Luk 16
16
Mànan mìilandɛnaa kɔkɔrɔ boo
1Yezu pɛ a kialandɛnan manɛ:
– Pàãma goon ne á giĩ goon saa á da a gɔn mànan mìi la. Bɛa giĩ lɛ ná a gɔn màn lɛ ziziɛ̃. Pàãma lɛ bɛ́ á bɛ ma, 2á ǹ dia ǹ nə lɛ dia la. Á tɔ́n nɔ̀n da la mà a na á wàa sii zɛnaa ke? Mà a na a dí nya ǹ gɔn nyaa asɛ nɛ. Mà a kũ sisia ganaa mà a ba re asɛ gɔn mànan sii yɔrɔ boe doo wa. 3Giĩ lɛ pɛ a din gɔ́ɔ̃ nɛ mà asɛ n die wàa zɛnɛɛ kəni? Mà asɛ a goledɛnaa bɛ́, á gɔn mànan sii yɔrɔ bɔ si asɛ la. Mà pàã ba asɛ lon asɛ tán kɔsɔ wa, mà nyankɔ dɔ á sìi diɛ asɛ ganaa. 4Haya! Mà asɛ sii kɔ́n yɛ á n die zɛnɛɛ, màn mɛn bɛ́ toɛ, bɛ̀ ǹ ná asɛ a dí lɛ si asɛ la, giaáran nə yɛ asɛ la, ǹ na asɛ kũ ǹ na asɛ da ǹ kion. 5Yǎa a lɛ dia a goledɛnaa a giɔ̀mɔdɛnan yii la, ǹ nə́ daa a li. Á pɛ ǹ bibinaa nɛ: «Maa goledɛnaa lɛ a giɔ̀mɔ n gia n ganaa?» 6Bɛ ná a lɛ si mà nyɔɔ dɔn paabiɛ. Dí mìilandɛnaa lɛ mà a ganaa mà Haya, mà a sɛ́wɔ á ke, mà a giã tán fufuu, a kiɛ̃ a nɛ mà posooro ne. 7Á pɛ kɔsɔ dɔ nɛ mà asɛ a goledɛnaa a giɔ̀mɔ lɛ n gia a dɔ ganaa? Bɛ mà asɛ wɔ n *belee boroo paabiɛ. Dí mìilandɛnaa lɛ mà haya, mà a dɔ a sɛ́wɔ á ke, mà a kiɛ̃ a nɛ mà pɔkiwisi ni.
8Goledɛnaa lɛ dí mìilandɛnaa sii kɔkɔrɔ-zɛnaali kɛ lɛ para pɛ, a giala mà á dí nya ka yiridɛnaabaa nɛ. Sonbore, min mɛnɛn bɛ́ kanaa kɛ lɛ wɔn lɛa, bɛn man yiri boe ǹ sii zɛnaan gɔ́ɔ̃ nɛ ǹ dinin biin ni á la tɛ fúlu nɛn kɛn manɛ.
9Yezu pɛ ǹ nɛ: «Ka ga giaáran li ka dinin manɛ ka kanaa a naforo kɛ nɛ. Màn mɛn bɛ́ toɛ, bɛ̀ bɛa naforo kɛ lɛ nya, Lawa lɛ kɔ ka ganaa ka giã a biikoo nyabaã bǎã kɛ nɛ.
10Bɛ̀ min mɛn tá foo doa ǹ min lɛa sii boɛɛn gɔ́ɔ̃ nɛ, bɛa dɛnaa n foo doa ǹ min biɛ sii gole dɔ gɔ́ɔ̃ nɛ. Bɛ̀ min mɛn ba foo doa ǹ min lɛa sii boɛɛn gɔ́ɔ̃-n wa, Ǹ dɛnaa ba foo doa ǹ min biɛ sii gole dɔ-n wa. 11Bɛ̀ min foo ba doa nɛ kaa dí nya ǹ gɔn ganaa ka kanaa a naforo kɛ-n wa, die n die naforo lɛ a taãn kɛ koɛ ka li? 12Màn mɛn din ba kaa wɔ lɛa wa, bɛ̀ ka foo doa ǹ minin baa bɛ wɔ gɔn la wa, Lawa n die ka dinin wɔ kɛ koe ka la lɔn?
13 #
Mat 6.24
Dí-nyali kɔ́n ba boe la a dí nya biikoo goon li mìinaa paa-n wa. A n die goon biɛ zɔ́ɔ, a goon narɛ, a n die goon bɔlɔ sii, a goon kɛ puusə kɔ. Ka a boe la ka n dinin kɔ Lawa la, ka n dinin kɔ wɔrɔ dɔ la wa.»
14 *Fariziɛ̃n mɛnɛn bɛ́ wɔrɔ n kɔɔ̃nɛ ǹ ganaa, bɛn dɔn nə́ goã n too koe bɛa boo kɛ lɛ tumaa ganaa, bɛ̀ ǹ nə́ yaa we a ganaa. 15Yezu pɛ ǹ nɛ:
– Kasɛn, ka n nyɛɛ minin yɔrɔ-a mà ka tá pepere, sɛnɛ, Lawa tá ka foon doɛ̃. Sii mɛn bɛ́ sii gole lɛa minbuiin nɛ yɔrɔ-a, bɛ tìĩ n boe-n Lawa nyin ni.
Lawa a boo laanka Lawa a kiibaa
(Mat 11.12-13; 5.31-32; Mar 10.11-12)
16A kũ lɛlɛ-lɛlɛ ganaa a da Zaã a biikoo yaa, Lawa a dí-pɛn laanka a boo gii-dalin sɛ́wɔn dininsɔɔ̃nɔn man nə́ goã. Sɛnɛ sisia, Boo Tii Kɔɔ̃n kɛ tá n pii, mà Lawa n kii lɛa. Didie nə n doɛ a tá n wen woɛ, màn mɛn bɛ́ toɛ, a wɔ *Lawa a kiibaa ǹ bǎã nɛ. 17#Mat 5.18 Lon laanka tán tá re kiɛ̃, a ná a dí din biɛ wa, sɛnɛ, Lawa a boo kɛ a lɛkoro boɛɛn din ba re papaɛ̃ wa.
18 #
Mat 5.32; Kor1 7.10-11 Min woo min ná a lɔ loo, á kɔsɔ saa, bɛa dɛnaa na á naarɛbaa zɛnaa. Lɔ mɛn dɔ bɛ́ ǹ zuũ loo, bɛ̀ min mɛn bɛ dɔ saa, ǹ dɛnaa na á naarɛbaa zɛnaa.
Pàãman giĩ laanka Lazaarɛ boo
19Giĩ goon na á goã, a n pàãma lɛa. A na á goã mɔnaa sonbore sonboren we. A na á goã zɔ́n màn-bii zɛnɛɛ baraabaraa. 20Giĩ doobaa goon dɔ́ goã a tɔ n Lazaarɛ. Baayɛrɛ goã a paǹ tumaa ganaa. A na á goã wɛɛ tán pàãma lɛ a kiɛnlɛ-a. 21A na á goã giĩ doobaa lɛ gɔ́ɔ̃ nɛ, bɛ̀ a n boe la, pàãma lɛ a màn-bii pɔnpɔsɛn mɛn bɛ́ kiɛ, a bɛ goa a bii. Ginin mɛnɛn nə goã die a baayɛrɛ lɛn piɛ̃, a goã boe la á bɛn lui wa.
22Bɛa doobaa lɛ daa á gã, yǎa lon a dia dí-a wolen ná a telenboen saa ǹ nə́ woo da Abrahamu genli Lawa a piɛ. Pàãma lɛ dɔ́ daa á gã, ǹ nə́ bĩ. 23Pàãma lɛ bɛ́ yii wɔ̃ ǹ bǎã-n geren piɛ, á n yii saa lon á Abrahamu yɛ sɔsɔɔ, Lazaarɛ ná a genli. 24Á tɔ́n nə n lɛ dɛ á pɛ: «Abrahamu, masɛ din a díi, makara bɔ ma ganaa, n Lazaarɛ dia a wo n gòon nyin sã mu li a da da masɛ lɛwɔn la, màn mɛn bɛ́ toɛ, ma bɔlɔ yala basã. A giala, ma á nɔmaa-n tɛ kɛ nɛ á la yii ni.» 25Abrahamu pɛ nɛ: «Maa nɛ, n yiri gisĩ a nɛ, ń gɔn màn gigiã yɛ kanaa, Lazaarɛ sɛ na á goã á nɔmaa gole yɛ. Sisia Lazaarɛ dɔ na a yii-nyɛɛ ǹ bǎã nɛ, bɛ̀ n dɔ á fuu yii. 26Ka bɛ dɔ-n doo, nyankɔrɔ gole tá ka laanka wɔsɛn bii. Bɛa yɔrɔ lɛ la, min mɛnɛn bɛ́ giɛ li ǹ bɔ wɔsɛn li ǹ wo ka li, bɛn baran boo la wa, min dɔ baran boo la a bɔ ka dɔn li a da wɔsɛn li wa.»
27Pàãma lɛ mà Díi ganaa, mà asɛ na a nyankoe, a Lazaarɛ dia asɛ di kion. 28Mà asɛ dɔɔ̃n sooro tan. Mà a wo n gɔn waa ǹ nɛ, màn mɛn bɛ́ toɛ, ǹ dɔn baran da fuu yɛ ǹ bǎã kɛ-n wa. 29Abrahamu ná a lɛ si mà Lawa landa siin mɛnɛn kɔ Muizu la, ka a boon mɛnɛn dɔn kɔ a din a boo gii-dalin la ǹ nə́ pɛ, mà bɛn tá ǹ dɔɔ̃nɔn lɛn li, ǹ nə́ n gɔn wɛɛ ǹ nɛ. Mà ǹ nə n too kɔ bɛn lɛn lon. 30Pàãma lɛ mà Díi Abrahamu ganaa, mà bɛa sii lɛ a boe wa. Sɛnɛ, mà bɛ̀ min yii kaa á bɔ geren bii á woo ǹ li, mà bɛa waáraa mà ǹ tá re wusii ǹ sii baraan kio ǹ golee Lawa li. 31Sɛnɛ, Abrahamu mà Lawa landa siin mɛnɛn kɔ Muizu la, ka a boon mɛnɛn dɔn kɔ a din a boo gii-dalin la, mà bɛ̀ ǹ nə n too kɔ bɛn-a wa, mà ta min yii na á kaa á bɔ geren bii á woo boo da ǹ nɛ, mà ǹ ba re wɛɛ ǹ dɛnaa a boo la wa.
اکنون انتخاب شده:
Luk 16: SBPE2011
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
