Luk 19

Yezu a da kɔn lɛ ka Zaase-n boo

1Yezu bɛ́ á dɔ Zerikoo, a n kiwi lɛ bii kuri kiɛ̃. 2Giĩ goon na á goã walan, a tɔ n Zaase. A na á goã wusuru-silin goledɛnaa lɛa, gɔn màn gigiã dɔ́ goã a lon. 3A na á goã giɛ li a yɛ Yezu bɛ́ min mɛn lɛa. Sɛnɛ, a na á goã min kunun lɛa. A goã boe la a Yezu yɛ zaman lɛ li wa. 4Á tɔ́n baa si á woo nyɛɛnɛ, á dii gɔ́rɔ da kɔ́n tɔrɔ la, a tɔ n sikomɔrɔ. A na á bɛ zɛnaa màn mɛn bɛ́ toɛ, a Yezu yɛ, a giala, Yezu n die kiɛ̃ walan. 5Yezu bɛ́ á dɔ bɛa bǎã lɛ nɛ, á n yii saa lon á pɛ Zaase ne: «Zaase, n nanaa n gisĩ, a giala masɛ doamaa nɛ man yu n din la pelo.»

6Zaase nə́ n nanaa á gisĩ, á Yezu a tiibaa kũ ka nyɛnyɛɛ nɛ. 7Minin mɛnɛn tumaa bɛ yɛ, bɛn nə́ goã zùzùũ sii, ǹ nə́ pii mà giĩ kɛ na á woo n yu sii baraa-zɛnaali la.

8Zaase golee Dɛnaa lɛ yɔrɔ-a, á pɛ nɛ: «Mìinaa, á ke, man die ma gɔn màn a talɛɛ koe doobaan la. Masɛ min mɛnɛn bebele lɛlɛ má wɔrɔ si ǹ la, man die didie wɔ doo koe la yǎa gunyin sii.»

9Yezu pɛ nɛ: «Pelo n din laanka n kion minin nə́ kirisibaa yɛ, a giala, n dɔ́ n Abrahamu tɔrɔ lɛa. 10#Mat 18.11 Sonbore, min mɛn bɛ́ papaã nɛ, Min a Nɛgiĩ na á daa ga bɛ lɛ li a tá a kirisibiɛ.»

Boo giməə mɛn nə n da wɔrɔ we wɔ gɔn la

(Mat 25.14-30)

11 # Mat 25.14-30 Yezu bɛ́ á diri Zeruzalɛmu la, minin bɛ́ n too koe bɛa boon kɛn lɛn-a, ǹ nə́ taasɛ mà Lawa kiibaa lɛ n die die sisia gɔrɔ. Yezu boo giməə goon kɔsɔ da. 12Á pɛ:

– Kii nɛ goon ne, á woo gána sɔsɔɔ kɔ́n nɛ, á woo ga kiibaa li kii gole gole li, a nə n bɔyɛɛ. 13A laan bɛ̀ a n woe, á lɛ dia a dí-nyali fù la, á wɔrɔ we fù gii ǹ ni. Á pɛ ǹ nɛ mà ǹ dí nya nɛ ǹ là yɛ, bɛ̀ asɛ baa n bɔyɛɛ. 14Sɛnɛ, a kɔɔ̃n a din a gána minin ganaa wa. Ǹ nə́ minin dia a kio mà ǹ pɛ kii gole gole lɛ nɛ, mà ǹsɛn ba li a giã ǹsɛn mìi la wa.

15Sɛnɛ, á kiibaa lɛ yɛ, á n bɔyaa á daa, a wɔrɔ we kɔ a dí-nyali fù mɛn la, á lɛ dia bɛn la. Á nɔ̀n da ǹ la, mà ǹ gogoonmaa na á boo la á dí nya á wàa là yɛ? 16Ǹ bibinaa daa, á n bɔlɔ pɛ mà asɛ a dɛnaa ganaa, mà a wɔrɔ we lɛ na á wɔrɔ we fù kɔsɔ yɛ là lɛa. 17Á pɛ bɛ nɛ mà á bǐɛ̃ kɔ, dí-nyali sonbore. Mà a bɛ́ á bɔlɔgoondɛnaa baa sii boɛɛn nɛ, mà a giã kiwi fù mìi la kii lɛa. 18Ǹ paabaa ǹ wɔ daa á pɛ mà asɛ a dɛnaa, mà a wɔrɔ we lɛ na á wɔrɔ we sooro kɔsɔ yɛ là lɛa. 19Á pɛ bɛ dɔ nɛ mà a dɔ giã kiwi sooro mìi la kii lɛa.

20Sɛnɛ, ǹ goon daa á pɛ mà asɛ a dɛnaa ganaa, mà a wɔrɔ we lɛ á ke, mà asɛ na á da mɔnaa lɛkoro ne á koa. 21Mà asɛ na á goã nyɛ́ɛ biɛ a din ni, a giala, mà á min kakaarɛ lɛa. Mà a bɛ́ a màn mɛn koa wa mà a n bɛ siɛ, mà a bɛ́ a màn mɛn da wa mà a n bɛ kuri. 22Á pɛ a dɔ nɛ mà dí-nyali naarɛ ke, mà asɛ n die kiri kuri la, a kɔnpɛ a din lɛ gɔ́ɔ̃ ǹ boon ne. Mà táa á dɔ̃ mà asɛ n min kakaarɛ lɛa, mà asɛ màn mɛn koa wa mà asɛ n bɛ siɛ, asɛ màn mɛn da wa asɛ n bɛ kuri. 23Sɛnɛ, mà wàa na á baa a wo asɛ a wɔrɔ lɛ kɔ pii-kɔlen la, ǹ nə́ dí nya-n wa? Mà asɛ a wusoo li, bɛ̀ asɛ bɛ́ re woe sii bɛn la ka là nɛ. 24Bɛ kio, min mɛnɛn bɛ́ golee ne, kii lɛ pɛ bɛn manɛ mà ǹ wɔrɔ we goon kɛ lɛ si la, ǹ kɔ a fùdɛnaa kɛ la. 25Ǹ nə́ pɛ nɛ mà dɛnaa, mà fù tá bɛ gɔn gɔrɔ dɔn! 26#Mat 13.12; Mar 4.25; Luk 8.18 Kii lɛ mà asɛ n pii ǹ ni: Màn bɛ́ min mɛn lon, kɔsɔ á re n diɛ bɛa dɛnaa wɔ li. Sɛnɛ, a bɛ́ a ba min mɛn lon wa, ta a boɛɛn mɛn dɔ din na a tan, ǹ tá re bɛ lɛ dɔ din sii la. 27Giĩ lɛ mà asɛ a zɔ́ɔn kɛn, min mɛnɛn bɛ́ mà ǹsɛn ba li asɛ giã ǹ mìi la wa, mà ǹ da ǹ nɛ kànaa, ǹ nə ǹ bɔlɔ kuru asɛ yɔrɔ-a.

28Yezu bɛ́ boon kɛn lɛn diɛ, á zii kũ á n woe Zeruzalɛmu.

Yezu a wɔ Zeruzalɛmu ǹ gɔn

(Mat 21.1-11; Mar 11.1-11; Zaã 12.12-19)

29Yezu bɛ́ á diri Bɛtfazee la ka Betaanii ni, dia-n woe *Olivie dan kele la, á kialandɛnaa min paa dia, 30á pɛ ǹ nɛ: «Ka wo ka nyɛɛnaan kiwi kɛ nɛ, bɛ̀ ka dɔ a nɛ, ka á re dundun banɛɛ yii doa nɛ, min kɔ́n tɔn dii la bɔrɔ wa. Ka fore ka da nɛ. 31Bɛ̀ min nɔ̀n da ǹ la, mà wàa nɛ ka tá fore, ka pɛ nɛ mà kasɛn Dɛnaa laadoo ná a ganaa.»

32Dia dí-a wolen lɛn nə́ woo, ǹ nə́ woo yaa ka Yezu bɛ́ á pɛ ǹ nɛ lɔn. 33Ǹ bɛ́ dundun banɛɛ lɛ fore, ǹ dɛnan mà wàa na á baa ǹ tá dundun banɛɛ kɛ fore?

34Ǹ dɔn nə́ ǹ lɛ si mà ǹsɛn Dɛnaa laadoo ná a ganaa.

35Bɛ kio, ǹ nə́ daa dundun banɛɛ lɛ kɔ Yezu la. Ǹ nə́ ǹ mɔnaan bɔ ǹ nə́ nyɔmaa dundun lɛ la, ǹ nə́ Yezu kũ ǹ nə́ da la. 36Yezu bɛ́ woe, minin man nə́ goã ǹ mɔnaan boe nyɔmiɛ̃ tán zii la. 37Yezu bɛ́ á diri Olivie dan kele kɛ a mìi zuməə la, a kialandɛnan tumaa kaa kun ka nyɛnyɛɛ nɛ, ǹ nə́ yoo ǹ tá loe loe Lawa tɔ boe ne ka lɛn gole ne, ǹ kaãbaa ǹ siin mɛnɛn tumaa yɛ, bɛn lɛa. 38#Loe 118.26 Maǹ nə́ goã pii kɛnɛn: «Kii ke die ka Dɛnaa tɔ nɛ, Lawa barka wɔ bɛ nɛ! Là nyantoro tá lon, gugurubaa goã lon a Lawa gole wɔ lɛa!»

39 *Fariziɛ̃n mɛnɛn bɛ́ zaman lɛ bii, bɛn nə́ pɛ Yezu ni: «Mìinaa, a pɛ n kialandɛnan lɛn nɛ, mà ǹ nə n lɛ tã.»

40Yezu nə́ ǹ lɛ si kɛnɛn: «Masɛ n pii ka nɛ, bɛ̀ ǹ nə́ n lɛ tã, kɔlɔn tá re n lɛ dii!»

Yezu a wuu pɛ Zeruzalɛmu kiwi la boo

41Yezu bɛ́ á diri kiwi lɛ la á yɛ, á wuu pɛ la. 42Á pɛ: «Zeruzalɛmu kiwi, màn mɛn bɛ́ là nyantoro koe n la, toa bɛ̀ n dɔ n bɛ giala miɛ kooro dinin pelo! Sɛnɛ, sisia, bɛ á durii ni n ganaa, n ba boe la n yɛ wa. 43A giala lɛawaan tá re die, n zɔ́ɔn tá re n lɛnpɛnɛ, ǹ nə n yɔrɔ bɔ taãn-taãnɛ, ǹ nə n lɛ gɛwaa n paǹ din tumaa ganaa. 44Ǹ tá re n yui lenlen, n din laanka n gɔ́ɔ̃gɔ́ɔ̃ ǹ minin ni. Ǹ ba re kɔlɔ toɛ ǹ miã la n gɔ́ɔ̃-n wa. A giala, Lawa biikoo mɛn bɔ á daa, mà a nə n sii sii la, n bɛa biikoo lɛ dɔ̃ wa.»

Yezu a wɔ Lawa a kion boo

(Mat 21.12-17; Mar 11.15-19; Zaã 2.13-22)

45Yezu wɔ Lawa a kion, á yoo á pii-kɔlen loo. 46#Iza 56.7; Zer 7.11 Á pɛ ǹ nɛ:

– Lawa a boo n pii: «Masɛ a kion lɛ n die goɛ̃ Lawa nyankɔ ǹ kion lɛa, sɛnɛ kasɛn nə́ baa wurumunun duru ǹ yala lɛa.»

47 # Luk 21.37 Yezu na á goã minin darɛɛ baraabaraa Lawa a kion. Wúlu-bɔlen goledɛnan man nə́ goã giɛ li kun ka landa sii-daraalin ni ka min golen ne, mà ǹ dɛ a gã. 48Sɛnɛ, ǹ goã doɛ̃ ǹ bɛ́ re siɛ lɔn wa, a giala, zaman lɛ na á goã n too koe a lon ka ǹ parsii ni.

اکنون انتخاب شده:

Luk 19: SBPE2011

های‌لایت

به اشتراک گذاشتن

کپی