Luka 21

O Pipacakat no Maponengay

(Maroko 12.41-44)

1Ca'ngaw sa ci Yis a ninengneng, ma'araw Ningra ko papinapina a cidafongay a tamdaw a miparo i pakingkingan a hako no Fangcalay Pita'ongan to dafong nangra. 2Ma'araw haca Ningra ko nipipakingking no ccay a pakoyocay a maponengay to tosa a laliping. 3Saka, sowal sa Cingra, <<So'linen Ako a somowal kamo, ikaka no nimanima a tamdaw ko nipipakingking nonini a pakoyocay a maponengay. 4Nawhani o nano rafas no dafong nangra ko niparoan no roma a tamdaw. Nikawrira, masapakoyocayto cingra i, ^min han ningra a pacakat ko polong no saka'orip no tireng,>> han ni Yis.

O Pipali'ayaw to Saka Pleng no Fangcalay Pita'ongan

(Matay 24.1-2; Maroko 13.1-2)

5Masasowasowal ko papinapina a nisawawaan to pakayniay i Fangcalay Pita'ongan. O tadamaanay a fokloh ato nipacakatan a dafong ko sapa^res tonini saan cangra. Sowal sa ci Yis, 6<<Ma'araway namo konini a ma^min haw? Yo mamaraod ko romi'ad, itiya to a o mamapleng a ma^min konini a mapatirengay a fokloh, o a awato ko ccaccay a fokloh i kafkang no roma a fokloh,>> han Ningra.

O Pades ato Kari'ang

(Matay 24.3-14; Maroko 13.3-13)

7Licay han nangra ci Yis, <<Singsiaw, ano hatira i, ano hakowa aira konini a dmak? Ano o mamalahcito konini a dmak a ma^min i, o maan ko kacipinangan niyam a mafana' saw?>> han nangra.

8Pasowal sa ci Yis, <<Pina'on kamo to saka^caaw ka sa'fit. O aira ko 'alomanay a tamdaw a micaliw to ngangan Ako. Sowal asa cangra, <Ci Kristo kako!> somowal haca, <Mangatato ko romi'ad!> o sasaan cangra. Aka pitoor i cangraan. 9Ano matngitngil namo ko nika ira no kalalood ato nika forifor i, aka ka talaw. Nawhani o airaira aca i 'ayaw no pahrekan konini. Nikawrira, caayho ko pahrekan no hkal itiya.>>

10Saka sowal sa ci Yis i cangraan, <<O mamalaloolood ko finawlan ato finawlan. O mamasasi'ada'ada ko kitakit ato kitakit. 11O aira ko tata'angay a lonen, kdal ato lifong i cowacowa. O aira haca ko masamaamaanay a katalawan ato kafahka'an a dmak nai kakarayan. 12Nikawrira, i 'ayaw no nika ira nonini a dmak a ma^min i, tona o mitooray kamo i Takowanan saka, o mamarpet kamo a makari'ang. O mamapatorod kamo a maliclic i kasa'opoan a loma' ta marofo. O mamapatayra kamo i ka'ayaw no hongtingti ato mikowanay to saki Takowanan. 13Onini i, o kanga'ayan namo a mipawacay to Nga'ayay Ratoh. 14Orasaka, i 'ayawen ko pikton to faloco' to nika malomaan ko nika roray a miharateng to sapa'ading to tireng. 15Nawhani o papaflien Ako kamo to taneng a somowal to saka^caaw ka filo no 'ada namo a pacoli i tamowanan. 16Halo mama ato ina ato salikaka ato malininaay ato widang namo a mipatorod i tamowanan. O mamapatay nangra ko romaroma namo. 17O mamaka'intel no tamdaw a ma^min kamo tona mitoor kamo i Takowanan. 18Nikawrira, awaay ko mamalasawad no ccaccay aca a fafokesan namo. 19Pihadidi kamo, ta mapa'orip ko tireng namo.

O Pipali'ayaw to Nika Pleng no Yirusalim

(Matay 24.15-21; Maroko 13.14-19)

20<<Ano ma'araw namo ko nipilikot no sofitay to Yirusalim i, kafana' kamo to nika mangatato ko katkopan noya niyaro'. 21Itiya i, pilaliw a talalotok kamo o maro'ay i Yutaya a tamdaw. Kamo o i niyaro'ay a tamdaw i, kasadak nanitira. Kamo o i omahay a tamdaw i, aka picomod i niyaro'. 22Nawhani, <O pitfocan a romi'ad,> konini to sakalahci no matiliday i Fangcalay Cudad a ma^min. 23Itiya toya romi'ad i, tada o kasini'adaan ko cipoyapoyay a fafahiyan ato ciwawaay a wina to micocoayho a wawa. Nawhani o aira ko tata'angay a pades i tini i hkal. O aira ko kter no Kawas itini i tatirengan nonini a finawlan. 24O fonos ko sakapatay nangra, o mamapalit cangra a mapatayra i cowacowa a kitakit. O mamasakasak no roma a finacadan ko Yirusalim, tangasa i kalponan no sa'osi no romi'ad nangra.

O Pili'ayaw no Wawa no Tamdaw a Tayni

(Matay 24.29-31; Maroko 13.24-27)

25<<O aira ko kacipinangan i cidal ato folad ato fo'is. I tini i hkal i, tata'ang ko pades no kasafinawlawlan. O mamatalaw cangra to harengheng no riyar ato taplik. 26O mamaska' ko tamdamdaw to nano talaw a miharateng to aira a dmak i hkal. Nawhani o mamangernger ko polong no kakakafikafit no kakarayan. 27Itiya i, o mama'araw no tamdamdaw ko nika o tadaci'icelay, o ci'dilay koya Wawa no Tamdaw a pakato'em a tayni. 28Ano irato konini a dmak i, kahalamham ko faloco' namo. Nawhani o a irato ko papa'orip tamowanan,>> han ni Yis.

O Sifana' to Sokon a Kilang

(Matay 24.32-35; Maroko 13.28-31)

29Pasowal sa ci Yis to ccay a tinako i cangraan, <<Nengnengen ko sokon a kilang ato kalokilang a ma^min. 30Ano ma'araw namo ko nika cico'ong noya kilang i, mangatato ko kacihrangan saan ko nika fana' namo. 31Malcad tonini, ano mahapinang namo ko nika ira nonini a dmak i, o mamafana' kamo o mangatato a malahci ko pikowan no Kawas.

32<<So'linen Ako a somowal kamo, o mamalahci ko polong nonini a dmak i 'ayaw no nika patay no aniniay a tamdaw. 33O mamalasawad ko kakarayan ato sra. Nikawrira, caay ko mamalasawad ko sowal Ako.

Kapalal a Mitolon

34<<Pina'on kamo. Latek yo maacang kamo, yo malasang, marawraw ko faloco' namo to saki 'orip i, talifahal sa a ira konini a romi'ad a mitakop i tamowanan. 35A matiya o tilo. Nawhani o mamasalaloma' nonini a romi'ad ko polong no maro'ay i tini i hkal a tamdaw. 36Saka, kararid a mapalal a mitolon to sakanga'ayaw namo a mita'lif tonini a aira a dmak a ma^min ato sakanga'ayaw namo a tomireng i ka'ayaw noya Wawa no Tamdaw,>> han ni Yis.

37O romi'ad i, pasifana' ci Yis i Fangcalay Pita'ongan. O dadaya i, masadak Cingra nai niyaro' a milafin i Olif hananay a lotok. 38Maratar ko finawlan a ma^min a lomowad to dafak a tayra i Fangcalay Pita'ongan to sapitngilaw to sowal ni Yis.

اکنون انتخاب شده:

Luka 21: AMIS2019

های‌لایت

به اشتراک گذاشتن

مقایسه

کپی