Matiye 16
16
Parijiyɛ̰je gə Sadusiyɛ̰je ꞌdəji netɔji
Mrk 8.11-21
1 Parijiyɛ̰je gə Sadusiyɛ̰je ꞌɗe ꞌdəji Jeju mba kar ɗa netɔji gə ḭ dara mba n-ɛ ne. 2Jeju ila-je kəne na: Kar kumatagə nama ꞌpaje na: Lo a to may ya̰ mba dara kasə wɛgɛ; 3ngaa ɓo gə ndɔɔ-sḭ nama ꞌpaje na: Nji a kər ɓogəne ɗaa dara kasə mbo̰. Sisəy gə ꞌgərəje lo kunda rɔ ndaji dara ngaa mba ɗi ɓa asəje mba gərəje neje gə to kəm-si gə nda̰-nda̰ ang wa? 4Gəl kuji gə kṵra̰y gə nje ɓogo lo to mba turu gir-e kar Luba, dəji netɔji nama, d-a kar-ɛ netɔji gə ɗangə kara unda dɔ kar Jonas gə ang.
Ngaɓa Jeju iya̰-je ɔdə aw.
5Logə ngan njenendoje d-aw gə tura əər kara gə ɗaa, mə-je uy dɔ mbə gə. 6Jeju pa ar-je na: Oje gə maj-ɛ ɓa, aje rɔ-si dɔ guway kodo gə lə Parijiyɛ̰je gə Sadusiyɛ̰je. 7Ngan njenendoje ꞌwɛdə tar horo naa gə na: N-pa tar gə nee mba mbə gə j-odo ang. 8Jeju gərə tar kəji lə-je ɗaa pa ar-je na: Mba ɗi ɓa ꞌwɛdəje tar horo naa gə mba mə-si gə uy dɔ mbə gə le wa? Njetakagəje gə gə mbɔr-ɛ. 9ꞌGərəje m-e ang ja dɔro ɓi wa? Mə-si uy dɔ mbə gə mi gə jingawje tɔl dɔg lo mi d-usa ngaɓa kɛs-ɛ nay ar-si odo-je gə karɛ-karɛ le wa? 10Ose mə-si uy dɔ mbə gə jingawje tɔl dɔg lo sɔɔ d-usa kede nəm gə kɔr karɛ gə odo-je ne bur-e wa? 11M-pa m-ar-si na: Aje rɔ-si dɔ guway kodo lə Parijiyɛ̰je gə Sadusiyɛ̰je ngaa ɗa na ban ɓa ꞌgərəje gəl-e ang wa? M-pa tar gə ɔji dɔ mbə ang baa. 12Be ɓa, ngan njenendoje ꞌgərə to gə Jeju pa mba kar d-a rɔ-je dɔ guway kodo gə kar mbə gə ang, ngaa dɔ netɔji gə lə Parijiyɛ̰je gə Sadusiyɛ̰je.
Piyɛr pa to gə Jeju to Kirisi
Mrk 8.27-30; Lug 9.18-21
13Jeju ce dɔ nangə gə Sejare gə Pilibi gə, ɗaa dəji ngan njenendoje lə-a na: Tar ɗi ɓa dəwje ꞌpa ɔji dɔ-m ꞌma gə Ngon lə dəw le wa? 14D-ila kəne na: Nje gə kɛm na ꞌto Ja̰ Njeɗabatɛm; nje gə ɗangə na ꞌto Eli; nje gə ɗangə na ꞌto Jurumi, ose na ꞌto kara lə pajambərəje lə Luba. 15Jeju təl pa ar-je na: Ngaa sisəy ja le ꞌpaje na m-to na wa? 16Simo Piyɛr ila kəne na: ꞌI ꞌto Kirisi, Ngon lə Luba gə Nje kisi kəm baa. 17Jeju təl un tar pa ar-ɛ na: Simo, ngon lə Jonas, ꞌi to njerɔləl mba darɔ gə məsə ɓa təgə gəl ne gə nee ar-i ang, ngaa Bɔy gə isi mə dara gə ja ɓa təgə gəl-e ar-i. 18Be ɓa ꞌma ja m-pa m-ar-i to gə ꞌi ꞌto Piyɛr, dɔ ər gə m-a kunda gəl Mbo̰ naa lə njetakagəje lə-m kəne, singamongə lə nje gə jabaw a kasə ɗa sə-a ne kara ang. 19M-a kar-i lakɛrɛ ta kəy ɓeko̰ gə dara: Ne gə ꞌi a tɔ dɔ nangə nee nama d-a tɔ dara tɔ, a ɓo ne gə ꞌi tudu dɔ nangə nee nama d-a tudu dara tɔ. 20Be ɓa Jeju təl un ndu gə mong-e ar ngan njenendoje lə-a mba kar ꞌpa d-ar dəw o to gə n-to Kirisi ang.
21Uma kud-e dɔ ndɔ-ɛ əng ja Jeju un kudu tɔji ne ngan njenendoje lə-a: To may kar n-aw Jerujalɛm mba ko ꞌməsərə ji buba ɓeje gə nəm, gə ji buba njekapoloje gə ngaɓa gə ji njekɔr gəl toronduje gə nəm tɔ. D-a ɗa kar ꞌtɔl ꞌne ngaɓa ndɔ gə njekum gə munda nama n-a təl ndol ɓi. 22Piyɛr uwa Jeju ar sə-a nganga̰ ɗaa un kudu kḭ sə-a na: Luba ja ngom-i Mbayɓe! Ne gə nee le a ce dɔ-i gə ang. 23Ngaa Jeju turu kəm-e pa ar Piyɛr na: ꞌSu ɔdə ta-m gə gə ɗangə! ꞋI to jigi tuga koso no-m gə, mba kəji tarje lə-i to kar Luba ang ngaa to kar dəwje baa.
24Be ɓa Jeju təl pa ar ngan njenendoje lə-a na: To gə ɓo dəw gə njigi kuwa go-m nama, to may kar mbadə darɔ-ɛ, odo kagə dəsə lə-a, ɗaa uwa ne go-m. 25Dəw gə njigi ngom təbə lə-a nama a kila-a kɔrɔ, ngaa dəw gə ila təbə lə-a kɔrɔ mba-m nama a təl kinga-a. 26To gə dəw inga neje tɔ̰y gə dɔ nangə nee ja, ngaa ila təbə lə-a kɔrɔ le, may lə-a a to ɗi cibi wa? Ose ɗi ja ɓa dəw a kuwa mbəl ne təbə lə-a wa? 27Mba ꞌMa gə Ngon lə dəw m-a ɗe dan rɔnduba gə lə Bɔ-mje gə anjije lə-a, ɗaa m-a kuga dɔ ji dəwje kara kara tɔ̰y gə go kula ɗa-je. 28Tɔgərɔ, m-pa m-ar-si, nje gə kɛm gə d-ar horo-si gə nee d-a kuy ang saar d-a ko-m ꞌma gə Ngon lə dəw gə m-a ɗe gə Mbay gə boy gə kəm-je.
انتخاب شده:
Matiye 16: lap
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2020, ATALTRAB. All rights reserved
