Mi cilima 38
38
Juda leni Tamari
1Lanyogunu, Juda den foagidi leni o naataani, ki gedi Adulami dogu joa kani, ke o yi Hira. 2Lanwani, Juda den laa Kanana yua bisalo ke o yi Suwa ki taa o, ke o tua o pua. O den kua o kani. 3O den punbi ki mali bonjaga ki yini o Eri. 4O go den punbi ki mali bonjaga ki yini o Onani. 5O go den mali bonjaga ki yini o Sela. Juda den ye Siba dogu, o pua n den mali Sela yaa yogunu.
6Juda den taa o pua o bijakpelo Eri po, ke o yi Tamari. 7Juda bijakpelo Eri den bia o Diedo nintuali, ke o teni ke o kpe. 8Lanwani, Juda den yedi Onani: «Taa a kpelo pua nani wan tie a koabianu yeni, ki maa a kpelo po a bila.»
9Nani Onani n den bani ke laa bila kan tua o yaa yaaba yeni, o yaa den taani leni o pua yaa yogunu kuli, waa den juodi o niinni, ama o yen ñani ki wuli tiipo, kelima waa bua ki maa o kpelo po. 10Wan den tiendi yaala den biidi o Diedo pali, ke o teni ke omoko kpe. 11Lanwani, Juda den yedi o biyuaga Tamari, ŋan yaa ye a baadiegu nni, ki yaa tie kpepuoli hali n bijua Sela n yabidi. O den maadi yeni kelima o den jie ke Sela baa kpe nani o kpeliba n den kpe maama. Tamari den gedi ki kali o baadiegu nni.
12Li yaa puoli, lan den waagi, Juda pua Suwa bisalo den kpe. Juda n baa i baagi ki duani o yama yaa yogunu, o den gedi Timina dogu, yaaba n den moagidi o pe kobidi n den ye naankani, wani leni o danli Hira, Adulami yua. 13Bi den waani Tamari laa maama, ki yedi o: «Diidi, a calo baa caa Timina, ki baa n moagidi o pe kobidi.» 14Lanwani, o den landi o kpepuotiadi, ki taa o kpalibu ki libini. O den kali Enayim dogu buliñoabu kani, yaabu n ye Timina sanu po, kelima o den laa ke Sela yabidi ki tua joa, ke bi naa den tuo ke o tua o pua.
15Juda den laa o ki tama ke o tie puoconconli, kelima o den libini o nunga. 16O den nagini o u sanu nni ki yedi o: «Cedi min duani leni a.» Waa den bani ke o tie o biyuaga. O den yedi o: «A baa pa nni be ki taani leni nni?» 17O den yedi o: «N baa ñani n yangoli nni ŋuabiga ki soani a po.» O den yedi o: «Naani a baa pa nni siedi bonla, hali ŋan baa soani ki ŋuabiga?» 18O den guani ki yedi o: «N baa pa ŋa be yaa siedibonla?» O den yedi: «Pa nni a ñoagilakaama leni mi gaalu leni ŋan kubi yaa gbiamu a nuu nni.» O den puni o lani kuli. Lanwani, o den duani leni o ke o punbi o po. 19O pua den fii ki ban caa. O den libidi o kpalibu, ki go lani o kpepuotiadi.
20Juda den soani ki ŋuabiga ke o danli Adulami yua n teni o, ki nan gaa o siedibonla o pua yeni kani. Ama waa den laa oba. 21O den buali laa dogu niba: «Yaa puoconconli n den kaa Enayim u sanu nni yeni ye le?» Bi den guani ki yedi o: «Puoconconli naa ye ne ba yendo.» 22O den guani Juda kani, ki yedi o: «Mii laa o, ba likani yaaba yedi ke puoconconli ki ye bi dogu nni.» 23Juda den yedi: «Wan kubi wan pia yaala. Tin da teni ban fali ti. N den soani n ŋuabiga, ama ŋaa laa o.»
24Lan den bua ki pundi ŋmaalitaa yaa yogunu, bi den cua ki yedi Juda: «A biyuaga Tamari tieni mi conconma, o punbi kelima o conconma po.» Juda den yedi: «Teni mani ban ñani o ki juu o u mu nni, wan kpe.» 25Ban den ñani o yaa yogunu, o den yedi o calo baa: «Li tie yaa joa n die yaa bonla n tie ne, wani n punbi nni. N mia ŋa, diidi ki bandi yua n die mi ñoagilakaama, mi gaalu leni u gbiamu ne.» 26Juda den bandi la ki yedi: «O tiegi ki cie nni, kelima mii den puni o n bijua Sela.» Juda naa go den kua o kani.
27O madi yogunu n pundi, bi den sua ke li tie pola. 28O madi yogunu, yendo den ñani o nuu ke o madimaanlo den cuo ki loli i gaalimoani ki yedi: «O ne n kpa mali.» 29Ama o den guani ki kuani o nuu, ke o lielo kpa ñani, ke o madimaanlo yedi: «A ñani be yaa ñama n yeni?» O den yini o yeli Peretisi.#38.29 Peretisi: Laa yeli bua ki yedi mi padima, bi mi pudima. Diidi Ruti 4.12,18. 30Lani n pendi, o waalo den ñani ke o nuu den luo i gaalimoani. O den yini o Sera, yaali n bundi “mi yenpudima.”
انتخاب شده:
Mi cilima 38: BGP
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Gulmancema Protestant Bible © Bible Society of Burkina Faso, 2013.