मरकुस 2

यीशु का ओधरंग कै रोगी कै ठीक कौरणा

(मत्ती 9:1-8; लूका 5:17-26)

1बौहितै दूसौ कै बाद यीशु हौजौ कफरनहूम नगर दा ओऊवा, औरौ लोगौ कै पौता लागा कै सै घोरे औसौ। 2तोबै ऐतरै लोग कौठै होवे कै दवारो कैई बै ठाँव ना थी; औरौ तैणै तिनुमुंजी पौरमेशवर का वचन शुणौऊवा। 3औरौ किछै लोगै ऐकी ओधरंग कै रोगी खै चार आदमी लैई टिपयौ तैसकै धोरे लियोऊवा। 4पौरौ जोबै सै भीड़ौ की बौजैह शै यीशु कै नेड़िक ना आए सौकी, तौ तिनुऐ घोरो कै छाप्परो खै उपाड़ो, औरौ तैसी ओधरंग का मौरेयौंदा कै सियुं ल़ौहथ धैनै राख दिया। 5यीशुए तिनका बिशवाश दैखैयो तैसी ओधरंग कै रोगी खै बौल़ौ, “दैख बैटा, हांव तैरै पापौ कै माफ कौरु।”

6तोबै कैई यहूदी शास्त्री, जू तैसी घोरो दै बौठै रौवै थिए, आपणै-आपणै मन दौ सुंचदै लागै, 7“ऐजा आदमी ऐशैखै काए बौल़ौ? ऐजा तौ पौरमेशवर कै नेंदैया कौरौ! पौरमेशवर खै छोड़ेयौ औकै कुणिए बै पाप माफ ना कौरे सौकौ?” 8यीशुए तौलोंई जाणै पोऊँ कै तिनुऐ आपणै-आपणै मनो दा ऐशणा विचार कौरे लौआ, औरौ तिनुखै बौल़ौ, “तुऔं कै ऐशै नै सुंचणौ चैंई। 9आसान का औसौ? का ओधरंग कै रोगी खै ऐजौ बौलणौ कै तैरै पाप माफ हौवे, या ऐजौ बौलणौ कै ऊबा बिज़ आपणै ल़ौहथ टिपेबा आगु जा? 10पौरौ हांव चोऊं कै तुऐं जाणै पाव कै मुं आदमी कै बैटै खै धोरती पांदी पाप माफ कौरणौ का औधिकार औसौ।” तैणै तैसी ओधरंग कै रोगी खै बौल़ौ, 11“हांव ताखै बुलू, ऊबा भीज, आपणै ल़ौहथ टिपयौ आपणै घोरो खै आगु जा।” 12सै ऊबा भीजा, औरौ तौलोंई ल़ौहथ टेपेयो सौबी कै सामणै दा निकल़ैयो हौटै गौआ; इथपांदी ‌‌‌सोबै हैरान हौए गौवै, औरौ पौरमेशवर कै बौड़ाए कौरेयौ बौलदै लागै, “आमुए ऐशणा चौमत्कार कौलोंई ना दैखी।”

यीशुए लेवी कै बोइदा

(मत्ती 9:9-13; लूका 5:27-32)

13यीशु ऐक बैई हौजौ निकल़ैयो झील कै किनारे हौटा, औरौ सौबै भीड़ तैसकै धोरे आए, सै तिनुखै पौरमेशवर का सौंदेश दैन्‍दा लागा।

14जोबै सै जांदा लागै रौआ थिया तोबै तैणै हलफईस का बैटा लेवी खै मामला लौन्दै बैई चौकी पांदी बोठेयोंदा दैखा, औरौ तैसीखै बौल़ौ, “मैरा चैला बौण।” औरौ सै आपणै कामौ कै छोड़ेयौ तैसका चैला बौणै गौआ।

15किछै दूसौ कै बाद जोबै यीशुए औरौ तैसकै चैलै लेवी कै घोरे खाणौ खाए लोऊ थियु; तोबै बौहितै मामला लोणो वाल़ै औरौ औकै लोग जिनु यहूदी लोग पापी#2:15 मूसा कै कानून कै तौड़णे वाल़ै बौल़ौ थिए, तिनुमुंजी यीशु कै चैलै बै थिए औरौ तैसकै साथै खाणौ खांदै बौठै, जिथुकै सै बौहितै लोग थिए, औरौ तैसकै पौछौड़ियौ हौए गौवै थिए। 16तोबै फरीसी लोग कै यहूदी शास्त्रीए ऐजौ दैखैयो, कै यीशुए तौ पापियों औरौ मामला लोणो वाल़ौ कै साथै खाणौ खाए लौ, तैसकै चैलै खै बौल़ौ, “सै तौ मामला लोणो वाल़ै औरौ पापियों कै साथै खांव पियौंए।” 17यीशुए ऐजौ शोणेयो, तिनुखै बौल़ौ, “राजी ताकडै़ कै डाक्टर कै जौरुरत नी आथी, पौरौ बीमारों खै औसौ: हांव पापी लोगौ खै बोईददा आए रौआ, ना कै तिनु बोईददा जू आपी कै धरमी बौणौ।”

उपवास कै बारै मुंजी सवाल

(मत्ती 9:14-17; लूका 5:33-39)

18यूहन्ना कै चैलै औरौ फरीसी लोग उपवास कौरौ थिए; ऐकी दूसै किछै लोगै यीशु कै धोरे आयौ ऐजौ बौल़ौ; “यूहन्ना कै चैलै औरौ फरीसी लोगौ कै चैलै उपवास राखौ, पौरौ तैरै चैलै किथु उपवास ना राखौ?” 19यीशुए तिनुखै बौल़ौ, “मैरै चैलै औरौ हांव ऐकी दुल्है औरौ तैसकै दोस्तो कै जैशणै औसौ। का तैसकै दोस्त तांव तौड़ी उपवास कौरलै? जांव तौड़ी दुल्है कै दोस्त बैयाव मोनादै तैसीआरी औसौ? ना सै उपवास ना कौरदै। तैशैकैई मैरै चैलै जांव तौड़ी हांव तिनु साथी रोऊंबा तांव तौड़ी उपवास ना कौरदै। 20पौरौ सैजै दूस आन्दै जोबै दूल्हा तिनुदा जौई कौरदै; तैसी सौमय, सै उपवास कौरदै।

21कुणिए बै लोग आपणै नौवें खोटणो कै टाली पुराणै खोटणो दै ना लांव; नही तौ धौयौ नोऐं टाली शोकड़े जांदै औरौ पुराणै खोटणो कै चिरी दैंदै। 22ऐशैखैई नौवें अंगूर कै रस खै पुराणै खोलड़ै दा कुणिए बै ना राखौ, नही तौ नौवें अंगूर का रस खोलड़ै खै फौटोए दैंदै, औरौ रस औरौ खोलड़ै दुईनै बैकार हौए जांदै; पौरौ नौवाँ रस नौवें खोलड़ै दा भोरो।” ऐशैखैई मैरी शिक्षा की बातौ खै पुराणै भोवारो आरी मिलाणी आछी ना आथी।

यीशु विशांव दूसौ का प्रभु

(मत्ती 12:1-8; लूका 6:1-5)

23ऐकी विशांव कै दूसै, जोबै यीशु औरौ तैसकै चैलै बागड़ी बाटी हौयौ जांदै लागै रौवै थिए; औरौ तैसकै चैलै चालदै बैई सिलै तौड़ेयो खांदै लागै। 24तोबै फरीसी लोगै तिनुखै बौल़ौ, “दैख, तैरै चैलै सैजै टोल लोए सांडै जू विशांव कै दूसै कौरणै मूसा कै कानून कै खिलाफ औसौ।” 25-26यीशुए बौल़ौ, “का तुऐं पवित्र-शास्त्र दो ऐजौ ना पोढ़ै रैई, कै अमारै बौड़ै बुड़ेईक राजा दाऊदे का कौरौ, जौल़ौ अबियातार महायहूदी पुरोहित थिया? जोबै राजा दाऊद औरौ तैसकै दोस्त भूखै थिए, तोबै सै पौरमेशवर कै तोम्बू दा हौटा औरौ सैजी रोटी खाई जू पौरमेशवर कै चौढ़ावे की रोटी थी, औरौ आपणै साथी कै बै दी। जू मूसा कै कानून कै हिसाब शै सिरफ मुख्य यहूदी पुरोहितो खै ही तिनु रोटी खाणौ कै छूट थी।”

27यीशुए तिनुखै बौल़ौ, “पौरमेशवरे विशांव कौ दूस आदमी कै भोल़ै कारिए बाणै राखौ, ना कै विशांव कै दूसै लोगौ पांदी बो‍झ बौणौ। 28इथकारिए हांव आदमी का बैटा विशांव कै दूसौ का बै प्रभु औसौ।”

انتخاب شده:

मरकुस 2: SRXNT

های‌لایت

به اشتراک گذاشتن

کپی

می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید

Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.

در مورد सिरमौरी नौवाँ नियम اطلاعات بیشتر کسب کنید