uMataayi 16

AVhafalisaayi vhakwanza ishilolesyo

(uMaaliko 8:11-13; uLuuka 12:54-56)

1Pisinda, aVhafalisaayi na Vhasadukaayi vhamo vhahinza kwa Yeesu kumulinga. Vhahamulaavha kuuti avhalolesye ishilolesyo isha kuhomeshezya kuuti afumile kwa Mulungu. 2UYeesu ahavhaamula ahati, “Inga haafiha hamazuuvha, mukuti, ‘Indaavhi kuliisha ahinza, mwe pe kumwanya kuzelu.’ 3Ileelo hanzanshi mukuti, ‘Ileelo kwe yitoonye, mwe pe kumwanya kwilufile, havhili kuli amavhingo.’ Imwe mumanyile kumanyinsanya ivilolesyo ivwa kumwanya, ileelo mutangamanyinsanya ivilolesyo ivwa havhaliilizyo iha. 4Avhantu avha havhaliilizyo iha vhavhiivhi havhili vhavhembu. Vhakwanza ishilolesyo, ileelo te mbalolesye ishilolesyo naashimo, nkandi sheshiila isha Yoona.” Pe uYeesu ahavhaleha paala, aheepa.

Umulembo uwa kuluzizya uwa Vhafalisaayi na Vhasadukaayi

(uMaaliko 8:14-21)

5Lwe avhasundikwa avha Yeesu vhalamba usumbi, vhahamanya kuuti vhaluviilwe kupaya amakaati. 6UYeesu ahavhavhuuzya ahati, “Muvhanje minso nu mulembo uwa kuluzizya uwa Vhafalisaayi na Vhasadukaayi.” 7Avhasundikwa vhaakwe vhahanda kupanzanya vhuuvho vheeka kuuti, “Ayanga vhwevhulo, mwe pe tutapayile amakaati.” 8UYeesu ahamanya zye vhakupanzanya, ahavhavhuuzya ahati, “Mwe vha lwitiho ulunsi imwe! Shooni she mukupanzanya kuuti mutali na makaati? 9Vhuli, mushiili kumanyinsanya? Mutakukumbuha avhantu vhaala 5,000 vwe vhaaliiye amakaati gasaano? Vhuli, mwaasevile ivwalila ivitundu vilinga? 10Poosye amakaati gaala 7 ge vháliiye avhantu 4,000, mwásevile ivwalila ivitundu vilinga? 11Mutakumanyinsanya vhuli zye nkuyanga kuuti te zya makaati? Ishi nkuvhavhuuzya havhili kuuti muvhanje minso nu mulembo uwa kuluzizya uwa Vhafalisaayi na Vhasadukaayi.” 12Pe avhasundikwa vhaakwe vhahamanyinsanya kuuti atahayangaga izya mulembo uwa kuluzizya amakaati, nkandi izya nsambiilizyo izya Vhafalisaayi na Vhasadukaayi.

UPeeteli akuhomeshezya kuuti uYeesu wu Chilisiti

(uMaaliko 8:27-30; uLuuka 9:18-21)

13Lwe uYeesu aafiha mu lutala ulwa mu nkaaya iya Kayisaaliya mu Fiilipi, ahavhavhuziilizya avhasundikwa vhaakwe ahati, “Avhantu vhakuti ine ne Mwana wa Aadamu ne naanu?” 14Avheene vhahamwamula vhahati, “Vhamo vhakuti we Yoohani uMwozyi, avhamwavho vhakuti we mukuvhwi uEeliya. Havhili avhamwavho vhakuti we mukuvhwi uYelemiya na vhamwavho vhakuti we wooka mu vhakuvhwi.” 15UYeesu ahavhavhuziilizya havhili ahati, “Ileelo imwe mukuti ine ne naanu?” 16USiimoni uPeeteli ahamwamula ahati, “Iwe we Chilisiti, uMwana wa Mulungu uMulanzi!”

17UYeesu ahamwamula ahati, “Ulosiitwe iwe Siimoni we mwana wa Yoona, mwe pe izi te muntu we akulolesiizye, nkandi wu Taata waane uwa ku mwanya. 18Ine nkukuvhuuzya kuuti, iwe we we Peeteli.#16:18 Peeteli: Izina ili kwe kuuti iyalaawe. Pi iyalaawe ili, kwe nzenje ishivhanza shaane, na maha aga ku vhuzimu#16:18 Ku vhuzimu: Vhaazya mu Ntantiho izya Mazwi aMajeni. te gahashipoote naalumo. 19Ine kwe nkupe ivwigulilo ivwa vhumwene uvhwa Mulungu, pe lyonti lye mwaligalila kwi izina lyane mu nsi umu, woope uMulungu akuligalila ku mwanya. Havhili, lyonti lye mwalyigula kwi izina lyane mu nsi umu, woope uMulungu akulyigula ku mwanya.” 20Pe uYeesu ahavhahaana avhasundikwa vhaakwe ahati, vhatahamuvhuuzye umuntu nuumo kuuti uweene wu Chilisiti.

UYeesu akuyanga izya kufwa nu kuzyuha kwakwe

(uMaaliko 8:31-9:1; uLuuka 9:22-27)

21Kufuma ahavhaliilizyo iho, uYeesu ahataliha kuvhavhuuzya apazelu avhasundikwa vhaakwe kuuti, “Nkwanzilwa kusogola ku Yelusaleemu. Ukwo kwe njimvilwe nkaani na vhasongo na vhapiti avha vhapuuti na vhasambiilizi avha ndajizyo, havhili kwe vhangoje. Ileelo isiku ilya vhutatu uMulungu alinzyusya.” 22Pe uPeeteli ahasaavhuha nawo ku luvhazu, ahataliha kumupilila kuuti, “We Mwene, yitahaavhe inza isho! Izyo te zikwaje iwe!” 23Ileelo uYeesu ahagalunkana kwa Peeteli, ahamuvhuuzya ahati, “Galuuha mwisinda iwe Seetano! Ukulinga kundinda kuvhomba ulukasamo ulwa Mulungu! Nkukuvhuuzya isho, mwe pe zye ukusiivha te zya Mulungu, ukusiivha izya vhantu.”

24Pe uYeesu ahavhavhuuzya avhasundikwa vhaakwe ahati, “Umuntu wonti we akwanza kundandata ine, yikwanzilwa ayihaane wuuyo weeka, ayikungulaje kundandata insiku zyonti, poosye nu kufwa.#16:24 Ayikungulaje kundandata insiku zyonti, poosye nu kufwa: IShiyunaani shikuti, Avhusyaje ishihovhenkanyo shaakwe nu kundandata. 25Umuntu wonti we akwanza kuvhupoha uvhulanzi vhwakwe, alivhulovwa. Ileelo umuntu wonti we akuvhulovwa uvhulanzi vhwakwe ku zyane, alivhupoha. 26Ishi umuntu angalyaga lilonka vhuli, inga avhiiha insi yonti yavha yaakwe, ileelo avhuteezya uvhulanzi vhwakwe? Poosye umuntu angaafumwa shintu vhuli kuvhutavhula uvhulanzi vhwakwe? 27Ine ne Mwana wa Aadamu ndiyinza pooka na vhahavhizya vhaane mu vhushindamu uvhwa Taata waane. Pe ndivhalipa avhantu vhonti kulandatana ni mbombo zyavho. 28Nalyoli nkuvhavhuuzya kuuti, vhaliipo vhamo vhe vhimiliiye ipa, te vhahaafwe, she vhatambwenyi ne Mwana wa Aadamu lwe nkwinza mu vhumwene vhwane.”

اکنون انتخاب شده:

uMataayi 16: nih

های‌لایت

به اشتراک گذاشتن

کپی