Luk 10
10
Jisɔs otigɛ iram itaa irɨma jubi na bafa
1Okpu ɔnyakanɛ Ɔkɔ-rokuku ɔra banyɛgɛ mɔ bajuju iram itaa irɨma jubi na bafa otigɛ bɛ bafa bafa, ya babɛ mɔ rɔsɔ barua na irɛ na bokpena sɛnsɛn mbu amɔ ŋaŋ okoru. 2Ɔkanɛ bɛ ya, “Rɛsɛ rɛjabajaba, nsu basisi bakijaba. Rɔbɔ nu njɔm minsɨna Ɔkɨm-kaju ŋɔ ɔra ɔkɔrɛsɛ otigɛ basirɛsɛ ecii ɔrɔbɔ na rɛsɛ rɛmɔ. 3Taŋɛ nu! Ntigɛ nu aya bɔrɔri na rɛkaba bɔgba-kɛtɨma. 4Kabɛ nu bagbuga, kabɛ nu ɛbam na birɛ-ikari, mɨnɛ kakubɛ nu kegbu minyɛ bani na ɛyɔ.
5Ɛtɔ nanjinɛ minɔ, bɛ nu rɔsɔ kanɛ bakɔ-ɛtɔ ya, ‘Reŋunɛ retumɛ na ɛtɔ nji.’ 6Ara bani mbɛ bafɔnɔ etima reŋunɛ batumɛ kafa, reŋunɛ kuresu kafa na abɛ, na ara bara, reŋunɛ ndi kurɛŋbɨnɛnɛ rɛgba rɛnyɛgɛ nu. 7Tumɛ nu na ɛtɔ kanji, mindiŋɛ, miŋɔŋɛ nambunɛ bajɛ nu, ndi basirɛsɛ bakɔkɔkpɛɛ bɛ ogbuga ɔbɛ. Kacɛ nu daŋa-daŋa-daŋa na bɔtɔ bani.
8Rɔrɛ nandunɛ minɔ mɨnɛ batama nu, di nu gbanambunɛ bajɛ nu. 9Gbana nu bani ifiɛ mbɛ bara kafa mɨnɛ kanɛ bɛ nu ya, ‘Rɔrɛ-rɛkɨm Ɛbrɔkpabi rɔra kpirekpirɛ.’ 10Nsu rɔrɛ ndu rɔkɨna nu, taŋɛ nu na bɔyɔ bɔbɛ kanɛ nu ya, 11tum ritɔbɔ rɔrɛ ronua ndi rilaga yu na bɔkpaga rekpun kɔjam nu ratu ya minkɨn rɛkɨm Ɛbrɔkpabi. Nsu gbɨra nu ya: Rɔrɛ-rɛkɨm Ɛbrɔkpabi rɔra kpirekpirɛ. 12Nkanɛ nu, reyi itiba, kukoyiba na bani Sodɔm kocia rɔrɛ ndu bakɨna nu.
13Rasinkanɛ kurajaga rajɛ nu bani Kɔrasin na Bɛsaida! Ara nsi birɛ kɔba-ɛkpaju mbi nsi nfa, nsi mbari irɛ Tai na Sidɔn, jugi bakunɛnɛ kosi bobi egbusinji, barɔbɔnɛ bɔsarasara bɔfɔ mɨnɛ basaganɛ ratɔ kɔkɔgɛ ya erun esi bɛ na bobi mbu abɛ basi! 14Ɛbrɔkpabi kuɛfɔnɔ erun na bani Tai na Sidɔn ecia nu reyi itiba. 15Mɨnɛ na anu, bani Kapanɔm, minduga kobirɛnɛ na rɔrɛ Ɛbrɔkpabi-ɛ? Kubatuba nu na kwa-rasinkanɛ.”
16Jisɔs ɔkanɛ banyɛgɛ mɔ ya, “Oni naŋɔnɛ ŋɔ ofugɛ nu ofugɛ mi; oni naŋɔnɛ ŋɔ ɔkɨna nu ɔkɨna mi; mɨnɛ oni naŋɔnɛ ŋɔ ɔkɨna mi ɔkɨna mɔ ŋɔ otigɛ mi.”
Rɛgba ndi iram itaa irɨma jubi na bafa
17Iram bani mbɛ itaa irɨma jubi na bafa bagba na ɔkɨmkɨm kɔrɔmetima mɨnɛ bakanɛ ya, “Ɔkɔ-rokuku,” “Tum bɔkɔ-bobi bojigɛ yu aya rɛŋama bu na rirɨna riyɛ.
18Jisɔs ɔfɛlɛ bɛ ramu ya, “Nfɛ ɔkɨm bɔkɔ-bobi osi na kaju ɔtɔ aya ŋbaŋbaŋ. 19Yumɛ kotu! Njɛ nu nsɨm, kɔsa bɔjɔ na mannaŋ mɨnɛ nsɨm oni ɛban onua Sɔtan ɔra nu na ibɔ, mɨnɛ tumgba bosiŋɛ nu. 20Nsu kakana nu ndi bɔkɔ-bobi bofugɛ nu; kana nu ya barɛ rarɨna ranua na rɔrɛ Ɛbrɔkpabi.”
Jisɔs ɔfɔnɔ kɔrɔmetima
(Mt 11:25-27; 13:16,17)
21Kegbu kanci keriragi-kɛkɔ kɛjɛ Jisɔs kɔrɔmetima mɨnɛ ɔkanɛ ya, “Mintɛ, Ɛbrɔkpabi kaju na rɔcɛ! Nsamɛ wu ndi akɔgɛ bani mbɛ babɔ bakigbɨra tumgba mbu aŋɨba bagbɨra kɔtanɛ na bagbɨra manrɛ. Ae, Mintɛ, na mbu bɔrɔmɔ wu etima ya asi.
22“Mintɛ omia ɔjɛ mi gbanambunɛ. Oni ɔra ŋɔ ɔgbɨra mbu Wɔ ɔra ekicia Mintɛ, mɨnɛ oni ɔra ŋɔ ɔgbɨra mbu Mintɛ ɔra ekicia Wɔ na bani mbɛ Wɔ osi etima kosi bɛ bagbɨra mɔ.”
23Jisɔs ocimɛnɛ yɛ ɔkanɛ banyɛgɛ mɔ ŋɨbaŋɨba ya, “Kɔrɔm-etima kɔyɔmɛ kɔjɛ nu kɔfɛ birɛ mbi minfɛ 24Nkanɛ nu mɔ bakanɛ-rotuma Ɛbrɔkpabi ecii na bakɨm baduga kɔfɛ mbu minfɛ, nsu bakifɛ, mɨnɛ kofugɛ mbu minfugɛ, nsu bakifugɛ.”
Rɛkana brika oni Sameria
25Ɔkpɛbɛ Ibina Mosis owu kɨmanɛ Jisɔs koyumɛ mɔ. Ɔsɨna Jisɔs ya, “Ɔkpɛbɛ,” “Nfɔnɔ bu kosi kɔfɔn rokpin ndu najunaju?”
26Jisɔs ɔfɛlɛ mɔ ramu ya, “Barɛ bu na Manrɛ-Ɛbrɔkpabi? Ajɔɛ mɛ nyan?”
27Ɔkpɛbɛ Ibina ɔfɛlɛ Jisɔs ramu ya, “ ‘Manrɛ-Ɛbrɔkpabi ya, ‘Fɔnɔ rɔraganɛ ɔkɨm-kaju Ɛbrɔkpabi ɛyɛ na etima ɛyɛ sɛnsɛn, na koku kɔyɛ sɛnsɛn, na nsɨm ɔyɛ sɛnsɛn mɨnɛ na kɛgbɨra kɔtanɛ kɛyɛ sɛnsɛn.’ Mɨnɛ fɔnɔ rɔraganɛ bacɛmɛ bani mbɛ bakunɛ wu aya afɔnɔ na ɛkpaju ɛyɛ.”
28Jisɔs ɔkanɛ mɔ ya, “Atanɛ cɛrɛrɛ. Si kanya awu kuakpina.” 29Nsu ɔkpɛbɛ Ibina oduga kɔkɔgɛ ya amɔ ɔgbɨri mbu amɔ ɔtanɛ. Ɔsɨna Jisɔs ya, “Baga oni mɔ okunɛ mi?”
30Jisɔs ɔfɛlɛ mɔ ramu na rɛkana ya, “Kegbu cinɛ orumanɛ ŋɔnɛ osi ndu Jɛrusalɛm oruŋɛ ntunɛ Jɛriko, baji babɨma mɔ, bakpara mɔ bɔfɔ na ɛkpaju, badu mɔ ta ɔcɛrɛ. 31Ewu jagi ya ɔjɔmɔ-kɔya ɔra ociŋɛ na ɛyɔ kanji; nsu ndi ɔfɛ oni ŋɔ, ɔbamini ocia oruŋɛ. 32Mɨnɛ kɛma kanci cinɛ oni Lɛbai owu kafa, oruŋɛ ɔkayɛbɛ mɔ, ɔbamini mɨnɛ ocia oruŋɛ. 33Nsu oni Sameria, ŋɔ oruŋɛ rɔcɛ na ɛyɔ kanji ɔfɛ mɔ, mɨnɛ ndi ɔfɛ mɔ, erun esi mɔ. 34Oruŋɛ ɔkakɨmanɛ mɔ, ɔwa mantana na mantugi na bɔrɛmɛ kambu, ɔbɔbɔ bu. Ɔbɛ mɔ origɛ na eti nji ɛsɔgɛ mɔ rasua oruŋɛ na ɛtɔ nji bacincɛ bariɛnɛ, kwa ɔsɔbɔ mɔ. 35Ɔnyakanɛ reyi ɔsɛ ogbuga siliba bafa ɔjɛ oni ŋɔ osiŋɛ rɛsɛ kafa, ɔkanɛ mɔ ya, ‘Rɔ mɔ, kunkpɛɛ wu mbu akubɛ na ɛbam ɛyɛ na retu rɛmɔ, ara ŋbɨnɛnɛ.’
36Jisɔs ɔsɨna yɛ ya, “Na etima ɛyɛ, na kɔrɔbani mbɛ bataa, yɛnɛ mɔ ɔkɔgɛ ya amɔ ɔra oni ŋɔ okunɛ oni ŋɔ baji badu nya?
37Ɔkpɛbɛ Ibina ɔfɛlɛ mɔ ramu ya, “Ŋɔ ɔkɔgɛ mɔ rɔraganɛ.” Jisɔs ɔkanɛ mɔ ya, “Taŋɛ mɨnɛ kasi kanya.”
Jisɔs orua iriba ɛyɛ Mata na Meri
38Aya Jisɔs na banyɛgɛ mɔ bara baruŋɛ rɔcɛ, owujagi rorirɛ ndu ɔwanɛ ŋɔ oyinɛ Mata ɔtama mɔ na ɛtɔ ɛmɔ. 39Ɔfɔnɔ ɔma ɔwanɛ ŋɔ oyinɛ Meri, ŋɔ otumɛ okunɛ Ɔkɔ-rokuku oyumɛ ratu na rɛkpɛbɛ rɛmɔ. 40Mata ɔra ojuŋanɛnɛ kotubɛrɛ gbanambunɛ mbu bɔyɔmɛ bɔjɛ ya basi na ɛtɔ, owu kanɛ ya, “Ɔkɔ-rokuku, akifɛ ya ɔma omia osugɛ mi ya nsi rasɛ ndɛ fɛb igbɛ-ɛ? Kanɛ mɔ owu tɔnɛ mi!”
41Ɔkɔ-rokuku ɔkpɛɛ mɔ ya, “Mata, Mata! Etima ɛyɛ ɛcɛŋɛ, mɨnɛ ajuŋanɛnɛ na birɛ ecii, 42nsu ekicia gbabunɛ bu bɔra brika abu. Meri ɔra mbu bociacia, mɨnɛ ɔtama bu na ibɔ imɔ ɔra.”
اکنون انتخاب شده:
Luk 10: Olulumo-Ikom
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©️2022 Luke Initiative for Scripture Translation
