G%E9nesis 7
7
I nim laj jab'
1I Ajwal xub'ij che ma Noé: “Chatok b'i chupam i nim laj kanuw chi pacha ja, junam ku' awalk'uwal, man wilom chi xwi yet suk'ul ak'aslemal chkixol konojel i winaq. 2Konojel ni'pa i jalajuj taq chikop chi je ch'am kak'am wuqub' mama'ib' xaq wuqub' atitab' chke, xwiri i chikop chi je ch'am taj xa jun ma xaq xa jun atit kak'am chke. 3Xaq chak'ama b'i wuqub' mama'ib' xaq wuqub' atitab' chke i tz'ikin chi kerupup chikaj, man keje ile ksach ti kiwach ni'pa i jalajuj taq tz'ikin chwach i jyub' ta'aj. 4Man pa wuqub' ij panoq, kinpetsaj ni jun nim laj jab' chwach i jyub' ta'aj, kuch'ij ni kawinaq (40) ij xaq kawinaq (40) a'ab', chupb'al kiwach konojel ni'pa i winaq xaq i chikop chi o kik'aslemal chi je in-anom chwach i jyub' ta'aj”. Keje ile xub'ij i Dios che ma Noé. 5I ma Noé lik xu'an ronojel chrij pacha xtaq che rumal i Dios.
6Ma Noé o lajujwinaq jumo' (600) junab' che are xpe i nim laj jab', chi xunojsaj uwach i jyub' ta'aj che i ya. 7Are uri xok b'i ma Noé chupam i nim laj kanuw chi pacha ja, junam ku' uk'ojol, rixoqil xaq i je ralib', tob'al kib' chwach i ya re i nim laj jab'. 8Xaq xe'ok b'i i chikop chi je ch'am, chikop chi je ch'am taj, tz'ikin, xaq i jalajuj taq chikop chi kejukmay chwach ulew, 9pa kakab'il xe'ok b'i ru' ma Noé chupam i nim laj kanuw chi pacha ja; mama'ib' xaq i atitab' pacha xutaq u'anik i Ajwal.
10Are xk'is i wuqub' ij xutikb'a petik i nim laj jab' chwach i jyub' ta'aj. 11Are o lajujwinaq jumo' (600) junab' che ma Noé, lik che i ij wuqlajuj re ukab' ik' are uri xeraqkrij li ronojel uchi' i ralaxb'al ya chuxe' li nim laj mar, xaq xejaqtaj li uchija re i kaj. 12Kawinaq (40) ij xaq kawinaq (40) a'ab' xuch'ij i jab' chwach i jyub' ta'aj. 13Lik che i ij le xok ma Noé chupam i nim laj kanuw chi pacha ja, junam ku' uk'ojol chi a Sem, a Cam, xaq i a Jafet, rixoqil xaq i je oxib' ralib'. 14Xaq xe'ok b'i jalajuj taq chikop aj pa taq es chrij kichikopil, chikop je manxo aj ru' taq ja chrij kichikopil, chikop chi kejukmay chwach ulew xaq i tz'ikin chrij kitz'ikinal. 15Keje okik b'i ile xki'an konojel i jalajuj taq chikop ru' ma Noé chupam i nim laj kanuw chi pacha ja, pa kakab'il xe'ok b'ik chrij kichikopil chi o kik'aslemal; 16jun ma xaq jun atit chke i jalajuj taq chikop xe'ok b'ik, pacha xub'ij i Dios che ma Noé; are uri i Ajwal xutz'apij uchija re i kanuw le chi pacha nim laj ja.
17I nim laj jab' xuch'ij kawinaq (40) ij chwach i jyub' ta'aj. Rumali i ya lik xel b'ik, xaq xuwalijsaj i nim laj kanuw chi pacha ja, lik xyaktaj chwach ulew. 18I ya lik ktijin b'i relik, lik x-on cho chwach ulew; i kanuw chi pacha nim laj ja lik kyolk'at puwi i ya. 19I ya lik xk'iyik xaq lik xel b'ik; is xch'uqtaj uwi ronojel i nimaq taq jyub', chi o chuxe' ronojel i kaj. 20Oxib' xik'ab' ru' jun mejelik ch'uk xik'aw i ya puwi ronojel i nimaq taq jyub' chi lik naj uwi. 21Keje kikamik konojel ni'pa i o kik'aslemal ile chwach i jyub' ta'aj, chikop je manxo je aj ru' taq ja, chikop aj pa taq es, konojel ni'pa i kejukmay chwach ulew, xaq konojel i winaq. 22Konojel ni'pa o kik'aslemal chwach i jyub' ta'aj, chi ke'uxlab'inik, is xekamik. 23I Dios keje uchupik kiwach ile xu'an chke konojel ni'pa o kik'aslemal chwach i jyub' ta'aj, xkijeq kamik i winaq, chikop, ni'pa i kejukmayik, xaq i tz'ikin aj chwa taq kaj, is konojel ile xchup kiwach chwach i jyub' ta'aj. Xwi chik ma Noé xkam taj rachi'ilam ni'pa je o ru' chupam i kanuw chi pacha nim laj ja. 24I ya xuch'ij lajuj wuqwinaq (150) ij chwach i jyub' ta'aj.
اکنون انتخاب شده:
G%E9nesis 7: ACHICUB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Biblia Achí de Cubulco, Derechos reservados de Sociedad Bíblica de Guatemala