YUHANA 7

Yesu kũ a dakũnanɔ

1Abire gbɛra Yesu gɛ̀ɛ Galili wɛ̃tɛ kũ wɛ̃tɛo, zaakũ à ye à kure Yudearo, kũ Yuda gbãnadenɔ tɛni a wɛtɛ ò a dɛ yãi. 2Yudanɔ Kutadɔna dikpɛ kà kãni, 3akũ a dakũnanɔ pìnɛ: Ǹ futɛ la ǹ gɛ́ Yudea, de n ìba kũ ò kú gwenɔ yã kũ ntɛn kɛnɔ e se. 4Tó gbɛ̃ ye à tɔ́ bo, àdi a yãnɔ kɛ utɛnaro. Lákũ ntɛn yã dínɔ taka kɛ nà, ǹ n zĩda mɔ andunianɛ. 5Bee a dakũna pìnɔ dí a náani kɛro. 6Akũ Yesu pìńnɛ: A gɔrɔ dí kámɛnɛ kɔ̀ro. Ákɔ̃nɔ sɔ̃ á zɛ́ vĩ gɔrɔ sĩnda pínki. 7Andunia ni we à zãáguro, ama à zãmagu kũ madì pi a yãkɛna vãni yãi. 8À gɛ́ dikpɛkɛkia, matɛn gɛ́ro, zaakũ a gɔrɔ dí kámɛnɛ kɔ̀ro. 9Kũ à yã pì ò, akũ à gɔ̃̀ Galili.

Yesu gɛna Kutadɔna dikpɛn

10Kũ a dakũna pìnɔ gɛ̀ɛ dikpɛkɛkia, gbasa à gɛ̀ɛ. Adi gɛ́ gbɛ̃nɔ wáraro, à gɛ̀ɛ asiri gũmmɛ. 11Yuda gbãnadenɔ tɛni a wɛtɛ dikpɛkɛkia ò pì: Àpi kú máa? 12Pari gũn òtɛn yã o kpãnikpãni a musu manamana. Gbɛ̃kenɔ pì: Gbɛ̃ manamɛ. Gbɛ̃kenɔ pì: Oi, àtɛn gbɛ̃nɔ sãtɛmɛ. 13Gbɛ̃ke dí a yã o gupuraaro, kũ òtɛn vĩna kɛ gbãnade pìnɔnɛ yãi.

14Kũ dikpɛ kà a dagura, Yesu gɛ̀ɛ Luda ɔnn, àtɛn yã dańnɛ. 15A yã bò gbãnade pìnɔ sarɛ ò pì: Gbɛ̃ kũ adi kyó kɛro mɛ́ à takada dɔ̃ lɛ yá? 16Akũ Yesu pìńnɛ: Yã kũ madì dańnɛ bi ma zĩda yãnlo, gbɛ̃ kũ à ma zĩ yãmɛ. 17Gbɛ̃ kũ à ye à zɛ kũ Luda pɔyenyĩnakɛnaao nigɔ̃ dɔ̃ tó ma yãdannɛna de Luda pɔ́ ũ, kesɔ̃ ma zĩda yãn matɛn o. 18Gbɛ̃ kũ àdi a zĩda yã o tɛn wɛtɛ à tɔ́ bomɛ. Gbɛ̃ kũ àdi wɛtɛ à gbɛ̃ kũ à a zĩ̀ tɔ́ bo náani vĩ, manafiki kú a gũnlo. 19Musa dí doka daárɛroo? Á gbɛ̃ke yã pì kũna sɔ̃ro. Bɔ́yãi átɛn wɛtɛ à ma dɛɛ?

20Akũ gbɛ̃nɔ pìnɛ: Ń tãna vĩmɛ. Dí mɛ́ àtɛn wɛtɛ à n dɛɛ? 21Yesu pìńnɛ: Daboyã mɛ̀n don ma kɛ̀, akũ à bò á pínki sarɛ. 22Musa tɔ̃̀zɔ̃yã dàárɛ, akũ adì tɔ̃̀ zɔ̃ kámmabogɔrɔ zĩ. Ase adi kɛ Musa kĩnaan à nàanlo, à bò á dizi káakunɔ kĩnaamɛ. 23Lákũ òdi tɔ̃̀ zɔ̃ nɛ́nɛ kámmabogɔrɔ zĩ nà de òsun bo Musa doka kpɛro yãi, à kɛ̀ dera á pɔ fɛ̃namai, kũ ma gbɛ̃ gbà aafia swáswa kámmabogɔrɔ zĩi? 24Àsun yã gwa lákũ á wɛ́ tɛn e nàro. À yã gwa a zɛ́a.

Kɛ̃kɛ̃kɔ̃ana Yesu yãi

25Akũ Yurusalɛmudenɔ pì: Gbɛ̃ pì bi gbɛ̃ kũ òtɛni a wɛtɛ ò a dɛnloo? 26À gwa, àtɛn yã o gupuraa, akũ gbɛ̃ke dí yã liaro. Gbãnadenɔ a dɔ̃̀ Arumasihu ũ yãpuran yá? 27Ó dɔ̃ gu kũ gbɛ̃ dí bòn. Tó Arumasihu sù, onigɔ̃ dɔ̃ gu kũ à bònlo. 28Abire yãi gɔrɔ kũ Yesu tɛn yã dańnɛ Luda ɔnn, à pũ̀tã à pì: Á ma dɔ̃, akũsɔ̃ á dɔ̃ gu kũ ma bon. Ase mádi su kũ ma zĩdaoro. Gbɛ̃ kũ à ma zĩ bi yãpurademɛ, akũ á a dɔ̃ro. 29Má a dɔ̃, zaakũ ma bo a kĩnaamɛ, àkũ mɛ́ à ma zĩ.

30Akũ òtɛni a wɛtɛ ò a kũ, ama gbɛ̃ke dí ɔ naaro, zaakũ a gɔrɔ dí papa kɔ̀ro. 31Zàa gũn ò Yesu náani kɛ̀ dasi ò pì: Tó Arumasihu sù, ani daboyã kɛ dasi de a kũ gbɛ̃ dí kɛ̀lan yá?

Dogarinɔ zĩna ò Yesu kũ

32Kũ Farisinɔ mà òtɛn yã o kpãnikpãni zàa gũn a yã musu, akũ sa'orikinɔ kũ Farisi pìnɔ dogarinɔ zĩ̀ ò a kũ. 33Akũ Yesu pì: Ma kunna kãáo gɔ̃̀ fíti, mani gbasa mà tá gbɛ̃ kũ à ma zĩ kĩnaa. 34Áni ma wɛtɛ à kuramai, zaakũ áni fɔ̃ à gɛ́ gu kũ má kunlo.

35Akũ gbãnade pìnɔ tɛn kɔ̃ lala: Mán à ye à gɛ́n kũ óni kuraii? À ye à gɛ́ ó gbɛ̃ kũ ò fã̀kɔ̃a Giriki bùsunɔ gũn kĩnaa de à yã da Giriki pìnɔnɛn yá? 36Yã kũ à òo pìi mì de deramɛɛ? Kũ à pì óni a wɛtɛ ò kuraai akũsɔ̃ gu kũ á kun óni fɔ̃ ò gɛ́ gwero.

Í kũ àdi ń ká wɛ̃̀ndiia

37Dikpɛ gɔrɔ kpɛde zɔ̃kɔ̃ zĩ Yesu fùtɛ à pũ̀tã à pì: Gbɛ̃ kũ ími tɛni a dɛ à mɔ́ ma kĩnaa à í mi, 38gbɛ̃ kũ àtɛni ma náani kɛ sɔ̃, í kũ àdi ń ká wɛ̃̀ndiia nigɔ̃ bàa lɛ́ zaa a nɛ̀sɛɛ gũn lákũ ò kɛ̃̀ Luda yãn nà. 39À yã dí ò Luda Nini kũ gbɛ̃ kũ òtɛni a náani kɛnɔ ni sí yã musumɛ. Ò Luda Nini pì vĩ gĩaro, kũ Yesu dí gĩnakɛ à tɔ́ bo kɔ̀ro yãi.

Gbɛ̃nɔ kɛ̃kɛ̃kɔ̃ana Yesu yãi

40Kũ gbɛ̃nɔ yã pìi mà, gbɛ̃kenɔ pì: Gbɛ̃ díkĩna bi annabii pìimɛ yãpura. 41Gbɛ̃kenɔ pì: Gbɛ̃ díkĩna bi Arumasihumɛ. Ama gbɛ̃kenɔ pì: Arumasihu ni bo Galili sɔ̃ yá? 42Ò kɛ̃̀ Luda yãn ò pì, Arumasihu bi Dauda burimɛ, ani bo Dauda bɛ wɛ̃tɛ Bɛtilihamumɛ. 43Akũ gbɛ̃nɔ kɛ̃̀kɛ̃kɔ̃a Yesu yãi. 44Ń gbɛ̃kenɔ ye ò a kũ, ama gbɛ̃ke dí ɔ naaro.

Yuda gbãnadenɔ dì Yesu náani kɛro

45Akũ dogarinɔ ɛ̀ra ò tà sa'orikinɔa kũ Farisinɔ. Akũ ò ń lá ò pì: Bɔ́yãi ádi a kũ a su kãaoroo? 46Dogari pìnɔ wèḿma ò pì: Gbɛ̃ke dí yã o lán gbɛ̃ díkĩna bà zikiro. 47Akũ Farisinɔ pìńnɛ: À á likara sen yá? 48Gbãnade ke Farisi ke a náani kɛ̀n yá? 49Pari bire Luda yã dɔ̃ro, Luda lɛ́ kɛ̀ńnɛmɛ. 50Nikodɛmu kũ à gɛ̀ɛ Yesu kĩnaa yã bi gbãnade pìnɔ dokemɛ. À pìńnɛ: 51Ó doka gũn ò pì, òsun yã da gbɛ̃la a yã manaa sariro ke yã kũ à kɛ̀ dɔ̃naa sariro. 52Ò pìnɛ: Galili gbɛ̃mɛ n ũ se yá? Ǹ tàasi ká ǹ gwa. Ĩni e kũ annabi ke dì bo Galiliro. 53Akũ baadi tà a bɛa.

اکنون انتخاب شده:

YUHANA 7: BB2005

های‌لایت

به اشتراک گذاشتن

کپی