Mi cilima 33
33
Jakob tuogi Esayu
1Jakob den yaadi ki diidi ki laa ke Esayu kpendi leni niba kobinaa. O den boagidi o bila kuli, Lea leni Raseli leni o puotualiediba. 2O den teni ke o puotuada leni bi bila n gaa liiga, Lea leni o yaa bila n ŋoadi bi puoli, Raseli mo n yuandi ki ŋoadi leni Josefi. 3Wani o ba den gaa bikuli liiga ki labini tinga po, hali taalimilele, ki nagini o kpelo kani. 4Esayu den sani ki tuogi o ki bibi o, ki gobini o. Bikuli den buudi. 5Esayu den yaadi ki laa bi puoba leni a bila ki yedi: «Ŋan pia yaa niba ne, bi tie ŋmenbe?» Jakob den guani ki yedi o: «Bi tie U Tienu n puni a naacemo yaa bila.»
6A puotuada den nagini bi kani bani leni bi bila, ki labini. 7Lea mo leni o yaa bila den nagini ki mo labini. Lani n pendi, Josefi leni Raseli mo den nagini ki labini. 8Esayu den yedi: «Min bi tuogi leni yaa yangola kuli yeni, bi tie be yaa po yo?» Jakob den guani ki yedi o: «Bi tie ke min baa ki nunmanga n daano kani.» 9Esayu den yedi: «N waalo, nmoko ye leni mi piacianma, ŋan kubi a yaa yaala.» 10Jakob go den guani ki yedi o: «Yeni ka, n mia ŋa n yaa baa ki nunmanga a kani, gaa n po n paabu, kelima li tie lani yaa po ke n diidi a nunga nani o nilo n baa diidi U Tienu nunga maama yeni, ke a gaa n cangu bonŋanla. 11Lanwani, ŋan gaa n po n paabu, min puni a yaabu kelima U Tienu den gbieni nni leni li ŋanbili, ke mii luo puu.» O den tigini o yene hali ke o gaa. 12Esayu den yedi: «Tin fii ki suagi liiga, n baa yaa ye a liiga.»
13Jakob den guani ki yedi o: «N daano, a bani ke a bila dingi ki daa pia fidu. N pia a peñuana leni a naañuana yaaba n ŋaandi bi bila. Ti yaa deli ba ke bi cuoni tontoni ba dayenli, li yangoli kuli baa bodi. 14N daano, gaa a naacemo liiga, mini, n baa yaa ŋua dindini nani li yangoli yaali n cuoni n liiga leni a bila n fidi maama, hali min pundi n daano deni Seyiiri dogu nni.»
15Esayu den yedi: «Ama n bua ki ŋaa n niba bi tianba leni a, ban ciani a.» Jakob den guani ki yedi o: «Be yaa po! Jo, ba min baa a nunmanga moko yeni dagidi.» 16Landaali Esayu den fii ki taa Seyiiri sanu, ki guani ki kuni. 17Jakob den fii ki gedi Sukoti. O den maa o yuli po li dieli lankani, ki go tii a suga o yangola po. Li tie lani yaa po yo ke bi yi laa kaanu Sukoti yaala n bundi a suga.
Jakob kali ki kuli Sikemi dogu
18Jakob n den ñani Padan-Arami ki guani, o den pundi Sikemi dogu Kanana diema nni leni laafia, ki kali u dogu nintuali. 19O den daa u kuanu wan den sieni o gbandieli naani. O den daa u Hamori yaaba bijaba kani, ki pani kujapiena kobiga. Hamori den tie Sikemi baa yo.#Jos 24.32; Jan 4.5. 20Jakob den maa li padibinbinli lankani, ki yini li El-Elohe-Isidayeli.#33.20 Lani n bua ki yedi: “U Tienu tie Isidayeli Tienu”.
انتخاب شده:
Mi cilima 33: BGP
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Gulmancema Protestant Bible © Bible Society of Burkina Faso, 2013.