Bo Bolɛ 7
7
Noe i mmeli nun fulɛ
1Anannganman seli Noe kɛ: «A nin wɔ awlofuɛ mun an `wlu mmeli'n nun afin ɔ blɛ sufuɛ'm be kwlakwla be nun'n, wɔ kunngba yɛ n wun kɛ a nin min mantan-an. 2Fa nnɛn nga be di'n be akpasua kunngun'n kwlaa be nun yasua kun nin bla kun sɔ fa nso. Be nga be di-man'n be liɛ'n be akpasua kun nun'n, fa bla kun nin yasua kun cɛ . 3Fa anunman akpasua kunngun'm be kwlaa be nun yasua kun nin bla kun sɔ fa nso. I liɛ'n, be osu'n su nunnun-man asiɛ'n su. 4Ɔ ka le mɔcuɛ kun n ´tɔ nzue asiɛ'n su cɛn ba klonglo ablanan kɔnguɛ nin wia nun. N ´nunnun like nga n yili be'n be kwlaa asiɛ'n su.» 5Noe niannin ndɛ nga Anannganman fa sieli i nyrun'n i kwlaa su yoli.
Anannganman su nzue'n i tɔlɛ
6Kɛ anannganman su nzue sɔ'n ´tɔ'n, wuun Noe ɔ'a di afuɛ ya nsiɛn. 7Noe nin i yi, nin i wa yasua mun, ɔ nin i wa'm bé yi mun be wluli mmeli'n nun kɛ ɔ ´yo nan anannganman su nzue'n ɔ'a di-man be'n ti. 8Nnɛn nga be di mun nin nga be di-man mun, anunman mun nin nnɛn nga be cuɛn be wun ase mun, 9bé bla kunngun nin be yasua kunngun nga Nyanmiɛn kleli kɛ be `wlu Noe sin'n, be wluli i sin. 10Kɛ le mɔcuɛ'n juli'n, nzue'n tɔli dan kpa asiɛ'n su.
11Noe i afuɛ ya nsiɛn'n i anglo nnyɔn'n su i le blu le nso su'n su yɛ nzue ng'ɔ wo asiɛ'n i bo lɔ'n kpukeli-ɔ, yɛ nyanmiɛn su lɔ nzue'n kusu i anuan'n tikeli-ɔ. 12Nzue'n boli asiɛ'n su tɔlɛ bo. Ɔ tɔli cɛn ba klonglo ablanan kɔnguɛ nin wia nun. 13Cɛn sɔ'n nun yɛ Noe nin i yi, nin i wa Sɛm nin Kam nin Zafɛt ɔ nin bé yi mun be wluli mmeli'n nun-ɔn. 14Be nin blo nnɛn akpasua kunngun mun, nin klɔ nnɛn akpasua kunngun mun, nin nnɛn kanngan'm be akpasua kunngun mun, ɔ nin anunman mun nin kakaa'm be kwlaa yɛ be wluli-ɔ. 15Nnɛn akpasua'n kwlaa be yasua kun nin bla kun be bali Noe sin. 16Be yasua kun nin bla kun nga Nyanmiɛn kleli kɛ be wlu Noe sin'n be wluli. Nan Anannganman ɔ'a nyin Noe su anuan.
17Anannganman su nzue sɔ'n tɔli cɛn ablanan. Kɛ nzue'n ´yi'n, ɔ mannin mmeli'n su. 18Nzue'n yi ɔli i nyrun lɔuun kpa, siɛn'n mmeli'n la nzue'n i nyin su. 19Nzue'n yi tratrali su, ɔ man ɔ katali oka nglo-nglo kpa'm be kwlaa be su. 20Nzue'n trali oka sɔ'm be su mɛtri nso. 21Ɔ man asiɛ'n su ninnge'm be kwlaa be wieli wu, i sran mun o, i klɔ nnɛn mun o, i blo nnɛn mun o, i anunman mun o, i waka mun o, be kwlaa be wieli wu. 22Like nga be de wunmiɛn bɔ be o asiɛ'n su be kwlaa be wuli. 23Anannganman nunnunnin asiɛ'n su ninnge'm be ngba. I sran o, i nnɛn dandan o, i nnɛn kanngan o, i anunman o, be kwlaa sɔ'm be nunnunnin. San Noe nin be nga be nin i wo mmeli'n nun'n be ngunmin cɛ yɛ be fiteli nun-ɔn .
Noe fin mmeli'n nun su jra
24Nzue'n kali asiɛ'n su cɛn ya cɛn ablenun.
اکنون انتخاب شده:
Bo Bolɛ 7: BB98
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Baoulé Bible © Alliance Biblique de Côte d'Ivoire, 1998.