Mi cilima 28
28
1Isaaka den yini Jakob, ki gaali o, ki teni o li naa ñoamabonli: «A kan taa pua Kanana yaaba bisiaba siiga. 2Fii ki gedi Padan-Arami, a naa baa Betueli denpo. Ŋan taa o pua a naa kpelo Laban bisiaba siiga. 3U Tienu yua n pia u paalu kuli n seligi a, ki teni ŋan yaa pugidi boncianla, ke ŋan tua i nibuoli boncianla. 4Wan pa ŋa Abalahama seli, fini leni a yaabila kuli, ke ŋan yaa die ŋan ye yaa diema nni moala, ki tie o caano wan den puni Abalahama yaama kuli.»#Cil 17.4-8.
5Isaaka den teni ke Jakob fii ki gedi Padan-Arami, ki pundi Laban kani. Laban den tie Arami yua, Betueli bijua, ki go tie Jakob leni Esayu naa Rebeka kpelo.
6Esayu den laa ke Isaaka gaali Jakob, ki soani o ke o gedi Padan-Arami ki baa n taa o pua. O den laa ke Isaaka den gaali o, ki teni o li ñoamabonli ki yedi o: «Ŋan da taa o pua Kanana yaaba bisiaba siiga.» 7O go den laa ke Jakob tuo o baa maama, ki fii ki gedi Padan-Arami. 8Esayu den bandi yeni ke Kanana yaaba bisiaba naa mangi o baa Isaaka pali. 9Lanwani, Esayu den gedi Isimayeli kani. Ba ke o den pia puotoaba, o go den taa Abalahama bijua Isimayeli bisalo Mahalati, yua n den tie Nebayoti waalo.
Jakob dangidi
10Jakob den fii Beri-Seba ki gedi Harani. 11O den pundi kaanyendu ki jiidi ki baa duani ku ñiagu, kelima u yienu den kua. O den taa li tanli ke li tua o po li yukunkuli, ki duani likani. 12O den dangi ti dangidi, ki laa ke u dendielu se, ke u yuli pundi hali tanpoli. O go den laa ke U Tienu malekinba do ki go ji u dendielu yeni po. #Jan 1.51. 13O go den laa o Diedo ke o se u yuli po, ki yedi: «N tie Li Miali Diedo a baa Abalahama Tienu leni Isaaka Tienu. Ŋan dua yaa tinga nni ne, n baa pa ŋa ka, fini leni a puoliŋuani.#Cil 13.14-15. 14A puoliŋuani baa tua nani ki tinga wagima. A baa tandi ki yadi nintuali leni puoli, nujienu leni nuganu po kuli. Ki tinga nibuoli kuli baa baa li seli kelima fini leni a puoliŋuani po.#Cil 12.3; 22.18. 15Diidi, n ye leni a, n baa yaa ŋua ŋa ŋan caa naani kuli, ki guani a mi naa diema nni, kelima n kan ŋaa ŋa ba waamu, hali min baa tieni a po min yedi a yaala kuli ki gbeni yaa yogunu.»
16Jakob den fundi o guama nni, ki yedi: «I moamoani, o Diedo ye ne ke mii bani.»
17Ti jawaandi den cuo o ke o yedi: «U naa kaanu pia ti jawaandi boncianla. Nekanba tie U Tienu diele, nekanba tie tanpoli buliñoaboe.» 18Jakob den fii ku tiŋaapanpangu ki taa wan den kuli yaa tanli nani li yukunkuli yeni, ki sieni ke li tua bontiadikaala. O den wuli mi kpama li yuli po. 19O den yini laa kaanu Beteli, lani n bua ki yedi: «U Tienu diegu.» Ama laa dogu den kpa yi Lusi. 20Jakob den niani ki yedi: «U Tienu yaa ye leni nni, ki kubi nni n sancenli nni, ki puni nni mi jiema leni yaa tiadi ke n baa yaa yie, 21ki teni ke n guani n baadiegu nni leni laafia, lanwani o Diedo baa yaa tie n Tienu. 22Min sieni yaa tanli ke li tua bontiadikaala yeni baa tua U Tienu diegu. N go baa pa ŋa diim ŋan puni nni yaala kuli siiga.»
انتخاب شده:
Mi cilima 28: BGP
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Gulmancema Protestant Bible © Bible Society of Burkina Faso, 2013.