Nugana 4
4
‘UPWA 4.
1Ta tai Ebe mwanena ‘i mwaratonina; ta i ‘euwana, ta Kaina ‘i enatunena, ta ‘i gwae, Ni‘atu tai ia ‘ewena Ieoba ‘ina lemeiega. 2Ta wate tasina Abela ‘i enatunena. Ta Abela to‘ita‘i‘isi sipi, ta Kaina to gesoa bwa‘a. 3Ta tuta iauna si gumwara ga gete ‘i apwesa, Kaina bwa‘a uanega ‘ebwaeadaita ‘i me‘ena Ieoba ‘enaia. 4Ta Abela, tauna wate ‘ina sipiao ‘ediega tomatua ta iapa ‘i me‘edi. Ta Ieoba Abela ta ‘ina ‘ebwaeadaita ‘i nuanuana: 5ta Kaina ta ‘ina ‘ebwaeadaita nigea nuanuana. Ta Kaina ‘i gamwasoara sinabwana, ta maninina ‘i tuegoegoa‘ena. 6Ta Ieoba Kaina ‘ena ‘i ona, To‘ase manuna ‘u gamwasoara? ta to‘ase manuna maninio ‘i tuegoegoa? 7‘Abo ‘u guinua ‘ai‘aila nigea nai ia da nuanuana? Ta ‘abo nigea ‘u guinua ‘ai‘aila, bubuna to‘umalina ‘awa ‘ena i ‘enokwaia: ta ‘emuia ‘ana nuanuana, ta ‘ena ‘u da loina. 8Ta Kaina Abela tasina ‘ena ‘i ona. Ta gete ‘i apwesa, ‘ena baguraia si miami, ga Kaina ‘i tooro tasina Abela ‘enaia, ta ‘i ununa. 9Ta Ieoba Kaina ‘ena ‘i ona, Abela tasio mwa‘o? Ta ‘i ona, Nigea ia mwaramwaratoni: ‘abo‘agu tasigu ‘ana to‘ita‘i‘ita nai? 10Ta ‘i ona, To‘ase ‘u guinua? tasio rarana ‘enana ‘eguia ‘i bwauma bwa‘a ‘enega. 11Ta gete tuga ni‘atu ‘u to‘umali bwa‘a ‘enega, tauna ‘awana ‘i ebarina sabi ‘ewa tasio rarana nimaioiega; 12‘ena bwa‘a ‘u gesoa, gea‘abo gete ‘enega ta muriega ‘ina waiwai ‘i da tagwatagware ‘emuia; ‘oio ‘u da ‘e to dena ta to lopilidadana bare‘uia. 13Ta Kaina Ieoba ‘ena ‘i ona, ‘Igu to‘umalina ‘ana e‘isa nigea kapekapeana ia da ‘a‘ari. 14U ‘ita, batua bwa‘a matanega ‘u da pa‘igu; ta matamuiega ia da pili kwaikwaia; ta ‘abo‘agu ia da ‘e to dena ta to lopilidadana bare‘uia; ta gete ‘i da apwesa, tauna ‘i lobegu ‘i da unugu. 15Ta Ieoba ‘i eonena, ‘Enega tauna Kaina ‘i ununa, e‘isa ‘e sebeni ‘i da loba. Ta Ieoba we‘iwe‘iiaia ‘i sa‘una Kaina manuna, abo ‘e bweu ‘i lobena ga ‘i da ununa.
16Ta Kaina ‘i apwesa Ieoba matanega, ta ‘asa Noda ‘ena ‘i miami, Edena matanaia. 17Ta Kaina mwanena ‘i mwaratoni; ta i ‘euwana, ta Enoka ‘i enatunena: ta ‘asa ‘i taraunena, ta ‘asa nina ‘i eesena Enoka, natuna ‘ana esana nadigega. 18Ta Enoka ‘ena Irada ‘i tubua: ta Irada natuna Meuiaela: ta Meuiaela natuna Metusaela: ta Metusaela natuna Lameka. 19Ta Lameka i ‘aserua: mwanena ‘e bweuna Ada, ta ‘e ruena Sila. 20Ta Ada Labala ‘i enatunena: tauna taudi anua‐naia ‘edia si miami, ta ma‘idi iobai tamadi. 21Ta tasina ‘ana esana Iubala: to giapi ta to gibinobinoo iauiaudi tamadi. 22Ta Sila, tauna wate Tubalakaina ‘i enatunena, tauna ‘ebedaba barasa be kainumu iauiauna ‘ana to bubuna: ta Tubalakaina nuuna Naama.
23Ta Lameka mwanenao ‘edia ‘i ona:
Ada ta Sila, ‘enagu wa da nonona;
Lameka mwanenao ‘omi, ‘igu ona wa da nono:
Tai ‘e bweu ni‘atu ia ununa ta ‘enega ‘i unuunugu ta ‘enega,
Ta tubuau ‘i bwarugu ta ‘enega:
24‘Abo Kaina ‘ana e‘isa ‘e sebeni,
‘Ai‘aila Lameka ‘e sebeniti ta sebeni.
25Ta Adama mwanena ‘i mwaratoni limena; ta natuna me ‘olotona ‘i enatunena, ta ‘i eesena, Seta: ‘I gwae, ta ‘enega, Eaubada mari susu ‘eguia ‘i sa‘una Abela ‘ana lopa‘eru; Kaina ‘i ununa ta ‘enega. 26Ta Seta ‘ena, wate natuna me‘olotona ‘ena ‘i tubua; ta ‘i eesena Enosa: gote ‘enega tomota si enugana be Ieoba ‘ana esana ‘ena si da bwau.
اکنون انتخاب شده:
Nugana 4: DOBOT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Published by the British and Foreign Bible Society in 1919