LUKU 17

Ludanaanikɛnaa

(Mat 18:6-7, 21-22)

1Yesu pì a ìbanɔnɛ: Yã kũ àdi tó gbɛ̃nɔ fu dìgɔ̃ sariro, ama waiyoo gbɛ̃ kũ ani bo a kĩnaa. 2Anigɔ̃ sã̀na adenɛ ò wísilɔgbɛ zɔ̃̀kɔ̃ dɔ a wakalɛ, ò a zu sɛ̀bɛɛ gũn de à tó nɛ́ dínɔ do fula. 3Àgɔ̃ kú kũ laakariio. Tó n gbɛ̃ndo durunna kɛ̀, ǹ gɛ́ ǹ a le. Tó à a nɛ̀sɛɛ lìtɛ, ǹ sùru kɛnɛ. 4Tó à durunna kɛ̀nnɛ gɔrɔ do gɛ̃̀n suppla, akũ à ɛ̀ra à pìnnɛ gɛ̃̀n suppla a nɛ̀sɛɛ lìtɛ, ǹ sùru kɛnɛ. 5Dikiri zĩ̀rinɔ pìnɛ: Ǹ ó ludanaanikɛna karawɛrɛ. 6Dikiri pì: Bee tó á Luda náani vĩ fíti lán ɛfɔ wɛ́ bà, áni o síri lí dínɛ à a zĩda wo à gɛ́ pɛ́ sɛ̀bɛɛ gũn, ani á yã ma.

7Tó á gbɛ̃ke zɔ̀ vĩ, àtɛn sɛ̃̀ wa ke àtɛn sãnɔ dã, tó à sù kũ burao, a dikiri ni pinɛ à su à pɔ́ ble gɔ̃̀nɔn yá? 8Oi, ani pinɛ à pɔ́ble kɛarɛ, à a uta litɛ, à suarɛ kũ pɔ́bleo kũ pɔ́minaao, àpii ni gbasa à pɔ́ ble, à í mi. 9Òdi zɔ̀ sáabu kpá, kũ à yã kũ ò dànɛɛ kɛ̀ yãin yá? 10Lɛmɛ ákɔ̃nɔ se, tó a yã kũ Luda dàárɛ kɛ̀ pínki, à pi: Zɔ̀nɔn ó ũ, ó zĩn o kɛ̀.

Kusu gbɛ̃nɔn kurinɔ werekɔ̃anaa

11Kũ Yesu tɛn gɛ́ Yurusalɛmu, àtɛn kure Samaria bùsu lɛ́a kũ Galilio. 12Kũ àtɛn gɛ̃ lakutu ken, akũ gɔ̃gbɛ̃ kusu gbɛ̃nɔn kurinɔ dàalɛ. Ò zɛ dire, 13ò lɛ́ zùi ò pì: Dikiri Yesu, ǹ ó wɛ̃nda gwa. 14Kũ à ń é, akũ à pìńnɛ: À gɛ́ à á zĩda mɔ sa'orinɔnɛ. Kũ òtɛn gɛ́, akũ ò wèrekɔ̃a. 15Kũ ń gbɛ̃ do è a werekɔ̃a, akũ à ɛ̀ra à sù, àtɛn Luda sáabu kpá kũ kòto gbãnao. 16À wùtɛ a kùaa Yesu arɛ à fɔ kpàa. Gbɛ̃ dí bi Samaria gbɛ̃mɛ. 17Akũ Yesu pì: Gbɛ̃nɔn kurinɔ mɛ́ ò wèrekɔ̃aroo? Gbɛ̃nɔn kɛ̃ndonɔn kú máa? 18Ń gbɛ̃ke dí ɛra à sù Luda sáabu kpáro, sé gbɛ̃ zĩ̀tɔ dí yá? 19Akũ Yesu pìnɛ: Ǹ futɛ ǹ tá, ma náani kũ n kɛ̀ mɛ́ à n werekɔ̃a.

Bisãsiri Nɛ́ sunaa

(Mat 24:23-41)

20Farisinɔ Yesu là kpata kũ à bò Luda kĩnaa bona gupuraai, akũ à wèḿma à pì: Kpata kũ à bò Luda kĩnaa dì bo gupuraa ò e kũ wɛ́oro. 21Oni pi à gwa la ke à gwa direro. Kpata kũ à bò Luda kĩnaa pì kú á tɛ́ lamɛ.

22Akũ à pì a ìbanɔnɛ: A gɔrɔ tɛn su kũ áni Bisãsiri Nɛ́ sugɔrɔ pìnɔ doke ena ni dɛ, áni ero. 23Oni piárɛ à kú dire ke à kú la, ama àsun gɛ́ro, àsun tɛ́ńyĩro. 24Lákũ legũpinaa dì gupura kũ ludambɛ lɛ́ gu dín kũ a lɛ́ direkũo nà, lɛn anigɔ̃ de lɛ Bisãsiri Nɛ́ sugɔrɔa. 25Séto à wɛ́tãmma è manamana gĩa, gbãragbɛ̃nɔ ni gíi. 26Lákũ à de nà Nuhu gɔrɔa, lɛn anigɔ̃ de lɛ se Bisãsiri Nɛ́ sugɔrɔa. 27Gbɛ̃nɔ tɛn pɔ́ ble, òtɛn í mi, òtɛn nɔ sɛ́, òtɛn zã kɛ ari Nuhu gɛ̀ɛ à gɛ̃̀ gó'itɛ gũn, akũ í dà anduniala, ò gàga pínki. 28Lɛmɛ dɔ Lutu gɔrɔa, òtɛn pɔ́ ble, òtɛn í mi, òtɛn pɔ́ lú, òtɛn pɔ́ yía, òtɛn pɔ́ tɔ̃, òtɛn kpɛ́ bobo. 29Gɔrɔ kũ Lutu bò Sɔdɔmu, tɛ́ kũ ifãntɛ̃gbɔ̃ɔo kɔ̀tɛ bona ludambɛ, akũ ò gàga pínki. 30Lɛn anigɔ̃ de lɛ gɔrɔ kũ Bisãsiri Nɛ́ ni bo gupuraa.

31Gɔrɔ birea gbɛ̃ kũ à kú a kpɛ́ musu sún kipa à gɛ̃ kpɛ́ gũn à pɔ́nɔ sɛ́tɛ à booro. Lɛn dɔ gbɛ̃ kũ à kpɛ́ bura sún ɛra à pɔ́ sɛ́ bɛro. 32À tó Lutu nanɔ yã dɔágu. 33Gbɛ̃ kũ à ye àgɔ̃ a wɛ̃̀ndi kũna ni kurai. Gbɛ̃ kũ à gì a wɛ̃̀ndiii sɔ̃, ade nigɔ̃ wɛ̃̀ndi vĩ. 34Matɛn oárɛ, gwãani birea gbɛ̃nɔn planɔ nigɔ̃ wútɛna kɔ̃ sarɛ, oni gbɛ̃ do sɛ́ ò gbɛ̃ do tón. 35Nɔgbɛ̃ gbɛ̃nɔn planɔ nigɔ̃ pɔ́ lɔ́lɔ gu dokɔ̃nɔa, oni gbɛ̃ do sɛ́ ò gbɛ̃ do tón. 36Gɔ̃gbɛ̃ gbɛ̃nɔn planɔ nigɔ̃ kú bura, Luda ni gbɛ̃ do sɛ́ à gbɛ̃ do tón. 37Akũ ò a là ò pì: Dikiri, má kpaa? À wèḿma à pì: Gu kũ gɛ̀ kún, gwen yumburukunɔ ni kɔ̃ kakaran.

انتخاب شده:

LUKU 17: BB2005

های‌لایت

به اشتراک گذاشتن

کپی