Juan 4
4
I Jesús xaq i ixoq aj Samaria
1Aj fariseo xketamaj chi i Jesús lik je k'i i winaq je teren chrij, xaq je k'i winaq kuqajsaj ya pkiwi chwach ma Wan. 2Tupu are ti i Jesús kqajsaw ya pkiwi i winaq, je are i utijoxelab'. 3Are xretamaj i Jesús xel chila pa Judea, xtzalij chik pa Galilea.
4Putzalijb'al, lik rajwaxik chi kik'aw che i ulew Samaria. 5Ire xupon che jun tinimit Sicar ub'i re i ulew Samaria. Naqaj che ulew chi uya'om etz mam Jacob che uk'ojol, chi a José. 6Chila o wi i k'otom chi re kan mam Jacob; i Jesús lik kosnaq chik che i b'e rumali xkub'i chuchi' i k'otom le. Kolo tik'il ij. 7Are uri xupon pan jun ixoq aj Samaria chuk'amik uya' chi k'otom. I Jesús are xrilo, xub'ij che:
—Ixoq, chaya jub'i' inya' —xcha. 8Tz'aqat i utijoxelab' i Jesús xe'e pa tinimit chulo'ik wach i kkitijo.
9Are uri i ixoq chi aj Samaria xula' uwach che i Jesús:
—¿Wach u'anik ile chi yet at aj Judío, katz'onoj taq aya' chwe yin chi in aj Samaria? —Keje ile xub'ij che, man i aj Judío kkaj ti kib' ku' aj Samaria.
10I Jesús xula' uwach che:
—Wetene aweta'am wach kuya i Dios, xaq wetene aweta'am pachin taq kutz'onoj uya' chawe, yet neri katz'onoj aya' che. Ire kuya neri k'aslik ya chawe —xcha.
11I ixoq xub'ij che:
—Nim laj winaq, lik nti ne kawesb'ej li re i ya xaq i k'otom lik naj upam; ¿Ipa kak'am wi uri i k'aslik ya chi kasujuj chwe? 12¿Xatab'a mas nim a'ij yet chwach i etz qamam mam Jacob, chi xuya kan i k'otomi chqe ipa xresaj wi li uya' ire, kiya' i rak'al xaq kiya' uchikop.
13Are uri i Jesús xula' uwach che i ixoq:
—Konojel i winaq chi kkitu' i ya ri kpe chik kik'atik. 14Xwiri jun we kutu' i ya chi kinya yin che, lik kpe ti chik uk'atik, man i ya chi kinya yin, ku'an ni pacha jun ralaxb'al ya puk'ux re i k'aslemal chi kk'is ti chik.
15Are uri i ixoq le xub'ij che i Jesús:
—Nim laj winaq, chaya i ya le chwe man keje ile kpe ti chik ink'atik, xaq kinmayij k'unik uri ij ij waral chuk'amik inya' —xcha.
16I Jesús xub'ij che:
—Jat, jasik'ij awachijil te'uri kixpe waral.
17Are uri i ixoq xula' uwach che:
—Yin nti wachijil. I Jesús xub'ij che:
—Lik saq laj tzij i kab'ij chi nti awachijil. 18Man jo'ob' awachijil je ik'awnaq awu', i achi chi o awu' wo'or, awachijil taj. Rumali chi lik saq laj tzij i xab'ij.
19Are uri i ixoq xub'ij che i Jesús:
—Nim laj winaq, wo'or kinta ub'e chi yet at profeta. 20I qatit qamam yoj, chi oj aj Samaria, waral puwi i jyub'i xkikoj wi u'ij i Dios; xwiri yix, chi ix aj Judío, kib'ij chi xwi pa Jerusalén koksax wi u'ij i Dios —xcha.
21Are uri i Jesús xula' uwach che:
—Ixoq, chakojo wach taq kinb'ij chawe, man kuriq ni ij chi yix xaipa kikoj wi u'ij i Ajwal, nti chik uchak kixpe waral puwi i jyub'i xaq mitene kix-e k'a pa Jerusalén. 22Yix iweta'am taj pachin kikoj u'ij, xwiri yoj qeta'am pachin kqakoj u'ij, man i tob'al ke i winaq chwach i kamik ku' aj Judío kpe wi. 23Xwiri kuriq ni ij, xaq lik are chik i ij iri, chi konojel ni'pa kkikoj u'ij i Ta chikaj, lik chkikojo na pacha kmajawik xaq lik pacha kub'ij i utewal i Dios man i Ta chikaj keje ile kraj chke ni'pa i kkikoj u'ij Ire. 24Man i Dios lik Tewal, xaq pachin kkikoj u'ij, rajwaxik chi lik kkiya ni kib' che utewal i Dios re krok'aj ni utzam ronojel ni'pa i kkaj u'anik.
25Are uri i ixoq xub'ij che i Jesús:
—Weta'am chi kk'un i Cristo chi taqtal li rumal i Dios chi Cristo ub'i. Are kk'un Ire kusaqij ni ronojel chqe.
26Are uri i Jesús xub'ij:
—I Cristo chi kab'ij le are yin, chi kinlapan awu' —xcha.
27Are uri xeupon pan utijoxelab', ike lik xkib'isoj chi i Jesús klapan ru' i ixoq le. Xwiri mijun chke xukowij rib' chutz'onoxik che wach taq kraj i ixoq xaq wach taq kkilap ru'. 28Are uri i ixoq xuk'am ti chub'i ukukub', x-e la pa tinimit chub'ixkil chke i winaq:
29—Chixpet chrilik jun achi chi xub'ij chwe ni'pa in-anom. ¿Moqxa are i Cristo?
30Are uri i winaq xe'el pa tinimit, xe'e chila ipa o wi Jesús. 31Tz'aqat i utijoxelab' kki'an pen ub'ixkil che i Jesús:
—Tijonel, chatija awa.
32Xwiri i Jesús xub'ij chke:
—Yin o inwa, xwiri yix iweta'am taj.
33I utijoxelab' xe'ok chub'ixkil chkiwach:
—¿O nawi jun xk'amaw li uwa? —Xecha.
34Xwiri i Jesús xub'ij chke:
—Inwa yin, are u'anik pacha kraj i xintaqaw loq, xaq kink'is ni uchak chi uya'om chwe. 35Yix kib'ij, k'a pa kajib' ik' panoq kjeqan i molonik. Xwiri yin kinb'ij chiwe chi chikojo retalil wach u'anom chik i tikon man lik utz chik kmolik. 36Jun winaq chi kchakun che i molonik kya' ni uri rajil; i molonik chi k-anik le re ni k'aslemal chi kk'is ti chik; man keje ile i jun chi ktikanik xaq i jun chi kmolonik junam kekikot na. 37Man pacha kub'ij jun tzij: “Jun ktikanik xaq i jun chik kmolonik”. 38Yin xixintaq b'i chumolik uwach i tikon chi itijom ti pich' uyej chutikik, lik jub'an chik je chakunnaq, xwiri yix xwi kimol uwach kichak ike.
39Che i tinimit Samaria je k'i i winaq xkikoj i Jesús rumal i tzij chi xub'ij i ixoq chke: “Xub'ij chwe ronojel ni'pa in-anom”. 40Rumali chi are xeupon aj Samaria ru' i Jesús, xkitz'onoj utzil che chi kkanaj ku' pa tinimit, rumali i Jesús xkanaj keb' ij ku'. 41Xaq lik je k'i xkikojo are xkita wach xub'ij ire chke. 42I winaq xkib'ij che ixoq: —Wo'or kqakojo xwi ti rumal wach xab'ij yet chqe, man lik yoj xqata wach kub'ij, xaq qeta'am chi lik saq laj tzij are ire Tol Ke konojel i winaq chwach i jyub' ta'aj —xecha.
I Jesús xukunaj uk'ojol jun achi chi nim upatan ru' i ajawinel
43Are ya xik'aw i keb' ij le, i Jesús xel chila pa Samaria, xumaj chub'i ub'e pa Galilea. 44Man xaq lik are i Jesús b'iwnaq chi jun profeta koksax ti u'ij pa tinimit ipa k'iynaq wi. 45I Jesús are xupon pa Galilea, i winaq aj chila lik utz uk'ulaxik xki'ano, man kilom uwach chila pa nima'ij Pascua, chila Jerusalén; xaq kilom ronojel ni'pa i nimaq taq il chi xu'an chila.
46I Jesús x-e chik pa Caná chi ukwenta i ulew Galilea; chila ipa xu'an wi che i ya chi xyiji che uwa'al uva muqb'am. O jun achi nim upatan chrij i ajawinel, lik iwab' jun rak'al chila pa tinimit Capernaum. 47I achi le, are xuta utzijol chi xupon i Jesús pa Judea man o chik pa Galilea, are uri x-e chrilik; are o chik chila, k'iyal mul xutz'onoj utzil che:
—Cha'ana utzil chwe, nim laj tijonel, kwaj yin kat-e wu' ru' ja chukunaxik jun wak'al chi kamik chik re.
48Are uri i Jesús xub'ij che:
—Yix lik kinikoj taj we kiwil ti jun nim laj il.
49Xwiri i achi chi lik nim upatan, xub'ij che i Jesús:
—Chakuyu inmak, nim laj winaq, chab'isoj a'enam tz'aqat k'amaja kkam wak'al.
50I Jesús xub'ij che:
—Jat chi awachoch man awak'al kk'asi na —xcha.
Are uri i achi le xukojo wach xub'ij i Jesús che, x-e chi rachoch. 51Are ktijin che i b'e, enam re chi rachoch xk'ulax kumal i rajchakib', xkib'ij che:
—¡I awak'al k'aslik!
52Are uri i achi le xutz'onoj chke umokom:
—¿Wach u'onom or xutikb'a utzirik i ak'al?
Ike xkila' uwach che:
—Iwir jun or chrijil chik i tik'il ij xchup i a' chrij —xecha che.
53I uqajaw i ala le, xuk'am usuk' chi are i or ile chi xub'ij i Jesús che: “I awak'al kk'asi na”. Te'uri i achi le, junam ku' i ralk'uwal xkikoj i Jesús.
54Are ukab' nimaq taq il ile xu'an i Jesús chila pa Galilea chrijil chik utzalijik loq pa tinimit Judea.
اکنون انتخاب شده:
Juan 4: ACHICUB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala
