै तिन्ऐं तैसी घरोह् को छाप्पर ऊपाड़ो अरह् सेजा दु:खिया तियों ही लूह्थों दा बाँनियों छाप्परों वाटी ऊँदा बाऊड़ी खे छुँड़ा जेथै प्रभू यीशू थिऐ। 5तिनका बिश्वाष दे:खियों, प्रभू यीशू ऐ तेसी अदरंगो के दु:खिया खे बुलो, “बैटा तेरे पाप माँफ हऐ रूऐ।” 6तबे कऐ यहूदी-निय्म के शिखाणों वाल़े जुण्जे तेथै बईठे अंदे थिऐ, से आप्णे-आप्णे सासो दा ऐजा बिचार कर्दे लागे। 7“ऐजा आदमी ऐष्णों कैई बुलो? ऐ तअ पंणमिश्वर की बरा-बरी करह्! पंणमिश्वर के सुवाऐं ओका कुँण असो, जू पाप माँफ करी सको?” 8प्रभू यीशू मसीया ऐ तेख्णी आप्णीं आत्त्मा दो जाँणी पाव, के ईन्ऐं आप्णी-आप्णी सासो दा का बिचार करी लुवा, अरह् तिन्ऐं तिनखे बुलो, “तुँऐं ऐष्णों कैई सोंच़ीं लो? 9सुखो का असो? ऐजो के अदरंगो के दु:खिया खे बुलू, के तेरे पाप माँफ हुऐ, के ऐजी अज्ञाँ देऊँ के बिऊँज अरह् आप्णी लुह्थ टींप, अरह् ऊडा-पुँढा हाँड? 10परह् मेरे बुल्णों का ऐजा मतल्व असो, के तुँऐं ऐजो जाँणीं पाँव, के धर्ती गाशी, आदमी के बैटे कैई पाप माँफ कर्णो का भे हंक-अधिकार असो” तबे प्रभू यीशू ऐ तेसी अदरंगो के दु:खिया खे अज्ञाँ दिती। 11“हाँव ताँव्खे बुलू, के बिऊँज अरह् आप्णी लुह्थ टींप, अरह् आप्णे घरे ज़ा।” 12से तेख्णी बिऊँजा अरह् आप्णी लुह्थ बिछाऊणा थागियों तिनू सभी के साम्णें दे:ख्दे-दे:ख्दे तेथै शा आगू हुटा; तबे तिनू सभी के तोरबाँणच़ूंटे, अरह् पंणमिश्वर की बड़ियाऐं करियों से बुल्दे लागे, “आँमें ऐष्णों कदी ने दे:खी थई।”
प्रभू यीशू ऐ चूंगी लणों वाल़ा लेबी बईदा
(मत्ती 9:9-13; लूका 5:27-32)
13तबे प्रभू यीशू तेथै शे नीक्ल़ियों झील की टिराँव्टी दे हुटे, अरह् लोगो की बादी भीड़ तिन कैई आऐ, अरह् से तिनखे बचन का बखाँण कर्दे लागे। 14ज़ाँदी बई प्रभू यीशू ऐ हलफई का बैटा लेबी चूंगी की चौऊँकी गाशी बईठा अंदा दे:खा, अरह् तेस्खे बुलो, “मुँह पाछी आ।” अरह् से बीऊजियों तिनू पाछी चाल पड़ा। 15जबे प्रभू यीशू मसीया लेवी के घर दे खाँणों खाँदे धुईऐ, तअ बैजाऐ च़ूंगीं लणों वाल़े, अरह् पापी प्रभू यीशू अरह् तिनके चैले की गईलो भोजन कर्दे लागे, किन्दें खे के से बैजा लोग थिऐ। 16प्रभू यीशू मसीया पापी लोगों की गईलो भोजन कर्दे दे:खियों यहूदी रिंत्ति-रूवाज बाँण्णों वाल़े, अरह् यहूदी-निय्म के शिक्क्षा देणों वाल़े, जू के यहूदी भाट-बाँम्ण थिऐ, तिन्ऐं प्रभू के चैले शे सुवाल करे, “तुवाँरा गुरू जी, चूंगी लणों वाल़े, अरह् पापी लोगो आरी कैई खाँव-पीयों?” 17प्रभू यीशू ऐ ऐजो शुणियों तिनखे बुलो, “आछे-भले आदमी खे जड़ी-जड़यारे के जरूरत ने हंदी, परह् दु:खिया खे जड़ी-जड़यारे की जरूरत हों: हाँव धर्मी के खातिर ने, परह् पापी लोगो बंईद्दा आऐ रूवा।”
परार्थना का सवाल
(मत्ती 9:14-17; लूका 5:33-39)
18संत्त-यूहन्ना के चैले, अरह् यहूदी भाट-बाँम्ण ऐ बरत करी लुवा थिया, अरह् कंई ऐ आऐयों प्रभू यीशू मसीया शा ऐजा सुवाल करा, के “ऐष्णों कैई असो, के संत्त-यूहन्ना, अरह् यहूदी भाट-बाँम्ण के चैले तअ बरत करह्; परह् तुवाँरे चैले ने बरत कर्दे?” 19तबे प्रभू यीशू ऐ तिनखे जबाब दिता, “जाँव तोड़ी दुह्ला बंरात्ती दा बंरातू आरी हों, ताँव-तोड़ी से बरत ने कर्दे। 20परह् सेजे देसो आँदे जबे दुह्ला तिन कैई शा ज़ई हंदा तबे से भे बरत कर्दे।
21“नंऐं कपड़े की टाली पुराँणे खोट्णों दे ने लाई दी, ना तअ सेजो पूराँणों खोटियोंण हजो भे बैगेही चीरियों, जेथै सेजी नंऐं कपड़े की टाली लाई। 22नुवाँ दाख्ह्-अंगूरोह् का रंस पुराँणी मंष्को दा ने थंईदा, ना तअ सेजी पुराँणी मंष्क अरह् दाख्ह्-अंगूरोह् का नुवाँ रंस दुईनें खत्त्म हले, किन्देंखे के नुवाँ दाख्ह-अंगूरोह् का रंस नंई ही मंष्क दा थंई।”
बिषाँव का प्रभू
(मत्ती 12:1-8; लूका 6:1-5)
23ऐशो हऐयों के प्रभू यीशू आप्णें चैले आरी बिषाँव के देसे सेंरी बाटी ज़ादे लागे थिऐ, अरह् तिनके चैले ऐ हाँड्दी बई खेच़ौ की मियाल़ो शी शीमी लंम्बाऐयों च़ूंड़ियों खाऐ लई थी। 24ईन्दें गाशी यहूदी भाट-बाँम्ण ऐ प्रभू यीशू खे बुलो, “दे:खो! तुवाँरे चैले बिषाँव के देसे ऐजी टह्ल कैई करह्, जू यहूदी-निय्म के हिसाब शो ठीक ने आथी।” 25तबे प्रभू यीशू ऐ तिनखे बुलो, “कियो रे, तुँऐं ऐजो कदी ने पढ़ी थई? के जरूरत पढ़णों गाशी जबे राजा दाऊद अरह् तेस्के साथी के भूख लागी तअ तिन्ऐं का करो? 26महाँ-याजक अबियातार के बख्त्ते तिन्ऐं पंणमिश्वर की देऊँठी शी भेंट की पबित्र रोटी खाई, जिनू याजक के सुवाऐ ओकी कोसी खे भे यहूदी-निय्म के मुँताबिक खाँणी ठीक ने थी, तबे भे तेने खाई अरह् सेजी ही पबित्र रोटी आप्णें साथी खे भे दिती थी?” 27तबे प्रभू यीशू मसीया ऐ तिनखे बुलो, “बिषाँव के देसो की थापनाँ आदमी खे करी थऐ, ना के आदमी की थापनाँ बिषाँव के देसो खे करी थऐ। 28ऐजो भे शुणों: के आदमी का बैटा बिषाँव के देसो का भे मालिक असो।”
اکنون انتخاب شده:
मरकुस 2: sri
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2022, Wycliffe Bible Translators, Inc. All rights reserved.
