Yohani 16

1<<O saka somowal Ako i tamowanan tonini i, o saka^caaw ka toled no faloco' namo. 2O lalaplapen no tamdamdaw kamo nai kasa'opoan a loma'. Ano hakowa i, O saki Kawas a tayal ita konini, o sasaan cangra to nipipatay nangra i tamowanan. 3O sakamatini no dmak nangra i, o nika fokil nangra to Wama ato nika fokil nangra i Takowanan. 4O sakasomowal Ako i tamowanan tonini i, nga'ay maharateng namo ko sowal Ako i tamowanan ano maraodto koya romi'ad.

O Tayal no Fangcalay 'Adingo

<<O saka ^ca pipasowal Ako i tamowanan tonini i sa'ayaw i, o nipikapotho Ako i tamowanan. 5Nikawrira, o tatayrato Kako i matini i miocoray Takowanan. 'Arawhani, <O tatalacowa Kiso?> Awaay ko sanay namo a milicay i Takowanan. 6O sakararom aca no faloco' namo ko nika somowal Ako tonini. 7Nikawrira, so'linen Ako a somowal kamo, o sakaci^poc namo ko nipiliyas Ako. Ano caay piliyas Kako i, caay ka tayni i tamowanan koya Padamaay. Ano tayra Kako i, o a ocoren Ako Cingra a patayni i tamowanan. 8Ano taynito Cingra i, o papahapinangen Ningra ko tamdamdaw to nika moraraw no harateng nangra to pakayniay i raraw ato mo^celay a dmak ato pisawkit no Kawas. 9Caay paso'lin cangra i Takowanan. Saka, moraraw ko piharateng nangra to pakayniay i raraw. 10O romasato, moraraw ko piharateng nangra to pakayniay i mo^celay a dmak. Nawhani yo iraho Kako i, caay paso'lin cangra Takowanan. O maminokay Kako a tayra i ci Wamaan. O a awato a ma'araw namo Kako. 11O romasato, moraraw ko piharateng nangra to pakayniay i pisawkit no Kawas. Nawhani masawkitto no Kawas ko mikowanay tonini a hkal a Satan.

12<<Adihayho ko sasowalen Ako i tamowanan. Nikawrira, caay pakahadidi kamo a mitngil. 13Nikawrira, ano taynito ko so'linay a Fangcalay 'Adingo oya pakafana'ay to sowal no Kawas i, Cingra ko mamikrid tamowanan a pasifana' to polong no sowal no Kawas. Caay ko no Ningra a harateng ko dado^doen Ningra a somowal. O nitngilan Ningra a sowal ko sasowalen Ningra. O romasato, o papakafana' Cingra i tamowanan to pakayniay i aira a dmak. 14O papahapinangen Ningra ko nika tadamaan Ako. Nawhani Cingrato ko sasomowal to sasowalen Ako i tamowanan. 15O no Wama Ako a maamaan i, o no Mako. Orasaka, o Fangcalay 'Adingo ko sasomowal to sasowalen Ako i tamowanan.

Malalipahak ko Rarom

16<<Caayto ka halafin ta o a awato a ma'araw namo Kako. Nikawrira, caho ka halafin i, o mama'araw haca namo Kako,>> han Ningra.

17Sasowasowal sa ko papinapina a nisawawaan Ningra, <<O sowal ni Yis i, <Caayto ka halafin ta awato a ma'araw namo Kako. Nikawrira, caho ka halafin i, o mama'araw haca namo Kako,> saan. O romasato a sowal Ningra i, <Nawhani o tatayra Kako ci Wamaan,> saan. 18O maan sanay ko tatodong noya <Caayto ka halafin> yasanay a sowal Ningra hakiya? Caay ka fanafana' kita to tatodong no sowal Ningra!>> saan cangra.

19Mafana' ci Yis to nika sapilicayan cangra Cingraan. Saka, sowal sa i cangraan, <<Caay koya <Caayto ka halafin ta awato a ma'araw namo Kako. Nikawrira, caho ka halafin i, o mama'araw haca namo Kako,> yasanay a sowal Ako ko kalalicalicayan namo saw? 20So'linen Ako a somowal kamo, o tatomangic kamo a mararom. Nikawrira, o lalipahak ko no hkalan a tamdaw. Talacowa o mamararom kamo, nikawrira, o mamalalipahak koya rarom namo. 21Tinako sa, ano tala'ayaw ko fafahiyan a mahofoc i, maroray cingra a miharateng. Nawhani o mamisemsem cingra. Nikawrira, yo mahofocto cingra i, awaayto a maharateng ningra ko roray ningra. Nawhani lipahak cingra to nika sadakto no wawa i hkal. 22Talacowa mahaenay ko nika roray namo i matini, nikawrira, o mamasaso'araw haca kita. Ta o lalipahak ko faloco' namo itiya. Awaayto ko mamipalasawad toya lipahak namo.

23<<Itiya toya romi'ad i, caayto ko Kako ko pilongocan namo. So'linen Ako a somowal kamo, ano o maamaan to ko nilongocan namo ci Wamaan pakayni i ngangan Ako i, caay ka ^ca paflien Ningra kamo. 24To ha:tiniay i, caayho pakaynien namo i ngangan Ako ko nipilongoc to maamaan. Pilongoc ta malayap namo. Onini i, o sakatadamaan no lipahak namo.

Malowidayto ko Hkal

25<<To ha:tiniay i, pakatinakonako han Ako ko nipipasowal i tamowanan. Nikawrira, caayto pakatinakonakoen Ako kamo a somowal. Nawhani ano hakowa a romi'ad i, o mamisongila' Kako a pahapinang a somowal tamowanan to pakayniay i ci Wamaan. 26Itiya toya romi'ad i, pakaynien namo i ngangan Ako ko pilongoc ci Wamaan. Patadoen Ako kamo a mingitangit ci Wamaan, caay ko nika saan Ako i tamowanan. 27Maolah kamo i Takowanan. O romasato, paso'lin kamo to nika o nai Kawasay Kako a tayni. Orasaka, maolah ko Wama i tamowanan. 28O nanitiraay Kako ci Wamaan a tayni i hkal saka, o mamiliyaliyas aca Kako tonini a hkal a minokay i ci Wamaan,>> han Ningra.

29Pasowal sa ko nisawawaan, <<Pahapinang sato Kiso i matini a somowal. Caayto pakatinakonakoen Iso kami a somowal. 30Mafana'to kami i matini to nika o mafana'ay Kiso to maamaan. Mafana'to kami to nika awaay ko kafokilan Iso. Caay ko lalicayen no tamdaw Kiso. Orasaka, paso'lin kami to nika o nanitiraay Kiso i Kawas a tayni,>> han nangra.

31Paca'of sa ci Yis i cangraan, <<Paso'linto kamo i matini saw? 32Maraodto ko romi'ad i matini. O mamaliwasak kamo a paytmek a minokay i loma' no tireng. O mamapakaccay namo Kako. Nikawrira, caay ka ccay Kako. Ira ko Wama a mikapot i Takowanan. 33O sakasomowal Ako i tamowanan tonini i, o sakacirihadayaw namo tona malaccay kita. O aira ko pades namo i tini i hkal. Nikawrira, sa'icelen ko faloco', malowidayto Ako ko hkal,>> han Ningra.

انتخاب شده:

Yohani 16: AMIS2019

های‌لایت

به اشتراک گذاشتن

کپی