Mi cilima 25
25
Abalahama kuuma. O puoliŋuani bontoaba
1 Abalahama go den taa o pua ke o yi Ketura. 2O den mali o po Simirani, Yokisani, Medani, Madiani, Yisibaki leni Suwa. 3Yokisani den mali Saba leni Dedani. Dedani yaa bila n tie Asuri, Letusima leni Leuma yaaba. 4Madiani yaa bila tie Efa, Eferi, Enoki, Abida leni Elida. Bikuli den tie Ketura yaabila.
5Abalahama den puni Isaaka o piama kuli. 6O den puni o puotuada bila moko bu paabu, ki cabi ba ke bi foagidi leni o bijua Isaaka, ke o da pia o miali. Bi den fii ki ban kali puoli po yaa diema. 7Abalahama den kpe ki pia kobiga n piilele n binamuu. O miali dana n yeni. 8Abalahama den podi ki gbadi o miali manu, o den guani o danba kani. 9O bijaba Isaaka leni Isimayeli den piini o Makipela tanlongu nni, Tisoari bijua Efiron Hititi yua kuanu nni, yuu n tiegi Manmire. 10Li den tie Abalahama n den daa yaa kuanu Hititi bijaba kani. Lankane ke bi den piini Abalahama leni o pua Sala.#Cil 23.3-16. 11Abalahama kuuma puoli, U Tienu den seligi o bijua Isaaka. O den kali Lahayi-Royi caali kani.
12Bine n tie Abalahama bijua Isimayeli yaabila. O den tie Ejipiti yua Agari, Sala yaa puotuado n den mali yua Abalahama po. 13Bine n tie Isimayeli bila yela, ki ŋoadi bi yela leni bi nifiima. O bijakpelo Nebayoti, 14Kedari, Adibeli, Mibisam, Misima, Duma, Masa, 15Hadadi, Tema, Yetuli, Nafisa leni Kedima. 16Bani n tie Isimayeli bijaba leni bi yela, yaaba n den kali leni bi naga leni bi dogi. Bi den pia piiga n badijabilie nani bi buoli n den da maama. 17Isimayeli miali dana kuli den tie kobiga n piitaa n binalele. O den kpe ki guani o danba kani. 18O bila den kali Hafila dogu, ki pundi hali Suri yuu n tiegi Ejipiti, a yaa cuoni ki cuubi Asiiri diema po. O den kaa yeni o kpiiba kuli nintuali.
Esayu leni Jakob
19Bine n tie Abalahama bijua Isaaka bila. 20Abalahama den mali Isaaka. Isaaka den pia bina piinaa wan den taa o pua Rebeka Betueli bisalo yaa yogunu. O den tie Arami buolu, ki kaa Padan-Arami dogu nni. 21Isaaka den jaandi o Diedo o pua po, kelima o den tie ŋoaliga. O Diedo den gbadi o miabu ke o pua Rebeka den punbi. 22A bila den bobini biyaba o tugu nni ke o yedi: «Be baa nni da?» O den gedi ki mia o Diedo.
23O Diedo den yedi o:
«Nibuolilie n ye a tugu nni.
Nibuolilie n baa ña a tugu nni, ki paadi leni biyaba.
Bi siiga nni nibuoyendu baa yaa pia u paalu ki cie uyuu,
O kpelo baa tua o waalo naacemo.»#Lom 9.12.
24O maadaali n den pundi, bilalie n den ye o tugu nni. 25Ki bikpiaga den ñani ki moani, ke ti kobidi den tie o po nani bu kpalibu ki pini o. Bi den yini o Esayu.#25.25 Esayu bundima tie o kobidaano. 26Li yaa puoli, o waalo den ñani ke o nuu muubi Esayu taajentindili. Bi den cili omo yaa yeli Jakob.#25.26 Jakob bundima tie yua n gaa o lielo kaanu. Isaaka den pia bina piiluoba ban den mali ba yaa yogunu.
27Laa bilieda den fandi. Esayu den tua tuado, ki fidi ki toa hali bonŋanla, ki tie yua n ye ku muagu nni yogunu kuli. Ama Jakob den tie yaa nilo n dingi, ki kaa a gbandiena nni. 28Isaaka den bua Esayu kelima o den faadi ti moanandi, ama Rebeka den bua Jakob yo ki cie.
29Dayenli Esayu den ñani ku muagu nni, ki kpeni ki coagi hali boncianla. O den sua ke Jakob ŋaani a tuuna. 30Esayu den yedi Jakob: «N mia ŋa, cedi min ŋmani ku tumoangu na, kelima n coagi.» Lani n teni ke bi yini Esayu Edomi.#25.30 Edomi bundima tie o nimoano.
31Jakob den yedi o: «Kuadi n po a nikpedi dinla.»
32Esayu den guani ki yedi: «Diidi, mi koma baa kpa nni, n nikpedi baa fuoni nni be?»
33Ama Jakob den yedi: «Se ŋan poli.» O den poli ki kuadi o nikpedi Jakob po.#Heb 12.16. 34Lanwani, Jakob den puni Esayu dupen leni a tuuna. O den ŋmani, ki ñuni ki fii ki ban caa. Li den tieni yene ke Esayu den fali o nikpedi.
انتخاب شده:
Mi cilima 25: BGP
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Gulmancema Protestant Bible © Bible Society of Burkina Faso, 2013.