Juan 12
12
Jun ixoq xukoj kunb'al muy puwi i Jesús
1Waqib' ij chuxe'el i nima'ij Pascua, i Jesús x-e pa Betania ipa jeqel wi ma Lázaro chi xuwalijsaj che i kamik. 2Are xupon i Jesús, xki'an jun nim laj wa'im kojb'al u'ij Ire. Chila chi mexa le o ma Lázaro xaq i jub'an chik achiyab' chi junam xkitij wa ru' i Jesús; are ati Marta xeutzuqu. 3I ati Mariy rok'am jun b'axo kunb'al chi lik muy xaq lik paqal rajil, elsam che jun saqil es nardo ub'i. Xukoj i kunb'al muy le che i raqan i Jesús, te'uri xuchaqijsaj ru' uwi. I kunb'al le lik x-e ronojel umuyal pa ja. 4Are uri ma Judas Iscariote, chi jun chke utijoxelab' i Jesús, chi xaq are i jun chi kujach ni pki'ab' ajch'oj chrij, xub'ij:
5—¿B'uchak chi xk'ayix ti kunb'al le tob'al ke i nib'a'ib'; man ile lik paqal rajil, i rajil ile keje pacha rajil jun ajchak re jun junab'? —Keje ile xub'ij ma Judas.
6Xwiri ma Judas, rumal ti k'axnab'al uk'ux chke i nib'a'ib' xub'ij i tzij le, man ire xa are jun ili'om, ire are ajk'olol pwaq chkij i rachi'il; lik o krel-aj che i pwaq chi uk'olom. 7I Jesús xub'ij che ma Judas:
—Mayaj i ixoqi man ire ax uk'olom wi i kunb'al muy le re kub'akb'ej b'i che inch'akul re inmuqb'al are kuriq i ij. 8I nib'a'ib' arewi je o iwu', xwiri Yin, arewi taj in o iwu' —xcha i Jesús.
Uyijb'axik ukamsaxik i ma Lázaro
9Lik je k'i chke aj Judío xkita utzijol chi i Jesús o chila pa tinimit Betania, rumali xe'e chrilik xaq chrilik i ma Lázaro chi xwalijsax chkixol i kamnaq rumal i Jesús. 10Are uri i kaj-atzil i rajpatan i Dios xkich'ob' ukamsaxik i ma Lázaro. 11Man xkich'ob'o chi xa rumal ire je k'i aj Judío xkikoj i Jesús; rumali lik ketijin chujek'ik kib' ku' ike.
Rokik i Jesús pa tinimit Jerusalén
12Lik je k'i i winaq xeupon pa Jerusalén rumal i nima'ij Pascua. Chukab' ij i winaq xkita utzijol chi i Jesús kupon chila che i tinimit Jerusalén. 13Rumali xkitzukuj uxaq palma xaq xe'e chuk'ulaxik i Jesús. Are ketijin che i b'e, xesik'in chub'ixkil i tziji:
—¡Chojato! ¡Lik nim u'ij i jun chi kk'un pub'i i Ajwal! Xaq ¡Lik nim u'ij i Ajawinel ke aj Judío! —Keje ile xesik'in chub'ixkil.
14I Jesús xuriq jun ral axna i x-an b'i chrij, xe'eloq pacha tz'ib'tal chupam uwuj i Dios:
15Maxij awib', nim laj tinimit Jerusalén;
chawila pe', i awajawinel xk'unik,
annaq chrij jun ral axna.
16I utijoxelab' i Jesús lik xkita ti ub'e i tzij le, xwiri chrijil chik ile are xwalij b'i chikaj pa chom laj uk'ijib'al, are uri xk'un chkik'ux chi ronojel ni'pa xuk'ulmaj, lik keje ile tz'ib'tal chupam uwuj i Dios.
17I winaq chi je o chila ru' i Jesús are xuwalijsaj ma Lázaro chkixol i kamnaq, kkimayij ti ulapik ronojel ni'pa i nimaq taq il xkilo chi xu'an i Jesús. 18Rumali chi konojel i winaq le xe'e chuk'ulaxik i Jesús, chi xu'an i nimaq taq il. 19Xwiri aj fariseo xkib'ij chkiwach:
—Xiwil ile ni'pa i winaq je teren chrij, lik nti ke'el wi wach kqa'an yoj —xecha.
Utzukuxik i Jesús kumal i jub'an aj Grecia
20Chkixol i winaq chi xeupon pa Jerusalén chukojik u'ij i Dios che i nima'ij Pascua je o jujun aj Grecia. 21I aj Grecia le xetejeb' pan ru' ma Felipe chi aj pa tinimit Betsaida, chi ukwenta i Galilea, xkitz'onoj utzil che; xkib'ij:
—Nim laj winaq, kqaj kqil uwach i Jesús —xecha.
22I ma Felipe x-e chub'ixkil che ma Andrés, are uri chekeb' xe'e chub'ixkil che i Jesús. 23Are uri i Jesús xub'ij chke:
—Xuriq i ij chi k-aljinsax u'ij pacha Winaq chi Xolalaxoq chwach Ulew. 24#12.24 Te'uri i Jesús xub'ij jun tijojb'al tzij kumal aj Grecia.Lik qatzij pacha ku'an i ija re i trigo are ktzaq pulew kkam taj, lik utukel kkanajik, xwiri we kkamik, kuya k'iyal uwach.#12.24 Keje ke'eloq ile chwe yin are kinmuqik. 25Jun winaq chi k'ax kuna uk'aslemal waral chwach i jyub' ta'aj xa kusach uwach uk'aslemal saqil. Xwiri jun winaq chi k'ax ti kuna uk'aslemal waral chwach i jyub' ta'aj, lik kuk'uxlaj uri uk'aslemal saqil chi nti uk'isik. 26Jun we kraj ku'an upatan chwij chterej ni chwij, man xaipa in o wi yin xaq chila uri kk'iji wi i wajchak wu'; jun we ku'an upatan chwij, koksax ni uri u'ij rumal Inqajaw —xcha i Jesús.
I Jesús xub'ij chi kkam na
27Wo'ori lik kinna jun nim laj k'achirik pink'ux. ¿Wach i kinb'ij wo'or? ¿Xatab'a kinb'ij: “Ta, chinawesaj chwach i nim laj k'achiriki chi in o wi” ¡Xwiri rumal ne iri xink'un waral chwach i jyub' ta'aj! 28—Ta, chanimarsaj u'ij ab'i —xcha.
Are uri xtataj jun ch'awb'al chikaj chi xub'ij: “In nimarsam chik xwiri kinnimarsaj chik ukamul.” Keje ile xub'ij i ch'awb'al chikaj.
29I winaq chi je o chila are xkita i ch'awb'al le xkib'ij:
—Ile jun ray xch'awik; xwiri o jub'an chik xkib'ij: Ile are jun ángel xch'aw li che chikaj.
30Are uri i Jesús xub'ij chke:
—Wumal ti Yin xtataj i ch'awb'al le, lik iwumal yix. 31Xuriq i ij chi k-at tzij puwi i jyub' ta'aj; xaq i jun chi uya'om rib' puwi lik kelsax nu b'ik.
32Xwiri are kintz'aw chwach i krus kin-an ni chke konojel i winaq chi kekojon chwe —xcha i Jesús.
33Ru' i tzij le xub'ij wach taq i kamik kik'aw wi. 34Are uri i winaq xkib'ij che:
—Yoj rumal i atb'al tzij, qeta'am chi i Cristo k-e ij saq chrij uk'aslemal. ¿Wach u'ankil uri ile kab'ij yet chi pacha i Winaq chi Xolalaxoq chwach Ulew kyaktaj nu b'ik? ¿Pachin taq uri i pacha Winaq le chi Xolalaxoq chwach Ulew? —Xecha.
35I Jesús xub'ij chke:
—Wo'or k'a o i saq chixol, xwiri naj ti chik o iwu', chixb'inoq tz'aqat k'a o i saq iwu', man kixk'achir taj are kk'un i equm, man pachin jun kb'in pa equm reta'am ti uri ipa k-e wi. 36Chixkojon che i saq le tz'aqat k'a o iwu'; man keje ile kixu'on ni rak'al i saq.
Are xb'itaj ile rumal i Jesús, xel chkixol, xruwaj rib' chkiwach.
B'uchak i aj Judío kkikoj ti i Jesús
37Tupu lik k'i nimaq taq il xu'an i Jesús chkiwach aj Judío, xwiri ike lik xkikoj taj. 38Man lik k-antaj na pacha utz'ib'am kan i profeta chi mam Isaías, chi xub'ij:
Ajwal, ¿Pachin nawi kojonnaq che i qatzij chi qab'im?
¿Pachin nawi che xuk'ut wi i nim laj ucho'ab' i Ajwal? —Xcha.
39I aj Judío le lik xkikoj taj; man xaq utz'ib'am kan mam Isaías:
40I Dios xu'an mawach chke
xaq xu'an che i kinojb'al chi kch'ob'on ti chik;
man keje ile kkil ti ub'e
xaq kkita ti ub'e, man keje ile ketzalij ti chaloq wu'
xaq yin keinkunaj taj.
41I mam Isaías xub'ij i tzij le man xril u'ij uchomal i Jesús, rumali lik k'iyal taq lapanik xu'an chrij.
42Lik je k'i chke aj Judío xaq je k'i chke i nimaq kipatan xkikoj utzij i Jesús, xwiri ani'al chkiwach aj fariseo man kkixij kib' chke; man keje ile ke'elsax tu b'i pa ja re i molb'al ib' ke i judío. 43Man chkiwach ike lik utz chi koksax ki'ij kumal i winaq, chwach we koksax ki'ij rumal i Dios.
Utzij i Jesús ku'at ni tzij pkiwi i winaq
44I Jesús ko xch'awik, xub'ij: Pachin jun kinukojo xwi ti Yin uri kinukojo xaq kukoj uri u'ij Inqajaw chi in taqawnaq loq. 45I jun chi kril inwach Yin ke'el uri chi xril uwach i Jun chi xintaqaw loq. 46Yin in saq chi in k'unnaq chwach i jyub' ta'aj, pachin jun kinukojo lik kk'iji ti uri pa equm. 47Xwiri pachin jun kuta intzij xaq kkojon ti che, Yin ti uri kin-at tzij puwi, man Yin in k'unnaq ti chu'atik tzij pkiwi i winaq, Yin in k'unnaq are elsab'al ke i winaq chisaq. 48Pachin jun kuk'aq b'i in-ij xaq kukoj ti intzij o kyaw tojpen uri puwi: Are i tzij chi xuta, are ile k-ataw tzij puwi pa k'isb'al ij. 49Man yin nti tzij kinb'ij chi to' kinch'ob' taq Yin, are i Ta chi in taqawnaq loq are b'iwnaq chwe wach kinb'ij xaq wach kink'utu. 50Yin lik weta'am chi i tzij xinutaq li chub'ixkil, pachin i xukojo kuriq uri uk'aslemal chi kk'is ti chik. Ni'pa i kinb'ij is are kinb'ij pacha xinutaq li i Ta chub'ixkil. Xcha i Jesús.
انتخاب شده:
Juan 12: ACHICUB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala
