Mi cilima 17
17
Abalama yeli lebidi ki tua Abalahama
1 Abalama n den pia piiyia n binayia yaa yogunu, o Diedo den doagidi o kani ki yedi o: «N tie U Tienu U Paaciamu Daano. Ŋan yaa cuoni n nintuali leni li papienli. 2N baa bili u ñoanianu mini leni fini siiga. N baa pa ŋa ti madi hali boncianla.» 3Abalama den gbaani ki pugi. U Tienu den maadi leni o ki yedi: 4«Diidi min niani a yaala: A baa tua i nibuoli boncianla baa. 5Bi kan go yini a Abalama moala, dinla liiga a yeli baa yaa tie Abalahama, kelima n baa teni ŋan tua i nibuoli boncianla baa.#Lom 4.17. 6N baa teni a puoliŋuani n yabidi ki tua nibuoli boncianla. A baa maa ba bi badiba moko. 7N baa kuani o ŋantaado mini leni fini siiga leni a puoliŋuani siiga, nifiima kuli nni. Li baa yaa tie yaa ŋantaado n kan gbeni. Laa ŋantaado yaa niinni, n baa yaa tie a Tienu leni a puoliŋuani yaa Tienu.#Luk 1.55. 8N baa pa fini leni a puoliŋuani kuli, ŋan ye yaa diema nni moala ki tie caano, Kanana diema kuli yeni ke man yaa tie bi yaa diema yaa yogunu kuli po. N baa yaa tie bi Tienu.»#JTT 7.5.
9U Tienu den yedi Abalahama: «Fini, a baa yaa kubi n ŋantaado. A yaa puoli mo, a puoliŋuani leni bi yaabila kuli baa yaa kubi n ŋantaado. 10Diidi yin baa yaa kubi n ñoanianu maama nne: fini leni a puoliŋuani siiga, bonjaga kuli baa kua ku koanciagu.#JTT 7.8; Lom 4.11. 11Yi baa kua ku koanciagu ke li baa yaa tie o ŋantaado maalima mini leni yinba siiga. 12Yi siiga nni bonjaga kuli yaa pundi dananii, yin kuani o ku koanciagu nani yi nifiima n baa yaa tie maama. Lan tie ban mali yaa yonbi yi siiga, bi yin daa yaaba bi nilanba kani ke baa tie yi puoliŋuani. 13Ba o yonbo, ban mali yua a diegu nni leni ŋan daa yua leni a ligi kuli baa kua ku koanciagu. Lani, n baa yaa tie n ŋantaado maalima yi gbanandi nni, hali yaa yogunu n kan gbeni. 14Yaa bonjaga n tie jifolo ki naa kua koanciagu o gbanandi nni, bi baa bolini o ki ñani o o niba siiga, kelima o fidi n ŋantaado.»
15U Tienu go den yedi Abalahama: «Ŋan da go yini a pua Sarayi. 16Dinla liiga, o ji baa yaa yi Sala. N baa seligi o, ki teni wan maa a po bonjaga. N baa seligi o hali yaala ke o baa maa i nibuoli, o puoliŋuani siiga bi badiba moko baa yaa ye.»
17Abalahama den gbaani ki pugi, ki laa ki yedi o pali nni: «Yaa joa n pia bina kobiga go baa fidi ki maa? Sala wani n nan pia bina piiyia yeni, o go baa fidi ki maa?» 18Abalahama den yedi U Tienu: «Min mia ŋa yaala tie ke Isimayeli n yaa ye leni li miali fini o Diedo nintuali.» U Tienu go den yedi o:
19«Mini ka yedi a te, a pua Sala baa maa a po bonjaga. A baa yini o Isaaka, n baa danli leni o. Lani n tie yaa ñoanianu n kan gbeni, ki baa yaa ye leni o puoliŋuani. 20Isimayeli po, n gbadi a miabu. Diidi, n baa seligi o ki teni wan maa boncianla. N baa seligi o, ki pa o ti madi hali bonŋanla. O baa maa piiga n badijabilie, n baa teni wan tua yaa nibuolu n yabi. 21Ama n baa danli leni Isaaka yo, Sala n baa maa a po yua yaa binli n kpendi u naa yogunu po.»
22Wan den maadi yeni ki gbeni, U Tienu den fii Abalahama kani ki doni tanpoli. 23Abalahama den taa o bijua Isimayeli, yaa yonbi n den mali o diegu nni, wan den daa yaaba kuli leni o ligi leni yaa bonjala n ye o diegu nni kuli, ki kuani ba ku koanciagu landaali, nani U Tienu n den bili o po li ñoamabonli maama. 24Abalahama den pia piiyia n binayia, wan den kua ku koanciagu yaa yogunu. 25O bijua Isimayeli den kua ku koanciagu ki pia piiga n binataa. 26Landaale ke Abalahama leni o bijua kuli den taani ki kua ku koanciagu. 27Yaa niba n den ye o diegu nni kuli, yaaba n den mali o diegu nni leni ban den daa yaaba leni i ligi bi nilanba kani, bikuli den taani leni o, ki kua ku koanciagu.
انتخاب شده:
Mi cilima 17: BGP
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Gulmancema Protestant Bible © Bible Society of Burkina Faso, 2013.