LUKU 22

Lɛ́kpakũsũna Yesui

(Mat 26:1-5; Maa 14:1-2; Yuh 11:45-53)

1Burodi Futɛnasari dikpɛ kũ òdi pi Vĩnla kà kãni. 2Sa'orikinɔ kũ ludayãdannɛrinɔ tɛn zɛ́ wɛtɛ ò Yesu dɛ, zaakũ òtɛn vĩna kɛ gbɛ̃nɔnɛ.

Yudasi bona Yesu kpɛ

(Mat 26:14-16; Maa 14:10-11)

3Akũ Setan gɛ̃̀ Yudasi kũ òdi pinɛ Isikariɔti gũn, gbɛ̃nɔn kuri awɛɛplanɔ dokemɛ. 4Akũ Yudasi gɛ̀ɛ à yã ò kũ sa'orikinɔ kũ Luda ɔn dãkpãri gbɛ̃ zɔ̃kɔ̃nɔ lákũ áni kɛ nà à Yesu kpáḿma. 5Ń pɔ kɛ̀ nna, akũ ò lɛ́dokɔ̃nɔ kɛ̀ ò ɔgɔ kpáa. 6À zɛ̀o, akũ àtɛn zɛ́ wɛtɛ à Yesu kpáḿma gbɛ̃nɔ kpɛ.

Vĩnla pɔ́blenaa

(Mat 26:17-25; Maa 14:12-21; Yuh 13:21-30)

7Burodi Futɛnasari dikpɛ gɔrɔ kà, gɔrɔ kũ òdi Vĩnla sãnɛ bɔ̀rɔɔ kùtu kpá. 8Akũ Yesu Pita kũ Yuhanao zĩ̀ à pì: À gɛ́ Vĩnla pɔ́bleyã kɛkɛwɛrɛ. 9Akũ ò a là ò pì: Ń ye ò kɛkɛ mámɛɛ? 10Akũ à wèḿma à pì: Tó a gɛ wɛ̃tɛ gũn, gɔ̃gbɛ̃ ke ni daálɛ à í sɛna kũ loo. À tɛ́i ari ɔn kũ ani gɛ̃n. 11À o ɔn pì bedenɛ, Dannɛri pì, mán kipaki kunn, gu kũ áni Vĩnla pɔ́ blen kũ a ìbanɔo? 12Ani kpɛ́ musu zɔ̃kɔ̃ kũ ò kɛ̀kɛ mɔárɛ. À pɔ́bleyã kɛkɛ gwe.

13Kũ ò gɛ̀ɛ, ò è lákũ Yesu òńnɛ nà, akũ ò Vĩnla pɔ́bleyã kɛ̀kɛ gwe.

Dikiri pɔ́ble

(Mat 26:26-30; Maa 14:22-26; 1Kɔ 11:23-25)

14Kũ a gɔrɔ kà, Yesu sù à vùtɛ gwe kũ a zĩ̀rinɔ lɛɛlɛ. 15Akũ à pìńnɛ: Vĩnla pɔ́ble dí blena kãáo ni tɛni ma dɛ manamana ari màgɔ̃ gɛ́ wari kɛ, 16zaakũ matɛn oárɛ, mani ble doro ari kpata kũ à bò Luda kĩnaa gɛ́ boo gupuraa, gbasa dikpɛ yãpura gɛ́ su. 17Kũ à toko sɛ̀, à Luda sáabu kpà, akũ à pì: À sí à dɔdɔkɔ̃nɛ, 18zaakũ matɛn oárɛ, mani geepi'i mi doro ari kpata kũ à bò Luda kĩnaa gɛ́ boo gupuraa. 19Kũ à burodii sɛ̀, akũ à arubarikaa dàn à lìkɔ̃rɛ à kpàḿma à pì: Ma mɛ̀ kũ má kpà á yãin dí, àgɔ̃ abirekũ kɛ ma yã dɔnaágu yãi. 20Kũ ò pɔ́ blè ò làka, à toko pìi sɛ̀ lɛ dɔ à pì: Ma aru kũ ani bɔtɛárɛn dí, Luda bàka kunna kũ gbɛ̃nɔo tera aru ũ. 21Ma bonkpɛde ɔ kú kũmao ta gũn, 22zaakũ Bisãsiri Nɛ́ ni kpágui lákũ Luda dìtɛnɛ nàmɛ. Waiyoo gbɛ̃ kũ ani a kpáḿma pìi. 23Akũ ò nà kɔ̃ lalanaaa ò pì: Ó dí mɛ́ ani yã bire kɛɛ?

Yesu lɛ́dana a ìbanɔa

24Akũ lɛ́kpakɔ̃anaa fùtɛ ń tɛ́, kũ ò ye ò dɔ̃ ń gbɛ̃ kũ à de a dakela. 25Akũ Yesu pìńnɛ: Buri pãnde kínanɔ dì gbãna ble ń gbɛ̃nɔa, gbãnadenɔ sɔ̃ òdi ń zĩda sísi yãmanakɛrinɔ. 26Ama àsun kɛ lɛro. Séde gbɛ̃ kũ à zɔ̃kɔ̃ á tɛ́ gɔ̃ de lán gbɛ̃ kũ à kĩanaái bà. Séde á don'arɛde gɔ̃ de lán gbɛ̃ kũ àtɛn zĩ kɛárɛ bà. 27Pɔ́bleri kũ zĩ̀riio, ń dí mɛ́ à zɔ̃kɔ̃ɔ? Pɔ́bleriinloo? Makũ sɔ̃ má kú á tɛ́ lán zĩ̀rii bàmɛ. 28Gbɛ̃ kũ ò zɛ̀ kũmao ma warikɛnaa gũnnɔn á ũ. 29Lákũ ma De ma ka kpatan nà, lɛn mani á ká kpatan lɛ se, 30áni pɔ́ ble kũmao ma kpatan, áni vutɛ kíblegbaaa àgɔ̃ yã gɔ̃gɔ̃ Isaraila buri mɛ̀n kuri awɛɛplanɔnɛ.

Yesu gĩnakɛ à dɔ̃ yã kũ Pita ni kɛ

(Mat 26:31-35; Maa 14:27-31; Yuh 13:36-38)

31Simɔ, Simɔ, ǹ ma. Setan zɛ́ wɛ̀tɛ à á fãfã lákũ òdi pɔ́blewɛ fãfã nà. 32Akũ ma adua kɛ̀nnɛ de ma náani kũ ń vĩ sún kĩammaro. Tó n ɛra n suma, ǹ n gbɛ̃nɔ gba gbãna. 33Pita pìnɛ: Dikiri, ma sì ò ma da kpɛ́siran mà ga kũnwo.

34Yesu pì: Pita, matɛn onnɛ, ari ko gɔ̃ gɛ́ lɛ́ zuo gbãra, ĩni ledi kpámai gɛ̃̀n aakɔ̃. 35Akũ à ń lá à pì: Kũ ma á zĩ ɔgɔsɔ̃nɔ kũ bɔ̀kɔlokonaao kũ kyatenɔ sari, pɔ́ke kĩ̀aáwa yá? Akũ ò pì: Oi. 36Akũ à pìńnɛ: Tera sà gbɛ̃ kũ à ɔgɔsɔ̃nɔ vĩ, à sɛ́. Lɛmɛ dɔ kũ bɔ̀kɔlokonaao. Gbɛ̃ kũ à fɛ̃nɛda vĩ sɔ̃ro, à a uta yía à lú. 37Matɛn oárɛ, séto yã kũ ò kɛ̃̀ Luda yãn ma musu papa kũ ò pì: Ò a dìtɛ dokɔ̃nɔ kũ taarikɛrinɔ. Yã kũ ò kɛ̃̀ ma musu pì mɛ́ àtɛn kɛ sà. 38Ò pì: Dikiri, fɛ̃nɛda mɛ̀n plan dí. Akũ à pìńnɛ: Abirekũ mɔ̀.

Yesu aduakɛna zaa Kùkpɛ sĩ̀sĩgɛrɛɛi

(Mat 26:36-46; Maa 14:32-42)

39Yesu bò à gɛ̀ɛ Kùkpɛ sĩ̀sĩgɛrɛɛi lákũ àdi kɛ nà. A ìbanɔn tɛ́i. 40Kũ à kà gu kũ àtɛn gɛ́n, à pìńnɛ: À adua kɛ de ásun fu yɔ̃ogwanaaaro. 41Akũ à kɛ̃̀ḿma à kà lákũ òdi gbɛ̀ zu à lɛ́tɛ taka bà. Akũ à kùtɛ à adua kɛ̀ 42à pì: Baa, tó ń ye, ǹ toko'í síma, ama adi kɛ ma pɔyenyĩnaanlo, séde n pɔ́. 43Akũ malaikaa bò ludambɛ à sùa à a gbà gbãna. 44Kunna wɛ́tãmma gũn àtɛn adua kɛ kũ kokario. Akũ a ísimma tɛn tɔ́ zĩtɛ lán arutɔnaa bà. 45Kũ à adua kɛ̀, à fùtɛ à ɛ̀ara à sù à a ìbanɔ lè, òtɛn i o kũ pɔsirao. 46Akũ à pìńnɛ: À kɛ̀ dera átɛn i oo? À futɛ à adua kɛ de ásun fu yɔ̃ogwanaaaro.

Yesu kũnaa

(Mat 26:47-56; Maa 14:43-50; Yuh 18:3-11)

47Kũ à kpɛ́ àtɛn yã o, akũ ò kà dasidasi. Gbɛ̃ kũ òdi pinɛ Yudasi, a ìba gbɛ̃nɔn kuri awɛɛplanɔ doke mɛ́ à dòńnɛ arɛ. Kũ à nài de à lɛ́ pɛ́a, 48akũ Yesu pìnɛ: Yudasi, lɛ́pɛnaaan ĩni Bisãsiri Nɛ́ kpáoḿma yá? 49Kũ gbɛ̃ kũ ò kú kũ Yesuonɔ yã kũ àtɛn su è ò pì: Dikiri, ò ń lɛ́lɛ kũ fɛ̃nɛdaon yá? 50Akũ ń gbɛ̃ do sa'oriki zɔ̃kɔ̃ɔ zĩ̀rii lɛ̀ à a ɔpla sã gò. 51Akũ Yesu pì: À abirekũ tó. Kũ à ɔ nà a sãa, akũ a sã ɛ̀ra à nàn. 52Akũ à pì sa'orikinɔ kũ Luda ɔn dãkpãrinɔ kũ gbɛ̃ zɔ̃kɔ̃ kũ ò sùinɔnɛ: A sumai kũ fɛ̃nɛdanɔ kũ gònɔ lákũ kpãni wɛ́dewɛn ma ũ bà yá? 53Lákũ gu dìgɔ̃ dɔ nà madìgɔ̃ kú kãáo Luda ɔnn, akũ ádi ɔ namaro. Ama gɔrɔ dí de á pɔ́ ũmɛ, gusira kíblena gɔrɔmɛ.

Pita ledikpana Yesui

(Mat 26:57-58, 69-75; Maa 14:53-54, 66-72; Yuh 18:12-18, 25-27)

54Kũ ò Yesu kũ̀ ò sù kãao, ò gɛ̀ɛ kãao sa'oriki zɔ̃kɔ̃ bɛa. Pita tɛ́ ń kpɛ zã̀zã. 55Kũ ò tɛ́ kà ɔn gura, ò kàtɛ ò lìkai, akũ Pita sù à sɔ̀tɔ ń tɛ́. 56Zɔ̀nɔkpare ke a è, akũ à wɛ́ dìa à pì: Gbɛ̃ dí kú kãao sɔ̃ bi. 57Akũ à ledi kpài à pì: Nɔgbɛ̃, má a dɔ̃ro. 58Kũ à kɛ̀ saa fíti gbɛ̃ pãnde a è, akũ à pì: Mɔkɔ̃n se, ń gbɛ̃ domɛ n ũ. Akũ Pita pì gɔ̃gbɛ̃ pìinɛ: Makũmɛro. 59Kũ gɔrɔ gɛ̃̀tɛ lán awa do bà, gbɛ̃ pãnde nàkarao à pì: Yãpura gbɛ̃ díkĩna kú kãaomɛ, zaakũ Galili gbɛ̃mɛ. 60Akũ Pita pì: Má dɔ̃ pɔ́ kũ ń tɛ́aro. Zaa gwe gɔ̃̀nɔ kũ àtɛn yã o, akũ ko lɛ́ zù. 61Dikiri lìtɛ à wɛ́ pɛ̀ Pitaa, akũ yã kũ à òo dɔ̀ Pitagu kũ à pì, ari ko gɔ̃ gɛ́ lɛ́ zu gbãra, ani ledi kpáai gɛ̃̀n aakɔ̃. 62Akũ Pita bò bàai à pɔsira ɔ́ɔ dɔ̀.

Yesu fobonaa

(Mat 26:67-68; Maa 14:65)

63Gbɛ̃ kũ òtɛn Yesu dãkpãnɔ a fobò ò a gbɛ̃̀. 64Ò pɔ́ yĩ̀nɛ a ãnnwa, akũ òtɛni a lala ò pì: Ǹ annabikɛyã o, dí mɛ́ à n lɛɛ? 65Dɔkɛna kãao gũn ò yã dasi pãndenɔ ònɛ dɔ.

Yuda gbãnadenɔ yãkpatɛkɛna kũ Yesuo

(Mat 26:59-66; Maa 14:55-64; Yuh 18:19-24)

66Kũ gu dɔ̀, Yuda gbɛ̃ zɔ̃kɔ̃nɔ kɔ̃ kàkara, sa'orikinɔ kũ ludayãdannɛrinɔ ń pínki, akũ ò Yesu sɛ̀ ò gɛ̀ɛo ń yãkpatɛkɛkia. 67Akũ ò a là ò pì: Arumasihumɛ n ũ yá? Ǹ owɛrɛ. À wèḿma à pì: Tó ma òárɛ, áni síro. 68Tó ma yãke làáwa sɔ̃, áni wero. 69Zaa tera Bisãsiri Nɛ́ nigɔ̃ vutɛna Luda Gbãnade ɔplai. 70Akũ gbɛ̃ sĩnda pínki pì: Ase Luda Nɛ́mɛ n ũ yá? Akũ à wèḿma à pì: Lákũ a ò nà, makũmɛ a ũ. 71Akũ ò pì: Ó bàka ũgba kũ sèedadeo dɔɔ? O mà a lɛ́n kɔ̀.

انتخاب شده:

LUKU 22: BB2005

های‌لایت

به اشتراک گذاشتن

کپی