Luka 1
1
Epa eka e ote Luka naka wele orooka na
1Ondoogong Tiyopalas, aromo a cake ne samba o wela aza epa eka Ashili a beke na nannamena e pena a nyimi oro a kazo Yeso, 2nangka waze o bora andaaka ne laka ka yizi, ka azara o baala angmǝ a Ashili ne nya ro. 3A wa kang rere a mi, nangka ma tare epame aza Yeso a be ting, kang wele a kap a deya ara au ondooka aromo gonte o gongnga wai. 4Ma ye nyimia adorana o rose edang angmǝ aka a baalo.
A bele ongmenga o Yohana ko batisma
5A were a Ogomo Hiridus o makeke ma Yahudiya, ondo magame ma Ashili ka a beya wai na Zakariya wa zene, wai ondo akwilǝ ona Abija waye. Kanza pate one ka ondaye wai ne suri akora a Harona, a leze le ondaye mea leye Alisabatu. 6Pate one a leere neya sangsang a begeshe be Ashili, ane tare angmǝ a Ateokora ka makili ma wai a kap. 7Pate ka nyimi neta neye ka kena ne, aza o bena Alisabatu ta ngmenza ne, a pate one a leere ne kang onga a shenai.
8A were aka Zakariya waya gole ka andaane akora Abija o makili ma Ashili. 9Nangka makili ma na magame ma Ashili maze, na zake wai na wa lyǝ ba akwilǝ a Ashili adorana wa ese mapapa ma o waze o lebo ara o esaza o mai.#1:9 Waya o torare ka e Hausa. 10A were o esaza mapapa ma o waze o lebo, aromo a cake neya o yangga a beya angmǝ ka Ashili.
11Na otoma Ashili o zaa shili oyende wa deya wai, na wa itǝ a sara ore o esaza mapapa ma o waze o lebo. 12Nangka Zakariya wa laka wai na wa kerke, a boome meke wai. 13Na otoma Ashili o zaa shili me bekaana, “Kana o kone boome ne, Zakariya, o beya angmǝ ka Ashili au, a kona, ondaye o Alisabatu wayo ngmenga kena ka lome, ka oyo nya kai leze na Yohana.#1:13 Leze le Yohana wore o bena, Ashili aye ka e egonegone. 14Oyo kona o leba, ocǝ lenyong le lebo, aromo a cake neyo kona o leba ka ongmenga wai, 15aza o bena Ateokora a yo ote wai kawa itǝ ondo ogong a nyimia aromo. Kana wa se oloo ne, ka pate epa eka e era e wongze aromo nangka o loo eze, a obere Ashili wayo tare wa kai zongka a ngmeng wai. 16A Yohana me wayo kuriyǝ ying maYahuda ba cake ara Ateokora Ashili ane. 17Kanza wayo kala izi Ateokora, a nyimi obere Ashili ka legoone le Ileya ondo beya a ngmǝ ka mawo ma Ashili, ka wa kuriyǝ anyong anate ba ra yana. Ana o dera o kona ngmǝ kane kabare ka o rosa aromo aka ne kone boome ba Ashili. Awa babare aromo kane ende o deya Ateokora.”
18Na Zakariya pirkǝ otoma Ashili o zaa shili ka o dera o kabare na, “Ma wanea ang rose epa ena? Ka ma samba o onga, a shenai se ondaye ong se lipǝ kanza.”
19Na otoma Ashili o zaa shili kabare wai na, “Mea Jibrailu, ondo itǝzǝ ba begeshe ba Ashili, a tongang kang beke angmǝ ka bo ang kang belo angmǝ a lebo na. 20Nannamena ongmǝ o wayo pate oto kang ama o bekaa ngmǝ ne se ngmeeka ba laka epa eka ma belo a e pena, aza o bena ota ba kabare ka angmǝ aka ma bekaa a bo ne, aka a yo pena a were aka ma zaka.”
21A aromo amea neya aza o enda Zakariya, ka madoola ma epa eka e ote wai na wa rabo ba akwilǝ Ashili. 22nangka wa suri o yangga, wa ta wa ama o beya angmǝ ka ne ne, na ne rose o bena Ashili a wore wai eyapa a nyimi name. A wa lya izi ka lerakare awata ama o beya eyapa ne.
23Nangka wa mare ogole o wai akwilǝ a Ashili a were name, na wa kuri akwilǝ. 24Malo tomore tome na Alisabatu ondaye wai waye tumǝ, naka baasa o mareka esu, 25Aka bekaana, “Ateokora wa yang epa ena, a wereena ka wa lakang ka egonegone na wa kwizǝng e zǝng ba nyimi aromo.”
A bele ongmenga Kena ka Ashili
26A nyimi oreka o taashe e tumǝ Alisabatu, na Ashili tong otoma ai o sure a zaa shili Jibrailu a Nazarat apeng ayende a nyimi a makeke ma Galili, 27ara kagala kamea kata ka tukǝ o mora ka ondaleme ne. Ka Yusupu waya caasa kai, Yusupu ondo abuudu ana Daoda. Leze le kagala kamea Mariya. 28Nawa de a kai a wa bekaana, “A beyo ko bo ka ba cǝ o sana ara Ashili. A Ateokora waye legwa ka bo.”
29Na Mariya kone o burǝ aza ngmǝ me, aka dambaraza aza obela o ko name. 30Na otoma Ashili o zaa shili bekaa kai na, “Tana o kone boome ne Mariya, ba cǝ o sana ara Ashili. 31Oyo ya e tumǝ ka ongmeng kena ka lome, ka oyo nya kai leze na Yeso. 32Kena kame kayo itǝ ondo o gongnga a rare kai na kena ka ondo kala o gongnga. A Ateokora Ashili wayo nya kai ara o cikǝ togomo te abuudu ate a kai Daoda, 33aka eze togomo te bedake ba za akora a Yakub. Togomo te kai teto ya ka bekazo ne.”
34Na Mariya pirkǝ otoma Ashili o zaa shili na, “A wiinia a nyimi ye ka anta tukǝ o mora ka ondaleme ne?”
35Na o otoma Ashili o zaa shili kabare na, “Obere Ashili o rere wayo lyǝ a bo, kanza a legoone le ondo kala o gongnga leyo panzau. Aza nyimi kena ka lome kamea oyo ngmenga a yo rara kai na Kena ka Ashili. 36Kanza, Alisabatu kamea e gwaara eyapa kaye ka e tumǝ a nyimi le'ona lekai, kando kamea bezena kato ngmenga ne e tumǝ ekai eya nyimi oreka o taashe. 37A begeshe ba Ashili eyapa ta girǝzǝ ai ne.”
38Na Mariya kabare na, “Mi kazara ka Ashili kai, baya wa itǝ a mi nangka ba beka.” Ara name na otoma Ashili o zaa shili ale a wa baya kai.
Mariya ka ale a begere akwilǝ Alisabatu
39A nyimi tomore tonname zora rabo, na Mariya ere a saseya naka meke orona o ale a kapeng ka yende a nyimi mayara o makeke ma Yahudiya. 40Ka o dukǝ kapeng kame, naka lyǝ akwilǝ Zakariya na ka beye Alisabatu ko. 41Nangka Alisabatu ka kone oko o Mariya, na kena kamea ka ya lebangi lekai cokomarono, a obere Ashili wa kang tare ka kai. 42Naka ara lengmelo a jǝng aka bekaa Mariya na, “Boa ondo o kona o leba a nyimi andaye, ondo kona o leba kai kena kamea oyo ngmenga. 43Eyaka mima ma sana ka iini Ateokora ka deya mi? 44Rosa o bena, a were ka oko o wa dukǝ teto teng, kena kamea kaya lebangi leng ka cokomarono ko kona o leba. 45Bo kando ka o kona o leba kai ka ba kabare o bena Ateokora yo ya epa eka wa beka.”
Leera le Mariya le o saba a Ashili
46A Mariya bekaana,
“Lenyong leng sabeze Ateokora,
47a mi okpwe ong zante o bena
Ashili aya ondo boza ong,
48ka wa rintǝ
o nata okpwe o kazara ka wai.
Laka pa, nannamena ba ale a izi
pate aromo neyo rarang na ondo sana,
49aza o bekaana ondoogong me wa ezeng epa e gong.
Ashili aya ondo o sangsang.
50Egonegone ai kanza eya kazo ondooka wa tare ai,
a ale a pate aromo.
51Wa ezeze ma gole ma moole ka legoone le wai.
Wa bacakareze ana o ara okpwe a nyimi madoola mane.
52A wa jǝpǝrǝzǝ agomo ana o arsaza tokpwe
aza togomo tone
andaaka ne jipǝrǝzǝ tokpwe tone a wa zalaraza ne.
53Wa nya ana o kona e komo etii ka magogoro ma rere
a wa tarangga ana ocǝ zora eyapa a taara tene.
54Wa kankama azara a wai abuudu a Yakubu,
o bena wa rintǝ ne egonegone wai.
55Nangka wa beke anate aro,
o era a Ibraheng ka andaame ne tare wai ba dimǝ
zora bekazo.”
56Na Mariya cikǝ ka Alisabatu mareka ma taaro, a malo nyimi aka kuri akwilǝ kai.
O ngmenga o Yohana ka o batisma
57Nangka tomore to ngmenga Alisabatu te dukǝ, naka ngmeng kena ka lome. 58Ana o tokwilǝ to ting kai ka ana o gbaara eyapa ka kai kone o bena Ateokora wa wore kai egonegone cak, na ne kone o leba ka kai.
59A lengme lo riiru ka o ngmenga nane de a core kena kame, a neya nya kai leze na Zakariya, leze le ate a kai, 60na iini me beke angmǝ na, “Nyimi taza ne. A yo nya kai leze na Yohana.”
61Na ne kabare kai na, “Ondo a nyimi akwilǝ aying ta zene ka leze le name ne.”
62Nane beye erara ka ate kena kame, aza o gera nangka a yo rara kena kame. 63Na wa pirkǝ epa o daara e wela a wa wele na, “Leze le kai ya Yohana.” Na pate epa eme tere ne okpwe. 64Malo nyimi na ongmǝ wai pǝrnu a leleng le wai dingarnu, na wa lya izi ka o beya angmǝ o saba Ashili. 65Na epa eme tere ana o tokwilǝ to ting one okpwe, na pate aromo a topepeng te eeno to mayara ma o makeke ma Yahudiya ne be ngmǝ epa ena ane kone ane kang laka. 66Pate andaaka ne kone nane eke anyong ane, ane bekaana, “Kena kaana kayo ya nannia?” Ka legoone le Ateokora leye azaa kai.
Leera le Zakariya
67Na obere o rere tare ka ate a kai Zakariya aka beke letoma le Ashili na:
68“O saba itǝ a Ateokora,
Ashili aromo aro abuudu a Yakubu,
kawa de na wa boze ro aromo a ai.
69A wa ara ondo legoone lo boza
a nyimi akwilǝ ozara ai Daoda,
70(nangka Ashili a beke a tongmǝ te andaaka ne beya a ngmǝ ka mawo ma ai
ka o rabo).
71O boza a taara te ana o nyana oro
ka aza legoone le ana o nyalang kaaro.
72Ka wa sǝǝrǝ ondo legoone lo boza
adorana wa wore egonegone ana magonggong maro.
A wa kang panza o tono wai o sangsang,
73o tono ka wa ye ogonggong oro Ibraheng.
74O bekaana, a boze ro ba taara te ana o nyana oro,
adorana te tare ai zora o kona boome.
75A nyimi be sangsang ka o cikǝ oka Ashili a kone o leba
a begeshe be ai kazo tomore tero.
76“A bo kena kang,
aromo neyo rarau na, ondo o beya a ngmǝ ka mawo ma Ashili ondo kala o gongnga
o bena oyo kala izi a Ateokora ka o babare orona o deya kai.
77O nya o rosa o boza aromo au
nangka wa kwizǝ madinǝ ma ne,
78aza egonegone e jǝng Ashili aro.
Aza egonegone ai ongme zaale ba ro a suri azaa shili
79ka wa nya masanto ba andaame ne cikǝ a maring
nyimia ana o cikǝ a boome be o ululu gbwǝ,
ka wa tare ka tobona tero a nyimi be cammo.”
80A kena kame gong aka itǝ ka legoone a nyimi obere Ashili, a ka ya nyimi o wake zongka ka wore okpwe kai ba buudu a Yakubu.
اکنون انتخاب شده:
Luka 1: XSN
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©️2022 Luke Initiative for Scripture Translation
