Yohani 4

Ci Yis ato Samariya a Fafahiyan

1Matngil no Farisay a tamdaw ko nika ikaka no nika 'aloman no nisawawaan ni Yohani ko nika 'aloman no nisawawaan ni Yis ato nipaino'an Ningra saan. Mafana' ci Yis tonini. (2Ano so'linen a somowal i, caay ka ci Yis ko mipaino'ay, deng o nisawawaan Ningra ko mipaino'ay.) 3Saka, liyas sato ci Yis to Yutaya a miliyaw a tayra i Kalili. 4Nikawrira, yo tatayra Cingra i, caay ka ^ca ka pakayra i Samariya ko rakat Ningra.

5Saka, tangasato Cingra i Sikar hananay a niyaro' no Samariya. I ngata no nipaflian ni Yakop i wawa ningra ci Yosifan a sra konini. 6Ira itira ko tfon ni Yakop. Maroray ci Yis tona romakat saka, aro' sa Cingra i tatihi noya tfon. Ma^deng o kalahokan itiya.

7Ira a tayra a miradom ko ccay a Samariya a fafahiyan. <<Pananomen Kako,>> han ni Yis cingra a somowal. (8Tayraay i niyaro' a micakay to kakaenen ko nisawawaan ni Yis itiya.)

9Itiya i, pasowal i ci Yisan koya Samariya a fafahiyan, <<O Yutaya a tamdaw Kiso i, nawiro pananomen Kako saan Kiso i takowanan o Samariya a tamdaw saw?>> han ningra. (Nawhani caay ka lcad ko lisin no Yutaya a tamdaw ato Samariya a tamdaw. Saka, caay pilingwa ko Yutaya to Samariya.)

10Paca'of sa ci Yis, <<Ano mafana'ay kiso to sapafli no Kawas i tisowanan, ano mafana'ay kiso tonini a pananomen Kako sanay a tamdaw i, kona mingitangit kiso i Takowanan ta mapafli Ako kiso to ma'oripay a nanom,>> han Ningra.

11Pasowal sa koya fafahiyan, <<Singsiaw, awaay ko nitatoyan Iso a sapihacol. Talolong konini a tfon. Saka, i cowa Kiso a miala toya ma'oripay a nanom hananay Iso saw? 12Nipaflian ni Yakop o tato'asan ita kita tonini a tfon. I tini tona tfon a minanom cingra ato wawa ningra ato pina'orip ningra. Ikaka no nika tadamaan ni Yakop ko nika tadamaan ako saan Kiso saw?>> han ningra.

13Pasowal sa ci Yis i cingraan, <<O minanomay tonini a nanom i, o mamiliyawho a maso'aw. 14Nikawrira, o minanomay a tamdaw toya sapafli Ako a nanom i, caayto ko mamaso'aw a tahada'oc. O sapafli Ako a nanom i, o mamatiya o nemnem a mapowar i cingraan a malamida'ocay a 'orip ningra,>> han Ningra.

15Pasowal sa koya fafahiyan, <<Singsiaw, paflien kako tora nanom. Ta caayto ka so'aw kako. Ta caayto ka rarid a tayni kako a miradom,>> han ningra.

16Pasowal sa ci Yis i cingraan, <<Olili, tahidangenho ko fa'inay iso a patayni,>> han Ningra.

17Paca'of sa koya fafahiyan, <<Awaay ko fa'inay ako,>> han ningra.

Pasowal sa ci Yis, <<Awaay ko fa'inay ako sa kiso i, matamaayto. 18Nano lalimaayto ko fa'inay iso. Ora cafay iso a fa'inay anini i, caay ko fa'inay iso. Saka, so'linay kora sowal iso,>> han Ningra.

19Pasowal sa koya fafahiyan, <<Singsiaw, o pali'ayaway to sowal no Kawas Kiso sa kako. 20I tini tona lotok a mita'ong to Kawas ko tato'asan niyam. Nikawrira, o sowal namo i, caay ka ^ca ka o Yirusalim ko pita'ongan to Kawas saan kamo,>> han ningra.

21Pasowal sa ci Yis i cingraan, <<Paso'linen Kako. O mamaraodto ko romi'ad, saka caayto ka i tini tona lotok, caayto ka itira i Yirusalim kamo a mita'ongan to Wama i kakarayan. 22Caay ka fana' kamo o Samariya a tamdaw to nita'ongan namo a Kawas. Mafana' kami o Yutaya a tamdaw to nita'ongan niyam. Nawhani i tini i Yutaya a tamdaw a masadak ko pa'oripay. 23Maraodto ko romi'ad i matini, o so'linay a mita'ong to Wama i, ka o nano 'icel no 'Adingo no Kawas ko sapacakat i Cingraan a so'lin ko pita'ong. O matiniay ko milongocan no Wama. 24O 'Adingo ko Kawas. Deng pakayni i 'icel no 'Adingo Ningra ko saka so'lin no tamdaw a mita'ong i Cingraan.>>

25Pasowal sa koya fafahiyan, <<Mafana' kako to nika o aira a tayni ci Kristo hananay a Misiya. Ano irato Cingra i, o papakafana' Cingra i titaanan to polong no dmak,>> han ningra.

26Pasowal sa ci Yis, <<Ora somowalay i tisowanan i matini i, orira Kako,>> han Ningra.

27Itiya i, irato a patiko ko nisawawaan ni Yis. Fahka' cangra a minengneng to nika sasowal ni Yis ato ccay a fafahiyan. Nikawrira, <<O maan ko nilongocan iso? Nawiro masasowal Kiso a tora fafahiyan?>> awaay ko sanay a milicay cangraan.

28Itiya i, tli hanto noya fafahiyan ko 'atomo ningra a tayra i niyaro' a pasowal i tamdamdaw, 29<<Katayni kamo a minengneng! Iraay ko pasowalay i takowanan to polong no nano dmak ako. Alatek ci Kristo konini a tamdaw kiya?>> han ningra. 30Sadak sato cangra nai niyaro' a tayra i ci Yisan.

31Itiya i, ngitangiten no nisawawaan ci Yis a somowal, <<Singsiaw, kakomaenho,>> han nangra.

32Pasowal sa ci Yis i cangraan, <<Ira ko kakaenen Ako to caay ko kafana'an namo a kakaenen,>> han Ningra.

33Saka, sasowasowal sa ko nisawawaan, <<Latek iraay ko patayniay i Cingraan to kakaenen,>> saan.

34Pasowal sa ci Yis i cangraan, <<O nipido^do to nafaloco'an no miocoray i Takowanan ato nipilahci to tayal Ningra ko malokakaenen Ako. 35<Spatto a folad ta maraodto ko pipanayan,> sanay ko sowal namo. Pasowalen Ako kamo, ca'ngawen a minengneng ko omah. Marahrahto, o papanayento. 36Cilifon ko mipanayay a tamdaw. Misa'opo cingra to kinaira to sakaci'orip no tamdaw to mida'ocay 'orip. Ta mapolong ko mifolsakay ato mipanayay a lipahak. 37So'linayto ko sowal no mato'asay to Mifolsak ko ccay, mipanay ko ccay, yasanay. 38Maocorto Ako kamo a papipanay to caay ko nano nikatayalan namo. O nano nikarorayan no tao a matayal i, kamoto ko milayapay tora hci,>> han Ningra.

39'Aloman ko paso'linay i ci Yisan a Samariya a tamdaw noya niyaro'. Nawhani <<Mapasowal Ningra kako to polong no nano dmak ako,>> han noya fafahiyan cangra. 40Saka, tayra sato i ci Yisan koya Samariya a tamdamdaw. <<Kaitiniho i tamiyanan a milafin,>> han nangra ci Yis a mingitangit. Saka, tosa a romi'ad ci Yis itira.

41Matongal ko nika 'aloman no paso'linay ci Yisan to nano sowal Ningra. 42Ta sowal sa cangra toya fafahiyan, <<Caayto ko nano sowal iso ko sapaso'lin niyam. To^to sa kami a mitngil to sowal Ningra. Saka, mafana' kami to nika o so'linay a Pa'oripay to tamdamdaw no hkal Cingra,>> han nangra.

O Piadah ni Yis to Wawa no Mikomoday

43I ikor no tosa a romi'ad i, liyasen ni Yis ko i tiraay a tayra i Kalili. 44Nawhani sowal sa Cingra, <<O pali'ayaway to sowal i, caay ka kangodoen no i niyaro'ay no tireng,>> sanay. 45Yo tahira ci Yis i Kalili i, litmohen no i tiraay a tamdaw Cingra. Nawhani nano tayraay cangra i Yirusalim a misalisin. Ma'araway nangra ko polong no dmak ni Yis itira i pisalisinan.

46Patikol haca ci Yis a tayra i Kana no Kalili, namifalicay ci Yis to nanom a pala^pah itira. Ira itira ko matayalay no hongti a mikomoday, adada ko fa'inayan a wawa ningra itira i Kapirnaum. 47Matngil ningra ko nika ira ci Yis nai Yutaya a tayni i Kalili. Saka, tayra sato cingra i ci Yisan a mingitangit to sakatayraaw ni Yis i Kapirnaum a papiadah toya sakapatayananay a wawa ningra. 48Pasowal sa ci Yis i cingraan, <<Ano awaay a ma'araw namo ko kafahka'an a dmak ato nipahapinang no Kawas i, caay ko papaso'lin kamo,>> han Ningra.

49Pasowal sa koya nipatirengan no hongti a mikomoday, <<Singsiaw, katayraho i matini a minengneng yo caho ka patay ko wawa ako,>> han ningra.

50Pasowal sa ci Yis, <<Pinokayto. O mama'orip ko wawa iso,>> han Ningra.

Paso'lin sa koya tamdaw to sowal ni Yis ta minokay. 51Yo i lalanho cingra i, litmohen no matayalay ningra cingra, sowal sa i cingraan, <<Ma'oripto ko wawa iso,>> han ningra.

52<<O hacowa ko sakanga'ay ningra,>> han ningra a milicay i, <<Ccay ko toki to hrek no lahok inacila a mafasaw ko fa^det ningra,>> han nangra. 53Itiya a maharateng noya wama ko nika lcad no tatokian to pipasowal ni Yis, <<O mama'orip ko wawa iso,>> sanay a sowal. Saka, paso'lin sato cingra ato paro no loma' ningra a ma^min.

54Natayni i Kalili ci Yis nai Yutaya i, o saka tosa a nidmakan Ningra a kafahka'an a dmak konini.

اکنون انتخاب شده:

Yohani 4: AMIS2019

های‌لایت

به اشتراک گذاشتن

کپی