Matiye 10
10
1Cibi Jeju ɓar ngan njenendoje lə-a gə dɔg gə gir-je gə joo, ar-je singamongə mba kar ꞌtɔbə ne njilje gə kṵra̰y gə d-aji ne njerɔko̰je gə njeməndəje nəm tɔ.
2Ri njeka̰ykulaje gə dɔg gə gir-je gə joo le ɓa to nee.
Dəw gə dɔngɔr, to Simo gə ꞌɓar-ɛ Piyɛr, ngon ko̰-ɛ Andəre, Jagə gə ngon lə Jebede, gə ngon ko̰-ɛ Ja̰. 3Pilibi je gə Batələmi; Toma je gə Matiye gə to njembo̰ lar gədə ɓe; Jagə gə ngon lə Aləpe, gə Tade; 4Simo gə Kana gə tar ɓe lə-a o̰-ɛ#10.4 Simo le to dəw gə ɗa ɗɔ gə njeko̰ɓeje gə Romə ya̰ mba kar dəwje lə-a d-isi nee gə dɔ-je nəm ɓa tar ɓe lə-a o̰-ɛ ya̰ nəm tɔ., gə Judas Isikariyɔdə gə a kun dɔ Jeju le.
Jeju um kula ji ngan njekulaje gə dɔg gə gir-je gə joo
Lug 9.1-6
5Nje gə dɔg gə gir-je gə joo nee le ɓa, Jeju ula-je ɗaa un ndu ar-je na: Dəwje gə to Jiibije ang le, awje ɓe lə-je ang, ɓa andə-je mə ɓeboje gə lə nje gə Samari ang.
6Awje gə ɓe lə badəmje gə d-igi gə ɓe lə dəw mə ɓeje gə Ijirayɛl. 7Aw awje ɗəw boo ɗaa, ila-je mbərə to gə ɓeko̰ gə dara nay əw ang baa, 8Ajije njerɔko̰je nəm, ꞌndolje nje gə d-uy nəm ɓa ar-je rɔ njebənjije arə ngadə, ngaɓa ꞌtɔbə-je njilje gə kṵra̰y nəm tɔ. Ingaje baa ɗaa sisəy kara ar-je baa tɔ. 9Unje maa ose lar nda, ose mbɛl ulaje ji ngira gə lə-si ang, 10ngaɓa unje ɓɔl kaw mba ang, kubu gə taar gəl joo ang, ulaje sabɔgɔ ang, kagə tɔsə ang, mba njekula le a kinga nekusa t-ɛ ja.
11Mə ɓebo ose ngon ɓe gə andəje kəne nama, ꞌdəjije tar a ɓo dəw gə asə kuwa-si mba ga̰ kəne nama ꞌtoje kəy lə-a saar ndɔ gə a kɔdəje ne. 12Logə andəje mə kəy gə nama, unje ji-si oje ne njeməkəyje ɓa, 13to gə ɓo mə kəy le asə kinga ɗɛgɛgɛ nama a kinga, a ɓo n-asə ang nama ɗɛgɛgɛ lə-si a təl ɗe kinga-si. 14Cibi logə ɓo dəw uwa-si mba ang nəm ngaɓa o tar lə-si ang nəm ɗaa ꞌceje mə kəy gə ose mə ɓebo gə nee le ɗaa, ꞌkundaje kuru gə gɔl si gə #10.14 Kunda kuru gə gɔl-je mba tɔji ne to gə ꞌbadə-je mba mbadə gə mbadə tar lə-je. To gə nejiɓe lə Jiibije gə ɗa gə dəwje gə ꞌgərə Luba ang, logə j-ḭ dɔ nangə ɓe lə dəwje nee le ꞌɗa bənəng mba ꞌto dəwje gə arə ngadə ang. Mə mbede gə nee le, Jiibije gə mbadə ko tar lə ngan njenendoje kara ɗa-je to gə dəwje gə arə ngadə ang tɔ. 15Tar gə tɔgərɔ ja m-pa m-ar-si: Ndɔ gangə tar nama, tar gə d-a gangə dɔ ɓebo gə nee le, a kədərə ya̰ kunda kar ɓe gə Sɔdom gə Gɔmɔr.
Kula kəm naa ndoo gə aw ɗe
Mrk 13.9-13; Lug 21.12-17
16Oje: M-ula-si to gə badəmje horo njagəmanjɛrje gə. Undaje kəm karə dɔ rɔ-si gə to to gə li be, ꞌkulje yururu to to gə dər kuul be. 17Aje rɔ-si rɔ dəwje gə, mba d-a kaw gə si no ngɔ gangə tar gə lə Jiibije nəm ɓa d-a kunda-si gə abəlay kəy nendo gə lə-je. 18D-a kaw gə si no njeko̰ ɓeje gə, gə no mbayje gə mba tar lə-m, mba kar to tar naji lə-m no-je gə nəm ɓa no dəwje gə ꞌgərə Luba ang gə tɔ. 19Ngaa logə d-a kaw gə si le, ꞌnoje rɔ-si mba gusu gə a paje ne tar ang, ɓa ɔji dɔ tar gə a paje ang; tar gə a paje le d-a kar-si dɔ kar-ɛ gə əng ja; 20Mba to sisəy ɓa a paje tar ang, ngaa Njil Bɔ-sijee Luba ɓa a kuwa ta-si pa ne tar.
21Dəw a kun dɔ ngon ko̰-ɛ kar d-a tɔl-ɛ, bɔ ngon-je a kun dɔ ngon-e, nganje d-a təl nje kəm tarje lə nje kuji-jeje, ngaɓa d-a ɗa kar d-a tɔl-je. 22Dəwje tɔ̰y d-a njigi-si ang gə kɔrɔ ja mba tar lə-m; ngaa dəw gə uwa gədərə saar ce ɗud-e gə ɓa a kinga kaji. 23Logə d-a kula kəm-si ndoo mə ɓebo gə nee gə nama a̰yje awje ye gə ɗangə gə. Tɔgərɔ ja m-pa m-ar-si, a kɔrəje sṵra̰ ɓeboje gə Ijirayɛl tɔ̰y ang ja, ꞌma gə Ngon lə dəw m-a ɗe.
Tar ndəji gə ɔji dɔ ɓəəl yo
Lug 12.2-9
24 Ngon njenendo nday njenetɔji ang, ngon njekula nday ɓəə-eje ang. 25Ne gə kəm kar ngon njenendo ɗa, ɗaa ndəji kəm njenetɔji, ngaɓa ngon njekula ɗaa ndəji kəm ɓəə-eje tɔ. D-unda ri njekəy na to Bɛləjebul, gə to mbay lə njilje gə kṵra̰y ngaa kandə ɓa nje gə kəy lə-a d-a kunda ri-je to gə be ang wa? 26Be ɓa, ꞌɓəəlje-je ang, mba ne kara gə iya rɔ-ɛ gə d-a kila gə ɗaga ang le godo, 27ngaɓa ne kara gə ꞌdəbə dɔ-ɛ gə d-a kḭya̰ dɔ-ɛ ngaw kar gadə gə ang le godo. Tar gə m-pa londul gə m-ar-si nama, ꞌpaje dan kara, ngaɓa ye gə m-wɛdə mbi-si gə nama, ubaje dɔ kəy ɓa ilaje ne mbərə. 28Nje gə tɔl darɔ baa ɓo d-asə tɔl kəm ang le, ꞌɓəəlje-je ang. May kar-si ꞌɓəəlje Luba gə asə mba tuji darɔ gə kəm joo tɔ̰y kəm pər gə. 29Se ꞌlabə mabəraje joo kəm sulay kara ang wa? Be ja kara, kara horo-je gə a koso nangə lal mə njigi lə Luba ang baa. 30Ngaɓa, bḭ dɔ-si ja kara Luba tura tɔ̰y. 31Be ɗaa, ꞌɓəəlje ang: Mba ꞌtoje ɓəəl undaje mabəraje gə bula.
32Gəl-e gə nee ɓa, dəw gə ɗa-ɗa gə tɔji rɔ-ɛ gə ɗaga no dəwje gə to gə n-to nje kar ꞌma nama ꞌma kara m-a pa gə ɗaga no Bɔ-mje Luba gə isi dara to gə nj-ɛ to nje kar ꞌma tɔ. 33Ngaa dəw gə ɗa-ɗa gə ma̰y tar lə-m no dəwje gə to gə n-gərə-m ang nama, ꞌma kara m-a ma̰y tar lə-a no Bɔ-mje Luba gə dara to gə m-gər-e ang tɔ.
Ngon njenendo je gə Njenujije lə-a
Lug 12.51-53
34Se əjije to gə m-ɗe mba kar ɗɛgɛgɛ to dɔ nangə nee wa? M-ɗe kar lo to ɗɛgɛgɛ ang ngaa m-ɗe gə ɗɔ ɓa m-ila horo-si gə. 35Mba m-ɗe gə cḭ naa m-ila horo ngon gə jingaw gə je gə bɔb-ɛje, horo ngon gə jene je gə ko̰-ɛje gə, horo ngon gə jene je gə mom-eje gə jene gə. 36Ngaɓa dəw gə ɗa-ɗa kara nje gə kəy lə-a ja d-a təl to njeba̰a̰je lə-a. 37Dəw gə njigi bɔb-ɛje ose ko̰-ɛje ya̰ unda-m nama asə to nje kar ꞌma ang, ngaɓa dəw gə njigi ngon-e gə jingaw ose ye gə jene unda-m nama asə to nje kar ꞌma ang tɔ, 38dəw gə un kagə dəsə#10.38 Kagə dəsə le tuji məsərə gə dəw a ko nəm ɓa kuy kara nj-ɛ a njigi kuy mba tar lə Jeju. lə-a ɓa uwa ne go-m ang nama asə to nje kar ꞌma ang tɔ. 39Dəw gə ngom təbə#10.39 Ngom təbə le pa uji ne dɔ dəw njigi ko kone ang nəm ɓa njigi kuy mba Jeju ang lə-a nama a kila-a kɔrɔ, ngaa dəw gə ila təbə lə-a kɔrɔ mba-m nama a təl kinga-a.
40Dəw gə uwa-si gə rɔ-ɛ gə nama ꞌma ja uwa-m gə rɔ-ɛ gə əng, a ɓo dəw gə uwa-m gə rɔ-ɛ gə nama uwa Luba gə njekula-m gə rɔ-ɛ gə tɔ. 41Dəw gə uwa pajambərə gə rɔ-ɛ gə mba n-to njekula lə Luba nama nj-ɛ a kinga kuga to gə pajambərə tɔ, ngaɓa dəw gə uwa njeneɗa gə gadə-gadə gə rɔ-ɛ gə mba to dəw gə gadə-gadə nama a kinga kuga to gə njeneɗa gə gadə-gadə be tɔ. 42Dəw gə ɗa-ɗa ja ɓa ɔr man gə kul gə ngon ngo ar ngon kara horo nganje gə nee ay mba to ngon njenendo lə-m nama, tar gə tɔgərɔ ja m-pa m-ar-si, nekuga dɔ ji lə-a a koso nangə ɓɛdə ang.
انتخاب شده:
Matiye 10: lap
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2020, ATALTRAB. All rights reserved
