Matiye 15
15
Parijiyɛ̰je gə nejiɓe
Mrk 7.1-23
1Be ɓa Parijiyɛ̰je gə njekɔr gəl toronduje d-ḭ Jerujalɛm ꞌɗe d-inga Jeju ɗaa ꞌpa na: 2Mba ɗi ɓa ngan njenendoje lə-i d-ila kuji dɔ nejiɓe gə lə ka-sijee ang wa? Mba ꞌtogo ji-je gə go ɗəb-e ang baa ja d-usa ne ne. 3Jeju ila-je kəne na: A sisəy, mba ɗi ɓa ilaje kuji dɔ ndu Luba gə ang mba nejiɓe lə-si wa? 4Mba Luba pa na: Ila kuji dɔ bɔ-ije gə dɔ ko̰-ije gə, cibi dəw gə taji bɔ-ɛje ose ko̰-ɛje nama d-a tɔl-ɛ gə tɔl.#15.4 Oje Cgɗ 20.12 5Ngaa sisəy ja ꞌpaje na: Dəw gə a pa kar bɔ-ɛje ose ko̰-ɛje na: Ne gə kəm kar m-la ne sə-i le to ne gə to mba Luba, dəw gə nee le ɗəw to mba kar ila kuji dɔ bɔ-ɛje gə ose dɔ ko̰-ɛje ang baa. 6Be ɓa ɗəw to mba kar dəw ila kuji dɔ nje kuj-eje gə ja ngaa sisəy ꞌcḭje tar lə Luba mba nejiɓe lə-si. 7Njetar mulaje, Ejay ila mbərə gə ɔji dɔ-si gə maj-ɛ na:
8 Dəwje gə nee le ꞌɗɔyi-m ta-je gə baa,
Ngaa mə-je to sə-m əw ya̰;
9 Polo-mje baa ja
Neje gə ꞌtɔji le
To torondu dəwje baa # 15.9
Eja 29.15
.
10Go-e gə ɗaa, Jeju ɓar bula dəwje ɗaa pa ar-je na: 11ꞌTuga-je mbi-si ɓo oje gə maj-ɛ. Ne gə andə mə kil dəw gə ɓa dəw mina ne ang, ngaa ne gə ḭ mə kil dəw gə le ɓa ɗa dəw ar-ɛ mina.
12Be ɓa, ngan njenendoje ꞌɗəm gə mbɔr Jeju gə ꞌpa d-ar-ɛ na: Tar lə-i gə ꞌpa le to Parijiyɛ̰je ya̰ le, ꞌi gərə ang wa? 13Jeju ila-je kəne na: Kagə gə ɗa-ɗa ɓa ɓo to kagə gə Bɔ-mje gə dara ɓa maa ang nama d-a kɔr gə ngira-a mɔgɔgɔ. 14Iya̰-jeje, ꞌto nje kəm tɔje gə d-ila kagə ji nje kəm tɔje gə. To gə ɓo nje kəm tɔ ɓa ila kagə ji nje kəm tɔ mar-ɛ gə nama, d-a koso buwa gə joo kɛm.
15Piyɛr un tar ila Jeju kəne na: Ɔr gəl kuji tar nee le ar-si joo. 16Jeju pa ar-ɛ na: Sisəy ja kara aw-je lal gərə gəl ne ja ɓi wa? 17ꞌGərəje ang wa? Ne gə andə mə kil dəw gə le, aw kəy sḭbo-e gə ngaɓa aw ne dɔ lo gə aw ila kɔrɔ. 18Ngaa ne gə ce mə kil dəw gə le ḭ m-e gə, ye ɓa ar dəw mina ne. 19Mba mə dəw ja ɓa kəjije gə kṵra̰y, tɔl dəw, ɓogo lo to, kaya, ɓogo, gangə tar kunda ta dəw gə, taji Luba ḭ kəne. 20Ye ɓa to neje gə ar dəw mina ne, ɓo kusa ne lal togo ji ɓa dəw mina ne ang.
Jene gə dɔ nangə gə Kana
Mrk 7.24-30
21Jeju ɔdə lo-e gə nee ɗaa ɔr rɔ-ɛ aw dɔ nangə gə Tir gə Sido̰. 22Be ɓa jene gə ɓe gə Kana, ḭ dɔ nangə ɓe gə əng le, ce uru ꞌkuwi na: O kəmtondoo lə-m, Mbayɓe, Ngon ka mbay Dabidi, njil gə kṵra̰y ula kəm ngon-m gə jene ndoo ya̰. 23Jeju ila-a kəne ang. Ɗaa ngan njenendoje lə-a ɗəm gə rɔ-ɛ gə dəji-e na: ꞌTɔb-ɛ ar-ɛ n-aw mba n-uru ꞌkuwi go si gə. 24Jeju təl ila kəne na: Luba ula-m horo badəmje gə d-igi gə to ngan Ijirayɛlje. 25Ngaa jene le ɗe unda ꞌburamba no Jeju gə, pa ar-ɛ na: Mbayɓe, kɔgərɔ ja ꞌla sə-m. 26Jeju ila kəne na: May kun mbə ta nganje kila kar ngan bisije ang. 27Jene le təl ila kəne na: Tɔgərɔ ja Mbayɓe, ngaa ngan bisije le d-usa bum ne gə um nangə kɔy yira nekusa ne gə lə ꞌɓəə-jeje ja tɔ. 28Ɗaa Jeju təl ila-a kəne na: Jene, takagə lə-i to ɓəəl ya̰ may kar inga ne gə aw ndoo-e. Ɗaa dɔ kar-ɛ əng ja ngon-e gə jene aji kəbərə.
Jeju aji njerɔko̰je dang-dang
Mrk 7.31-37
29Jeju ɔdə lo-e gə ɗaa uwa mbo kar man bo gə Galile. Ngaɓa uba dɔ ər aw isi kəne taar. 30Be ɓa bula bo dəwje ꞌɗe rɔ-ɛ gə gə nje nja məndəje, gə nje kəm tɔje, gə njeməndəje gə mbigije nəm ngaɓa gə njerɔko̰je gə kɛm bula ya̰ nəm tɔ. ꞌƊe gə je ꞌɗe d-umje no gɔl Jeju gə ɗaa aji-je. 31Logə bula dəwje d-o ɗaa cɛdə singa-je mba mbigije gə pa tar, gə njeməndəje dang-dang gə rɔ-je təl to gə maj-ɛ, gə nje nja məndəje kara nja gə maj-ɛ nəm, gə nje kəm tɔje gə d-o lo ɗaa d-ɔsə ne gaji Luba lə Ijirayɛlje tɔ.
Jeju arə jingawje tɔl dɔg lo sɔɔ nekusa
Mrk 8.1-10; Mat 14.13-21
32Jeju ɓar ngan njenendoje lə-a ɗaa pa ar-je na: M-o kəmtondoo lə bula dəwje nee mba ndɔ munda ja ngaa d-isi sə-m, ngaa d-inga ne d-usa ang. M-njigi kun ɗəw kar d-aw ɓe baa ang na d-a kaw koso labə ɗəw boo. 33Ngan njenendoje ꞌpa d-ar-ɛ na: J-a ɗa ban ɓa j-a kinga mbə ndag lo gə nee kar bula bo dəwje nee le d-usa d-ar mə-je ci wa? 34Jeju pa ar-je na: Mbə kandə ɓa to ji-si gə əng wa? D-ila kəne na: Siri gə ngan kənjije njɛ̰ kəne. 35Be ɓa n-un ɗəw n-ar bula dəwje le d-isi nangə, 36ngaɓa n-odo mbə gə siri gə kənji le n-tɔr ndu-e dɔ-ɛ gə ngaɓa n-cɛdə dana n-ar ngan njenendoje lə-a kay-je. 37Dəwje tɔ̰y d-usa ne d-ar mə-je ci, ɗaa d-odo dɔ dum-e karɛ siri. 38Dəwje tɔ̰y gə d-usa ne le d-asə jingawje tɔl dɔg lo sɔɔ, lal tura jeneje gə nganje.
39Jeju tɔbə bula dəwje ar-je d-aw ɗaa ɔdə al to, aw dɔ nangə gə Magada̰.
انتخاب شده:
Matiye 15: lap
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2020, ATALTRAB. All rights reserved
